العنوان : شيزوفرينيا

القسم: #النفسي

الرقم: 21

السؤال:

 

شفت قصة تشبه لقصتي شوية

 

انا كمان ماما وبابا منفصلين  , انا كنت شخصيه خجوله جدا صحابي كتييير لكن مشاكلهم اكتر  

 

ومن كتر وجودي فلبيت اهلي زهقو مني ومن كتر مسامحتي علي  اخطأهم بدءو يعاملوني كأني واحده مريضه 

 

بابا كان بيروح الشغل فكان بيسبني انا واخويا الله يرحمه مع اخونا الكبير هشام  واللي كان دائما يظلمنا تحت مسما انا اخوكم الكبير والمسؤول عنكم ودا كلام بابا.

 

مش عاوزة اخش فتفاصيل معاملته لينا لكن هحكي موقف من مواقفه

 

كان لما بيضرب اخويا الصغير واجي أتدخل كنت طفلة كان يضربني ولو اخويا الصغير أتدخل وهشام بيضربني كان بيضربه كان بيضربنا بدون سبب وال يسألو كان بيقول لو مضربتهمش كل يوم ممكن ييجو فيوم يقلو ادبهم

 

فبقيت بترعب من اليوم ال بابا بيروح فيه الشغل ويسبنا انا ومحمد مع هشام كنت بقول تهزيق المدرسين ليا علي عدم اهتمامي الشخصي بنفسي لأني كنت طفله مافيش ام تهتم  بيا كان ارحم من اني اقعد فلبيت ومرحش

 

محمد اخويا الله يرحمه بابا كان لوحده وقال لماما هاتيه عشان يونس هشام وهوا كان قصده هاتيه عشان يخدم هشام

 

بابا كان  بيجيب لهشام اخويا لبس بيعدي الألوف علي ايام مكانت ليها قيمة ومكانش بيجبلي اي لبس  , لبسي كله كانت مامت صحابي ال بتجبهولي 

 

ماما لما خلفت تؤام من جوز ماما قالت ل بابا اني اروح عندها  , رحت ويعتبر انا ال ربيت اخواتي التوأم

 

لفترة معينه من 13 لسن ال15 مكنتش بعرف اضحك حتي فصوري باين فعيني الحزن  , بدأت اكون بحالتين حاجه كدا صحابي بيقولوا عليها شيزوفربنيا 

 

ولاني عمري صوتي ما طلع وكنت جبانه كنت بخاف من الأطفال لقتني لأول مره ادافع عن محمد وقلت لهشام متلمسهوش  وبدءت اهدده ولاول مره ضربته ومكنش قادر يستحملني

 

وفجئه بعد مكنت قويه وبدافع عن نفسي حسيت اني غلطانه لأنه اخويا الكبير وسبته يضربني وكنت مسالمه

 

هنا بدأت الاحظ الجانب المظلم فيا  كل العيال ال كانو بيضربوني ومسميني جبانه

 

هما قالو أن عندي طاقه وفرط حركه لازم اتمرن وهناك اتعرفت علي خطيبي وكنا صحاب واتخطبنا ونا عندي 18سنه

 

كنت بدأت أحس بهلوسة بدون سبب  وبشوف حاجات خياليه وأحمد خطيبي لاحظ دا مع العلم أن كل ماحد من اهلي يزعل مني يقولي انتي مريضه

 

اوقات بكون قويه وأوقات ضعيفه اوقات بتكلم كتير وأوقات بخش فحالة سكوت  مافيش مخلوق يعرف يخرجني منها  كنت بعمل الحاجه وعكسها وزهقت من كلمة انتي مريضه ال بسمعها كل دقيقه من كل اهلي واللي خلتني حبيت العزلة 

 

انا لو عليا نفسي ابقي احسن ومشيت بمنطق إبدء بنفسك انا بدأت بس لما بيحسو اني بغير من نفسي بيقولو متقلبه أو ممثله لأنهم متعودوش مني علي كدا

