العنوان : الدائرة المفرغة - 2

القسم: #الديني

الرقم: 27

السؤال:

 

انا نفسي حضراتكم تكملو موضوع العادة السرية والمواقع الإباحية في أقرب وقت  انا متأكد ان شباب كتير طلبوا منكم ده نظرا لحالة الغليان الجنسي الرهيب اللي بيعيشه الشباب في الفترة دي دونا عن الأجيال السابقة بسبب اللبس الزفت بتاع البنات وكأنها ماشية في الشارع عريانة مش لابسة حاجة اصلا دا غير المبالغة في المكياج والزينة وطبعا الشاب مش هيقعد في بيته اليوم كله لازم وراه التزامات وبيضطر ينزل للشارع ويصطدم بالبلاوي السودة دي وطبعا غض البصر صعب جدا لأنك مبتشوفش واحدة ولا اتنين قدامك وخلاص لا دا عاملين زي النمل ومنتشرين في كل حتة بطريقة مستفزة فطبعا شهوته هتغلي جواه اكيد وعشان هو لسه متنيلش اتجوز بسبب الظروف الاقتصادية السودة اللي احنا فيها بيضطر انه.يتفرج علي المواقع دي لإخراج شهوته عشان متحصلهوش مضاعفات من كتمان الشهوة  زي احتقان البروستاتا ودوالي الخصيتين ارجوووكم ريحوني انا وكل الشباب في القصة دي وايه الحل فيها خصوصا برضو أن الجواز الأيام دي بقا شبه مستحيل

 

كل حاجة دلوقتي بقت بتدعو للاثارة الجنسية الشارع والشغل والتليفزيون والنت والفيس وغيره وبعدين يستغربو من حالات التحرش اللي انتشرت وممكن توصل للزنا برضو الموضوع بقا فعلا فوق طاقة الاحتمال لأي شاب حتي لو كان متدين وملتزم 100% انا بفضل الله عمري ما كلمت واحدة أو عملت صداقة مع واحدة في يوم من الأيام ولا زنيت والحمد لله بس مفيش غير  الإباحية هي الوسيلة الوحيدة اللي قدامنا عشان نفرغ شهواتنا اللي بتغلي نار جوانا دي

 

ياريت الإجابة بإذن الله تبقي بمنتهي منتهي التفصيل اكتبوا كل حاجة تعرفوها لو سمحتو

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 ده هو الجزء التاني من الرد , الجزء الأول بعنوان : الدائرة المفرغة -1

​

ماذا عن الجانب النفسي ؟ ؟

 

المشكلة الأساسية في الذنب المركب (المشاهد + العادة السرية) , إنها مرتبطة بعدد من الأزمات النفسية , اللي بتعمل ضغط مستمر علي الجهاز العصبي للشخص , و بتأثر سلبا علي صحته النفسية . .

 

تعالي نتكلم عن النقاط ديه , بشئ من التفصيل . .

 

1 )  الإحساس بالذنب :

 

وهي نتيجة التأنيب المستمر للضمير , علي اقترافه الذنب ده بشكل دائم , خاصة لو كان معدل ممارسة العادة كبير , وكمان لو كان محتوي الحاجات اللي بيشوفها "اشياء مخزية" .

 

و الإحساس بالذنب , بجانب الأثر الديني السلبي عليه , فالأثر النفسي شديد الخطورة , لأنه بيصنع داخله طعنات متكررة في كرامته و العزة بالنفس , وبيري نفسه انه بينغمس في مستنقع الوحل كل مرة بدرجة اعلي .

 

 

2 ) الشعور بالسرقة :

 

وده لأن خطوات البحث عن "الفيديوهات" , او خطوات ممارسة "العادة" , بتستلزم من الشخص كمية من الحذر و التخفي و الصمت , عشان محدش يشوفه أو يسمعه , بالإضافة للشعور المستمر بالقلق قبل و اثناء و بعد ممارسة ايا من الذنبين , و الحذر المستمر لمراقبة لو حد ممكن يدخل عليه أو يشوفه  , وده متتخيلش بعمل تدمير ازاي للجهاز العصبي , وللصحة النفسية , وبيقنعه ان هو زيه زي الحرامي اللي بيسرق حاجة , و بيغرس جواه الشعور بالإنحطاط .

 

 

3 )الإحساس بالعار :

 

 

 

 والمشكلة انه لما يرجع تاني للذنب ده أو ده , فإحساس العار بيتعمق فيه , مما يدمر جواه اي بقايا للصحة النفسية .

