العنوان : الخطأ الصغير

القسم: #الاجتماعي

الرقم: 42

السؤال:

 

انا ف الشغل دي ليا سنه عندي مشاكل كتير بسبب واحد هو السبب ف شغلي ف المكان دي وهو غالي عليا لانه ساعدني كتير ووقف جانبي بس من فتره حسيت انه متغير فسالته قالي مفيش

 

هو متزوج وعنده اطفال وتعرف ع واحده وحبها وبدات معاها الحكايه فكان بيكلمها ف الشغل بالساعات لحد لم الناس علقت وانا عشان غالي عليا حبيت اتكلم معاه فكلمته قالتلوا يصبر ع مراته شويه يمكن تتغير فكان مصمم انه ياخده وانا عرفته ان الناس بتتكلم عليه

 

وانا كانت اعرف الست دي فجايت ف مره كلمتني وقالتلي انها عايزه مني طلب ان لم يكون هو ف الشغل وهي تسالني اقالها موجود ولا لا فأنا مقدرتش ارفض وافقت ع كلامها ودايتها رقم بتاعي محديش يعرفه غير ناس معينه وخلاص

 

بقيت تكلمني وانا اكلمها فجايت ف يوم تسالني هو زعلان انك زعلانه ليه هو ف ايه بينك وبينه فأنا  قلت خلاص هي وصلت لدرجه ف ايه بيني وبينه خلاص انا مش هقدر اكلمك تاني ومسحت الرقم وطلبت منها متكلمنيش

 

لحد لم هو حكي لحد ان هي بتقولوا ان ف رقم بيرن عليها وهو بيكلمها وبيتابع المكالمات وانها عملتوا بحث ولقاءته باسم البت دي الا شغلها عندكم والواحد دي طبعا اديق وجاءه حكي ليا وانا مقدرتش اعاتبه عشان مايقوليش مين قالك

 

وبعدين حطني ف دمغه وبقي يعمل معايه مشاكل وحورات تفهه ويقول عليا ان خبيثه وليمه وانا مش عارفه اعمل ايه  لحد لم بقيت اديق قوووي واعيط من افعاله

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

الرد المرادي هيكون قصير علي غير العادة .

 

انتي نيتك كانت سليمة من الأول لاصلاح الأمر , وبدأتي بخطوة ايجابية انك تكلمي البنت اللي بتسرح مع الشاب ده , لكن وقعتي في غلطة   .

 

انك بشكل ما اشتركتي معاها في خطوة "التجسس" لصالحها .

 

يعني بفرض ان هو كان عايز يخلع منها تدريجيا , سواء ملل منها او عشان يرجع لمراته و اولاده , ومكانش بيرد عليها , فانتي كنتي بتساعديها عليه هو  , ينفع كدة ؟

 

فالغلطة ديه اللي بدأت المشكلة , واللي جعلتها هي تتبجح و تفترض وجود علاقة ما بينكم , وقالتهالك في وشك .

 

انتي اتصرفتي كويس انك قفلتي معاها باب النقاش , لان هي هتعاملك بنفس المستوي الخلقي اللي متربية عليه , واياكي تتمادي معاها .

 

و يتبقي دلوقتي الأزمة اللي هي صنعتها في الشغل عندك .

 

والحقيقة ان الازمة اكبر بكتير من المشكلة الصغيرة اللي هتحصل لو انتي عملتي مصارحة كاملة بكل اللي حصل .

 

يعني لما تفكري ايه اللي هيحصل لو انتي رحتيله , وشرحتيله كل اللي حصل بالتفصيل , مش هيحصل اي شئ , ممكن يتضايق منك شوية و خلاص .

 

لكن ترك المشكلة بالشكل الحالي مش هينفع , لانها ممكن تتطور سلبا و مضايقاته تكبر عن الشكل الحالي .

 

المشكلة ان هو ممكن يظن حاجات اوسع بكتير من الحقيقة  , والبنت ديه مش هتسكت لغاية لما تشحنه بقصص شنيعة عنك , واللي لو هو اقتنع بيها و نشرها وسط الناس هتدمرك .

 

فمتنتظريش لحظة , وروحيله و قولي اللي حصل كذا كذا , ولو فيه اي شات بينك و بينها او رسايل صوت خليه يشوفها , عشان تبعدي الشيطان من ذهنه او فكره .

 

متسكتيش او تترددي , لان الانتظار مش في صالحك