سلسلة الأخطاء

الرسالة السابقة

العنوان : سلسلة الأخطاء

القسم: #العاطفي

الرقم: 07

السؤال:

انا مشكلتى انى اعجبت بزميل ليا ف الشغل وطبيعه الحال انا مليش اى تجارب نهائى قبله وانا جبانه انى ااقابله حتى

فعملت اكونت باسم مستعار واعترفتله بحبى ليه واصر انه يقابلنى وقابلته وبعدين قابلته كذا مره بعدها

واخر مره كانت من اسبوع وروحت لقيته بعتلى رساله انه كان فرحان بوجودى حواليه جبتله هديه كتذكار ف اول مقابله لينا

تالت مقابله قالى اننا اخوات وانه مش بيفكر يرتبط او يتجوز بس انا حاولت اقنع نفسى انى لازم اعامله كأخ وكملت معاه بنفس اهتمامى

بيرد متأخر رغم انه اون لاين ويقولى اسف كنت ف شغل وكمان ساعات بيقولى كلام حلو جدا وكلام مغازله مش كلام بين اخوات

زهقت من طريقته اهملته اسبوعين جه كلمنى وكتبلى شعر بس مقلش انه ليا بس معنى الشعر ان الغياب صعب وانه ايقن بحبه بس بردو مقلش انه ليا

كل ما اقابله يقولى ع البنات اللى عايزين يرتبطوا بيه وهو رافض واغلبهم من الشغل اعرفهم كلهم واغلب كلامه ع البنات وبس وقد ايه هو مرغوب فيه منهم وقد ايه هو شخص جد ومفيش منه

ولما قولتله ع بنت معانا انا كنت حاسه انها بتحبه بردوو قالى دماغها خفيفه اوى ومتعجبنيش ع العلم ان شكله عادى بس عجبتنى شخصيته

ولما قولتله انت بتقول رسايل الother عندك مليانه بنات اشمعنا يعنى رديت ع رسالتى قالى عشان عرفتى تدخليلى صح وانك اهتمامك الوحيد اللى لفت انتباهى

انا دلوقت واقفه ف النص ومش عارفه اتعامل معاه انا تعبانه حقيقى وعايزه حل

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة :

اهلا و سهلا بنموذج جديد من المتلازمة المشهورة "شاب بيتسلي – بنت مخدوعة" . .

اغلب الكلام اللي هقوله مش هيعجبك , فانتي ان مكنتيش متقبلة كمية من النقد البناء , اللي بنقوله عشان خايفين عليكي , وعشان بنعاملك زي اختنا , ويهمنا مصلحتك , فممكن تسيبي المنشور تماما و تتجاهليه . .

لو انتي بالفعل عايزة تحلي المشكلة و مش هيكون عندك غضب من اننا نحط النقط فوق الحروف و نقولك ده صح و ده غلط , فكملي معانا للآخر . .

انتي ببساطة واقفة في النص , لأنك واقفة في المكان الغلط , مكانك مش علي السلم , ولا مع اخينا ده . . .

خبرتك الحياتية الضعيفة جعلتك تقعي في سلسلة من الاخطاء المتتالية , واللي جعلتك في الوضع المؤلم ده , وبتعاني منه , ومش عارفة تتخلصي منه , فلا هو اتقدملك بالفعل , ولا انتي عارفة تنسيه . .

و سلسلة الأخطاء ديه بدأت و استمرت و لسة شغالة حتي الآن , ومن كرم ربنا انها حاليا متوقفة عند محطة معينة , ونخشي ان المشكلة تتفاقم , و تلاقي نفسك في مساحة انتي متخيلتيهاش في ابشع كوابيسك , ربنا يحفظك . .

عشان كدة لابد من التخلص بشكل سريع من الوضع القائم ده , و حله فورا . .

--------------------------------------------------------------------

تعالي نمسك سلسلة الاخطاء المتتالية اللي حصلت , ونحللها . .

اول مشكلة مش الاعجاب , الاعجاب في حد ذاته مش مشكلة , متنسيش ان السيدة خديجة وجدت في شخص الرسول صلي الله عليه و سلم انسان عظيم , وعملت خطوة حكيمة لاتمام الزواج منه . .

و بنت الرجل الصالح في مدين (يقال انه سيدنا شعيب) اعجبت بسيدنا موسي , وسلكت طريق سليم للتلميح لابوها و بعدها للزواج منه . .

فالاعجاب في حد ذاته فطرة بشرية لا يد لك فيها , لكن مشكلتك في الطريقة الساذجة للتواصل معاه . .

