العنوان : الوجه الحقيقي

القسم: #العاطفي

الرقم: 21

السؤال:

 

السلام عليكم

انا باختصار كنت باحب واحد بحبه جدا فوق الخيال ومش شايفه غيره كنت باغير عليه جدا وكنا دايما بنتخانق حبيته ومكنتش اعرف ان نيته وحشه او حبني لغرض معين , حتي انه طلب مني حاجات وحشة و طبعا رفضت تماما .

 

وحتي لما عرفت كده للاسف مبطلتش احبه ابدا عمل حاجات كتير اوي فيا كسر قلبي ومشاعري ورغم كده لسه برضو بحبه

 

هو سابني علشان مبقتش اجي علي هواه هو من النوع اللي بيحب يغير البنات دايما بتاع بنات يعني انا حبيته من كل قلبي وبكل حاجه فيا وعرفت عنه حاجات كتير ورغم عن كده مش عارفه محبوش ومش قادره انساه

 

والغريب انه  كان بيتلذذ ف ذلي من كتر حبي ليه وكان دايما بيتخانق معايا ودايما بيشتم بالفاظ وحشه جرح مشاعري ببعده عني انا قعدت 3 شهور بعد ما يعد عني ف السرير مش قادره اتحرك وجالي اكتئاب حاد جدا  وخلاني كرهت الدنيا باللي عليها

 

حاولت علشان انساه اني اتجوز وفعلا اتجوزت بس مش عارفه برضو وانا تعبانه جدا

 

انا اتجوزت بالفعل من شهرين من واحد تاني والحقيقة جوزي محترم جدا ومؤدب وابن ناس وطاير بيا ف السما وبيحبني جدا وبيتمنالي الرضا ارضا رغم انه مشفنيش غير كام مره ايام تجهيزات الفرح بس

 

من وقت ما اتجوزت متواصلتش خالص مع الشاب الاولاني  , انا مش من طبعي الخيانه منكرش اني استنيته يرن او يكلمني بس انا مقدرش اعمل خطوه زي دي ابدا

 

مع اني محجبة و بصلي و متدينة بس مش عارفة مالي فعلا

 

لوفي حل ارجوك فيدني

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله

 

شوفي يا ستي . .

 

باختصار حصل خطأ من البداية من عندك , مع شخص مجرم  ,لكن عشان ربنا بيحبك , فهو بكرمه جعله يبان علي حقيقته , وكمان خلاه يبعد عنك و عن طريقك , لكن لازال عقلك و قلبك متعلق بيه .

 

بالفعل لازم تحمدي ربنا انه جعله يظهر بوجهه الحقيقي قبل اي ارتباط رسمي , وان ربنا قذف في قلبك الخوف منه , وانك موافقتيش الشاب ده علي طلبه , والا كنتي هتنتقلي لمساحة مظلمة وهتكهري نفسك للابد . .

 

بل ان من كرم ربنا عليكي , ان الشاب ده – علي إجرامه – فهو بعد عنك , وانتي متتخيليش قدام هتحمدي ربنا ازاي ان ده حصل , بل انك هتبعتي رسالة شكر للشاب ده , انه رحمك و سابك , وراح يدور علي بنات من عينته عشان يمارس معاهم الفاحشة – ربنا يحفظنا –

 

و من كرم ربنا عليكي انه لم يستجب لدعواتك , اكيد انتي دعيتيه ان الشاب ده يرجعلك , وانه يكون من نصيبك , وانه يتواصل معاكي , ويرجع يحبك زي ما بتحبيه , لكن من رحمة ربنا و لطفه بيكي انه لم يستجب لدعائك , ولو استجاب الدعاء و رجع الشاب ده ليكي بنفس اخلاقه , لذقتي معه المرارة و الجحيم . .

 

انا مندهش من وصفك له , خمورجي و حشاش و بتاع بنات , منتظرة ايه تاني اشارات و علامات من رب العالمين , عشان تعرفي ان الشاب ده هو بوابة الجحيم , ربنا يهديه ويهدينا جميعا يا رب  . .

 

اللي بيعمله الشاب ده , انه بيمسك بايد الواحدة , وبيغطس بيها في اعماق الفواحش و الرذائل , واتمني انه ميكونش داير علي واحدة بنت ناس , وانه ميكونش ادالها  نفس "الطـُعم" اللي عرف يصطادك بيه من شهور  . .