 

 

 4 ) الإحساس بالفشل .

 

وهي النتيجة الحتمية للمآسي المتتالية اللي فاتت . .

 

ان الشخص بعد ما يجد نفسه مدمن لكلا الذنبين , وإن الإحساس بالعار و الخجل بيتعمق اكتر واكتر , وانه حاسس بالفارق الرهيب بين اللي الناس شايفاه منه , وبين حقيقة نفسه , فعقله هيقتنع بمبدأ معين وهو : انا إنسان فاشل , لا أصلح لأي شئ . .

 

الإحساس ده هيكون أحد محاولات اللاوعي للشخص , للهروب من الجحيم المستمر لتأنيب ضميره له , وهيكون التفسير الوحيد للتغيير الكامل اللي بيحصله لما بيمارس الذنبين دول . .

 

و خليني أقولك , ان علي مستوي جميع التأثيرات السلبية الرهيبة للعادة السرية , ومشاهدة الافلام الإباحية , سواء النفسية او الدينية , فأسوءهم علي الإطلاق , هو الإحساس بالفشل . .

 

لأن الشخص أول ما يؤمن إنه فاشل , هيؤمن إن الخطوة الحتمية التالية , ان خلاص , مفيش حاجة نافعة , لا صلاة ولا صيام ولا غض بصر , ولا حتي مذاكرة و امتحانات , أنا إنسان فاشل من جميع المستويات , فخليني أكمل في فشلي , بنفس المنطق بتاع : كدة كدة خربانة .

 

و هنا يفتح الباب علي مصراعيه لكل أنواع الموبقات و الفواحش , مهو خلاص , انا اصلا فاشل و مفيش أمل , وهيكون شديد الشبه بشخص عنده أزمة مالية او عاطفية رهيبة , ومش شايف اي أمل في حياته  ,فياخد بعضه و يروح ينتحر , لأنه مش شايف أي أمل في إنقاذ الموقف , و حل المشكلة .

 

الإحساس بالفشل هو بالفعل أسوء شئ ممكن يصيب الشخص , وهو أول خطوة لهدم كل ما تم بناءه من سنين , وهو ذروة نجاح الشيطان في إبعادك عن طريق الله . .

 

 

الدنيا اسودت كدة ليه ؟ ؟

 

الكلام بقي كله سلبي وقاتم , واللي هيقرأه هيشعر ان مفيش أمل . .

 

لأ طبعا , الأمل موجود و بقوة , وياما ناس عرفت تهرب من فخ الذنبين دول , و اتحسن حالهم بشكل كبير بعدها . .

 

الأمر زي ما قلنا في البداية مش سهل بس مش مستحيل , وممكن جدا لو انت بالفعل عندك ارادة حقيقية , وصبر كبير , و نفس طويل . .

 

وزي ما المشكلة ليها جذور نفسية و دينية , كمان الحل هيتناول المحورين مع بعض , للتأكد من تجفيف كل منابع المشكلة , و صياغة حل متكامل و سليم , وده اللي ممكن نقوله في خطوات معينة . .

 

هنذكر دلوقتي 10 خطوات , لو انت مشيت عليهم بجدية و اهتمام , ثق انك هتلاقي تحسن ملموس في المشكلتين دول . .

-----------------------------------------------------------------------------------------------

 

1) أولا لابد من تخفيف الأثر النفسي السلبي :

 

لا تتعامل مع الذنب ده إنه نهاية العالم  ,أو إنه مسمار في نعشك ,في النهاية هو ذنب محدد , والشرع علمنا إن الذنوب درجات , وفيه ذنوب أكبر من ذنوب , فلا تضع للأمر حجم مبالغ فيه , عشان ميصنعش عندك أزمة نفسية ليها اثر مدمر .

 

والأهم من كدة , لابد تتعلم فن التعامل مع الذنوب لما تحصل , انهيارك و تعذيب نفسك و الإحساس بالفشل , مش هيحل المشكلة علي الإطلاق , لكن وجود الندم الإيجابي اللي يدفعك لإصلاح المشكلة , هو الشئ المطلوب . .

 

الندم علي الذنب من أساسيات التوبة , وانا مش بقول انك متندمش , لكن بقول توقف عن تعذيب نفسك و اتهامها بالفشل , اعرف انك في حرب مع شيطانك ,ولو كان هو انتصر في جولة , فممكن تنتصر عليه في الجولة التانية , والعبرة بالنهاية .