 

وموضوع الشيزوفرينيا دا اخواتي الصغيرين لما يغلطوا يروحوا يقولو لماما ان انا  ضربتهم وانا مبقاش ضربت حد وماما تقولي انتي بتعملي حجات مبتحسيش بيها وتصدقهم وتكدبني

 

رغم ان بيقولو عندي انفصام الا اني مبحبش الحال المايل حتي وقت تقلبي ودا ال خلاني احب العزلة ووصلت لمرحلة اني نسيت اسامي صحابي بعد وفاة اخويا مباشرة وبقيت لما بزعل اوي بيجبلي هيستريا بفضل اضحك مقدرش ابطل ضحك  واعيط وارجع اضحك تاني والناس تستغرب هيا بتضحك ولا بتعيط

 

وبقيت اعمل الف حجات غريبه يعني  مثلا ادي الموب لصاحبتي واقولها انا مش عاوزة ارن علي احمد ولو خدت الفون منك اضربيني بلقلم ولو قلتلك حاجه فكريني أن انا ال قلتلك كدا صحابي طلعولي اسم جديد سموني روكا

 

روكا دي لما بكون فلحالة التانيه رغم اني بستغرب الا اني في أوقات بحب فيها الاسم دا وبحسه بيمثلني  اصحابي لما بيلاقوني جد  بس فيه واحده

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

لازم في البداية احييكي علي صبرك انك تكتبي المآسي ديه كلها ,  بعض القرآء بيحبو يضيفو تفاصيل وهمية  , أو يألفو شوية , و احيانا ممكن يألفو قصة كاملة  , بس احنا بنتعامل ان اي حاجة تتبعت لنا هي صادقة , و بنرد علي الاساس ده . .

 

ثانيا لازم نفرق بين حاجتين الناس بتتلغبط فيهم , وكمان بتحب تفتي فيهم من غير علم . .

 

حاجة اسمها (اضطراب الانفصام في الشخصية) , و حاجة اسمها (اضطراب ثنائي القطب) . .

 

الأول (اضطراب الانفصام في الشخصية) , واللي ممكن نسميه (فصام) , و اللي اسمه العلمي (Schizophrenia) , و بيتقال شيزوفرينيا او سكيزوفرينيا . .

 

ده مش معناه ان الشخص عنده شخصيتين , لكن معناه باختصار ان الانسان المصاب بيه بيكون منفصل عن العالم  , فيه بينه و بين الناس و الحياة عوائق كتير  , و غالبا بيصاحبه كمية كبيرة من الاكتئاب و القلق و الهيستريا

 

أما التاني (اضطراب ثنائي القطب) , واللي ممكن نسميه (اضطراب زي الاتجاهين) , وبالانجليزي (Bipolar mood disorder) هو الاضطراب النفسي , اللي بيجعل الشخص ينتقل من حالة الي حالة بشكل سريع , ومفاجئ , و تتقلب مشاعره بطريقة سريعة و غريبة . .

 

والناس بتحب تسمي المرض الثاني "شيزوفرينيا" , وده مش صحيح , ده شئ و ده شئ . .

 

---------------------------------------------------------------------------

 

ولو هنلخص مشكلتك , فممكن ننقول ببساطة :  ان عندك جزء كبير من اعراض (اضطراب ثنائي القطب) مصحوب بكمية لا بأس بها من الاكتئاب , وده نتيجة  الضغوط النفسية المستمرة اللي انتي عانيتي منها من انفصال ابوين , و اضطهاد اخوكي و قسوته ليكي , و تجاهل ابوكي و امك لمأساتك . .

 

فالاكتئاب تزايد عندك وصنع كميات من الهلوسة والخيال , ومع تراكمها و عدم اصلاحها او حل المشكلة من اساسها , دخلك في مشكلة "اضطراب ثنائي القطب" . .

