العنوان : نسيان الماضي

القسم: #العاطفي

الرقم: 05

السؤال:

 

مشكلتي أنا كنت بحب واحد بجنون وعايزه انساه

 

مع العلم اننا لسة قربين من بعض اوي

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 من غير ما توضحي ايه سبب الحب , او سبب انك عايزة تسيبيه , او مين فيكو اللي عايز يسيب مش هنعرف نفيدك ابدا . .

 

و قلنا كتير ياريت نبعت تفاصيل كاملة عشان نقدر نقول كلام دقيق , لان رغما عنا مش هيكون الحل دقيق و متناسب مع الموقف طالما احنا بنفتقر لمعلومات كاملة  . .

 

لكن خليني اقول كلام عام هيتناسب مع اغلب الحالات من اللي ممكن تكون عندك , واتمني انك تنفذيها . .

 

ليه بقول كدة ؟ لان 90 % من البنات اللي بيكونو عايزين ينسو اللي بيحبوهم , معندهومش ارادة حقيقية لده  . .

 

اكبر مشكلة لما البنت تدخل نفسها في ارتباط و تجعل قلبها يحب نوعين من الاشخاص بالتحديد  :

 

•  

  اما اللي فيه استحالة او شبه استحالة انها تتجوزه , يعني شخص متجوز اصلا و زواجه مستقر و عنده عيال , او شخص خاطب و بيحب خطيبته  , او واحد اعزب ايوة بس اغني منها بكتير , او شخص في دولة تانية و هي عارفة ان محدش فيهم هيسافر للتاني , او شخص من ديانة مختلفة , وهكذا
   
  فلما تجعل قلبها يرتبط بشخص فيه صعوبة شديدة في الزواج منه , هي بتقتل نفسها ببطئ , و بتدخل كيانها بالكامل في دائرة لن تنتهي من العذاب المستمر , واللي هتحتاج شهور طويلة للتخلص منه . . .
   
  واللي يغيظ في حالة ان هو مخباش عليها حاجة بالفعل , يعني هي عارفة من اول اتعرفت عليه انه متجوز و معاه عيال , او انه عايش في بلد كذا و مش هيجيلها  , او كذا او كذا , وبالرغم من ده , هي سايبة نفسها في المنحدر الاستسلامي اللي هي مستلذة بيه في البداية , وهي مخدرة بالامل الكاذب اللي مش هيحصل, الي ان تصل لنهاية الطريق و تفاجئ بالواقع المؤلم انه بعد ما بيخلص الشات معاها , انه بيروح لمراته عشان يكلمها بحب و حنان , وعياله عشان يلعب معاها , فهو يضحك و هي تقطعها نيران الغيرة و الحسرة . .
   
  وهو ان كان مخطئ في انه اتكلم معاها باسلوب لين و لطيف و فتح الباب شوية , فهي المخطئة اكتر في التعلق اساسا بشخص هي عارفة انها مش هتتجوزه , وسمحت ليه بدخول قلبها بموافقتها

 

 

•  

  النوع التاني واللي بيكون فيه شوية خداع من طرف الشاب , وهي المتلازمة اللي جبنا سيرتها اكتر من مرة اللي اسمها (شاب بيتسلي – بنت مخدوعة) , وهي لما تبدأ تعجب ثم تحب شاب اعزب , و هو يوعدها بالزواج بس لسة بيكون نفسه , وانه اكيد هييجي البيت يخبط علي الباب , وشهر العسل هيكون في دبي , وبنتنا الاولي هيكون اسمها مريهيان ولا شاهيناز , ويقعدو يبنو في قصور من الرمال . .
   
  وهوب لما هو يتشبع منها و يزهق , يبدأ يخترع حجج مقنعة في البداية بعدها مش هتكون مقنعة  , كرد علي السؤال الخالد : هتيجي تقابل بابا امتي , و يبدأ يتهرب واحدة واحدة لغاية لما يختفي  . .
   
  هنا و ان كان الشاب اكثر اجرام و دناءة و خسة  منها , الا انها مش بريئة تماما , لأنها في الاصل المفترض مكانتش تسمح لقلبها انه يتشابك خيوطه مع شاب الا لما يكون بالفعل جاد و بتاع كلمته , وجاي علي البيت من بابه . .
   
  لكن من اول ما تشوف حججه و تسويفه و تهربه , كان لازم هي ترفع ايديها منه فورا , وتلحق تطلع من فخ هذا الحب الغير سوي , وهي لسة علي البر , قبل ما تحبه اكتر , و قد يصلو لمدي يصعب الخروج منه . .
   
  بعض الشباب بيعمل ده لمجرد التسلية بان واحدة لطيفة بتحبه ,  و البعض الأكثر خسة بيعملو لاسباب تانية ربنا يحفظنا منها  . .
   
