العنوان : المشاعر الكاذبة

القسم: #النفسي

الرقم: 24

السؤال:

 

السلام عليكم انا مشكلتى انى بشكك فى مشاعرى

 

يعنى لو حصل موقف يدايقنى الاقى نفسى بقول لنفسى بطلى هبل انتى هتمثلى انتى مش مدايقه بس فعلا ببقى مدايقه من الموقف جدا

 

بس بيبقى جواايا صوتين صوت موجوع وبيلوم وبيتوجع من الموقف وصوت يقول انى بمثل وان دى مش مشاعرى الحقيقيه

 

واغلب الصدمات والمواقف بستقبلها بهدوء وعدم استيعاب وبشتت عقلى انه يفكر فيها

 

زى خبر وفاه زميلتى المقربه وفراق حد عزيز عليا باخد الموقف "بتبليمه" ممكن اعيط لحظه وخلاص وبيبقى الحزن متخزن جوايا ويطلع بعدها بفتره شهر لحد سنه

 

وزمان كان ممكن احزن لفوق السنتين تلاته

 

معرفش ايه الحل فى ده سواء الصوت اللى بيكذب مشاعرى او امتصاصى للصدمات من غير رد فعل وبيظهر متأخر

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله

 

من النادر لما طبيب او أخصائي نفسي ,يكون عنده قلب انه يشخص حد من مجرد قراءة اعراض , لان التشخيص محتاج بالطبع اكتر من كدة  ,لابد يقابله , ويتكلم معاه و يعمل مجموعة من الاختبارات المختلفة معاه . .

 

لكن خليني اقول ان كل اللي بتقوليه يتشابه جدا مع اعراض حالة نفسية مش مشهورة , وليها اسم غريب شوية هو "لا مفرداتية"   و اسمها بالانجليزي (Alexithymia ) , وممكن نسميها بالبلدي "نقص المشاعر" . .

 

وزي ما قلتلك , مينفعش حد يشخص مرض او حالة نفسية بمجرد سماع كلام , لكن بالفعل أعراض الحالة ديه تتطابق بشكل كبير مع النقطتين اللي انتي ذكرتيهم وهم (تذبذب المشاعر بين نقيضين, برود المشاعر لدي احداث الاخرين) . .

 

ولو هنحاول نوصف ايه معني الشئ اللي اسمه "لا مفرداتية" , فممكن نقول انه بيصنع  حاجتين مهمين في الشخص . .

 

أولا انه بيعمل صعوبة في تحديد المشاعر في الاساس عند الشخص  . .

 

ثانيا بيكون فيه صعوبة في وصف المشاعر للأشخاص الآخرين لأن قدرة الشخص على التعرف على مشاعره الشخصية بتكون أقل . .

 

وكأن الحالة ديه "لا مفرداتية" بتتسبب في عرقلة فهم المشاعر الحقيقية اللي انتي حاسة بيها , وفي نفس الوقت صعوبة صياغة مشاعر حقيقية في مواقف يتعرض ليها الناس . .

 

 وديه بالتحديد النقطتين اللي انتي ذكرتيهم في رسالتك , تذبذب مشاعرك , و صعوبة الاحساس بمشاعر معينة في مواقف فرح او حزن . .

 

والطبيب النفسية الامريكية الدكتورة "ديبورا سيراني" كانت بتسمي الحالة ديه "العمي العاطفي" لانها شايفة ان الانسان اللي عنده الحالة ديه هو معندوش القدرة علي رؤية مشاعره الحقيقية او مشاعر الآخرين

 

كمان هي عملت من 4 سنين مقال مهم عنها , هننقل جزء منه هنا   :

 

( البعض لا يستطيعون التعبير عن مشاعرهم وأفكارهم بالكلمات. ليس لأنهم لا يرغبون بذلك، بل لأنهم لا يعلمون كيفية ذلك فعلا.

 

المصطلح الطبي لهذه الحالة هو “اللامفراداتية- alexithymia ” وهو يصف عدم المقدرة على تمييز العواطف بشكلها الدقيق.

 

اللامفرداتية تفقد المرء مفتاح القدرة على التعرف على مشاعر المرء نفسه ومشاعر الآخرين. إليكم بعض أعراض اللامفرداتية:

 

• صعوبة في تحديد أنماط المشاعر المختلفة

• فهم محدود لأسباب المشاعر

• صعوبة في التعبير عن العواطف

• خيال محدود وجامد

• نمط تفكير ضيق

• فرط حساسية فيما يتعلق بالأحاسيس الجسدية

• علاقات منقطعة أو شبه منقطعة بالآخرين                )

 

انتهي كلام البروفيسيرة ديبورا . . .

 

وهنا رابط المقال علي موقع (scientific american) لو انتي كويسة في الانجليزي . .

​

أؤكد تاني محدش يقدر يحسم هل عندك بالفعل ولا لا , لازم زيارة طبيب متخصص . .