 

لان كتير من البنات للاسف , بيسهل اصطياد قلوبهم , بكام كلمة حلوة , علي شوية اهتمام , علي نظرة حنيه , علي رسالة علي الواتس , ديه خلطة سحرية معروفة لاغلب الشباب , لكن فيه منهم اللي بيخاف ربنا , ومش بيستخدمها ابدا الا مع زوجته عشان يصنع بناء متين من الحب في اطاره الحلال معاها , وفيه اللي بيستخدم الخليط ده , لاعداد طـُعم شهي , يجذب بيه قلوب العذاري الابرياء . .

 

وان كانت البنات المخدوعات ديه , تم جذبهم من قلوبهن , فهو للاسف لا يستهدف قلوبهن بل اجسادهن ومواطن عفتهن , ولا يحرك الشباب ده الا هرموناته اللي بتجري في عروق يملؤها الفاحشة و العياذ بالله . .

 

------------------------------------------------------------------------

 

وان كان النوع ده من الشباب مجرم , فالبنت مشاركة في الجريمة , لان الشاب ده اوغيره , مستحيل يهجم علي بيوت الناس يخطف البنت و يجري , لكن هو بيرمي سنارة العاطفة و الحب , والبنت هي اللي بتسمح لنفسها انها تقترب منه تدريجيا , وهي عارفة ان ده شئ محرم شرعا , ومدمر اجتماعيا  . .

 

المولي تبارك و تعالي لما حرم الاختلاط , وحرم التواصل بين الجنسين الا لشئ مهم ,  ان التواصل ده يكون بإطار محدد , واسلوب جاد , فالتحريم ده مكانش من فراغ , لكن لانه سبحانه يعلم ضعف النفوس , وهشاشة القلوب , خاصة للفتيات , آنسة , او مطلقة او أرملة , او حتي متزوجة . .

 

قلب الست مهما كان ضعيف , ومهما كان يسهل احتوائه , واحنا كشباب عندنا المقدرة اننا نصطاد قلب اي بنت , بس الفرق بين شاب بيخاف ربنا  ,انه مستحيل يعمل شئ فيه غضب الله , ومش بيتواصل مع اي بنت الا لشئ مهم , ويكون بالاطار المذكور , بينما النوع التاني من الشباب , فهو بيتعامل مع البنت تعامل الصياد مع الفريسة , اللي بيعمل المستحيل عشان تقع في الشبكة . .

 

فلازم نكون واضحين , هو مجرم و انتي غلطانة , الغلط بدأ من الشات , وطلب الصداقة , وانك تسمحيله انه يقتحم حياتك بالشكل ده , وانه تجعلي قلبك يحبه  ,قلبك مكانش هيحبه ابدا لو انتي كنتي قدرتي تمشي علي الخط اللي رسمه لنا الرسول صلي الله عليه وسلم في تعامل الشباب مع البنات . .

 

ياريت تقري الرسالة ديه بعنوان : اقتحم حياتي , لان فيها شرح تفصيلي للنقطة ديه

​

 

انا مش باعمل جلد ليكي ,انا باحط النقط فوق الحروف , عشان تكوني عارفة اللي ليكي و اللي عليكي , ومن كرم ربنا عليكي انه لم يتركك للمصير الاسود اللي بتروح فيه كتير من البنات , واللي مشيو في نفس الطريق ده .

 

ربنا من حبه ليكي جعلك تشوفي الوجه الحقيقي للشاب من الاول , وجعله هو "يزهق" منك , ويروح يشوف بنت تانية , و ربنا اعطاكي فرصة هايلة انك ترجعي تاني لطريقه , وتمسحي كل اللي حصل فورا .

 

 

 

نوصل للسؤال المهم , انتي ليه اساسا بتحبيه بعد ما شفتي منه الوجه القبيح ؟ ؟

 

يعي انتي اكيد مندهشة من نفسك , ازاي انا كفلانة بحبه بعد ما شفتي منه المصايب ديه, وبعد ما طلب منك ابشع شئ في الكون ؟ ؟

 

الاجابة سهلة , لان اللي حبه هو عقلك الباطن مش عقلك الواعي . .

