العنوان : إدمان الإنترنت

القسم: #النفسي

الرقم: 63

السؤال:

 

 

الحمد لله انا من البنات المتفوقين فى الدراسه بس بقالى فتره عندى كسل رهيب من ناحيه المذاكره برجع من الجامعه وبفضل قاعده على النت لحد ما انام مبذاكرش غير لما يكون عليا امتحان او هسلم شيت

 

مع العلم ان اغلب وقتي بيروح علي الموبايل بقيت فعلا بامسكه كتير جدا

 

 وكمان مش عارفه ليه لما الدكتور يسأل عن حاجه فى الماده واجى اجاوب  الاقي عدد كبير جدا من الموجودين فى المحاضره بيبص عليا وفى منهم بيضحكو مع إنى بجاوب صح

 

فى حاجه كمان احنا عندنا دكتور الاقتصاد شرحه وحش جدا ومعظم اللى معانا فى تجاره خارجين من ثانويه عامه وانا خارجه  من تجاره لما الدكتور عمل امتحان اول امبارح  كان فى ناس كتير جدا مش عارفين اى حاجه فا انا ساعدتهم مش عارفه ده غلط ولا انا بس حبيت اساعدهم علشان من وجهه نظرى إن هم مش واخدين حقهم فى الشرح كويس

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

اهلا بيكي . .

 

واضح ان فيه تأثير مباشر للتعلق بالموبايل , وان هو السبب الرئيسي للي انتي بتعاني منه . .

 

وان تعاملك مع مواقع التواصل الاجتماعي , زادت كتير عن الحد الطبيعي , وهو الأمر الي صنع عندك مشكلة ملموسة , وبتأثر سلبا علي دراستك , وممكن تأثر كمان علي حياتك الاجتماعية الطبيعية , بل و عباداتك .

 

مع انتشار الانترنت في آواخر التسعينات , بدأ علماء النفس و علماء الاجتماع يلاحظو بعض الممارسات و السلوكيات الغير سوية في التعامل معاه .

 

و انا هنا مش باتكلم عن اشياء احنا كمسلمين و كعرب بنعتبرها حرام (زي مشاهدة الاشياء الغير لائقة) , لان اصلا علماء النفس الغربيين معندوهمش تحفظ في النقطة ديه .

 

لكن كلامهم كام علي الاستخدام الغير متوازن مع الانترنت , خاصة انه بالفعل "بحر لن ينتهي" .

 

يعني مع الزيادة الغير معقولة في عدد المواقع , و الزيادة المهولة في محتويات كل موقع , فمتصفح الانترنت يجد فعلا فيه كميات من المعلومات و الصور و الفيديوهات , مش هيقدر يخلصها ولو قعد عمره كله علي الشبكة . .

 

بل ان بعض العلماء قالو من عشر سنين ان لو شخص قعد علي الانترنت 24 ساعة , 7 ايام في الاسبوع , عشان يحاول يخلص كل شئ فيه , هيحتاج فوق الـ 200 سنة .

 

و الكلام ده من عشر سنين , يعني قبل ما يتضاعف المحتوي أضعاف عديدة . .

 

فعلماء النفس و الاجتماع بدأو يتخوفو من تأثيرات سلبية عديدة , هتصيب اللي مش قادر يتحكم في وقته في تصفح الشبكة العنكبوتية , و سردو منها عشرات النقط , هنركز فيها اليوم علي : ضياع الوقت .

 

فعلا كميات هائلة من الوقت بتضيع , لان اي مقارنة بين المهام و الواجبات الحياتية اللي علي الشخص , وهي فيها شئ من التعب و المعاناة , وبين الكنز الذي لن ينتهي علي شبكة الانترنت , هتكون مقارنة خاسرة .

 

خاصة لو كان الشخص عنده الانترنت سريع  , ومعاه تليفون او لاب كويس , فهيسهل عليه انه يحمل العاب احدث , ويشوف فيديوهات اكتر  ,او يقرأ مقالات متنوعة اكتر .

 

و من موقع لفيديو لتعليق لصورة لبلوج لكومنت للايك , تلاقي ان العمر بيضيع  ,و الوقت بيتم التهامه , والايام بتجري , والسنين بتمر , و الشخص لسة مكانه محلك سر , او حتي عمل عدد من الانجازات اقل بكتير من اللي كان ممكن يعملها من غير الشبكة . .

 

علماء النفس وضعو مسمي جديد في قواميس الاضطرابات النفسية وهو : اضطراب إدمان الانترنت ( Internet Addiction Disorder ) , وبقي مرض نفسي بشكل رسمي ,ويتم تدريسه في الاماكن المختصة ,  وفيه مصحات مخصصة بس للي بيعانو منه , سواء من العاب او فيديوهات او قراءة .