   ---------------------------------------------------------------------------------------

 

 

 

لانك لما تحبي شخص متجوز , رغما عنه حبه لمراته و اولاده هيتأثر سلبا ,  و رغما عنه  هيكون فيه نوع من رد الفعل العاطفي منه , واحيانا تصل حالة الجنون بينهم لارتكاب الفاحشة , لصعوبة تحقيق الزواج . .

 

هل انتي ترضي انك تكوني مجرد "شئ" هو بيتسلي فيه و يفرغ فيه هرموناته ,  و في نفس الوقت  , يكون اول مسمار في نعش بيته و استقراره ؟ ؟

 

لو ان فيه موافقة علي التعدد عندك و عنده و عند زوجته الاولي  ,يبقي يتم الموضوع فورا , لكن لأن ده نادرا ما بيحصل , وان اساسا الراجل المتزوج لما بيعجب بواحده دماغه مش بتروح للزواج منها لكن لاشياء اخري  .  .

 

 

والنوع التاني لما تحبي انسان معندوش اي احساس او مسؤولية او رغبة حقيقية في تكوين بيت و اسرة , فانتي بتضيعي وقتك و سمعتك و اخلاقك ودينك .

 

وغير ده كله بتصنعي جرح غائر في قلبك لن يلتئم بسهولة . .

 

------------------------------------------------------------------------

 

نوصل للسؤال بتاعك  , انتي عايزة تنسيه صح  ؟ ؟

 

اهم من اجابة السؤال , يكون عندك ارادة حقيقية لنسيانه  , لاني اخشي ان كتبر من البنات بيقولو الكلمة ديه  ,بس من جواهم عايزين يظلو للابد في العلاقة الغير سوية ديه . .

 

ثقي انك لو جواكي ارادة حقيقية لنسيانه فهتنسيه , ولو مفيش الارادة ديه , فانتي هتظلي ترقصي علي السلم طول عمرك , لا هتتجوزيه , ولا هتتجوزي انسان محترم تاني عايزك شريكة لحياته . .

 

نسيان الشخص اللي انتي عارفة انه مش هيتجوزك مهمة عاجلة و ضرورية  , لأنك بتطهري قلبك من بقايا تواجده , واللي هتمنعك فورا من التفتح للدنيا , ومن انشاء علاقة سليمة و صحيحة مع ابن الحلال اللي عايزك معاه العمر كله رفيقه لكفاحه . .

 

ان ظل في قلبك  آثار قديمة (من الاخ المتجوز او الاخ اللي بيتسلي) فهتظل تنغص عليكي اي علاقة سوية تحاولي تنشئيها مع خطيبك  , وهو فورا هيكتشفها او هيحسها حتي لو انتي مقلتيش اي شئ , و كرامته مش هتسمحله انه يكمل ابدا مع واحدة قلبها مشغول بالفعل . .

 

ان ظل في قلبك  آثار حتي لو قليلة  ,فممكن تنغص عليكي حياتك حتي بعد الزواج , لما يحصل اي نوع من المشاكل العادية اللي ممكن تحصل في اي بيت , هتلاقي قلبك رغما عنكي بيقارن ما بين زوجك اللي بيزعق فيكي , وبين حبيب القلب القديم اللي كان احسن انسان في الكون , زي ما خيالك مصورلك . .

 

ازالة كل اثار من الحب القديم شئ بالغ الاهمية عشان تعرفي تواصلي حياتك بشكل صحي و سليم , وتكوني زوجة وفية و ام سوية . .

 

انك تنسيه مش امر سهل , اي مدمن ممكن يحكيلك قصص عن ما يسمي "اعراض الانسحاب" يعني الألم اللي فوق الوصف اللي بيعاني منه لما يقرر انه يسيب المخدرات , اي حد ساب السجاير يقولك كان ممكن يعمل ايه عشان يرجع لنفس واحد , خاصة في الايام الاولي . .

 

اللي قدر يستحمل معاناة اعراض الانسحاب , و قدر يصبر الكام شهر علي ما دمه تخلص بالكامل من اثار الأذي اللي كان فيه , هو ده الشخص اللي نقول عليه ناجح , ويقدر يبدأ حياته بشكل سليم من جديد

 

اللي انتكس و رجع تاني بعد كام يوم من الاقلاع , هيظل في نفس الدوامة بشكل مستمر

 

 

 

1.  

   اكيد اول خطوة انك تقطعي اي تواصل بينك و بينه , مستحيل تقدري تنسيه وانتي بالفعل بتشوفيه اما فعليا وجها لوجه , او اونلاين , فيس ولا واتس ولا سناب . .
    
