الطلاق الحتمي
الرسالة السابقة
العنوان : الطلاق الحتمي
القسم: #الاجتماعي
الرقم: 75
السؤال:
انا مدام ومتزوجه وعندى27سنه بقالى10سنين متجوزه ومعايه ولدين
في اول سنتين ف الجواز مكناش مستقرين وبعد كده بقينا عادى شويه وشويه كده والحياه ماشيه زى مابيقولوا بس جوز ف اى مشكله تحصل كان بيمد ايده عليه ويضربنى وبقالنا حوالى سنتين واحنا ف مشاكل مستمره كل مشكله اكبر من اللي قبلها وكل اسبوعين يضربنى ع اتفهه الاسباب وانا مكنتش بمشى واسيب البيت وكان اى حد يدخل ويصلح وخلاص
بس المشاكل بدءت تكبر لدرجه انه مره واحده اصر انه يطلق مع انه كان ضاربنى ضرب جامد وانا كل اللي عملته انى اخدت موقف منه وقاعده ف بيتى
.هو من عيوبه انه بيرمى ودانه لاهله وبيسمع كلام امه ف كل حاجه ..
دلوقتى الطلاق هيتم خلال الكام يوم دول وانا مش عارفه اخد قرار من ناحيه ولادى انى اخدهم معايه والا اسيبهوم ليه بس المشكله ان اهلى بيتهم علي قدهم والدخل بتاعهم قليل
غير ان جوزى هو اللي مصر ع الطلاق وانا مش عايزه اطلق وعايزه اعيش مع اولادى وهو مش راضى يسيبلى الشقه اربى عيالى فيها لانه عايز يتجوز فيها بالرغم انى قولتله اتجوز عليه انا موافقه بس سيبنى بعيالى وهو مش راضى وانا مش عارفه اعمل ايه
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي
طيب الطلاق في مصلحتك من كل النواحي , ده مش زوج , لكن ده انسان مجرم , بيعمل كل اللي يقدر عليه عشان يأذيكي ويحرمك من إنسانيتك و آدميتك وكرامتك . .
الإنسان اللي يضرب مراته بالشكل المجنون ده , فهو يشير لعقل مختل محتاج يتعالج نفسيا , مش انه يتجوز تاني . .
وبقاءه معاكي هيأذيكي نفسيا , وهيدمر الحالة النفسية عند اطفالك , اللي لابد هيتحولو لحاجة من 3 حاجات :
-
إما انهم يتحولو لشباب جبان , مفيهوش اي مقدار من الشجاعة و عزة النفس , يعيش طول عمره عينه مكسورة , لانه خايف يتأذي او يتضرب , زي ما شاف أمه بتتأذي
-
أو إنهم يتحولو لوحوش قاسية , هتعمل تقليد لابوهم المجرم , اللي بيتعامل بدراعة مش بعقله ولا باخلاقه , وبالتالي توقعي منهم انهم يبقو بلطجية او قبضايات , ويدخلو في عدد لا ينتهي من المشاكل مع الناس , او الصراع مع القانون
-
أو انهم يتعاملو مع زوجاتهم و ابنائهم بنفس الطريقة الحمقاء , انهم يأدبوهم بالضرب بالعصايا بشكل مستمر , وهو الشئ اللي هيؤدي حتما لتدمير علاقاتهم الاجتماعية و الأسرية
فبقائك انتي او اولادك معاه , معناها تدمير مستقبلكم فورا , ومعناهه المزيد من العذاب المستمر معاه . .
و من كرم ربنا عليكي ان هو مُصر علي الطلاق , وان هو اللي اتخذ القرار مش انتي , فالذنب في رقبته هو .
ولو أنتي عايشة في دولة بتحترم القانون , كان بتليفون واحد , يجيلك البوليس لغاية البيت , يقبض عليه , ويترمي في السجن سنين طويلة لما يفهم التمن الحقيقي ان شخص يرفع العصايا علي مراته من غير وجه حق .
ارجو انك متغلبيش عاطفتك علي عقلك , وانك تعرفي ان الطلاق هو الخير ليكي و لاولادك
------------------------------------------------------------------------------------
طب ماذا عن الشقة و النفقة ؟ ؟
القانون بيحتم ان في حالة الطلاق , فالزوج ملزم بايجاد شقة مناسبة لطليقته و اولاده , لغاية لما اصغرهم يوصل لسن الـ 18 , وده اللي لازم تعمليه و متسكتيش عليه . .
روحي فورا لمحامي من العيلة او لو تعرفيه , واشرحيله كل التفاصيل , ولو فيه اثار للضرب باينة في جسمك خلي السكيرتيرة تشوفها (بنت اللي تشوفها مش راجل) وقوليله انك عايزة حقك منه بعد الطلاق , وهو النفقة الشهرية + شقة ليكي و لاولادك , سواء الشقة اللي انتو فيها حاليا , او هو ملزم انه يجيب شقة تانية .
وقتها المحامي هيعرف يتصرف , ومش هيغلب , واحنا مش بنتكلم في حاجة صعبة ولا مستحيلة , ده القانون , واللي المحامي هيعرف يتصرف فيه , عشان تاخدي حقك .
لان من ناحية مينفعيش انك تتقلي علي اهلك و هما مش هيقدرو يتحملو المصاريف ديه كلها . .
و من ناحية مش هتخلي اطفالك يسيبو المدارس و يشتغلو صبي ميكانيكي و لا صبي سباك عشان تفتحو البيت .
ده حقك و اوعي تتنازلي عنه , او تكسلي , حتي عشان اولادك .