 

مش هاقدر اقول ان اكيد عندك الاضطراب ده او انك مصابة بالفعل  , لابد من الكشف عليكي من طبيب نفسي مختص , و يتم تطبيق عليكي احد اختبارات الإضطراب ده  , لتحديد انتي مصابة بيه بالفعل ولا لا , ودرجته ايه . .

 

كمان لابد من قياس كمية الاكتئاب اللي عندك , وهل وصلت للشكل المَرَضي ولا كمية مقدور عليها , لاحظي ان كتير مننا عنده الشعور بالاكتئاب , بس الشعور شئ و المرض شئ تاني . .

 

الشعور بالاكتئاب مش بيمنع الشخص انه يروح دراسته او شغله او يضحك و يهزر  , لكن المرض شئ خطير بيعزله عن العالم . .

 

------------------------------------------------------------------

 

وبالطبع المسئول الاول عن اصابتك بده هو اخوكي هشام , واللي اصاب فيكي جرح نفسي غائر مستمر ,  بالضرب و الاهانة , وزرع الخوف و الرعب منه . .

 

و كمان بالظلم المستمر ليكي و لمحمد , واللي محدش قدر يوقفه تماما . .

 

ابوكي المسئول رقم اتنين  , ان كان هو مضربكيش , فهو كان قادر يرزع هشام علي قفاه اول ما يمد ايده علي اخواته , لكن تخليه عن الدفاع عنك و ايقاف الظلم صنع داخلك عقد نفسية مركبة . .

 

امك ليها شئ من المسؤولية , كان المفروض تدافع عنك او علي الاقل تحتضنك معاها وتبلغ البوليس , لما هشام يدخل السجن لاعتدائه المستمر علي اخوته افضل بكتير من المصير المظلم اللي انتي بتعاني منه حاليا  . .

 

وطبعا الظلم في عدم المساواة بينكم في الفلوس و الملابس , ده عمل تعميق للجرح أكتر , وجعلك – رغما عنك – تكرهي ابوكي و اخوكي مع بعض , بل و تكرهي حياتك كلها . .

 

 

 

وموقف انك ضربتي اخوكي هشام , مش قليل , وارد يكون ده البداية الفعلية لظهور (اضطراب ثنائي القطب) عندك . .

 

لانك لما ضربتيه كنتي في حالة شديدة من الغضب و الانتقام , حتي انك تخطيتي كل خوفك منه , لكن بعدها شعرتي بالرعب الشديد تاني , فانتي كان عندك نوعين من المشاعر المتناقضة بعد بعض فورا , وده هو التوصيف الدقيق لـ (اضطراب ثنائي القطب) . .

 

و يمكن هو اسمه (ثنائي القطب) لان الشخص بيشعر بقطبين ورا بعض فورا , يعني مشاعرين متناقضين علي النقيض تماما , ديه في قطب و ديه في قطب , زي ما بنقول القطب الشمالي و الجنوبي . .

 

فانتي تحولتي فورا من الشجاعة لاستسلام  سبتيه يضربك . .

 

 

بعدها بتقولي ان عندك "فرط حركة" , وده شئ مختلف , مش عارف مين اللي قالك كدة , هل هو متخصص ولا اصحابك اللي بيفتو , علي العموم انتي محتاجة تحطي ده في بالك  , وتسألي عليه الطبيب لما تكشفي  . .

 

انك تحسي بالهلوسة ده كمان شئ يكون مصاحب احيانا لمريض (اضطراب ثنائي القطب) , بس معرفناش كمية قد ايه , وهل بتشوفيها باستمرار ؟ ؟

 

وبعدها انتي بتوصفي كل اعراض  الـ (اضطراب ثنائي القطب) , لما تكوني (قوية - ضعيفة) , (رغاية - صموتة) , (تعمل الشئ - عكسه) , (الضحك -  العياط) , (عايزة تكلمي احمد – مش عايزة )

 

وبالرغم من ان كتير من الفتيات في سن (من 15 لـ 25) ممكن يكون عندهم شئ من الشعور ده , انها تحس انها عايزة تعمل الشئ و عكسه بعدها علي طول , و هما يستمتعو بتفسير الامر ده بناء علي (اصل انا برج الحمل وهو متقلب) , (هو دايما الميزان مجنونة) والكلام  ده , الا ان مفيش منهم حد عنده (اضطراب ثنائي القطب) . .