 

-----------------------------------------------------------------------------------------------

 

2 ) اتبع السيئة الحسنة تمحها :

 

ده مش كلامي , ده كلام الرسول صلي الله عليه وسلم , اللي فيه تتجلي عبقريته  صلي الله عليه و سلم , في انك تلزم نفسك بعمل طاعة "كبيرة" مرتبطة بكل مرة تعمل فيها الذنب . .

 

طب و ايه اللي النتيجة وقتها ؟ ؟

 

3 حاجات ايجابية جدا , هتنتدهش من تأثيرهم الرائع . .

 

أولا : إنك اقرب ما تكون لرضا ربنا عليك , لما تعمل ذنب معين , فتتوب عليه , وتصر علي عمل طاعة كبيرة  ,فانت بتقول يا رب , انا ايوة غلطت و ضعفت , لكن يارب لأني أحبك , ولأني أخافك , فأنا باعمل التوبة بشكل عملي , فيا رب تقبل توبتي , واغفر لي هذا الضعف . .

 

ثانيا : انت بتخلي الشيطان هيلطم , بجد هتخليه يتجنن , يعني هو زقك للمعصية عشان تاخد مقدار معين من السيئات , فأنت تخليه يشوف انك بتعمل طاعة أكبر منها , و- إن شاء الله تعالي – هتاخد عليها حسنات اكتر , الشيطان هيعرف ان العملية خسرانة معاه , وان انت كدة بتطلع لقدام مش بترجع لورا , فمش بعيد قدام انه ينسيك المعصية ديه .

 

ثالثا : بتعمل تحسين رائع في حالتك النفسية , بدل ما انت قاعد مغموم و مكتئب , ويغمرك الإحساس بالفشل والإحباط و اليأس , العكس تماما دلوقتي , انت قايم نشيط و متفائل و كلك يقين ان ربنا تاب عليك , وانك اقرب لربنا دلوقتي بسبب الطاعة ديه . .

 

ولكن . .

 

إياك إنك تكسل عن الطاعة ديه , او متعملهاش  , او تتعب منها بعد فترة  ,وده اللي الشيطان هيراهن عليه , انك لو قدرت مثلا لمدة اسبوعين , انك تعمل الطاعة بعد المعصية , هيراهن انك بعد فترة تتعب من الطاعة , فتستمر في المعصية , من غير ما تعمل الطاعة , كدة يبقي انت هديت كل حاجة .

 

عشان كدة الأفضل انك تعمل طاعة معقولة , مش كبيرة جدا, متقولش مثلا : هاعمل قيام الليل كله وانا ماسك المصحف , ده شئ اكبر من تحملك , ومش هتقدر تستمر فيه , اعمل شئ معقول انت عارف انك هتقدر تعمله حتي لو لمدة سنين , مثلا (هاتصدق بـ 100 جنيه) , (هاصلي قيام بالمصحف و اقرأ جزء من القرآن ) , (هذكر الله لمدة ساعتين متواصلتين) , (هصوم يوم عن كل مرة اعمل فيها الذنب) , شئ يكون مقدور عليه , وفي نفس الوقت تحس ان فيه كمية كبيرة من الحسنات .  

 

لو بالفعل انت صبرت علي تنفيذ طاعة بعد المعصية ديه شهرين تلاتة , هتكتشف تدريجيا انك خلاص مش هتعمل المعصية ديه  ومش عايزها . .

 

متنساش ان في اول الكلام , قلنا ان الحل محتاج نفس طويل , وصبر جميل , وشوية وقت . .

 

---------------------------------------------------------------------------------------

 

3 ) مترفعش سقف طموحاتك .

 

يعني متتخذش قرار حاسم , اني عمري ما هاعملها ابدا ابدا في حياتي , وابقي عيل لو قربت للذنب ده تاني .

 

مشكلة القرار الحاسم , والسقف المرتفع للطموح , انه في اغلب الاحوال يتم تحطيمه , و بيتم الرجوع تاني للذنبين دول  .

 

وبالتالي لما انت تتخذ قرار حاسم , وانت مُصر عليه جدا , وحاطط عليه كل همتك و عزيمتك , فلما بيتم تحطيمه مرة و التانية و التالتة , وقتها انت من جوة هتؤمن "ان مفيش أمل" , وان الأزمة ديه مستحيل حلها . .

