العنوان : أخي المجرم

القسم: #الاجتماعي

الرقم: 10

السؤال:

 

انا عندي ٢٢سنه

 

اخويا الاوسط بيعملي مشكله من اتفه الاسباب ولما ارد عشان افهموا بنسبالوا ببقي قليلة ادب وكلام كتير كده وبيوصل معاه انوا يضربني

 

والموضوع ده تعبني نفسيه وماثر علي صحتي

 

يعني من كام شهر جيت من الكلية الساعة 8 اخويا سالني جيتي متاخرة ليه قلتله مش متاخرة انا خلصت الكلية الساعة 6 ونص فاتضايقت شوية من كلامه خاصه انه كان قدام ابن عمي

 

فكلمت اخويا الكبير و قلتله علي اللي حصل فهو اتصل باخويا الاوسط و قاله صالحها

 

فاخويا الاوسط اتجنن وقالي انتي ازاي تقولي المشكلة لحد غريب قلتله مش غريب ده اخوك قالي لا و زعق فيها و بهدلني جامد  ومنعني من النزول خالص وقالي مفيش خروج قلتله طب و الشغل و الدراسة قالي مفيش لا ده ولا ده

 

كلمت اخويا الكبير تاني قالي تعالي عندي اتغدي معايا رحتله فعلا اتغديت معاه و قعدت اليوم كله هناك

 

لما رجعت لقيت ماما في البلكونة بتقولي متطلعيش عشان اخوكي ناوي علي الشر اضطريت اطلع لقيت اخويا رماني علي الارض و ضربني بشكل رهيب بالسلك و الحزام

 

 جريت علي الشارع من غير طرحة ولا حجاب نزل شدني و طلعني و هددني انه يموتني واخويا الكبير لحقني ووشي جايب دم وراسي وارمة

 

حتي لما رحت المستشفي ماما اصرت اني اقول اني وقعت من السلم عشان مأذيش اخويا الاوسط  وفعلا مقلتش عليه حاجة

 

ده موقف من المواقف اللي بعاني منها دايما واللي لازم اخويا يمشي كلمته علي الكل

 

وابويا مش مهتم خالص يعني ممكن يزعق فيه و خلاص

 

انا اختصرت كل المواقف عشان الاحداث كتير لو قعدت اسبوع بحكي مش هخلص

 

ايه الحل

 

 *-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

هي مشكلة دموية , يقودها انسان مصاب باضطراب نفسي , يجمع بين السادية , و التحكم , و الارتياب المبالغ فيه , والانتقام الاعمي . .

 

و السكوت عليه هي مأساة , هتدفعي تمنها انتي و اي شخص اضعف منه يقف في طريقه. .

 

ولو احنا كنا شفنا مشاكل من النوع ده , واللي بيقوم ولي الأمر علي البنت (أب , زوج , أخ ) بنوع من التشديد عليها , فنادرا لما بنلاقي النوع ده من الوحشية و القسوة , واللي قام فيها تهديد بالقتل , وأصابك بالفعل عدة اصابات مش سهلة , وده لسبب اقل ما يقال عنه انه تافه , انك كنتي عند اخوكي . .

 

ولاننا بنفرض دايما المصداقية الكاملة لمرسل الرسالة  ,لاستحالة التيقن من تفاصيلها , فاجابتها هتكون معتمدة عليها . .

 

من الواضح ان اخوكي نشأ في بيئة قاسية , دموية  , معتمدة علي التفوق الجسدي و اللي بيستخدم لحسم اي صراع او اختلاف , وان شريعة الغابة فقط هي ما تطبق في المكان اللي نشأ فيه . .

 

و بدافع السيطرة و التحكم فقط  , وليس النخوة او الغيرة , اخوكي بيمارس عليكي سلطاته العليا , وباستخدام ايده و رجله و صوته و عضلاته , دون اي مراعاة للدين او الخلق او حتي الانسانية . .

 

وما بين اب مش شايف الموضوع كبير , وأم متألمة بس مش بايديها حاجة , النيران تزداد اشتعال , ودمك هيستمر في النزيف . .

 

ومن الواضح ان بقاء الوضع علي ما هو عليه هي فكرة غير صحيحة , لأن اللي يضربك دلوقتي بايديه , ويجرك من شعرك في الشارع , هييجي قدام و يخلع ضوافرك , ويكسر عضمك , وبرضه أمك المسكينة هتقولك انك تقولي انك وقعتي من علي السلم . .

 

و بعدين لما نقرأ خبر ان أخ يقتل أخته في لحظة غضب , مش هنندهش  ,لاننا شفنا المقدمات بعينينا , وسكتنا عليها . .

 

سكوتك و صبرك علي الوضع ده هو جريمة  , ان مكانش عشانك انتي يبقي عشان اي ضحية هيقف في طريقه , وبالتالي هنلاقي ان فيه حد دخل المستشفي , وحد تاني دخل السجن  . .

 

يعني مقاومتك للي بيحصل هو انقاذ ليه هو , من استمراره في هذا الوضع الجنوني , واللي مش هيتوقف . .

 

---------------------------------------------------------------------------

 

هحاول اسرد عدد من الخطوات الواجب التفكير فيها بعمق , وتحديد آلية تنفيذها بشكل مناسب , وارجوكي تفكري فيها بشكل جاد ولا تكاسل

 

 

• أولا – و هي خطوة قد تبدو غريبة – ابدئي بعمل تقييم موضوعي ليكي , يعني شوفي لو ان فيه بعض اللي بيقولو كلام سليم , حاول تغيريه في نفسك

 

 

 

• لازم تشوفي كبير في العيلة , انا مندهش ان الوالد ليه رد الفعل الغريب ده  ,فعلا سبحان الله , ابنه بيسحب بنته من شعرها قدام الناس  , ويفتح راسها , فهو بيكتفي انه يزعقله , وكدة عيب يا واد . .

• مع اول اعتداء تاني عليكي , من ناحية مترديش الضرب بضرب , لانك مش هتقدري تتغلبي عليه جسديا , ومش هتعرفي توقفيه عن الجنون  ,لكن حاولي تحتمي بغرفتك لو كانت قوية , بحيث ميدخلهاش , او تخرجي برة البيت فورا وتروحي جري لاخوكي التاني

 

 

 

• لو استمر الوضع فلازم تكسري كلام امك و تبلغي البوليس فورا , و تشرحي كل اللي بيحصل من غير ما تخبي شئ