العنوان : التشوه النفسي

القسم: #النفسي

الرقم: 32

السؤال:

 

انا جوايا مشاعر ملعبكة بمعنى الكلمة

 

انا بنت مشوهة بمعنى الكلمة من جوايا وده اتضحلى لما اتجوزت وخلفت

 

لما لقيت نفسى مش عارفة اتعامل مع جوزى مع ابنى

 

واللى اتضحلى ان انا تعبانه بسبب حاجات اتعرضتلها فى طفولتى وانى محستش انى عشتها اصلا ومن تربيتى اللى اصلا متلعتش منها غير العصبية والظغط على اعصابى وعدم اخد قرارات بسيطة وهكذا

 

ببحث عن نفسى وبقرا على قد مااقدر وبحضر كورسات بس انا تعبانة ومش عارفة اشفا من جوايا بجد

 

مش عارفة ابقى عايشة حياة مريحة الى حد ما دايما اى شئ بيعكر عليا حياتى

 

والله فعلا انا تعبانة ومش عارفة علاجى فين

 

لدرجة انى فكرت اروح لدكتور نفسى بس للأسف جلساتهم غالية جدا مش هكدب عليكم كدبت نفسى وقولت بلاها دكتور وانا هحاول مع نفسى واشفا بس مش عارفة اعمل كده ولاعارفة اتابع مع دكتور نفسى يقدر يساعدنى بسبب الظروف

 

 

وحاليا من اللى اتعرضتله خايفة اعرض ابنى للى اتعرضتله واللى اتضحلى انى فعلا على قد ماأحاول انا بعمل شبه اللى اتعمل معايا

 

بس والله انا بضغط على نفسى وبحاول وده تعبنى جدااااااااا

 

كله بقى داخل فى بعضه نفسى .قيمتى. جوزى .ابنى. تعاملى مع الناس   كله والله

 

 

جوزى دايما بحس انى محتاجة اهتمام وحب ومشاعر اكتر من اللى بيدهولى لانى اتحرمت من الحاجات ديه فللاسف هو الوحيد اللى هيدهالى واللى دايا بحس بالذنب انو بيعمل اللى عليه بس انا محتاجة اكتر بكتيييير

 

 

اما ابنى فمن كتر خوفى انى اطلعه  زى وانى رافضة تربية اهلى ليا فبقى تفكيرى منصب على كده والحمدلله لقيت انى كل اللى كنت خايفة منه عملته من غير مااشعر

 

مكنتش بلاقى تفاهم ولا احترام ولا قيمة بالذات دايما فشل وخلاص حتى لو ناجحة ومازال كده حتى لما كبرت

 

انا مش هنكر انى الحمدلله بحاول وانا فخورة انى بمسك نفسى ساعات وساعات بتفلط منى

 

بس بحاول وهحاول

 

هو ده اللى بيعرضلى للضغط على اعصابى واللى بقى يطلع على جسمى بامراض

 

اما تعاملى مع ناس معنديش طولة باااال خالص انى ادخل مناقشة او حوار مع حد غير وانا خارجة منه قلبى وجعنى جدا وكأن الكلام بيخرج من اعماق قلبى بألم وبقيت اكره ادخل فى اى حوار مع جوزى صحابى ابنى اهلى بتخنق وببقى عايزة اجرى

 

انا بعتلكم يمكن تقدروا تساعدونى

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

المشكلة عندك محتاجة فعلا حل عاجل .

 

لان بقائها و استمرارها معناها المزيد من الضغط علي اعصابك , والمزيد من المعاناة لزوجك , والمزيد من التربية الغير سليمة لابنك .

 

تعرضك في طفولتك لاسلوب غير سليم في التربية او لتجارب مؤلمة قديمة , اكيد عمل تأثير سلبي خطير في جهازك العصبي ., وفي سلوكياتك الشخصية  . .

 

ولكن اغلب التأثيرات ديه قابلة للإصلاح , طالما الشخص مشي علي المنهج العلمي الخاص بها , واعتقد ده هيكون سهل معاكي , خاصة انك بالفعل مدركة ان فيه مشكلة و عندك رغبة لاصلاحها , وديه بداية علاج المشكلة .