 

وهنا الغلطة من عندك , لان زي ما قلنا من شوية , ديه نوعية من المشاكل اللي لازم تتحل علي نار هادية , و بنفس طويل , فالقرارات الحاسمة مش مناسبة معاها بالفعل . .

 

وأغلب اللي سابو السجاير او المخدرات , كان بالتدريج  , مش بقرار حاسم , خاصة لو كانت جرعة تعاطيه مع السجاير او المخدرات كبيرة  .

 

فانت ابدأ بتقليل الذنب , شوف انت بتعمل كام مرة في الاسبوع , وابدأ نظم نفسك انك تعملها بنصف المعدل بس , واجبر نفسك علي كدة , واتمسك بالنظام الجديد فترة كذا شهر مثلا , بعدها قلل كمان مرة لنصف المعدل , و حافظ عليها كذا شهر , بعدها ابدأ أنك تسيب الذنب تماما . .

 

صحيح هو ذنب , وليه سيئات , لكن لابد تكون حكيم في التعامل معاه , عشان تتخلص منه , وعشان متزرعش جواك الإحساس بالفشل تاني و تالت .

 

-----------------------------------------------------------------------------------

 

4 ) افصل بين الذنبين .

 

يعني المشاهدة ده ذنب يختلف عن العادة السرية . .

 

ولو هتاخد رأيي , فمشاهدة الأفلام الإباحية , اثرها التدميري أكبر , والتبعات اللي ممكن تعملها أخطر , وعدد من الآراء الفقهية إن حرمتها أشد  .

 

فابدأ فورا بالتخلص من الذنب ده , وده انت ممكن تعمل ايقاف مفاجئ ليه , يعني مش محتاج تدريج فيه , لأن بشكل ما الاستغناء عن مشاهدة الأفلام , اسهل من الاستغناء عن العادة السرية . .

 

ابدأ فورا بالتخلص من ذنب المشاهدة , و اعمل تقليل لمشكلة العادة السرية , وامشي فيها بالمعدل التدريجي اللي قلناه في الخطوة التالتة .

 

وقتها انت من جواك هتشعر ان الذنب اقل شوية (بعد التخلص من ذنب المشاهدة) , وهتشعر بتحسن في الحالة النفسية , انك ماشي بخطوات علاجية , وانك بتتقدم لقدام , خاصة لو انت التزمت بالخطوة التانية (طاعة بعد الذنب) .

 

ولو لقيت نفسك رجعت لذنب المشاهدة , اعمل ليها طاعة اكبر و اقسي , عشان تخلي الشيطان يحرم يجيبلك سيرتها تاني , وكأنك بتقول لنفسك , ماشي هكمل في العادة السرية بمقدار أقل , لكن المشاهدة ممنوع تماما .

 

--------------------------------------------------------------------------------------

 

5 ) استخدم أسلوب الروافد .

 

يعني ايه الروافد ؟ ؟

 

عارف لما يكون فيه "مجري" مائي صغير , متجه من مكان لمكان , وكل مسافة يكون فيه "قناة" فرعية بتصب في المجري ده , مياه من عندها . .

 

فبعد فترة هتلاقي ان مجري المياه الصغير تحول لنهر كبير, من كتر قنوات المياه اللي صبت مياه فيه .

 

اهي ده بقي اسمها روافد . .

 

يعني لابد يكون ليك عدد من المحطات ,اللي بتعمل "تغذية" ايمانية و روحية عالية جدا , حتي لو انت مستمر في الذنب ده .

 

يعني مثلا , لازم تحافظ علي صلاة الفجر ,ويا سلام لو تقدر تقوم قبل الفجر بربع ساعة و تستغفر او تصلي ركعتين قيام  , حافظ علي صيام يوم في الاسبوع , تقرأ جزء من القرآن يوميا , لسانك يكون مشغول في ذكر الله , يكون فيه صدقة يتعملها بشكل دائم , بتروح لحد من الفقرا و بتطمن عليه ,بتزور ملجأ للأيتام و تضحك معاهم , تزور حد من قرايبك و تصل رحمك . .  

 

اعمل كل الحاجات ديه , حتي لو انت مستمر في الذنبين دول و مش قادر تسيبهم , استمر في الروافد مهما كنت بتعمل .

 

كل  الأعمال ديه , هي اشبه بالروافد , اللي بتعملك "تغذية" كاملة و مستمرة في حالتك الإيمانية و الدينية , هتلاقي تدريجيا ان روحك امتلأت بطاقة إيمانية  عالية , هتكتشف انك بقيت بتحب عدد كبير من الطاعات , وبالتوازي , هتلاقي ان رغبتك في المعصية بتقل تدريجيا , مش هتختفي مرة واحدة بس واحدة واحدة هتتلاشي . .

