العنوان : مقاومة المشاعر

القسم: #الاجتماعي

الرقم: 37

السؤال:

 

انا بحب واحد وانا بنت عندى ١٢ سنة وهوة كمان بيحبنى

 

ااتقدملى عريس وانا عندى ١٤ سنة واتصالت بية وقلتلوو هوة قالى ارفضى قولتلو خلاص تعالى اتفق مع ابويا وحتا جيب دبلة وابوية مش هيتكلم معاك قالى لا ارفضى وانا لسة عايز اجهز اختى عشان هوة ابوه متوفى وهيا ال شايل الحمل كله

 

وانا بصرحة مردتش ارفض عشان ابوية وامى كانو قسين عليا جدا وكنت شايلة فوق طقتى المهم اتخطبت واتجوزت بعد الخطوبة ب سنتين ودة كله متصلتش بيه وله كلمتو وقالت كل واحد ف حاله وكان كل يوم يعدى عليا ومش بكلمة كنت بموووت ١٠٠ مرة

 

المهم اتجوزت وقعدت سنتين كمان مش بكلمة بس ف الاربع سنين دول كنت بموت ومش عارفة عدو ازى عليا من غير مااكلمة بس كان اكتر الاوقات ارن من السنترال واسمع صوتة واقفل المهم

 

جيت ف يوم كنت مخنوقة اوووووووى قولت اتصل بية كان هوة لسة متجوز بقالو ٥ شهور وفضلت اكلمو بقالى ٦سنين انا ربنا كرمنى ب ولد وهوة ب بنت وكنت اكتر الاوقات احنن قلبة ع مرتة عشان كان واخدها غصب ان امة عايزة تفرح بيه وصبر ٧ سنين ع امل انى اطلق

 

بس ربنا كرمنى ب ابنى ف كنت بحط ابنى ف بالى ع طول ازى هسيبو وممكن تجيلو مرات اب وكنت بفكر كتيررر

 

لغيت ما جه يوم وقلتلو يله نطلق بس قبل ما تطلق اقسملى باالله ان مش انا السبب حلفلى كتيرررر انتى مش سبب وحلف بلطلاق وهوة عمرة ما حلف كدب قلتلو لو طلبت اى حاجا ادهالها عشان متظلمهاش قالى ماشي قلتلو وانا هطلق عشان كمان انا مش مرتاحة مع جوزى خالص وله جوزى حاسس بيا قالى ماشي قلتلو هسيبك تفكر وترد عليا ولغيت متفكر متتصلش بيا الا لما تكون لقيت حل قالى خليكى معايا وطول ماانتى معايا هوصل ل حل متسبنيش عشان لو سبتينى هدمر

 

المهم محططتش كلامة ف دماغى وسيبتو ومردتش اتصل بيه وبقيت اسمع ان خلقة بقا ديق ونفسيتو زى الزفت وبيعمل مشاكل كتيررر وع اقل حاجا ممكن يتخلق ع اعز صاحب ليه

 

المهم كلمتو وقلتلو ايه ال بيحصل دة قالى طول ماانتى بعيد عنى انا هعمل اكتر من كدة قلتو الحل ايه قالى مش هينفع اطلق دلوقت عشان بنتى لسه ٥ شهور وخايف تكرهنى او يقسوها عليا قلتلو طب وال بيطلقو دول وبيسيبو عيلهم يعملو ايه المهم لقيت مفيش حل قلتلو خلاص الحل اننا نبعد عن بعد وكل واحد ف حاله قالى عشان خاطر بنا متسبنيش انتى بتمسكينى من ايدى ال بتوجعنى انا اقسم باالله بعشق التراب ال بتمشى عليه قلتلو دة الحل نبعد عن بعض قالى لا ولسه بيتكلم قفلت السكة قاعد يرن كتير مردتش عليه

 

شافنى وانا ماشية ف الشارع اتصل بيا وكان هيوقفنى ف الشارع فا اطريت انى ارد عليه بيقولى راحة فين قلتلو ملكش فيه قالى مليش ف اززززززى قلتلو زى ما سمعت سلام وقفلت

 

وبقالى اسبوعين مبكلمهوش وقلبى مولع وعارفة ان غصب عنه ان هوة كان شايل حمل بيت واختة بتتجهز ودلوقتى كلمتو بعد ما اتجوز وخايفة اشيل زنبو ان انا بحكم عليه ب كدة هوة بيتمنة يتكلم معايا او يشوفنى

 

ودلوقتى هموووووووت واكلمو واكتر الاوقات بدعى ان ربنا يكرهنى فيه ويبعدو عنى ف كل صلاة ووانا قاعدة وف كل مكان اقسم باالله بدعى من قلبى وبفضل اعيط واصلى وادعى ان ربنا يشيله من قلبى باالله عليكم عايزة حل من غير تجريح وال هتقولو عليه هعملة

 

اسفة ان طولت عليكم

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

يا سبحان الله عليكي .

