عبادة الدعاء
الرسالة السابقة
العنوان : عبادة الدعاء
القسم: #الديني
الرقم: 05
السؤال:
سلام عليكم
زمان لما كنت بادعي كنت باحس بكل كلمة بقولها دلوقتي بحس كانه عمل روتيني بقضيه و خلاص , ده صح ولا لا و هل ربنا هيتقبل مني
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أكيد محدش هيقدر يقول ربنا هيتقبل ولا لأ , هذا شئ في علم الله تبارك و تعالي , ومفيش أي إنسان يقدر يحسمه , عشان كدة هنتكلم في الشق الأول من سؤالك بس
المشكلة اللي بتواجه اغلب الناس مع الدعاء , إنهم مش بيتعاملو معاه علي إنه عبادة من الأساس , ولا علي إنه من أسباب تحقيق الهدف المطلوب
بيتعاملو مع الدعاء علي إنه حاجة تكميلية , او حاجة ابوشن , اتعملت كويس , متعملش عادي . .
ميعرفوش ان الدعاء عبادة كاملة , كما وصفه الرسول صلي الله عليه و سلم في حديث أخرجه الترمذي "الدعاء هو العبادة"
فيه ناس بتنظر للدعاء علي أنه شئ ثانوي , باعتبار ان فيه عبادات مهمة زي الصلاة و الصيام و الحج , وحاجات تانية أقل أهمية , وطبعا ديه نظرة غير سليمة
---------------------------------------------------------------------------
طيب ليه المولي تبارك و تعالي و الرسول صلي الله عليه و سلم أكدو علي أهمية الدعاء بالشكل ده ؟
لأن الدعاء هو أكبر من مجرد كلمات بتقولها لرب العالمين , لكنه عبادة قلبية من الدرجة الأولي . .
في الدعاء قلبك بيتذلل لله , نفس التذلل اللي بيتم ترجمته في الركوع و السجود و الاستغفار و التوبة , نفس الشعور بالنقص و الاحتياج لخالقك , شعور صعب علي كتير من الناس . .
و يمكن ده السبب اللي مخلي كتير من الناس مش بتدعي , هو من جواه حاسس بنوع من الندية , نوع من العزة , بيقيس التذلل لرب العالمين زي ما بيقيسه للناس . .
تلاقيه بيدعي ربنا و نفسه عزيزة , مش هاين عليه يدوس علي كرامته شوية وهو بيكلم خالقه . .
و ديه مصيبة كبيرة . .
حديث مسلم واضح جدا في ده "لا يدخل الجنة من كان في قلبه مثقال ذرة من كبر" يعني وجود اقل مقدار من الكبر يمنعك فورا من دخول الجنة , ده إن كان الكبر علي خلق الله ذنب عظيم , فما بالك بالكبر علي الله . .
الناس اللي مش بتدعي , او اللي بتدعي بعزة نفس , أخشي يكون جواه كبر يمنعه من طلب العون من الله , كبر يمنعه من استغفار الله علي ما اذنب , كبر يمنعه من انه يمرغ انفه في التراب
اوعي تخلط بين عزة النفس الموجهة للناس , وبين العزة في التعامل مع الله , النوع الأول من صفات المسلم الهامة , والنوع التاني يدخل النار فورا و العياذ بالله
الآية في صورة غافر صريحة جدا (وَقَالَ رَبُّكُمُ ادْعُونِي أَسْتَجِبْ لَكُمْ ۚ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ)
العلاقة بين الجزء الأول من الآية والجزء التاني علاقة وثيقة , التحذير من الاستكبار عن العبادة بنار جهنم , كان بعد الترغيب في الدعاء , كدلالة عن إن الغافلين عن الدعاء , ربما يكون هذا من استكبار قلوبهم . .
و بالتأكيد , لم يكن الله تبارك و تعالي ليحذرنا من الاستكبار , مالم يكن هو ذاته أهم عائق من عوائق الدعاء عند المسلمين , استكباره من أن يطلب من الله وأن يذلل نفسه . .
ولهذا جُعل الدعاء في السجود , وهي الحظة التي يمرغ فيها المسلم انفه و جبهته لرب العالمين , لأن الدعاء يحتاج لنفس النوع من التذلل لله الخالق
---------------------------------------------------------------------------
و الناس بتنقسم 3 أقسام في التعامل مع الدعاء , ولو هنرتبهم من الأسوء للأفضل هيكونو :
- من يدعو عند الحاجة
- من يدعو بلسانه
- من يدعو بقلبه
النوع الأول هو الأبعد عن منهج رب العالمين , اللي بيتعاملو مع الدعاء علي إنه للضرورة بس , يعني لما بيكون عنده امتحان مرعوب منه و مش مذاكر فيه , يدعي كويس , لكن لو في مادة تانية مذاكر كويس و مقفل المنهج , خلاص , يدعي ليه ؟ ؟ ما هو أصلا مش محتاج توفيق ربنا في حاجة باعتبار انه مذاكر كويس , هيدعي لما يكون محتاج ربنا , لكن دلوقتي مش محتاجه في حاجة . .