 

صدقني , حافظ علي نظام الروافد  ده شهرين بس , و هتلاقي ان حياتك اتغيرت , مش بس من مشكلة العادة السرية و المشاهدة , لا في كل حاجة في حياتك .

 

و الأهم , انك هتلاقي ان قدرتك علي مقاومة الذنب بتكون أكبر , و رغبتك اساسا في ارتكابه بتقل , و خوفك من ربنا بيزيد في قلبك .

 

هو اسلوب رائع , بس محتاج مثابرة و نظام و اهتمام . .

 

--------------------------------------------------------------------------------------

 

6 ) اقفل الأبواب .

 

يعني حاول تقفل علي نفسك الأبواب اللي ممكن الذنب يجيلك منها , متخليهاش متاحة اساسا عندك .

 

فلو ان شغلك او دراستك مش محتاج لاب توب , تخلص منه حتي لو عند حد من قرايبك كام شهر , اعمل فكرة مجنونة انك تجيب موبايل مش "سمارت فون" عشان اصلا  متعرفش تشوف بيه حاجة , لو مستحيل يبقي هات موبايل سامسونج قديم شاشته صغيرة و يكون بطئ شوية , عشان اصلا يكون متعب و مرهق ليك انك تشوف بيه اي حاجة , لو عندك وايفاي في البيت الغيه و اعمل باقة في التليفون , عشان متفتحش اليوتيوب , لو فيه اي حاجات علي اللاب او الموبايل امسحها فورا من غير نقاش , اي حد من اصحابك اللي كان بيجيبلك حاجات زي كدة اعمل معاه خناقة و اقطع علاقتك بيه . .

 

عارف انت اللي بيكون عايز يعمل "دايت" فهو اصلا مش بيخلي في بيته اي اكل فيه سعرات حرارية كبيرة , عشان لما يجوع ويضعف شوية , ميلاقيش ان فيه اي اكل متاح يتخنه .

 

صحيح النظام ده مش هيقفل الباب 100 % , لكن علي الأقل هيقلل من نسبتة ارتكاب الذنب , وديه في ذاتها خطوة كويسة , خاصة لما تتضافر مع باقي الخطوات التانية اللي قلناها

 

 

7) نظام الأكل و الرياضة . .

 

ديه مش خطوة حاسمة , لكن خطوة مساعدة هايلة .

 

ايوة ممارسة الرياضة مش هتمنعك انك تفكر في الشهوة , بس هتقلل منها شوية , وحتي هتخلي جسمك مهدود فتكسل عن عمل الذنب ده .

 

غير إن الرياضة بتعمل تحسين كبير في الحالة النفسية للشخص , وهو اللي هيفيدك جدا في ترك الذنب .

 

كمان الأكل بيكون ليه تأثير , شوف كل الوجبات اللي بتعمل زيادة في الطاقة الجنسية (السمك , البصل , الشطة . .  ) وابعد عنها تماما لغاية لما تتجوز , ايوة مش هتوقف الذنب  , بس هتقلل من فوران هرموناتك , وبالتالي تقلل كتير من معدل ممارسة الذنب .

 

-------------------------------------------------------------------------------------------

 

8) استخدم تكنيك انهيار قطع الدومينو .

 

اللي هو ايه ؟ ؟

 

لو انت عندك 100 قطعة من الدومينو واقفين ورا بعض , وفجأة لقيت ان اول قطعة وقعت علي التانية ومنها التالتة و هكذا , لو انت سبتها هتجد ان القطع كلها هتقع  بالتوالي .

 

لكن انت لو مديت ايدك , ونزعت القطعة الخامسة مثلا قبل ما هي تقع , هتلاقي ان القطعة الرابعة هتقع علي فراغ , وبالتالي القطع من رقم 6 للنهاية هيظلو في مكانهم .

 

نفس الموضوع بالنسبة لسلسلة الذنوب  , لو كان  فيه مثلا 8 ذنوب مرتبطين ببعض (المشاهدة + العادة  + هتكسل تقوم تصلي + هتسمع اغاني + هتكلم البت محاسن + هتزعق في والدتك لما تكلمك + هتنفض لابوك عشان عايزك تروح مشوار + هتنام من غير ما تذاكر ) .

