وسواس الكفر
الرسالة السابقة
العنوان : وسواس الكُفر
القسم: #الديني
الرقم: 21
السؤال:
السلام عليكم ورحمة الله وبركاتة
أنا عندي صحبتي عندها وسواس قهري في العبادات من حوالي سنتين ونصف وبيوصلها لدرجة إنها بتسب الله والعياذ بالله
هي متجوزه وعندها ولدين وبتصلي. حتي هي خايفه تحكي ايه الاشياء اللي جواها بالظبط من ناحية ربنا علشان كثرة الذنب وحاسه إنها كافرة بسبب الإشياء اللي جواها وإنها ماتستهلش نعم ربنا عليها.
المشكلة إن جوزها مش راضي يخليها تروح عند الدكتور لان من وجهة نظر أهله هيضيع فلوسه في التراب.
أنا نفسي أساعدها واخليها ترجع زي الاول وتكون كويسه لكن أنا معلوماتي عن الوسواس محدودة
ياريت لو فيه اي طريقة اقدر أساعدها بيها وتكون كويسة حضرتك تقولي عليها وأنا هعملها بالكامل. بس من غير ماتروح لدكتور لان ده مرفوض من جوزها تماما
هي رافضه تفسر ايه جواها بالظبط.
كل اللي بتقوله دائما انها بتسب الله بداخلها ومش عايزه تقول لانها خايفه لو اتكلمت يبقي ده كفر
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام و رحمة الله . .
علاجها الوحيد الذهاب لطبيب نفسي , و اي حاجة غير كدة يبقي بنضحك علي نفسنا . .
لو كان زوجها عنده من الجهل بما يكفي انه يمنعها عن الطبيب النفسي بحجة ان رمي فلوس في الشارع , فانا عندي انهم ياكلو يوم و يجوعو يوم , ولا إنهم يتأخرو في علاج الوسواس القهري , لأنه شئ مش سهل . .
كمان ممكن تعرفيها ان في مستشفي عين شمس الجامعي , فيه عيادة نفسية باسعار رمزية جدا , هنا الرابط
فانتي ممكن تعملي فيها خدمة , تتصلي انتي بالعيادة و تسألي علي التفاصيل و سعر الكشف , ولو هي وجدت ان السعر معقول , لازم تروح فورا .
خدي بالك وارد ميكونش عنها وسواس قهري OCD وارد يكون شئ مختلف او ميكونش عندها اصلا اي اضطراب نفسي , و مستحيل حد يحسم ده مالم يكون فيه مقابلة شخصية مع طبيب متخصص . .
--------------------------------------------------------------------------------
طيب بعيدا عن الذهاب للطبيب النفسي , يتم علاج الافكار ديه ازاي ؟ ؟
الحقيقة ان اللي عندها شئ مؤلم , يعني هي مش مجرد وساوس بسيطة بتيجي متعلقة بالعقيدة , زي ما عدد مننا بتجيله أحيانا , لأ ده شئ بيوصل لسب المولي تبارك و تعالي في العقل , فهو شئ خطير جدا .
أكيد ليس علي المريض حرج , بس مين اللي يقدر يحدد مدي مرضها قد ايه ؟ وهل بالفعل عقلها مغيب تماما ؟ ؟
كمان الشرع أمرنا بالعلاج من المرض , وزي ما بنجري علي الدكتور لما بيكون فيه مشكلة في الجسم , لازم نجري علي طبيب نفسي لما يكون فيه مشكلة في التفكير و السلوك .
و كنا اتكلمنا بالتفصيل عن الوسواس القهري OCD في رسالة سابقة بعنوان : ثلاث مرات , ياريت لو هي تقدر تقراها ,لانها هتفيدها
واللي فيها شرحنا يعني ايه وسواس قهري , وازاي نفرق بينه بين اعراض تانية قريبة منه . .
والوسواس القهري علاجه مش بسيط ولا سريع , بيحتاج وقت و مجهود , واحيانا مش بيتم علاجه 100 % , لكن الطبيب النفسي بيقدر انه يقلل جدا من مقداره , ومن تأثيره علي السلوك و التفكير .
و غالبا ما بيتجه الطبيب للعلاج الدوائي , بالتوازي مع تكنيك العلاج السلوكي المعرفي (CBT)
و بالطبع العلاج الدوائي مينفعش هي تتناوله الا باشراف طبيب نفسي (حتي مش أخصائي نفسي خريج كلية آداب ) , و العلاج السلوكي المعرفي لابد ان يتم ممارسته من شخص محترف .
فكل الاسهم تشير لاتجاه واحد , انها لابد انها تروح لطبيب متخصص , ولو زوجها لسة رافض يبقي هو بالفعل بيدمرها . .
--------------------------------------------------------------------------------------------
وبالتوازي مع ذهابها للطبيب , ممكن تمشي علي عدد من النصايح , واللي هتفيدها بشكل ما .