ده اللي بنعمله حتي لو مكناش قاصدين , محدش طبعا يقدر يتفوه بكلمة زي كدة في حق رب العالمين بس ده لسان حالنا جميعا لما ننسي او نتجاهل الدعاء في الأمور اللي احنا شايفين اننا كويسين فيها , وديه مصيبة . .
مصيبة التعامل مع توفيق رب العالمين علي إنك بتحتاجه بس لما مبتكونش قادر علي الموضوع بنفسك ,لكن لما انت بتكون متمكن منه , ومعاك الاسباب , فتقول لتوفيق الله , خلاص مش عايزك , انا هاعرف اتصرف بنفسي . .
و للأسف كلنا بنقع في الخطأ ده من غير ما نحس . .
قارن بين دعائك لما بتروح امتحان مش مذاكر فيه , و لما بتروح امتحان انا مذاكر كويس جدا . .
لما بتنزل مشوار وانت مش عارف هتعمله ازاي , وبين لما تروح لزميل بابا عشان هيخلصهولك . .
بل انك لو مثلا قلقان علي قريبك المريض في المستشفي , فممكن تكون بتدعي ليل و نهار عشان يخف ويكون كويس , واول ما الدكتور يطمنك انه خلاص اجتاز المرحلة الخطر و بقي كويس , دعائك بيتوقف علي طول . .
ديه حاجة بنقع فيها كلنا , ولو دلت فهي تدل علي التعامل الغير سليم مع عبادة الدعاء , ومع احتياجك لرب العالمين
--------------------------------------------------------------
كل ده كان النوع الأول , اللي بيدعو بس عند الحاجة . .
النوع التاني اللي بيدعي علي طول , بس بلسانه وبس . .
و يمكن النوع ده من الناس ليه الحق يندهش هو ليه الدعاء عبادة , وهو ليه مهم اساسا , ما هو فعلا , مش حاسس باي اهمية للدعاء , وبيأديه كنوع من تقضية الواجب . .
هو مجرد مبرمج لسانه علي عدد من الأدعية اللي بيقولها اثناء السجود , ولما يختم الصلاة , و بيكررها هي هي من غير ما يفكر فيها , ولا يعرف هي ايه اصلا , حتي انه ممكن يكون بيدعي بحاجات وقتها خلص خلاص او اتقضت , وهو لسة مش واخد باله عشان لسانه شغال في غياب عقله
و زي ما قلنا من شوية عن إن جوهر الدعاء هو التذلل لله , فأخشي ان النوع ده من الناس , يمارس القدر الأدني من التذلل , لأن قلبه اساسا مش موجود وهو بيدعي , هي مجرد كلمات بيقولها وعقله غايب في حاجات تانية
------------------------------------------------------
النوع التالت بقي اللي عايزين نركز معاه . .
اللي بيكون الدعاء عنده , هو حالة خاصة من التواصل مع الله تبارك و تعالي , تواصل كامل , يعني بيكون بالفعل محضر مع نفسه كدة هو عايز يسأل ربنا في ايه , ويبدأ مع بداية الدعاء يتكلم مع ربنا سبحانه و تعالي بكل راحة و هدوء , ويشكيله المشكلة بالتفصيل ويطلب من المولي تبارك و تعالي الشئ اللي عايزه . .
حتي يا أخي لو هتتكلم باللهجة العامية , مش هيفرق تتكلم مع ربنا بانهي لغة , المهم تقوله كل اللي في قلبك , وتشكيله وهو بيسمع . .
الدعاء عند النوع ده من الناس , نوع من بيكون قناة اتصال مفتوحة و بين العبد و خالقه , هو يتكلم بلسانه و عقله , وينصت بقلبه ووجدانه , و كثيرا ما يشعر بالرد من الله تعالي , في صورة طمأنينة استقرت في قلبه . .
احنا عارفين ان ربنا يعلم بالطبع كل شئ عن مشكلتك , وبالتأكيد ليس لله حاجة في انك تقولها بالتفصيل , انت لما بتقولها مش عشان تقولها لله لانه بالفعل عارفها , لكن عشان تفتح قناة التواصل أكتر مع رب العالمين , و تجعل قلبك علي اتصال به , ونفسك في حالة ذل له
الدعاء عندهم بيكون حالة شعورية ووجدانية, يشترك فيها القلب و العقل معا , ويترجمه اللسان في صياغة كلمات تذلل و ضراعة للخالق , و يتواصل فيه في تكرار و إلحاح حتي يشعر بأن الله تعالي استجاب له . .
ياريت نحاول نبقي كدة , و يكون الدعاء بالنسبة لنا حالة من الاتصال بالله بكل جوارحنا , والاهم القلب , ويكون الدعاء محاط بكم كبير من التذلل لرب العالمين