العنوان : مقياس "ستانفورد"

القسم: #النفسي

الرقم: 62

السؤال:

 

طيب انا اخصائيه نفسيه وعندى ولد عنده ١١سنة وداما يشتم العيال ولما ولى أمره جه حد محترم بس عصبى ويضربه علشان متأخر فى التعليم ولما عملت اختبار ذكاء ٨٣ تقديره للاختبار وهو يشتم ألفاظ بذيئة رغم ولى أمره محترم مش بينزل الشارع وأسرة متدينة ومش عارفه اتعامل معها

 

مع العلم ان عنده شوية تأخير في قدرته علي تحصيل العلم كمان عنده عزلة و انطوائية مستمرة مع ان هو كان كويس وهو صغير بس هو اتنقل من مدرسة خاصة لمدرسة حكومة من قريب

 

كمان احيانا والدته تقارنه باخوه الاحسن منه عشان يتعلم

 

هما مضايقين من الألفاظ دى وقالت هما عمرهم ما قال كدا وهى مستغربه جاب الالفاظ دى منين عشان كدة بيضربوه .

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

أهلا بيكي  . .

 

اكتر حاجة لفتت انتباهي في الرسالة , نقطتين بالتحديد . .

 

الكلام عن ان هو متأخر شوية في التعليم ,  تاني حاجة درجة اختبار ذكاءه .

 

غالبا انتي قصدك علي اختبار "ستانفورد  - بينيه" , واللي بيقيس الذكاء البصري , الحسي , الذاكرة , التشابه و الاختلاف , استكمال الجمل و هكذا .

 

و درجة 83 , تعني ان هو اقل من المتوسط شوية , لأن مقياس "ستانفورد – بينيه" بيكون كالتالي :

 

• أقل من 67        :      معاق عقليًّا

• 68 - 78          :     بطيء التعلم .

• 79 - 88          :     متوسط منخفض

• 89 - 110         :      متوسط

• 111 - 120        :     متوسط مرتفع

• 121 - 131        :      ممتاز

• 132 فما فوق     :    ممتاز جدًّا

 

فهو حاليا في خانة المتوسط المنخفض , صحيح انه موصلش لاحد مراحل التأخر العقلي الحقيقي , بس وارد يكون في الطريق .

 

خاصة اننا مش قادرين نتجاهل 3 علامات سلبية . .

 

• الوقاحة المفاجئة اللي اصابت لسانه , وجعلته ينطق بشتائم غير محتملة

• تأخره الدراسي اللي جعل والديه يقلقو عليه , وانه مش بيذاكر , وغالبا درجاته سلبية

• انطواءه و انعزاله عن اصدقائه في الفصل , واللي ممكن يكون من لسانه الطويل , او من بوادر اضطراب نفسي ولو بسيط

 

 

 

اما ان الطفل بيعاني بالفعل من احد اضطرابات التأخر العقلي اللي عند الاطفال , الاحتمال التاني  ان هو نفسيا مفيهوش مشاكل , بس بدأ سلوكه و اخلاقه تتغير تدريجيا لاسباب معينة   .

 

تعالي نمسك كل احتمال علي حدة  .

 

 

 

احتمال وجود بدايات تأخر عقلي وارد عنده , صحيح ان رقم 83 مش خطير , لكن كمان مش طبيعي .

 

و بشكل عام , اي طبيب او اخصائي نفسي بيقلق من اي رقم اقل من 90 علي مقياس ستانفورد , خاصة لو كان ده يصاحبه سلوك غير اعتيادي عند الطفل , زي انطواء , او عصبية , او فرط حركة , او رغبة تدميرية , او خوف زيادة .

 

و فورا دماغنا بتروح لاحد انواع المتلازمات اللي ممكن تكون عند الطفل  , واللي محتاجة اختبارات متخصصة اكتر عشان نكشف هل موجودة ولا لا , وبكمية كبيرة ولا لسة في البداية .

 

و علي كلامك ان المدرسين كانو بيشكرو فيه شطارته وهو صغير , وارد يكون عنده احد المشاكل البسيطة بس مكانتش باينة وهو صغير , ووارد يكون فيه شئ جديد حاليا عمل اثارة للازمة و خلاها تظهر بشكل واضح .