   مفيش اي خطوة من خطوات النسيان هتنجح وانتي بتجعلي نفسك في مواجهة و احتكاك معاه ابدا , حتي لو مش بتتكلمو  , ديه اوهام
    
   رغما عنك لو حاولتي تنسيه باي طريقة , وبعدها شفتيه في النادي ولا الكلية ولا النقابة ولا اونلاين علي الماسنجر ولا في اي حاجة , عقلك هيفكر فيه , وقلبك هيتحرك تجاهه , خاصة انك بتحبيه بجنون زي ما انتي وصفتي في رسالتك . .
    
   الحاجات اللي ليكي قرار فيها اقفليها فورا (نادي , كافيه , فيس , واتس ,انستاجرام ) , والحاجات اللي مفيش فيها بديل (الكلية  , الشارع) يبقي تجاهليه تماما و ياريت يكون معاكي صديقتك عشان تنشغلي

 

 

1.  

   بعض الساذجات والحمقاوات (سامحيني في اللفظ) لما بيسيبو "الكراش السابق" بيحاولو "يشطشطوه" , و يغيظوه , اما عن كطريق ان يكون فيه كراش جديد ليها , او حتي انها تكون بتضحك و لابسة و متزوقة و فرحانه , وتتعمد ان ده يحصل قدامه , وانه يشوف الكلام ده , وان صورها و هي بقها بيضحك من الوريد للوريد يشوفها علي الفيسبوك , كنوع من تطبيق كلمات شيرين (انا بيك من غيرك مش فارقة)  وزي ما عملت مديحة يسري مع محمد فوزي في الفيلم القديم . .
    
    وليه بقول ساذجات و حمقاوات ؟
    
   لانه ببساطة مش فاهمة انها كدة بتدخل قلبها اعمق و اعمق في علاقة جديدة معاه , بس بدل ما كانت علاقة حب و اعجاب قبل كدة , دلوقتي بقي تنافس و تطاحن  . .
    
   هي فاكرة انها كدة هتنساه ؟  فاكره انها كدة بتشيله من دمها ؟ ؟
    
   هي – لا شعوريا – بتدفع في عروقه دماء الغيرة و الغضب , ونفسها من جوة انه يجيلها و يكلمها و يصالحها و يرجع لسفاهته القديمة معاها , هي عايزة كدة بس مش معترفة  . .
    
   ارجو ميكونش ده في مخططك , انا بقول انسيه مش غيظيه ولا تشعلليه ولا تنتقمي منه , انسيه يعني انسيه , يعني اصلا ميكونش في ذاكرتك . .
    
   يعني يكون بالظبط زيه زي "اسلام عبد اللطيف " , مين هو اسلام عبد اللطيف , معرفش , انا عن نفسي معرفش اي حد بالاسم ده وانتي متعرفيش اي حد بالاسم ده , صح ؟ ؟
    
   اهو انا عايزك بقي يكون اخينا الكراش ده  ,زيه زي اسلام عبد اللطيف بالظبط , متعرفيش اساسا اي حد بالاسم ده , يختفي تماما من ذاكرتك , تتمسح كل ذكرياتك الحلوة و المهببة معاه , عايزك "تنسيه"

 

 

1.  

   ببساطة انشغلي . .
    
   الفراغ هيفكرك بالماضي , والانشغال هيخليكي مش فاضية تفكري فيه  . .
    
   يعني ايه ؟ يعني اعملي قايمة حلوة طويلة كدة , بعدد من المهام المفيدة , والمسلية  وحتي الهايفة (بشرط متكونش حرام او فيها اذي لحد)  . .
    
   و القايمة ديه تخليها في جيبك , اول ما تلاقي نفسك فاضية , والشيطان محضرلك وجبة دسمة من الوساس و الهلاوس , فورا تفتحي القايمة و تعملي حاجة فيهم . .
    
   عندك بقي زيارة قرايبك , علي قراية كتب و روايات , علي تشوفي حاجة مفيدة علي ناشيونال جيوجرافيك , علي تتعلمي ايلتس , علي كورس كومبيوتر , علي ملجئ ايتام , علي التطوع في جمعية خيرية , علي تحفظي شوية قرآن , علي تتصلي بصاحبتك المحترمة و ترغي معاه شوية (من غير ما تجيبو سيرة حد) , علي تتابعي اخبار ليفربول و ابو صلاح ايه , علي يا تري انجلينا اتطلقت ولا لسة من براد . .
    
   مش لازم كل الحاجات تبقي حاجات مفيدة و هادفة , مفيش مشاكل من حاجات هايفة بس تكون حلال . .
    
   علي قد ما تنشغلي علي قد ما عقلك هيتملي و مش هيكون فاضي للهيافات  , والـ (overthinking)

 

 

• دبسي نفسك في حاجات مفيدة . .

 

 

 

 

• اياكي و الانعزال . .

 

 

 

• اياكي و قفل قلبك . .

 

 

ديه مجموعة من الخطوات , لو نفذتيها , فثقي ان حالك هيتغير تدريجيا , وانك هتلاقي نفسك بقيتي في شكل مختلف