 

انا اعرف الواحد ممكن يتجنن و يهد بيت , لكن يهد بيتين مع بعض ؟ ؟

 

يعني ان كان طلب الطلاق من غير مبرر قوي , هو ذنب كبير , فما بالك بقي لما تكوني عايزة تعملي ده في بيتين مش بيت واحد ؟ ؟

 

لا و كمان فيه طفل هنا و طفل هنا . .

 

يعني عايزة حالتين طلاق تتم , والاطفال تتيتم هنا و هنا , وكل ده عشان "بتحبيه" . .

 

بجد امرك عجيب  . .

 

 

لو هنبدأ من الاول , انك اصلا بتقولي انك بتحبي من وانتي في عمر 12 سنة .

 

 

هل انتي معتقدة ان مراهقة عندها 12 سنة قادرة انها تحكم علي مشاعرها بالشكل المناسب ؟ 

 

وهنا كنا عملنا سؤال تفصيلي عن الحب هل هو حقيقي ولا وهمي بعنوان : لهيب الحب

   

وبعدها  هو ظروفه كانت مش مناسبة , و مجاش اتقدملك .

 

وبعدها جه واحد تاني و اتقدم , وانتي مكنتيش بتحبيه .

 

ساعتها كنتي تعملي حاجة من اتنين .

 

يا اما ترفضيه تماما , وتنتظري اخينا لغاية لما تشوفي ظروفه .

 

يا اما توافقي , وكنتي تقفلي الباب القديم تماما , وتفتحي قلبك لجوزك ابو عيالك .

 

لكن الرقص علي السلم  ده مصيبة , كارثة بتهد البيوت .

 

مينفعش باي حال انك تتجوزي حد و قلبك متعلق بحد , يا اما تقفلي الباب القديم و تحبي الجديد  ,يا اما مكنتيش تتجوزي .

 

و لو رجع بيكي الزمن وقتها  , كنت هقولك ان اللي عملتيه صح , و مكنتيش المفروض ترفضي زوجك الحالي ولا حاجة .

 

لان الاحساس بالحب في سن 12 , مش لازم يكون واقع و حقيقي , ممكن جدا يكون نوع من "التشبث" بالاعجاب بشخص مناسب .

 

و ممكن لو حتي كنتي حبيتي حقيقي  ,انك تنسي الحب الاول و تحبي من جديد .

 

احنا مش في فيلم رومانسي يقطع القلب لفاتن حمامة , ولا في رواية متسهوكة بتقراها المراهقات .

 

الحياة اكتر تعقيد من كدة , وشكلها مختلف عن اللي بنحسبه .

 

وان بالعقل ممكن الواحد او الواحدة بعد ما يحب , انه ينسي تدريجيا اللي كان بيحبه  , او علي الاقل يجعل تاثير الحب ده اقل في قلبه , ويفتح قلبه تدريجيا لشخص تاني .

 

فما بالك بقي لما الشخص التاني ده يكون جوزك و ابو عيالك , و الشخص اللي انتي بتحبيه  هو بالفعل متجوز .

 

فانتي عايزة تخربي بيتين  , عشان بس تنفذي اللي في مزاجك , سبحان الله فعلا .

 

والغريب ان هو لما حاول يقاوم مشاعره , ويفرمل مزاجه , عن انه يخرب بيته و بيتك , انتي اللي كنتي بتشديه اكتر للقرار الغريب ده .

 

يعني الراجل اللي بنكون متعودين علي انه متهور اكتر , و و بيفكر في حاجات مجنونة بقي هو العاقل , والست اللي بتميل اكتر للعفة و الستر , اتقلب دورها تماما .

 

فلو انتي قادرة علي انك تشيلي ذنب هدم بيتين , سيبك من الرد ده خالص وروحي اعملي اللي انتي عايزاه

 

عارف ان الطلاق حلال بشكل عام , بس مين قالك ان الطلاق ينفع في حالة ان الزوجة بتحب واحد غير جوزها , اللي هو اصلا  شئ مخالف للشرع ؟

 

الطلاق شُرع في حالة ظلم  مستمر من الزوج لزوجته , مش عشان الزوجة مش قادر تنسي الحبيب القديم

 

اياكي تفكري في الطلاق طالما مفيش مبرر شرعي و حقيقي و كلام جاد تقابلي بيه ربنا , ده احنا كتير بنشوف قصص الزوج فيها بيظلم مراته  , بس بنقولها اصبري عشان الاولاد ميتيتموش بين بيتين .

 

-----------------------------------------------------------------------

 

لو بالفعل انتي جادة , وعايزة تحلي المشكلة فحلها ببساطة في 4 خطوات

 

 

• انسيه  .

 

 

 

 

• ممنوع التواصل معاه .

 

 

• حبي جوزك . .

 

 

 

• الدعاء بتخفيف الكرب

 

 

---------------------------------------------------------------------------

 

انتي في بداية طريق خطر , و خايف عليكي انك تستسلمي لمشاعرك فيتخرب بيتين وانتي تشيلي ذنبهم , استغفري ربنا و ادعيله في السجود , وامشي علي اللي قلناه من شوية , و ثقي ان ربك كريم