 

و ممكن يكون الحدث الجوهري اللي باين عندها هو انتقاله من مدرسة مستواها كويس (خاصة) , لمدرسة تانية اقل في المستوي (حكومة) , فيكون ده الشئ اللي استحث عنده المشكلة , وخلاها تظهر بشكل اكتر وضوح .

 

احنا للاسف بنتكلم من غير تفاصيل لاننا مش هنقدر نحدد هو اساسا عنده احد انواع الاضطرابات ولا لا , ولو عنده فهو نوعه ايه , مش هنعرف نحدد حاجة زي كدة من الكلام , حاجة زي كدة محتاجة مقابلة شخصية , وتطبيق احد اختبارات التأخر العقلي لدي الطفل , واللي بيعتمد علي تلات حاجات :المهارات العقلية والسلوكية، اعتبارات نفسية وعاطفية وجسدية، اعتبارات بيئية .

 

كمان لابد يكون عندنا تاريخ "بيولوجي" لاسرته , خاصة الاب و الام , ويكون عندنا تاريخ للمهارات العقلية والسلوكية، اعتبارات نفسية وعاطفية وجسدية، اعتبارات بيئية النفسية لاسرته  , عشان نشوف لو فيه شئ مشابه .

 

بل ان تواجد اي معلومات عن الحمل و الولادة ممكن يفرق , لان فيه حاجات قد تبدو طبيعية , زي "ارتفاع ضغط الام اثناء الولادة" حاجة زي كدة ممكن جدا تأثر في الحالة العقلية لدي الطفل .

 

وبالتالي الاحتمال ده وارد , وبنسبة كبيرة , بس محدش هيعرف يحسمه الا لو مشي بالخطوات العلمية عشان يشوف مدي تواجد اضطراب عند الطفل او لا , ولو موجود فنوعه ايه و كميته قد ايه

 

 

 

 

و كلمة تغير في السلوك معناها انه بدأ يبقي صايع شوية بشوية , لأسباب عديدة , ممكن هنا نلاحظ منهم 3 اسباب . .

 

اولا ان عنده 11 سنة , وديه السن اللي الطفل بيبدأ فيها يسيب مرحلة الطفولة , ويدخل في مرحلة المراهقة بكل مشاكلها و معاناتها , ويبدأ يتعامل مع اقرانه معاملة مختلفة  , البقاء فيها للاقوي , و ان هو لازم "يفرد" نفسه علي اللي حواليه عشان محدش ياكله .

 

ثانيا التغير اللي حصله , في الانتقال من مكان محترم "مدرسة خاصة" , لمكان أسوء "مدرسة حكومة" , وما يتتبعه من اختلاف في نوعية الطلاب المتواجدين هنا و هنا , او حتي اختلاف تعامل المدرسين بين مدرسة خاصة المدرس فيها بيعامل الطالب بنوع من الاحترام  و الآدمية , لمدرسة حكومة التعامل فيها أكيد مختلف .

 

فالتغير الحاد ده جعله يغير من سلوكه و طباعه , وجعله يكشر عن انيابه عشان محدش من اطفال المدرسة الحكومية يدوسله علي طرف , ده مكانش باين في المدرسة الخاصة ربما لان نوعية الاطفال مختلفة شوية .

 

ثالثا الضرب المستمر اللي بيعانيه من أمه , واللي بيجعله ياخد مسلك هروبي واضح , في انه يتسلح بالفاظ قذرة كنوع من صد العدوان اللي عليه , وربما كان بيستخدمها مع امه او ابوه لما حد فيهم يضربه .

 

الاسباب التلاتة ديه , تدفع في اتجاه ان التغير اللي اصابه هو مش اضطراب نفسي , ولكن تغير سلوكي طبيعي متعلق بطباع سلبية , مش تأخر عقلي .

 

خاصة  ان رقم 83 في اختبار "ستانفورد  - بينيه" يظل رقم مش مخيف , وربما لو تم اعادته مرة تانية انه يجيب فوق ال 90 , مما يدل انه طفل طبيعي .

 

 

 

 

ربما عدم حسم القرار أصابك بشئ من خيبة الأمل , لكن لو احنا كنا هواة , كنا حسمنا الأمر فورا بالمعلومات اللي قدامنا , وكنا سهل جدا اننا نقول اي كلام , لكن لاننا عارفين الطريقة العلمية لتناول أمر زي كدة , وضرورة عمل مقابلة شخصية بين الطفل و بين متخصص , فلازم نأكد ان لا احنا ولا اي حد يقدر يتخذ قرار في حالة زي كدة , من غير ما يقابله , ويقابل اسرته , ويعمل له اختبار متخصص في الاضطرابات العقلية للاطفال  , عشان يتم الوصول لنتيجة دقيقة .