تحاول تطرد الوساوس , ان معرفتش يبقي علي الأقل تقلل من الوقت اللي بتفكر فيه , لو كانت بتجيلها 20 مرة في اليوم , تخليها 5 مرات بس , لو كانت كل مرة بتفكر فيها ربع ساعة ,تبقي دقيقتين بس
عارف الموضوع مش سهل ,بس بالتدريب واحدة واحدة هتلاقي ان فيه تقدم
ياريت تسمع محاضرات او دروس دينية , خليها تسمع ابسط و اسهل شئ , مش لازم حاجات صعبة عليها , خليها تبدأ بالشيخ الشعراوي مثلا , وتسمع حلقات الدار الآخرة للدكتور عمر عبد الكافي , وتسمع حلقات علي خطي الحبيب لعمرو خالد (مع إختلافنا الحاد مع عمرو خالد سياسيا لكن سلسلة علي خطي الحبيب فعلا رائعة) . .
سماع الدورس و المحاضرات ديه هيملي جواها فراغ كبير , هو اللي عامل المشكلة ديه , بينما لو بدأت تملي عقلها بالمحتوي الديني القيم , هتلاقي تفكيرها اختلف شوية
خليها تقرأ قرآن كل يوم , مش لازم كتير , خليها تقرأ ولو صفحة واحدة في اليوم , هي صفحة مش اكتر , بس يكون كل يوم , ومتسيبش ولا يوم .
بل ان في أيام الدورة , ممكن تقرأ اللي هي تحفظه من القرآن , وفيه فتاوي انها ممكن تقرأ القرآن من الموبايل , او تسمع قرآن عادي , بس لا يجوز انها تمسك المصحف .
مش عارف هي بتصلي ولا لا , بس لو مش محافظة علي الصلاة فلازم لازم لازم تتمسك بالصلاة , حتي لو الوساوس بتجيلها كل يوم , حتي لو كل ساعة , حتي لو كل دقيقة ,حتي لو الوساوس بتجيلها وهي بتصلي .
ممكن هي تتخيل ان مينفعش تصلي طالما بيجيلها الوساوس ديه , العكس تماما , ده تمسكها بالصلاة هيكون من الحاجات اللي هتساعدها علي التخلص من الوساوس , حذاري انها تترك الصلاة لأي سبب .
خليها تثق ان ربنا رحيم , وانه مش هيعذبها ابدا طالما الوساوس ده رغما عنها , وانه مش هيغضب عليها طالما ده شئ مش في ايديها . .
طالما الوساوس ديه في عقلها بس , فبإذن الله تعالي ليس عليها ذنب , لكن لو هي ترجمت الوساوس ديه لافعال , وجعلت لسانها ينطق بكلام كفر , فهي بدأت ترتكب الذنوب العظيمة ..
لازم تتأكد ان ده شئ مش في ايديها , وخليها متعتقدش ان ربنا هيغضب عليها بسبب الوساوس , الوساوس في ذاتها مش ذنبها , لكن المشكلة هتبدأ لو هي ترجمت الوساوس ديه لاعمال .
لو هي تعرف واحدة متدينة و درست علوم شرعية , فعلا فاهمة في الدين , ممكن تروحلها , وتقولها علي كل اللي هي بتفكر فيه , والاخت ديه هيكون عندها ردود منطقية و عقلانية و دينية لكل الاسئلة اللي في بالها .
لو هي تعرف واحدة دراسة لعلم النفس بشكل جيد , وفعلا متمكنة منه , تروحلها و تقولها انها عايزة تمارس معاها اسلوب العلاج السلوكي المعرفي (CBT) عشان تتخلص من الوسواس القهري OCD , وهي هتقدر تفيدها , لكن اياها انها تكتبلها دوا , ده شئ لابد من طبيب متخصص
الاحسن انها متفتحش الموضوع ده مع اي شخص مش متخصص , لأنهم غالبا هيزيدو الطين بلة .
خليها تنشغل في حياتها الطبيعية بحاجات تانية عادية , سواء حاجات دينية (قراءة قرآن , صلة الرحم) , او حاجات مفيدة (قراءة كتب , اعمال خيرية) , او حتي حاجات هايفة (قراءة قصص , تتفرج علي افلام كوميدي , برامج الطبخ) , علي قد ما تشغل نفسها , علي قد ما شياطين الوسواس هتبعد عنها
اياها انها تفكر في اي لحظة في الانتحار و العياذ بالله , الوسواس مش ذنب لكن الانتحار ذنب رهيب , قد يصل للكفر , اياها انها تفكر في ده ابدا ابدا
انتي كصديقتها , تابعيها اول باول , و متسيبيهاش , ومتنسيهاش , واطمني عليها دايما , ولو لقيتي انها مش بتكلمك , كلميها و اطمني عليها , عشان فعلا حالتها النفسية مش سهلة
ربنا يوفقها يا رب , ويفرج الكرب عنها