 

فلو انك بالفعل عملت اول ذنبين , اياك تسمح لقطع الدومينو انها تستمر  , باعتبار انها "كدة كدة خربانة " , لا صدقني مش خربانة ولا حاجة , قوم فورا , خد دش سريع , الحق الصلاة , امسك القرآن و استغفر ربنا  وبعدها شوف باقي الحاجات اللي عليك .

 

انت كدة انقذت نفسك , بدل ما كنت هتعمل سلسلة من الذنوب المتتالية , عملت ذنبين بس , و عملت بعدهم فورا طاعة و استغفار , وقدرت تستغل باقي اليوم في الحاجات اللي عليك , من غير ما تكمل في سلسلة الذنوب .

 

ثق ان الشيطان مكسبه الأكبر مش من المعصية الأولي ,لكن من السلسلة التابعة ليها , انت خليك اذكي منه , و وقف نفسك فورا بعد اول او تاني معصية , ارجع لربنا سريعا , هتلاقي ان الدنيا متدمرتش , ومش خربانة ولا حاجة .

 

-----------------------------------------------------------------------------------------

 

9 ) استخدم تكنيك القَسَم

 

هي طريق احيانا بتنفع واحيانا لا , فلازم تجربها ولو مش هتنفع بلاش منها . .

 

انك تقسم علي نفسك (تحلف يعني) انك مش هتعمل كذا كذا لمدة معينة , بس ارجوك اعملها لمدة معينة , وتكون مدة قصيرة , اسبوعين مثلا .

 

الطريقة ديه احيانا بتكوت هايلة , انك بالفعل لما تضعف بتفتكر انك حلفت مش هتعمل كذا , و بتلاقي نفسك مجبر انك متعملش الحاجة ديه .

 

بس مشكلتها انك ممكن تكسر القسم و تعملها لو مقدرتش تستحمل , وهنا هيكون لازم تعمل كفارة للقسم "انك تعمل اطعام لعشر مساكين , او تجيبلهم هدوم" غير انك من جواك هتعمل تعميق للاحساس بالفشل .

 

فنصيحة , انك تعملها علي شئ بسيط و هادي و محتمل , و تكون لمدة محددة , عشان لو هتضعف تكون عارف ان خلاص , فاضل كام يوم و القسم ينتهي  فتقدر تصبر .

 

زي ما قلتلك الطريقة ديه مش بتنفع كل الناس , فجربها الاول علي حاجة بسيطة و بمدة محددة .

 

------------------------------------------------------------------------------------------

 

10 ) أخيرا , حاول تتجوز .

 

انا عارف انك مش هتدوس علي زرار فتتجوز , بس اجتهد بقدر الإمكان , دور علي المواصفات اللي انت عايزها في بنت من اسرة متوسطة الحال , عشان  يكونو متفهمين الوضع المادي , وتكون الامكانيات المطلوبة حاجة محتملة , وحاول من دلوقتي تحوش عشان تمشي خطوة خطوة , و ابدأ بيتك بحاجة بسيطة , وربك هييسرها واحدة واحدة

 

 

الكلام كتير , والنصايح مش هتخلص , بس الاعتماد كله علي الهمة و الصبر و طول البال . .

 

عشر خطوات مهمة , لو مشيت عليهم , اكيد هتلاقي نتيجة ايجابية . .

 

1)  تخفيف الأثر النفسي السلبي

2)  اتبع السيئة الحسنة تمحها

3)  مترفعش سقف طموحاتك .

4) افصل بين الذنبين .

5) استخدم أسلوب الروافد .

6)  اقفل الأبواب .

7)  نظام الأكل و الرياضة . .

8) استخدم تكنيك قطع الدومينو .

9) استخدم تكنيك القَسَم

10) حاول تتجوز .

 

 

نصيحة , متعتمدش علي الذاكرة , امسك الـ10 خطوات دول و حطهم في ورقة لوحدها و اطبعها , وحطها قدامك علي طول , عشان كل ما تفكر في الذنب ده او ده , تقراهم سريعا , و  تشوف هتستخدم ايه بالظبط .

 

كمان ممكن تعمل لنفسك جدول ,يعني من دلوقتي و لمدة شهرين هتكون العادة لمدة مرتين في الاسبوع , وبعدها لمدة شهرين هتكون مرة واحدة في الاسبوع , وهكذا . .

 

اياك تنسي الطاعة اللي ورا المعصية , او اسلوب الروافد . .