 

بس ممكن نقولك خطوات مهمة تقدري تمشي عليها , و تخلي اسرته تلتزم بيها .

 

 

• مفيش بديل عن ذهابه لطبيب نفسي , او اخصائي متخصص في اضطرابات الاطفال , هو هيكون خبير في التعامل مع الحالات ديه , وفي نفس الوقت هيكون جاهز باختبار محدد عشان يوضح الحالة الحقيقية للطفل , ويا تري هو بيعاني من شئ , ولا بس ده تغير في سلوكه و طباعه

 

• لازم الأب و الأم – و الأم بالتحديد – تغير من طريقة تعاملها معاه , الضرب مش هيحل اي مشكلة , بل انه هيجعله يصر علي الوقاحة اللي هو مستمر فيها , لانه شايفها الدرع المناسب لصد هجمات الناس عليه , فورا يتوقف الضرب , لانه مبقاش طفل صغير , بل هو علي اعتاب المراهقة بالفعل  .

 

• علمي امه انها تعاقبه باسلوب مختلف , يعني من غير ضرب , ولكن بنوع من حرمانه من شئ بيحبه , انها تعرفه انها متضايقه منه و مش طايقه تبصله , انها تبصله بعتاب , هي هتكون عارفه ايه الطريقة المناسبه معاه

 

• الاقناع و الكلام بشكل عقلاني ممكن يفيد طفل في السن ده , فلازم تبدأ في النهج ده في اسرع وقت

 

• خليها هي و الاب يبدأو في التعامل معاه علي انه راجل , ويتكلمو معاه باسلوب انت بقيت راجل خلاص , عيب شغل العيال الصغيرة ده , احيانا الطريقة ديه بتغير المراهق تماما

 

• ممكن تستفزعنده نقطة الوعد , وانه ميكسرش كلمته , والا مبقاش راجل و بقي عيل , وديه حاجة بتستفز اي مراهق , فلو انها اتفقت معاه انه ميقولش اي كلام وحش , ورجع قال كلمة مش كويسة , تبصله بسخرية و تقوله : هأ , مش كنت تقول انك عيل و مش قد كلمتك عشان اعرف , ده شئ هيغيظه و يخليه يحافظ علي وعده

 

• لازم يبدأ يتعلم أسس الدين و الصلاة والقرآن , خليهم يعمل تغذية روحية في عقله و قلبه و كيانه , عشان يساعدهم في مسح القاذورات من عقله , وهو مبقاش طفل

 

• لازم الأم تبطل تقارنه بأخوه , احتمال يكون تمسكه بالشتيمة ده كرد فعل للاهانة المستمرة اللي بيحسها من مقارنته باخوه المتفوق عنه , فهو وقتها بيجعل نفسه يتميز عن اخوه ولو في شئ سلبي , غير انها كدة بتزرع جواه نيران الغيرة و الكراهية لأخوه , لازم هي تتوقف فورا

 

• ميضغطوش عليه كتير في المذاكرة , يعني اكيد ميسيبوهوش يضيع وقته , بس ميحسسوهوش ان المذاكرة هي قضية حياة او موت , لان وارد الطفل يكون بيعاني من الاساس من مشكلة تأخر دراسي

 

• ياريت يبطل يشوف كارتون او افلام كتير , والام تنقي له حاجات اكتر فايدة يشوفها , كتير من الحاجات ديه بتزرع جواه رغبات العنف , واللي هو بيترجمها لشتائم قذرة

 

• ان كان عدم اختلاطه باصدقاء السوء حاجة كويسة , فانعزاله تماما حاجة مش كويسة  ,لازم يختلط بناس محترمين, عشان يبدأ يتعلم منهم الصح, وياريت تبدا هي تعرفه طريق المسجد , ويصلي هناك بقدر الامكان عشان يتعرف علي اطفال كويسين

 

• انتي كأخصائية لازم تصاحبيه , و تكوني صديقة ليه , عشان لو عنده سر يقولهولك , ومش اي حاجة يقولهالك انتي تقوليها لامه , لان هي ممكن تعاقبه علي شئ هو قالك عليه كسر , وقتها مش هيثق فيكي ابدا

 

​