 

لان الاصابة بالمرض ده معناه ان الشخص واقع في فخ مش عارف يهرب منه , وديه حالتك , بعكس البنت اللي فيها شوية "تقلب" في المود لكن موصلتش لدرجة المرض النفسي . . 

 

بالنسبة ان اخواتك الصغيرين يقولو انك ضربتيهم و انتي تقولي لا , فيه احتمال يكونو بيكدبو او بيهزرو معاكي بشكل تقيل , واحتمال تاني انك تكوني بالفعل مش فاكرة , وديه مشكلة . .

 

فلو اتكرر انك سمعتي انك عملتي شئ و مش فاكراه , فده معناه ان حالتك بتتدهور للاسف , وان تأخرك في الذهاب لطبيب نفسي متخصص معناه  انك بتفضي علي كل قواكي العقلية . .

 

---------------------------------------------------------------------------

طب والحل ؟ ؟

 

حالتك مش سهلة , فارجوكي تركزي جدا معانا , وتنفذي ده غير تأخير . .

 

• أولا لازم تؤمني ان فيه مشكلة , وانك لازم تحليها , لو انتي بقيتي عنيدة و قلتي مفيش حاجة , فمستحيل تتعالجي او تتحسني

  

• مش شرط تكوني مصابة بـ (اضطراب ثنائي القطب) , ده تشخيص مبدئي  , لكن الطبيب اللي هيشوفك هو اللي هيقدر يحدد , بناء علي مقابلتك , وعلي تاريخك والاحداث القديمة , وعلي الاختبارات النفسية المستخدمة

 

• مفيش نقاش انك لازم تروحي لطبيب نفسي , مينفعش تتأخري علي الاطلاق , وارجوكي مترميش ودنك لنصايح غبية ممكن تيجي من بعض الصديقات اللي ممكن تفتيلك وتقولك (سيبك من الكلام ده كله يا حبيبتي , انتي هتوهمي نفسك , انتي كويسة ومش مجنونة)

 

 

• لو حد نصحك بالتمسك بالدين وحده كعلاج يبقي غلطان , التمسك بالدين بالطبع هو علاج لكنه خطوة مساعدة , جنب العمل بالاسباب و استشارة المتخصصين , والا كنا نعالج السرطان و الحصبة بالدين . .

• للأسف الفهم الخاطئ لتناول الدين , بيجعل البعض يكتفي بالقرآن و الصلاة كعلاج نفسي , هم و ان كان لهم اثر ايجابي كبير في علاج الشخص , لكن لابد من العمل بالاسباب , و التواصل مع المتخصصين عشان نفك الازمة من بدايتها , والا كنا نقوم نزرع الارض بالتمسك بالدين . .

 

• انعزالك عن المجتمع هيزود المشكلة والشعور بالاكتئاب  , فحاولي تمارسي حياتك الاجتماعية بشكل طبيعي . .

 

• حاولي متحتكيش كتير باللي تسببو في الازمة النفسية (اخوكي و ابوكي) , لغاية لما تروحي للطبيب و تحكيله كل حاجة , وهو يقولك تتعاملي معاهم ازاي . .

 

 

--------------------------------------------------------------------------

 

حالتك مش سهلة , وانتظارك هيهدم بقية التعقل عندك , ارجو متكسليش , ولو مش عايزة تروحي لوحدك , روحي مع صديقة قريبة منك  ,بحيث تكون معاكي

 

لكن ثقي انك لو تجاهلتي الخطوة ديه , فانتي بالفعل بتدمري كل شئ اتبقي عندك