 

تعالي نحط ايدينا علي النقط اللي انتي ذكرتيها بالتحديد كمشاكل موجودة :

 

• العصبية

• التردد (عدم اخذ قرارات بسيطة)

• الاحتياج للاهتمام

• عدم وجود التفاهم او التقدير

• العجز عن الجدال

 

وقبل ما نتكلم في خطوات حل  , لازم نأكد علي أهمية ذهابك للطبيب النفسي .

 

لان اللي عندك مش مجرد شئ بسيط بيخلص بكلمتين  , قد ما هو باقة متكاملة من سلوكيات فيها نوع من الاضطرابات , واللي اكيد هتأثر عليكي سلبا .

 

و بالتالي علاجك منها محتاج بذل فلوس ووقت و مجهود  .

 

 ممكن تشوفي طبيب ارخص شوية , او حتي متروحيش كتير , يعني حاولتي تروحي مرات قليلة , وتعرفي ايه اللي ممكن تعمليه في الفترة البينية

 

لان الطبيب بيكون قادر علي "النبش" في الماضي , ومعرفة الاسباب اللي صنعت منك كل المشاكل ديه , ومحاولة تفكيكها و حلها واحدة واحدة

 

 

لو هنبدأ بالعصبية , فاحنا اتكلمنا عنها بالتفصيل في المشكلة اللي بعنوان : كابوس العصبية

 

 و بشكل عام لازم تتعودي علي التعامل باسلوب فيه  "هدوء الاعصاب" الشديد , وده بييجي بالتعود .

 

يعني فيه تدريبات انتي لو عملتيها , هتلاقي ان اعصابك بقت اكتر هدوء , و التعامل بقي اهدي شوية .

 

والعصبية بالفعل اي اساس عدد كبير من الإضطرابات السلوكية عند الشخص , واللي بستلزم منك التخلص منها

 

شوفي في الرابط السابق ده الكلام عن العصبية , وحاولي تطبقيه بشكل ما

 

 

لو هنمسك النقطة التانية : التردد في اتخاذ القرارات .

 

فهي كمان مشكلة لابد من التخلص منها سريعا , لان التردد قادر علي تعطيل اي نوع من العلاج عندك .

 

و هنا عدد من النصايح اللي بتقدمها الطبيبة النفسية "صفاء عبد القادر" 

 

• التخلص من الخوف الذى يجعلك تتردد هو الخطوة الأولى للتخلص من التردد.

• وضع وتحديد الهدف من أهم العوامل التى تساعد على التخلص من تلك المشكلة.

• الإنجاز يقود إنجاز لذلك فإن نجحت فى القيام بشىء ستشعر بانتصارك على نفسك وستستمر فى ذلك.

• يجب أن تعلم أن الحياة مكسب وخسارة، لذلك لا تحكم على حياتك بالفشل بل تحدى خوفك وحدد هدفك، لأن الأخطاء من الأشياء الواردة فى حياتنا ويجب علينا أن نتقبلها.

• يجب عليك تحمل مسئولية قراراتك.

• التفكير بشكل إيجابى مع الأخذ فى عين الاعتبار إذا فشلت فى تحقيق شىء ما سأتعرض له.

• بناء ثقتك بنفسك يساعدك فى تجنب التردد.

 

حاولي تطبيقها بشكل ما , وهتلاقي نتيجة ايجابية ان شاء الله

 

-------------------------------------------------------------------------------

 

ماذا عن الاحتياج للاهتمام بشكل اكبر .

 

هنا لازم انتي  وجوزك , كلا منكم تعملو خطوات في الموضوع ده بالتحديد   .

 

لان اللي بيعاني مشكلة في الطفولة (خاصة لو بنت) فبيكون عندها احتياج اعلي للاهتمام , وبتكون علي درجة اعلي من الرغبة  للرعاية المستمرة , وان الناس تسأل عليها و تتواصل معاها اكتر .

 

فلازم جوزك يراعي ده بشكل كبير , ويولي للنقطة ديه اهتمام اكبر , وبالتالي يكون الوقت اللي بيقضيه معاكي اكتر , ونوعية الكلام تختلف .

