سُوء الظن
الرسالة السابقة
العنوان : سُوء الظن
القسم: #النفسي
الرقم: 105
السؤال:
بص حضرتك جوزي بختصار شديد احساسه دايما بالي حوليه بيكون سيئ ولما يقول رأي ياما الكل يوافق عليه يا إما الكل يبقا بيكره وقيس ع كدا كل تصرفاته عنده سؤ ظن اقرب جدا من حسن الظن
هو 55 سنه و شغال فني مكانيكي وعندنا 4 اولاد
الاسلوب دع عنده من زمان والمشكلة بيقكون بصعبية و شتيمة
هو مش بيتعامل معايه غير بالضرب انا والاولاد واي حد من الناس زمايل في الشغل مثلا او جيران او اخواته او اي حد ضرب وشتايم واهانه بكل الوسايل
وبعد الاهانه والضرب يعتزر ويقول مش هاتتكرر وترجع تتكرر في لحظه
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي يا فندم . .
زوجك عنده حالة متقدمة من البارانويا , واللي بتجعل حياة كل اللي حواليه يصاحبها معاناة مستمرة . .
و اي حلول لا تتضمن ذهاب زوجك للطبيب النفسي تبقي كلام فاضي , لابد من ذهابه و متابعته مع طبيب نفسي متخصص , عشان يقدر يشخص حالته بشكل كويس ,و يعرفكو تعملو ايه . .
و المشكلة إن أغلب مرضي البارانويا بيكون عنده رفض قاطع لفكرة الذهاب للطبيب النفسي , حتي ان بعض الأسر بيستشيرو الطبيب من غير ما هو يروح , يعني يروحو للطبيب و يوصفو حالته بالكامل , ويعرفو الارشادات المطلوب اتباعها للتعامل معاه , وكمان لو كتب لهم اي دوا معين بحيث ياخده من غير ما ياخد باله (في وسط الأكل مثلا )
و من كلامك ان بقاله سنين طويلة علي نفس الوضع , وانا مندهش ازاي تصبري العمر الطويل ده , ده غير سوء المعاملة و استمرار الضرب و الإهانة ليكي و لأولادك . .
أحيانا الصبر علي الأذي بيكون خطأ في حد ذاته , الصبر علي الظلم شئ مش من الدين ولا من حسن الأخلاق , كان لازم من أول شهر ظهر فيه سوء المعاملة ان يتم الفصل في الموضوع , انه يتعالج او يغير اسلوب معاملته . .
-------------------------------------------------------------------------------
فحضرتك محتاجة تمشي في مسارين بالتوازي . .
-
أولا البحث عن حل لذهابه للطبيب النفسي , فعلا شئ لابد منه , ولو هو رافض قطعا ففكري في فكرة انك تروحي انتي للطبيب و تشرحيله كل شئ عنه , وتعرفي منه الطريقة المناسبة للتعامل معاه , او لو فيه دوا مناسب يقدر الطبيب يكتبه له
- ثانيا انك تحرصي علي تخفيف الضرر الواقع عليكي و علي اولادك , لو فيه طريقة لتجنب الإحتكاك بيه او عدم اثارة غضبه , او حتي الكذب عليه , بالمقدار المعقول اللي يجعله يتوقف عن ضربكم و تعنيفكم بالشكل ده
ربنا يفك الكرب عنكم , ويهديه الي صلاح الحال