العنوان : تكسير المجاديف

القسم: #النفسي

الرقم: 16

السؤال:

 

انا عندى ١٨سنه  . بحب التعليم جدااااااا . وهويتى المذاكره

 

انا فى أولى كليه تجاره  انا دخلت الكليه من ثانوى  تجارى طبعا

 

فى تريقه كتيير من العيله ليا علشان انا تجاره واخواتى مدرسين ازاهره  وفى منهم ثانويه عامه وكمان انا الوحيده فى العيله تجاره

 

ديما شايفينى انا الأقل وكل مايبقي ليا هدف يفضلو يتريقو

 

اول مادخلت تجاره كان نفسي اوى ابقي سكرتيره عمى فضل يتريق ويقولى هتبقي خدامه راقيه وتعملى شاى للمديرين  واقنع بابا بكده بس شلت الفكره دى من دماغى

 

انا دلوقتى نفسي اووووى ابقى معيده فى الجامعه وعارفه اعمل كده ازاى بس هم برضو بيفضلو يتريقو وعملين يقولو يا دكتوره ويضحكو

 

ساعات ببقي مكسله اوووى ومش قادره اقوم عايزه حد كل شويه يحفزنى ومش عايزه اسمع كلامهم الوحش ده تانى بيحبطى بس انا مبيشجعنيش غير الكلمه الحلوه

 

وغير كده كل مايجيلى عريس يفضلو يقنعونى بيه وانا مش عايزه اتجوز شايفه نفسي صغيره اوى وكمان عايزه اكمل تعليمى

 

بيقولو انتى عما تبقي دكتوره هيبقي عندك ٣٠سنه هتفضلى قعدلنا كل ده ومش عارفه اتصرف معاهم ازاى

 

بس انا مش حره فى نفسي ومقدرش اعمل حاجه من دماغى يعنى هم لو مش عايزنى اطلع معيده مش هعرف اعمل كده

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

عجيب أمرهم اسرتك . .

 

في كل مكان علي ظهر الكوكب ,  الأسر والحكومات والمؤسسات و الجمعيات بتبحث بشدة عن الابناء اللي عندهم الحماس و الطموح و الاهتمام بالعلم , وحلم الكبير للنجاح . .

 

و اسرتك لما تشوف ده كله يتعاملو معاكي باسلوب مدهش , وبيقومو بتكسير كل انواع المجاديف اللي انتي بتلاقيها في كل مكان . .

 

و كل ما تعيدي اصلاح اي مجداف فيهم , يقومو بكل قوة وحماس و يدغدغوه بحيث ميتبقاش منه اي شئ . .

 

فعلا شئ مدهش لما تشوف أسر  لسة بتفكر بالاسلوب ده , ربنا يسامحهم  . .

 

بس اختصارا , خليني اقولك ان نجاحك  تفوقك و تحقيق حلمك بايدك انتي مش بايد حد تاني , ولو انتي عندك الارادة الكافية هتحققيه فورا . .

 

تعالي نمسك نقطة نقطة  .  .

 

---------------------------------------------------------------------------

 

نمسك نقطة السخرية منك في البداية . .

 

لو انا هكون "حسن الظن" باي فرد بيتريق , فهنقول ان عنده "قصر نظر" و "تقييم غير سليم" , فهو مين اللي قال ان مدرس افضل من محاسب , او مين قال ان الازهر افضل من جامعة القاهرة . .

 

التعامل بالشكل العنصري السخيف ده , بيولد كمية من الغضب و الحيرة في نفس الشخص , ويجعله يتسائل الناس ديه عايشة ازاي معانا في 2018 ؟ ؟

 

ولو هكون "سئ الظن" ممكن اقول ان بيكون فيه نوع من الحقد احيانا , عند الشاب لما يلاقي اخته الاصغرمتجهة لتحقيق نجاح اكبر من نجاحه هو , ولسان حاله بيقول "انتي  اتجننتي ولا ايه , اترمي هنا و خليكي في البيت" . .

 

لأن معروف , ان اي شخص فاشل لو هو مش قادر يحقق نجاح مناسب , فهيسعي لاحباط تجارب الاخرين , عشان يتساوو جميعا في الفشل . .

 

وعلي كلامك ان كل ما يكون ليكي هدف يتريقو , فهو يا اما غلاسة غير محدودة منهم , يا اما ظني السئ هو الاقرب للصواب . .

 

كلامي ده مش بقوله عشان تكرهيهم , لكن عشان تضعي كل شئ في نصابه , وتتفهمي الدافع اللي بيقولوه و استمرارهم في تكسير مجاديفك , يعني ببساطة اعرفي انك ماشية في طريق النجاح . .

 

لكن حذار من المعاملة السيئة لهم , او تقولي حاجة زي "انتو حقودين مني يا فشلة" , انتي كدة بتقطعي في ارحامك . .

 

---------------------------------------------------------------------------

 

ولو كان اخواتك اتريقو , فممكن نقول عليهم شباب غلس , لكن لما الوالد و عمك يتيريقو عليكي , فهنا لازم نستغرب من التعامل المستفز ده . .

 

و غصب عني ظني السئ هيوصل لاستنتاج  , ان عمك  مش عايزك تتفوقي علي اولاده مثلا , وان والدك مش عايزك تناطحي اخواتك الرجالة  , يارب يكون استنتاجي غلط , بس ده اللي بيبان من الكلمات . .