 

فان كان الست العادية محتاجة قدر معين من الاهتمام و الكلام معاها (حتي لو حاجات هايفة) , وانه يطمن عليها و يسألها علي كل شئ  , فانتي محتاجة قدر اكبر , وسؤال أعمق

 

ولو ان جوزك عليه الخطوات ديه  , فانتي عليكي خطوات في نفس النقطة .

 

هو انك تعذريه لو اتاخر او قصر او مخادش باله .

 

لان الراجل بطبيعته ممكن ينسي او يغفل موضوع التواصل مع مراته بشكل مستمر , وانه يسألها علي اللي في بالها و كدة .

 

و بالتالي لو هو مخدش باله او انشغل شوية , لازم تعذريه .

 

والنقطة اللي بعدها "التقدير و التفاهم" مرتبطة بيها , لان الاهتمام و التواصل لو اتحل , فالتقدير و التفاهم هيتحل اوتوماتيك .

 

و هنا مشكلة مهمة تم حلها عن نفس النقطة , بعنوان : البحث عن الإهتمام

  

----------------------------------------------------------------------------

 

النقطة الاخيرة المرتبطة بعدم قدرتك علي الجدال . .

 

هو اصلا مين قال ان من الصح انك تجادلي الناس ؟

 

احيانا بيكون مقبول ان يكون فيه نقاش هادي مع ناس تتفهم مبادئ النقاش بشكل لطيف و علي اساس علمي , واحيانا لازم تتجنبي اي جدال مع حد بيتعامل باسلوب حاد و عنيف .

 

الامام الشافعي ليه جملة جميلة : ان جادلت الف عالم غلبتهم , وان جادلني جاهل واحد غلبني .

 

يعني ببساطة هو الشافعي يقدر يناقش و يقنع الف عالم  ,لان العالم بيتكلم باسلوب سليم و منطقي  ,لكن لو جاهل واحد اتناقش مع الشافعي , فهو اصلا مش هيعرف يتناقش معاه لانه بيتكلم باسلوب احمق , وبعيد عن اي اساس علمي للحوار .

 

و ده اللي بيخلي كتير من الناس تريح نفسها في النقاش مع اي حد , ويقوله :  ( خلاص انت صح و انا حمار , ارحمني و اسكت )  , كنوع من انه يرحم نفسه من العذاب المستمر من الجدال

 

-----------------------------------------------------------------------------

 

طيب و الحل ؟  ؟

 

زي ما شرحنا المشكلة فوق , هنستقي منها الحلول هنا :

 

 

• الذهاب لطبيب نفسي , ده شئ مش ثانوي او اختياري , لكن بالفعل بقي ضروري و عاجل , و اتمني بالفعل يكون في اسرع وقت , وتحاولي تتابعي معاه بقدر الامكان

• ومع الطبيب حاولي تسترجعي كل شئ عن طفولتك , واللي حصل فيها , لانها هتكون مفاتيح قوية ليه لبدء العلاج

 

• التخلص من العصبية , زي ما قلنا في النقط اللي فوق , او انك تجيبي سيرتها مع الدكتور وهو يفيدك بخطوات اكتر

 

• علاج التردد  , و زي العصبية شوفي الخطوات المذكورة فيه  , و جيبي سيرته مع الدكتور

 

• حل مشكلة الاهتمام  , بالاتفاق مع زوجك علي اللي قلناه من شوية

 

• عدم الجدال اساسا مع اي حد في اي حاجة

 

• الانشغال , حاولي تشغلي نفسك بحاجات مفيدة , او حتي حاجات مسلية حتي لو مش مفيدة , لان علي قد ما تنشغلي علي قد ما ذهنك هيكون مستريح عن اي وساوس غير سليمة

 

• لازم تعرفي ازاي تتعاملي مع ابنك بالشكل السليم , و انك تربيه بالطريقة السليمة عشان ميطلعش عنده مشاكل نفسية ممكن تأذيه

 

 

مشكلتك مش صعبة , بس محتاجة منك اهتمام و دافع قوي , ومواظبة علي اللي الدكتور هيقولهولك , وبالتوفيق دايما ان شاء الله