الإعجاب الفوري
اول مره ابعت سوءال لصفحة زي كدة بس انا مشكلتي باختصار اني اي واحدة تتكلم معايا او تعمل شويه اهتمام بيا باعجب بيها علي طول
مش عارف انا غلطان ولا صح بس الموضوع ده بقاله سنين معايا
انا عندي 27 سنة ومش متجوز وشغال في محل موبايلات
أهلا بيك يا معلم , وسعداء انك أول مشارك معانا في القسم العاطفي
احنا معرفناش عنك بعض البيانات التانية المهمة , زي مستوي التعليم , ليك اصدقاء ولا لأ , حالتك المادية , هل خاطب او لأ ,لان كل النقط ديه بتفرق شوية , بس مش مشكلة , هقيم الموضوع بشكل عام
شوف يا سيدي . .
فيه فيلم جميل فلسفي عميق لجيم كاري , اسمه "بريق أبدي لعقل نقي" وفي أول خمس دقايق في الفيلم , جيم كاري كان بيقول نفس اللي انت بتقوله بالظبط . .
"لم دائما أصاب الإعجاب لأي أنثي , تبدي لي الحد الأدني من الاهتمام"
و كانت مفاتيح شخصية جيم كاري في الفيلم انه خجول , انطوائي , مقتنع انه دميم و ممل و سخيف , يفتقد الثقة بنفسه , حاد شوية , ملوش اصدقاء ولا صديقات , مش متجوز , مش بيخرج , من الشغل للبيت و من البيت للشغل
ممكن أفرض إن شخصيتك متشابهة معاه في بعض النقاط , طبعا مستحيل أقيم شخصيتك من رسالتك , لكن خليني اقول ان انت انطوائي إلي حد ما , ثقتك بنفسك ضعيفة شوية , اصدقائك قليلين , ومش خاطب , او قد تكون خطبت بس الموضوع مكملش
إعجاب كل نوع بالنوع الآخر , من الاشياء المزروعة في الجانب الإنساني , وهو أمر لا نقاش فيه و ليس لنا يد في التحكم به , و يزيد هذا الإعجاب , حينما يظهر أحد الطرفين إهتماما بالآخر . .
و يمكن ده السبب الرئيسي في تحريم الاختلاط غير الضروري بين الذكور و الإناث , و إذا تم لشئ مهم , فيكون بأطر معينة , وده لمنع تحرك القلوب . .
و تحرك القلوب , و تكوين الإعجاب المتبادل بين الذكور و الإناث هيسبب فوضي عارمة في المجتمع , إذا لم يتم التحكم فيه بالصمام الطبيعي و هو الزواج . .
وإنشاء إعجاب متبادل بين رجل متزوج و ست تانية ,او ست متزوجة و رجل تاني , هو أول خطوة لهدم البيت و تسويته بالأرض , والجري في المحاكم بين الزوجين , و بداية عهد "يتم" الأطفال بينهم . .
ديه كانت مقدمة لابد منها عشان اشرحلك ايه اللي بيتم في النفس البشرية من نقطة إعجاب الولد بالبنت او البنت بالولد . .
------------------------------------------------------
والسبب الرئيسي اللي بيجعلك تعجب باي بنت تبدي قدر من الاهتمام بيك , ان انت لسة موصلتش لمرحلة من النضج العاطفي , واللي منه تقدر تميز التعامل الطبيعي مع الانثي , من الاعجاب المتبادل اللي ممكن يتم ترجمته لخطوبة و زواج . .
و عدم التمييز بينهم خطير جدا , لانه ممكن يجعلك تندفع لخطوة خطوبة من بنت , انت معجب بيها علي أساس هش , و بعد الزواج تفاجئ بكمية من الاختلافات البينية الضخمة اللي بينكم . .
خاصة إذا ما كانت البنت هي كمان خجولة , و قليلة التعامل مع الشباب , وبالتالي هتبادلك الاعجاب الفوري , و هتوافق غالبا علي فكرة الخطوبة و الزواج . .
و مش قصدي بكلامي ان الولد او البنت يختلط عشان يقدر يميز بين ده و ده , لان الاختلاط غير الضروري محرم تماما , لكن أقصد يكون عندك (وعندها ) الوعي الكافي , اللي يقدر يخليك تميز بين الاعجاب اللحظي , وبين التفاهم القائم علي مساحات مشتركة كافية يتبني عليها البيت . .
و لحل الموضوع ده , محتاج تمشي في كذا خط بالتوازي . .
------------------------------------------------------------
أولا لازم تحل مشكلة الانطوائية (لو كانت موجودة بالفعل ) , و ان يكون ليك عدد من الاصدقاء (الشباب) اللي بيهم تقدر توسع مدارك تفكيرك , و طرق تعاملك مع الناس , وتزود الوعي الاجتماعي عندك . .
كمان لازم يكون ليك أنشطة تمارسها وتلتزم بيها , بتلعب كورة , بتروح المكتبة , كورسات انجليزي , دورات كمبيوتر , اي حاجة من الحاجات الاجتماعية اللي بتزود دائرتك الاجتماعية
نوصل لنقطة الثقة بالنفس , واللي صعب نتكلم عنها في سطور معدودة , لكن يكفي إنك تكتشف في نفسك مواطن قوتك , ومميزاتك , وتنميها بشكل كافي , و تمارسها لو تقدر , عشان تحقق فيها نجاح حتي لو متوسط
زيادة معدل ثقتك بنفسك , هيصنع عندك نوع من التشبع لما يسمي "تحقيق الذات" و بالتالي تقييمك هيكون أكتر حكمة في التعامل مع الناس . .
لأن من الأسباب المهمة اللي بتجعل الشاب "يتدلق" مع اي بنت تعجب بيه ,ان هو من جوة عنده فقدان كبير في ثقته بنفسه , ومش مصدق ان معقول بنت هتعجب بيا انا ؟ معقول انا هلفت انتباه اي بنت , خاصة لو كانت جميلة او مشهورة او ناجحة او متوفقة . .
كأن الموضوع هو حيلة نفسية , لتعويض نقص الثقة بالنفس اللي عندك
ولو انت زودت معدل ثقتك بنفسك شوية بشوية , هتلاقي ان احتياجك لملئ هذا الفراغ النفسي عندك قل شوية , وبالتالي تقييمك للاعجاب بالبنت هيكون اكتر اتزان و اكتر حكمة
الحاجة الأخيرة انك حاول تقضي علي اي اسباب بتصنع عندك توتر في حياتك , ديون , بحث عن عمل , مشاكل مع الاسرة . . . , يعني حتي لو المشاكل موجودة , تعامل معاها ببساطة من غير ما تحمل علي أعصابك , لان وجد التوتر بيصنع عندك اضطراب في تقييم المواقف المتشابهة