 

يعني بدل ما يهتمو بيكي و يشجعوكي و يوفرو ليكي بيئة مناسبة للتفوق و النجاح , لأ دول بيعملو المستطاع عشان يعقدوكي تماما . .

 

وحل النقطتين دول (ديه و الاولي) انك تتوقفي عن انك تقوليلهم اي شئ عن خططك او طموحاتك , يعني متتبسطيش في الكلام معاهم خالص , لان فيه نوعية غريبة من البشر مش بتطيق تسمع سيرة اي نجاح , والا هيسخر منه و يعقدك منه تماما . .

 

فانتي ببساطة احتفظي بخططك لنفسك , او قوليها لافراد اسرتك اللي انتي عارفة انهم هيفهوكي و يشجعوكي , غير كدة متتكلميش مع اي حد فيهم عن احلامك . .

 

وبالطبع نفس الفكرة في حلم تكوني معيدة  , ممكن بالطبع توصلي لو انتي تعبتي بالشكل الكافي ليه , و متتكلميش معاهم خالص في النقطة ديه  عشان يستريحو و تهدي اعصابهم , وينامو وهما مستريحين انك هتكون زيهم في "تكبير الدماغ"

 

---------------------------------------------------------------------------

 

بالنسبة للكسل . .

 

هو ده بقي اكبر عدو ليكي  . .

 

يعني ان كان التريقة ليها علاج , فالكسل هو قادر علي تدمير كل خططك , وتسويتها بالارض , في حالة انك مقاومتيهوش و نظمتي نفسك . .

 

الكسل ببساطة هيحطم كل احلامك , ولو تملك منك مش هتعرفي حتي تعملي الشاي في مكتب عمك . .

 

فانتي حاولي تطبقي عدد من الخطوات ديه عشان تقاوميه

 

• حطي قدام عينيكي هدف واضح و فكري نفسك بيه كل يوم

• متفتحيش الموضوع مع اي حد بيحبطك , قوليه بس مع اللي عارفة انه هيشجعك

• متضيعيش وقتك في حاجات انتي عارفة انها هايفة (فيس , رغي مع صاحباتك)

• نظمي وقتك كويس , و اعملي جدول مذاكرة مناسب

• ابعدي عن الصديقات الهايفات , اللي مش وراهم حاجة الا الحاجات اللي بتضيع وقت

• حاولي تذاكري مع صديقات مجتهدات

 

---------------------------------------------------------------------------

         

انتي قلتي هنا كلمة مهمة  . .

 

قلتي انك بتكوني عايزة حد يشجعك دايما , و يحفزك بالكلمة الحلوة . .

 

المشكلة انك لازم تستغني عن التشجيع تماما , صحيح انه من الحاجات المهمة , بس لان ظروف افراد اسرتك مختلفة , فانتي توقعي انك متسمعيهاش ابدا

 

فحاولي تبني حياتك و خططك , علي التعامل بدون اي كلمات تشجيع او ترحيب , بل و انك تجعلي اذنك "صماء" علي السخرية اللي ممكن متقفش . .

 

نأكد تاني , صحيح التشجيع حاجة كويسة , بس اتعودي علي عدم وجوده , لانه ممكن بالفعل يختفي من حياتك , ولازم تتصرفي من غيره . .

 

---------------------------------------------------------------------------

 

نوصل للنقطة الاخيرة , الزواج . .

 

زي ما من حقك انك تقولي ان الزواج مينفعش يعطل التعليم  ,فلازم انا كمان اقول ان التعليم مينفعش يعطل الزواج . .

 

اكيد سن 18 صغير شوية عن الزواج , وممكن يكون سن 21 مناسب ,بس الخوف ان ياخدك "الحماس" , وتكملي الطريق  الصحراوي السريع , الخاص بسلك اعضاء هيئة التدريس , والدراسات العليا , ويجعلك ده ترفضي او تأجلي الزواج . .

 

يعني ان كان 18 سن صغير للزواج , ففعلا 30 سن كبير للزواج , وبالتالي اننا نتكلم في 21 او 22 هو مناسب

 

وبالتالي لازم تتعلمي فن ايجاد المساحات الوسطي في حياتك , وازاي توفقي بين دراستك و الدراسات العليا و الزواج . .

 

ففكرة ان يجيلك عريس مناسب و تتخطبي اخر سنة في الكلية , ويحصل الزواج بعد التخرج , وبعد الزواج – ومع الاتفاق مع الزوج – تكملي في سلك الدراسات العليا . .

 

وهو لو متفهم هيوافق فورا . .

 

وبالتالي انك تعاندي اهلك في ديه , هتكون مشكلة , يعني انتي قولي انا موافقة , بس بشرط ييجي شخص انتو ترضو دينه و خلقه بالشكل الكامل . .

 

و كمان يكون العريس ده متفهم قيمة تعليم الست , اللي هي هتكون زوجته و ام اولاده . .

 

ممكن يكون من حقه انه يقولك او يشترط عليكي  انك متشتغليش , وساعتها متجادليهوش , لكن انتي ناقشيه في امكانية عمل دراسات عليا . .

 

يعني من الاخر , إياكي ان تضحي بالزواج – لو كان شخص محترم و يخاف ربنا – عشان شغلك او دراستك , ولو هو محترم هيساعدك عليها