العنوان : إنتي مجنونة !!

القسم: #النفسي

الرقم: 92

السؤال:

 

هو انا ممكن ابقي مريضة فعلا وانا مش عارفه ولا دا هزار تقيل منهم  ؟

 

لان كلمة انتي مريضه نفسيه بهزار وبجد بتتقالي كتير من امي او اخويا او اختي

 

يعني مثلا ممكن لو شديت مع حد فيهم  وبدخل اوضتي اعيط كتير وبعدين بهدي خالص بعدها بنسي ايه اللي حصل اصلا

 

انا بقيت بنسي كتير  او ممكن اتعصب اوي وانا بكلم اختي ف تروح قايلالي لا دا انتي مريضه نفسيه

 

انا ساعات كتير بفضل ف اوضتي وممكن اتدايق من حاجات تافهه بس دا لاني كنت بفكر كتير ف مشاكل هما ميعرفوش عنها حاجه  هما كلهم فكرين انهم مصاحبني   بس فعلا هما ميعرفوش عني حاجه

 

الاول كلمه انتي نفسيه دي مكنتش بتفرق معايا  بس انا معرفش بتتقالي كتير ليه كدا  جايز علشان كدا هما بيقولولي انتي مريضه  علشان مش فاهمني

 

الكلمه دي مدايقاني جدا  و المشكله اني بقيت حساسه واي كلمه بتخليني ادخل اوضتي اعيط

 

ومن كتر المشاكل ووجع الدماغ حتي مبقاش عندي طاقه للدراسه  اللي هي اكتر حاجه بحبها

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

اهلا بيكي .

 

اولا لازم تتعرفي علي الفارق بين حاجتين , الناس غالبا بتتلغبط ما بينهم . .

 

أولا  : الاضطراب النفسي   , ثانيا  : المشكلة النفسية

 

الاضطراب النفسي , اللي هو نفسه المرض النفسي , بيكون سلوك غير طبيعي من الإنسان نتيجة اسباب كتيرة لا مجال لذكرها , زي الوسواس القهري , او الفصام , او السادية او غيرها .

 

و زي ما قلنا , بيكون سلوك غير طبيعي , وغالبا بيكون فيه ايذاء للنفس او للآخرين , وفي أغلب الأحيان المريض النفسي مش بيكون مدرك او معترف انه مريض نفسي , وأحيانا بيتم علاجه رغما عنه حتي لو مش موافق .

 

لكن المشكلة النفسية , أمر ابسط و أسهل من كدة  , ببساطة ان حد عنده شوية توتر , او خجل , او بخل او عصبية , او خوف بكمية معقولة . .

 

اللي هو بنتكلم في سلوك طبيعي , لكن بكمية قد تكون زيادة شوية , وبطريقة  مش بتأثر بشكل كبير في منحي الحياة , وغالبا مش بيكون فيه اثر سلبي كبير علي الاخرين . .

 

وان كان 90 % من سكان العالم بيمرو – في وقت ما – بعدد من المشاكل النفسية, فنسبة اقل بكتير هما اللي نقدر نقول ان عندهم مرض نفسي او اضطراب نفسي محتاج علاج . .

 

و اللي عندك – نتيجة عدد من الضغوط – هي مشكلة مش مرض , وده معناه انك مش محتاجة علاج ولا دوا ولا تشخيص  , انتي بس محتاجة تعملي نوع من التعديل في طريقة تعاملك مع الحياة و مع الناس , و يكون فيه اسلوب مختلف في التعاطي معاهم

 

ولازم أشير للأسلوب الجاهل اللي اسرتك بيتبعوه معاكي , بالفعل لا يوصف إلا بالجهل المطبق , لأن الشخص سواء عنده مشكلة نفسية بسيطة , او اضطراب نفسي عميق , فمن الغباء اننا نقوله انت مريض نفسي  , او انتي مجنونة , لأننا كدة بنعمل تعميق للأزمة , وبنزرع جواه يقين ان هو مجنون  , و بنشعل جنونه . .

 

اللي هما بيعملوه معاكي اسمه حماقة , و متسمحيلهومش انهم يستمرو فيه  . .

 

-------------------------------------------------------------------------------

 

طب والحل ؟

 

هنا عدد من النقاط لو مشيتي عليها هتعمل حل للمشكلة الي حد كبير . .

 

 

• أولا متفتحيش معاهم كل الكلام , مش اي حاجة تقوليلهم عليها , لأن الشخص اللي بتعامل بحماقة مع حد عنده ازمة معينة , هو لا يؤتمن عليه في اي كلام يتقاله . .

 

 

• توقفي عن العصبية , لأن هي مفتاح الأزمة من الأساس ,  طالما عندك عبية مستمرة هيستمر مسلسل المشاكل ومش هيتوقف , ابدئي في علاج عصبيتك و التعامل بهدوء , وياريت تقرأي الرسالة اللي كنا اتكلمنا فيه بالتفصيل واللي بعنوان  : كابوس العصبية 

 

 

 

• لما تقابلك مشكلة حليها مش تعيطي , يعني امسكي ورقة و قلم , واكتب عناصر المشكلة و طرق حلها , لكن انك تقفلي باب الاوضة و تبكي طول الليل , ده مش هيحل اي مشكلة , وبالتوازي هيدمر استقرارك النفسي و جهازك العصبي

 

 

• متتعامليش مع المشكلة علي اكبر من حجمها , يعني متحطيش مقدار كبير من الازمة في حين الامر نفسه بسيط , اللي هو زي ما بنقول : متكبريش الموضوع , احيانا بيكون فيه حاجات بسيطة ممكن تعدي , وبيكون من الغلط اننا نتناولها باسلوب اكبر من حجمها

 

 

• مراعاة هما بيشوفو ايه منك , يعني لازم تاخدي بالك هما ايه اللي بيشوفوه منك , لأن ده اللي بيصنع عندهم تقييم ليكي  , فحاولي تعملي نوع من ضبط السلوكيات اوالتعامل قدامهم , عشان مياخدوش عنك تصور سلبي محدد