 

حتي ان مؤخرا و مع انتشار الموبايل و تطبيقاته بشكل جنوني في العالم كله , علماء النفس وضعو مسمي مختلف للتعامل مع الموبايل و اسمه : الخوف من افتقاد المحمول  , واللي اسمه nomophobia , وهي اختصار لكلمة No Mobile Phobia

 

لاحظي ان كلمه افتقاد مش فقد , يعني مش الخوف ان الموبايل يضيع , لان الخوف من ان الموبايل يكون مش متاح معايا دلوقتي , حتي لو كنت نسيته في البيت مثلا , او دخلت مكان ممكن يكون فيه الموبايل زي السفارات

 

 

حتي ادمان الاشياء المفيدة هي غلط  ,حتي لو الواحد قاعد طول اليوم بيشوف افلام وثائقية  ,او بيقرأ كتب مفيدة  ,او بيتلو القرآن عليه , الافراط في اي شئ غلط تماما مهما كان مفيد  . 

 

وان كان حاليا الموبايل بيأثر بس علي مذاكرتك  , ومش بيأثر علي عبادتك , فقدام تأثيره هيمتد لكل نواحي حياتك , وحتي انتي ذكرتي ان الاستغفار بيتعمل و انتي ماسكة الموبايل , مما يتنافي مع معاني استشعار عظمة المولي تبارك و تعالي , والاحساس بفحوي الاستغفار , واللي هو اهم من تحريك اللسان به

 

ولأن انتي "حديثة العهد بالموبايل" فانتي لسة عندك مشاعر البهجة القوية في التعامل مع الموبايل , وتصفح المواقع المفيدة او الكوميدية , او التواصل مع ناس – حتي لو محترمين – و غيرها من انشطة الانترنت  .

 

وده السبب الرئيسي في حالة الكسل المستمرة اللي عندك حاليا  .

 

 

و عشان نشوف حل للمشكلة , تعالي نعمل تحليل ليه بالتحديد الموبايل عامل عندك الحالة ديه .

 

كل مرة عقلك بيقارن بين شئ ممتع رائع اسمه الموبايل , وشئ ممل سخيف اسمه المذاكرة , كفة الموبايل بترجح , وده منطقي .

 

اذن الحل هيكون بنفس النقطة , ان الموبايل ميبقاش رائع , والمذاكرة متبقاش سخيفة .

 

لان الموبايل ان ظل بنفس "الروعة" , و فيه نفس المحتوي "الجذاب" دايما , فمقاومته هتكون عسيرة بالفعل , وحتي ان قدرتي تقاوميه شوية عشان مذاكرة او شغل او صلاة , فهتكون دماغك مشغولة بيه , وهتخلصي بسرعة اللي في ايدك عشان ترجعيله .

 

فالحل باختصار هو : تقليل جاذبية الموبايل , و جعله اقل تسلية , واكثر ملل . .

 

مش هاقدر اقولك سيبي الموبايل خالص , او اشتري موبايل سيمنز قديم من اللي فهي زراير و مفيهوش نت , ده حل غير واقعي  , ومحدش هيعرف يكمل فيه . .

 

ده غير ان التواصل الدائم مع اهلك , سهولة الاطلاع علي حاجات معينة , ديه مميزات محدش يقدر ينكرها , و التخلص منها تماما شئ مش صح .

 

احنا بس عايزين نوصل لمرحلة من التوازن , بحيث يكون استخدامك للموبايل علي القد , يعني فترة محدودة , ويادوبك علي قد تكلمي خالتك , وتطمني علي بنت عمتك , و تعرفي فلانة ولدت ولا لسة , وابن فلانة عمل عملية ولا لا .

 

اوحتي التواصل السليم مع جروب الدفعة , عشان نشوف الجديد في المنهج او الامتحانات .

 

و الحاجات ديه كلها مش هتاخد ابدا اكتر من ساعة يوميا , و حتي لو راحت ساعة كمان يوميا في حاجات "هايفة" فهي مش ازمة .

 

الازمة في ضياع 4 و 5 ساعات يوميا , وان باقي الوقت اللي بعيدة فيه عن الموبايل دماغك بتفكر فيه . .

 

 

 

فيه كذا خطوة ممكن تعمليها , هتفيدك شوية بحيث تخلي الموبايل فاضي الي حد ما , وامساكه ممل ليكي , فتقدري تروحي للحاجات المهمة .