 

يعني ايه العقل الباطن و العقل الواعي ؟  ؟

 

اكنا اتكلمنا بالتفصيل عن الفرق بينهم في رسالة : أطياف الماضي  ,  ياريت تقريها

​

 

و السبب اللي جعل عقلك الباطن يحبه و يتمسك بيه , هو تعطشه الرهيب للحب و الاهتمام و الرعاية , واللي هو قدمهالك من البداية , كعربون محبة عشان يقبض التمن قدام . .

 

ولما شاف ان مفيش منك امل انك تطاوعيه في رغبته , سابك فورا وبدأ يشوف غيرك .

 

و مشكلة عقلك الباطن , انه مش بيفكر بالمنطق او العقل , لكن باسلوب "انا عايز من ده" , ومن غير اي تفكير منطقي او عقلاني . .

 

كنا وصفنا قبل كدة العقل الباطن , بطفل عنده 12 سنة  , لا هو طفل صغير نعرف نضحك عليه بكلمتين , ولا هو بالغ فاهم , هنعرف ناخده بالاقناع , لا هو بيجمع بين رغبات ملحة , واسلوب غير منطقي في التفكير .

 

يعني متتعجبيش لما تشوفي طفل في السن ده , بيعيط عشان عايز يسافر الغردقة دلوقتي حالا , حتي لو كان امتحانه بكرة , هو كطفل لسة مش مؤهل انه يفكر بالمنطق .

 

نفس الموضوع لعقلك الباطن , اللي انتي مندهشة من تمسكه بيه , هو متمسك بالشاب ده من الحب و الحنان و الاهتمام اللي شافه منه , واللي بيظن انه هيستمر للابد لو كنتي اتجوزتيه . .

 

بينما عقلك الواعي بيتعامل مع الحياة بتفكير منطقي وعقلاني , وهو عارف ان ده انسان زبالة , مفيهوش اي شئ يناسبك .

 

بس المشكلة ان انتي منصتة لعقلك الباطن , ومش عايزة تسمعي لعقلك الواعي , واللي بيحاول يفهمك الصح من الغلط

 

------------------------------------------------------------------------------

 

و التعامل مع العقل الباطن بيكون بمزيج من كذا حاجة مع بعض , وهي غالبا نفس الطريقة للتعامل مع طفل عمره 12 سنة

 

يعني شوية من المسايسة و محاولة الاقناع , وانك تتكلمي معاه بالراحة .

 

مع شوية اجبار علي قبول الشئ الصح , حتي لو مش عاجب عقلك الباطن  .

 

مع شوية من تجاهل انك تسمعيه اساسا , وتقوليله : اخبط راسك في اتخن حيط .

 

مع شوية من انك توافقيه في حاجات معينة (حاجات عادية مش حرام ) , يعني مثلا ضربت في دماغك النهاردة مش هروح الكلية , وعايز اروح اكل رز بلبن من المالكي في المهندسين , ماشي مش ازمة , الكلية مش هتموت لو مرحتيش في يوم , وهكذا .

 

فرويد كان قال كلام يشيب في وصف العقل الباطن , ولو انتي قريتي كتب ليه , هتفهمي قصدي تماما . .

 

و الاذكياء هما اللي بيقدر يعملو مسايسة لعقلهم الباطن , و ياخدو و يدو معاه , بس ميسمعوش ابدا كلمة ليه لو حاجة خطيرة .

 

و غير الاذكياء هما اللي بيعملو حاجة من اتنين . .

 

اما انه يمشي علي كلامه علي طول الخط , وده اللي ممكن نسميه "هوائي" , او "مزاجي" , وبالتالي معندوش اي وازع او تفكير , و بيعمل اللي بييجي في دماغه  فورا .

 

او انهم يعملو كبت كامل لكل اللي بيقوله عقله الباطن , حتي لو شئ مباح او مفيهوش ازمة كبيرة , والخوف ان النوع ده من الناس يحصلهم انفجار من الكبت الرهيب .