 

-------------------------------------------------------------------------------

 

و خدي بالك من حاجة مهمة , اللا مفرداتية ديه مش مرض ولا اضطراب نفسي , ديه حالة , مش اضطراب , وفيه فرق  . .

 

نفس الفرق بين شخص عنه حساسية من البنسلين , وشخص تاني عنده الحصبة . .

 

اللي عنده حساسية ده شئ موجود فيه و مش هياثر علي صحته ولا حاجة , لكن اللي عنده الحصبة لو متعالجش منها هتبهدله . .

 

فاللي عندك (مش متأكدين لسة هو عندك بالفعل ولا لا) هي حالة , مش اضطراب او مرض نفسي . .

 

بس مع كدة , هي حاجة مش كويسة , وهي حاجة ممكن تتسبب في أذي و ضرر في المدي القريب  و البعيد  . .

 

بالنسبة للمدي القريب , فالتذبذب المستمر في مشاعرك  و عدم رؤيتها الحقيقية , ده هيتسبب عندك في حيرة كبيرة , والم نفسي مستمر , وصراع في عقلك هو ده صح ولا ده صح . .

 

كمان في المدي القريب , عدم التعبير عن مشاعر مناسبة في المواقف مع الاصدقاء او الاقارب , هيتسبب اما بعمل انطباع سلبي تجاهك عندهم , انك مستهترة او باردة او "مش طبيعية" , او تضطري انك تغيبي عن الافراح و الاحتفالات و مناسبات العزاء , وانتي كدة بتقطعي في علاقاتك الاجتماعية و صلة رحمك . .

 

وعلي المدي البعيد , استسلامك للحيرة المتزايدة في عقلك وارد يصيبك لاحقا بـ "اضطراب الاكتئاب" , او "اضطراب ثنائي القطب"  اللي الناس بتقول عليه شيزوفرينيا , بس ده شئ تاني  . .

 

كمان ممكن يدفعك بشكل مستمر للانطوائية و العزلة المستمرة , واللي هتكون بداية لسلسلة من المتاعب النفسية الطويلة . . 

 

ربنا يحفظك من كل ده  , بس انا بارسم الصورة القاتمة الممكنة , عشان اعرفك اهمية علاج الموضوع ده  , ومتكسليش . .

 

----------------------------------------------------------------------

 

طب ايه علاجه ؟ ؟

 

لاحظي اننا مش متأكدين هل هو عندك ولا لا بالفعل , وبالتالي اول خطوة هو التأكد , وده محتاج زيارة طبيب نفسي متخصص . .

 

روحي و اعرضيله كل التفاصيل اللي انتي بتحسي بيها , وشوفي هيقولك ايه . .

 

لو هو بالفعل قالك علي "اللا مفرداتية" يبقي احنا واقفين علي ارض صلبة , ونبدا نشوف معاه ايه حلها . .

 

 و في حالة انه قال شئ مختلف , فانتي ممكن تساليه , باعتبار انك شاكة هل اللي عندك هو اللا مفرداتية ولا لا , ولو هو نفي وجودها يبقي فيه شئ مختلف , هو شافه من الاختبارات و الاسئلة اللي سألهالك . .

 

فذهابك للطبيب خطوة اساسية لابد منها , و استسلامك للحالة اللي عندك هو استمرار لمعاناتك . .

 

و الدكتورة ديبورا اقترحت عدد من الخطوات العلاجية , في حالة ان اللي عندك هو بالفعل اللا مفرداتية  . .

 

• لازم كل اللي حواليكي يعاملوكي بشكل فيه اهتمام و رعاية اكتر , لأن أحيانا المصاب باللا مفرداتية بيكون بسبب نقص الاهتمام بيه من الصغر

 

 

• قراءة الروايات : لان فيها قدرة مميزة علي اكساب القارئ العواطف و المشاعر بشكل سليم

 

 

• تعلم و ممارسة الفن : سواء (رسم , أدب , كتابة روايات , تصميم , . . . ) لان اثناء التعلم او الممارسة , عقلك بيعمل صياغة مستمرة لعواطفلك و يهيئها بالشكل المناسب . .

 

 

• الكتابة في اي مجال او موضوع  , لما تيجي تكتبي مقال او قصة او راي او حتي منشور طويل علي الفيسبوك , عقلك رغما عنك هيبدأ يرتب المشاعر و الاحاسيس بشكل سليم , و يكون عندك نوع من الصياغة العاطفية السليمة , وده بيفيد بشكل كبير

 

 

• الاسترخاء  , سواء بتمرينات اليوجا او غيرها , مجرد انك توقفي عقلك عن التفكير وجسمك يكون في حالة راحة كاملة , لمدة معينة يوميا  ,ده بيساعد عقلك علي التعامل بشكل افضل مع كل شئ في حياتك

 

 

 

 

ارجو انك متكسليش , ومتتردديش انك تروحي للطبيب فورا, وتتابعي معاه و تشوفي ازاي تتغيري من جواكي