تبعات التعدد
الرسالة السابقة
العنوان : تبعات التعدد
القسم: #الاجتماعي
الرقم: 70
السؤال:
انا عندي تجربه زواج فشلت ومعايا ولدين و منفصله من حوالي سنه وكنت رافضه فكرة الزوج تاني
وفي شخص عرفته من عالنت من فترة كبيرة كانت الاول صداقه فقط ولكن كان في عريس جاي يتقدم وانا قولته اشوف ايه رايه
ومحصلش نصيب المهم بعدها بفتره اتكلمت مع الشخص بتاع النت اكتر وطلب يشوفني وحصل فعلا وبعدها بفتره جه عندنا البيت واتقدم بشكل رسمي هو اكبر مني بـ 11 سنة ومتزوج وعنده طفلين هو من محافظه تانيه
هو قالي مش هيقول لمراته الاولي حاليا بس هيقولها قدام . بس طبعا الجواز هيكون رسمي مش عرفي
كمان هو طلب نعيش مع مامته فشقتها فنفس المحافظه عشان نكون معاه وانا بصراحه حبيته بس هنا في البيت معترضين عليه وخصوصا اني عرفته من علي النت
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي . .
فكرة التعدد مش مرفوضة كمبدأ , خاصة في ظروف متداخلة زي اللي عندك او عنده , فهي كفكرة ممكن تكون كويسة او وحشة . .
بس المشكلة مش في التعدد , لكن في تطبيقه بشكل سليم , وفي التأكد ان كلا منكم (الزوج و الزوجة) هتمشو علي الخطوات السليمة لإقامة زواج صحيح , وان كلا منكم هيقوم بدوره بشكل صحيح , وهيتحمل التبعات المتعلقة بالتعدد .
و لما بقول "تبعات" مش قصدي اخوفك من التعدد , لكن باعمل توضيح بسيط , ان التعدد زي اي حاجة في الدنيا , ليه مميزات و ليه عيوب , او تبعات , او مسؤوليات , او ايا كان . . .
كمثال بسيط , لما نقول ان فلان جاتله فرصة الهجرة لأوروبا , فالفكرة كويسة و ليها مميزات , بس كمان ليها تبعات و عيوب و عدد من المصاعب . .
زي مثلا : مش هيشوف اسرته الا قليل , هيتعب في الاندماج مع شعب مختلف , مش هيلاقي اكل حلال بسهولة , وهكذا . .
فلما بنقول ان الهجرة ليها عدد من العيوب , مش معني كدة ان الهجرة وحشة , او ان هي فكرة غلط , لأ هي شئ كويس , بس فيه عدد من التبعات اللي لازم ناخد بالنا منها . .
و الشخص الذكي هو اللي بيقدر يتعامل بشكل ماهر مع التبعات ديه , وبالتالي يتلافي اي عيوب في الحاجة اللي هيعملها .
-------------------------------------------------------------------------------------
فهنعمل سرد هنا لعدد من الخطوات اللي ممكن تمشي عليها , واللي هتفيدك في تجنب تبعات التعدد , خاصة مع وجود أطفال . .
- أولا لازم تتأكدي انك بالفعل بتحبيه . .
- لازم تتأكدي ان هو كمان بيحبك , لو انتي بتحبيه بشدة بس هو حبه ليكي بسيط , فهنا هتظهر مشكلة هتتفاقم قدام , لازم تعرفي انه بالفعل بيحبك , ومستعد للتضحية عشانك , وانه مش هيرميكي مع اول محطة تحصل فيها مشكلة . .
- كون إنك عرفتيه من علي النت , مش مشكلة في ذاتها , السؤال متعلق باخلاقه الشخص و قيمه و دينه . .
- انك تعيشي مع أمه , ديه نقطة مهمة . .
- اعتراض أهلك في البيت حطيه في بالك , ايوة هما ميقدروش يجبروكي انك تتجوزي حد مش عايزاه , بس احيانا بيكون عندهم وجهة نظر مهمة , خاصة لو كانو حريصين عليكي مش عن تعنت او كراهية ليكي .
-
لازم تحسمي موضوع الحضانة قبل ما تتخذي قرار بالزواج , لازم تستشيري محامي و تعرفي منه طليقك ممكن يعمل ايه , ولازم طليقك يعرف قبل ما توافقي انتي علي الزواج , عشان لو عنده من دلوقتي نية انه يسحب الاولاد منك ,تبقي انتي عارفة و تتخذي قرار علي الاساس ده , مش تفاجئي بشئ بعد الجواز
- موضوع ان زوجته الأول متعرفش , هي نقطة سلبية و مش مريحة . .
-
لازم يكون واضح معاه تعامله مع اولادك عامل ازاي , سواء من ناحية التحكم او المصاريف , و تكونو متفقين علي التفاصيل , عشان متظهرش خلافات بعد الزواج , ديه بالفعل نقطة مهمة
-----------------------------------------------------------------------------------
لو انتي قدرتي تحسمي النقاط ديه قبل الجواز , وقتها هتلاقي نفسك مستريحة لقرار الزواج ,او قرار الرفض , مستريحة بناء علي معلومات واضحة , مش مجرد انطباعات .
ارجوكي امسكي النقط التمانية ديه , وابذلي جهد ووقت في الاجابة عنها معاه , للوصول للإجابة السليمة , اللي علي اساسها تقولي ايوة او لا
بالتوفيق يا رب