 

محدش يعمل شئ حرام او غلط يأمره بيه عقله الباطن , لكن لا بأس في الحاجات العادية , حتي لو شكلها مش مناسبة , مثلا الواحد يخرج الساعة 1 ص يجيب بيتزا و ياكل درة مشوية , او تضرب فكرة في دماغك تاخد اجازة اسبوع من شغلك و تروح الاقصر تتفسح هناك و ترجع تاني , وهكذا .

 

و هنا شرحنا تفاصيل رسالة مشابهة  للي قلتيه هنا , بعنوان  : بحب زميلي الصايع 

​

------------------------------------------------------------------------------

​

طب عايزين حل دلوقتي . .

 

اعمل ايه عشان اكره الشخص الزبالة ده , وارجع بنت طبيعية زي خلق ربنا ؟ ؟

 

هنقولك هنا عدد من النصايح , واللي شايفين انها هتفيدك ان شاء الله , انك تتخلصي من اثار الانسان ده من قلبك , وتلتفتي لبيتك و زوجك و حياتك

 

 

 

• لازم تتعاملي مع عقلك الباطن بنوع من الخشونة والجدية ممزوجة بالاقناع و محاولة افهامه  , و تعرفيه ان هو اصلا كان بيمثل ده كله , ومكانش بيحبك و لا كان هيحبك , كل اللي كان بيعمله ده كان عشان هدف قذر  ولما وجد ان مفيش امل سابك .

 

 

• الخطوة الاولي ديه مش سهلة , محتاجة زي ما قلنا مسايسة , مع اقناع , مع شوية شدة , مع شوية هدوء , مع شوية قسوة , وهكذا , تخيلي بالظبط انك مسؤولة عن طفل عمره 12 سنة  , وبتتعاملي معاه , بكل غلاسته و عناده و عياطه .

 

• حاولي تتوقفي عن التفكير فيه , عارف انه صعب بس حاولي , علي الاقل قللي من التفكير فيه , لو كان ساعتين في اليوم يبقي نص ساعة , لو كان كل يوم يبقي مرتين في الاسبوع , وهكذا , عارف صعب بس مش مستحيل , اي حد بيجاهد نفسه عشان الخشوف في الصلاة هيبقي فاهم ازاي يقدر يتحكم في خط تفكيره اثناء الصلاة .

 

 

• طب لو انتي غصب عنك بتفتكريه , ساعتها مارسي ما يسمي "الارتباط الشرطي" اللي شرحها بالتفصيل بافلوف في تجربته المشهورة , انك تعملي في ذهنك ربط بين سيرته , وبين تلات حاجات بشعة (الزنا , الخمرة , الحشيش) , فكل ما تفتكريه , افتكري التلاتة دول معاه , متفكريش في الكلام الحلو و الاهتمام و الاحتواء من عنده , افتكري بس التلات حاجات دول , وشوية شوية هتلاقي نفسك مش طايقاه

 

 

• استكمالا للنقطة السابقة , وعشان تقدري تنسيه , حاولي متروحيش اي مكان يفكرك بيه , او متعمليش اي شئ يكون ليه ذكري معاه , حتي لو شئ متعلق بفستان هتلبسيه لو اكل هتاكليه , الاشياء بيكون ليها قوة مدمرة في اجترار الذاكرة , واحنا عايزين نقطع اي سبيل انك تفتكريه تاني

 

 

• لازم لازم لازم لازم تقطعي اي سبيل للتواصل معاه , اي طريقة انتي سايباها للتواصل معاه هي باب من ابواب جهنم , اي تليفون هو عارفه يترمي فورا , لو اكونت علي الفيس او الواتس يتمسحو , اياكي تتواصلي معاه او تسيبي اي باب مفتوح  .

 

 

 

• مش محتاج اوصيكي بالتقرب من ربنا , لان باين من كلامك انك علي وعي كامل باهمية البند ده , وان انتي من جواكي فيه وازع ديني كبير , ربنا يتقبل منا و منكم .

 

 

 

• النصيحة الأهم : انك تلتفتي للكنز اللي قدامك , واللي انتي مش شايفاه و مش مهتمة بيه , وهو زوج بيخاف ربنا و بيحبك  وبيعمل المستحيل عشانك .

 

 

 

معنديش كلام تاني اقوله  ,الكورة في ملعبك , وانتي اللي تقدري تصلحي المشكلة لو عايزة

 

ربنا يوفقك و يرعاكي يا رب

​