العنوان : هرمون السعادة

القسم: #النفسي

الرقم: 42

السؤال:

 

اولا عندی عدم ثقه بالنفس ثانیا عیااط ع طول ع اتفهه الاسباب بزعل من اقل کلمه وبتعصب برضو من اقل کلمه

حاسه انی مش جمیله والی حوالیا کلهم جماال

 

بعانی من الاکتئاب والعیاط طول الوقت ومش بعرف اذاکر ده حتی حیاتی الاجمتاعیه مش کبیر معندیش حظ حتی فی الحب وسبب الفرکشه مش انا ولا هو بالعکس ده ماما

 

مش حاسه بالرضا ع نفسی مگتئبه ومحبطه طول الوقت وعیااط کتییر جداا

 

لا عندی هرمون السعاده ناقص او معندیش تقریبا و موصلتش لسبب لکل ده

 

هل ده طبیعی ولا انا فیا حاجه

 

ومش معنی انی کلمت دکتور نفسی ابقی متخلفه او مجنونه انا والله عاقله بس عندی ضغوط نفسیه کتییر والله

 

طب اعمل ای او تنصحینی /تنصحنی ب ای    وای هی اسباب ده

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

هو بداية مفيش شئ اسمه هرمون السعادة , ده مصطلح اخترعوه كتاب الروايات العاطفية عشان بس يشتغلونا .

 

السعادة احنا بنصنعها بنفسنا , وفيه عوامل خارجية بلا شك بتأثر عليها , وهي الشئ اللي نص الناس دايخين عليها , والنص التاني لما بتجيلهم بيطردوها بايديهم .

 

انتي بالفعل عندك اكتئاب , وانتي ذكرتي هنا عدد من الأسباب ليه  ,تعالي نمسكها واحدة واحدة عشان نعرف نتكلم عنها  :

 

• الاحساس بعدم الثقة بالنفس

• العياط علي اي شئ

• العصبية

• الاحساس بانك مش جميلة

• مفيش حظ في الحب

• الاحباط

 

بعض النقط ديه متعلقة بظروف من حواليكي , وبعضها جواكي انتي و ممكن تغيريه لو عايزة 

 

-----------------------------------------------------------------------

 

نبدأ بنقص الثقة في النفس .  .

 

وغالبا هي اساس باقي المشاكل اللي عندك , لان الافتقاد للثقة بالنفس , بيجر بعده سلسلة طويلة من المشاكل المرتبطة بيه . .

 

 

فلو انتي عندك قدرات او مواهب معينة , وانتي مش عارفاها او مش واثقة فيها , فهيظل عندك ضعف في الثقة بالنفس , واول ما تعرفيها و تتأكدي منها , هترجعلك الثقة بالنفس فورا

 

 

 

وكأن عشان يبقي عندك ثقة بالنفس في موضوع معين , ابدئي جربيه بالتدريج واحدة واحدة , مع مواقف سهلة , عشان قلبك "يقوي" شوية , وتجدي ان الموضوع مش بالصعوبة اللي كنتي شايفاها . .

 

----------------------------------------------------------------------------------

 

ندخل علي نقطة  "الاحساس انك مش جميلة" لانها مرتبطة جدا بالثقة بالنفس .

 

لو انتي من جواكي مش حاسة بالثقة بالنفس , هيضيع منك اي احساس بالجمال , وهتشعري دايما انك اقل جمالا من اللي حواليكي . .

 

ومع علاج نقطة الثقة بالنفس , هتلاقي الاحساس بالجمال عندك هيختلف , وهيزيد تدريجيا .

 

كمان لازم تقنعي نفسك ان معايير الجمال , مش هي نفسها المعايير اللي الناس بتحطها , المعايير اوسع من كدة , هل شفتي الممثلة الامريكية "كاترين هيبورن" , شفتي "اوبرا وينفري" , شفتي "ميريل ستريب"

 

 

غيرهم  كتير من الممثلات اللي هما مش جميلات , لكن واثقات في نفسها بشكل كبير , فمين قالك ان الجمال هي بس المعايير اللي في ذهنك ؟ مشفتيش كتير من المواطنين في امريكا , تلاقي شكلها مختلف تماما عن المعايير اللي في بالنا , ومع كدة هي بالفعل حاسة و متأكدة انها جميلة جدا

 

فده احساس داخلك , وانتي محتاجة تعملي ليه اعادة ضبط , عشان متدمريش حياتك

 

 

وهنا مشكلة تم حلها بعنوان : الحساسية المفرطة, مهم تقريها

 

 

---------------------------------------------------------------------------------------

 

ماذا عن سرعة العياط ؟ ؟

 

غالبا ديه نتيجة مش سبب , يعني هي بتحصل نتيجة العوامل التانية اللي انتي بتعاني منها , وهي مش عرض جديد عندك

 

لان طبيعي لما تحسي بفقد الثقة بالنفس , وبالعصبية , وبالاكتئاب , طبيعي انك تنهاري بالعياط فورا مع اي موقف صغير .

 

فببساطة حاولي تحلي المشاكل التانية اللي عندك , وهتلاقي ده اتحل بشكل تلقائي

 

واحيانا بيكون من اسباب البكاء السريع  , هو الشعور بالحساسية المفرطة

 

---------------------------------------------------------------------------------------

 

بالنسبة للعصبية  و الاحباط فهي كمان نتيجة تراكمات المشاعر السلبية اللي انتي بتعاني منها , و برضه حلها هيكون بحل المشاكل اللي فاتت

 

هنا اتكلمنا بالتفصيل عن العصبية    و هنا عن الاحباط    وهنا عن الاكتئاب 

 

---------------------------------------------------------------------------

 

وبالتالي اللي انتي محتاجة تعمليه , انك تحاولي تحلي بدايات المشكلة عندك (الثقة بالنفس , الحساسية) , وتهتمي بالنتائج اللي ظهرت بسببها (العصبية , الاحباط , الاكتئاب) , وهتلاقي ان المشكلة بدأت تتحل بالتدريج