 

• لو ينفع تسيبي تليفونك ده و تشتري تليفون الشاشة فيه اصغر شوية , يكون مستعمل و بطئ , لازم يكون بطئ عشان يكون ممل ليكي في التصفح , و"يخنقك" , ده غير ان الشاشة الصغيرة هتتعب عينك وانتي بتشوفي او تقري , وده المطلوب .

 

• اعمل ازالة لكل التطبيقات الغير ضرورية , حتي المفيدة منها , سيبي بس كام تطبيق اللي فعلا محتاجاهم جدا , غير كدة شيلي الباقي .

 

• لو عندك جوجل كروم في الموبايل شيليه , وخليكي بس علي متصفح سامسونج , لانه تقيل جدا و ممل و هيزهقك

 

• في الفيسبوك ماسنجر الغي خاصية  ان الماسنجر يدخل اوتومايتك ,  خليه يطلب منك كل مرة الاسم و كلمة السر  , واعملي كلمة السر للفيس طويلة و سخيفة , عشان تكسلي كل شوية تفتحيه

 

• في الفيس نفسه , اطلعي من كل الجروبات و اعملي عدم اعجاب لكل الصفحات الهايفة  , والاهم انك تعملي عدم متابعة لـ 90 % من صديقاتك , هتلاقي ان الصفحة عندك بقي فاضية و مملة و سخيفة , وده هيخليكي تزهقي لما تفتحي الفيس .

 

• لو عندك اي تطيبقات خاصة بالفيس احذفيها كلها

 

• اول ما ترجعي البيت , متحطيش الموبايل قدامك , خليه في اوضه بعيدة , وخلي صوت الرنة عالي عشان لو حد اتصل , غير كدة ميبقاش قدامك

 

• لما تعوزي الموبايل في حاجة , روحي شوفي اللي عايزاه هناك و ارجعي تاني غرفتك من غيره , عشان ميكونش قدامك

 

• اعملي اوقات معينة للموبايل , وحافظي عليها , في المواصلات , بين المحاضرات , قبل الاكل و هكذا

 

• بالنسبة للمذاكرة  ,حاولي تذاكري مع صديقة ليكي , لو متاح تتقابلو في الكلية او في بيت واحدة فيكم , وجود حد معاكي بيجبرك علي المذاكرة حتي لو ملكيش نفس

 

• جربي انك تشرحي اللي ذاكرتيه لواحدة صديقة , حتي لو انتي مش فاهماه قوي , هتلاقي نفسك رغما عنك بتذاكريه و بتحضريه

 

 

أخيرا , هنا فيه بوست مهم بعنوان الثروة المفقودة , اتكلمنا فيه عن شئ مماثل

 

 

--------------------------------------------------------------------------------

 

بالنسبة للنقطة التانية : ان الناس بيبصولك . .

 

ببساطة تجاهليهم , معروف ان اي فاشل يتغاظ لما يكون فيه حد متميز قدامه , هما بيحاولو يكسرو عزيمتك , فانتي تجاهليهم , وكملي في طريقك .

 

و الكلام ده طالما طريقتك في الكلام مفيهاش اي ادعاء او تكبر , لو كان عندك شئ منهم فلازم تراجعي نفسك .

 

و الاحسن انك تقعدي قدام شوية مش ورا , حتي يكون تواصلك مع الدكتور احسن , ومن غير ما الطلبة يبصولك النظرة ديه

 

بالنسبة للنقطة التالتة :

 

ده اسمه غش , وهو حرام تماما , ومفيهوش اي استثناءات .

 

لو انتي شايفة انك متميزة في مادة معينة عنهم , فلو عايزة اشرحيلهم قبل الامتحان , وقوليلهم كل حاجة , لكن اول ما يبدأ الامتحان , اي معلومة تقوليها لاي طالب هي خيانة لثقة الجامعة فيكي , و انتي بتساعديهم علي استمرار الفشل .

 

لما حد فيهم يشيل المادة , فهو يا اما هيذاكر , يا اما هيسال حد متخصص , والنت دلوقتي مخلاش اي شئ صعب , اللي هيدور هيلاقي .

 

لكن لما ينجح هيعرف ان الموضوع سهل و هيتقدر عليه , وزي ما انتي ساعدتيه قبل كدة , فهيلاقي اللي يساعده , ويتخرج من الكلية وهو مش فاهم حاجة .

 

دينك و اخلاقك تمنعك انك تكرري ده لاي سبب , او لاي استثناء ,حتي لو زعلو منك , حتي لو اتهموكي انك انانية , حتي لو عيطو قدامك بالدموع , اللي يعيط ده كان يفتكر الدموع ديه لما ضيع وقته علي الفيس و انستاجرام.

 

و لما يشيل المادة هيتعلم , وهيعرف ان النجاح محتاج مذاكرة مش محتاج تكبير دماغ .