والطريقة ديه كانت هتجيب نتيجة , لو كان هو انسان محترم و جاد و متدين , ومش عايز يتسلي , وده احتماله كام في المية ؟ ؟ ؟

لو كان هو انسان بيخاف ربنا , وعنده احترام ليكي و لنفسه , كان عمل خطوة حقيقية بعد ما اتعرف عليكي , لكن اللي حصل مختلف للأسف . .

دلوقتي بتقولي انك قابلتيه كذا مرة , يعني بالفعل هو شافك و عرفك اكتر من مرة و لسة معملش خطوة جاد , لسة مطلبش منك رقم بابا عشان يروحله , يبقي انتي مستنية ايه ؟ ؟

فالمشكلة التانية هنا هي استمرارك في مقابلته و الكلام و الهزار و الضحك , وانتي لسة منتظره منه خطوة ايجابية و مخدهاش . . .

والقاعدة التجارية معروفة : ليه ادفع تمن حاجة انا ممكن احصل عليها مجانا . .

يعني ليه هو يلتزم و يتحمل مسؤولية زواج ,عشان يكون معاكي , في حين انك بالفعل معاه من غير اي التزام منه , طب ايه اللي يدفعه انه يخبط علي باب بيتكم . .

لا اعني وجود شئ بينكم والعياذ بالله ,لكن حتي "المصادقة" و الهزار و الضحك , هو شئ المفروض لا يحصل عليه الا اللي يحط ايده في ايد ابوكي , مش اي حد تاني ابدا . .

فهو طالما مستمتع بالصداقة مجانا , عمره ما هيتجوزك , بل انه فقط بيضعك مفتاح في سلسلة مفاتيحه وسط العدد الكبير من البنات اللي هو مصاحبهم , وغالبا بيخرج مع بعضهم , وفي نفس الكافيه اللي بتقعدي معاه فيه . .

فالمشكلة التانية اللي حصلت , هي "التساهل" في التعامل معاه , وتحولك من "قطة مغمضة" مش بتعرف تتكلم مع اي شاب او حتي تبص لعينيه , لواحدة بتقابله اكتر من مرة وفيه نوع من التعامل السلس معاه , حتي انك جبتيله هدية كمان , هل ده ينفع ؟ ؟

المشكلة التالتة ان هو لما كان صريح معاكي في المقابلة التالتة (وديه النقطة الوحيدة الايجابية اللي عملها) و قالك علي حقيقة مشاعره ,انك اتخذتي قرار غلط ساعتها . .

يعني هو جابهالك علي بلاطة , وقالك يا بنت الناس انا مش بتاع جواز ووجع قلب ,انا ليا في الخروجات , في الفسح , في الكافيهات , لكن بقي نظام دبل و بوكيه ورد , واجيلكم كل يوم خميس , و اجيب شقة و اتابع النقاش , واختار الستاير ,وقاعة البرنسيسة ,و اعمل بلوك صاحباتي البنات , لا انا مش في الحوار ده . .

والحقيقة منقدرش الا نقوله "كتر خيرك" انه كان صريح معاكي , وانه ملفش ودار معاكي , وانه معملش زي شباب كتير ,انه يعشمك و يوعدك , وحاضر كمان سنتين هخلص الجمعية و اجيلك وبتاع ,ويتسلي علي حس الوعد ده و يتسهوك و هكذا . .

وهو لما كان صريح معاكي , عقلك الباطن مصدقش انك ممكن تخسريه , وانه هيكون لغيرك , فهو – عقلك الباطن يعني – جاتله فكرة هايلة (من وجهة نظره) . .

انك تكملي معاه , بنفس اهتمامك زي ما قلتي , وقال يعني هتعامليه كأخ , لأنه – عقلك الباطن – يتمني انه – صديقك – قدام شوية يعجب بيكي و يحبك , ويقرر ياخد رقم بابا و ييجي معاه بوكيه الورد . .

و مشكلة الفكرة الساذجة ديه انها غير فعالة علي الاطلاق , واحتمالية نجاحا مش اكتر من 1% , لان هو من الاساس مش مهتم بفكرة الجواز, ده غير انه بالفعل معجب بغيرك . .

فده خطأ مش قليل ,انتي ببساطة قاعدة في مطعم كباب الساعة 8 الصبح في اول يوم رمضان , وبتقولي هكمل صيام عادي و مش هفطر , انتي مصدقة نفسك ؟ ؟

المشكلة الرابعة انك معاملتيوهش كأخ ولا صديق , مع ان مفيش حاجة كدة في الشرع اصلا . .

مفيش زميلة بتلوم زميلها انه رد متأخر في الشات , او اهماله ليها , او انه مش بيكلمها . .

انتي بتعامليه معاملة "خطيبته" بالكامل , بكل مشاعر الحب و الاهتمام و الغيرة , وطلب الاهتمام منه . .

هو عايز يخلع منك بالراحة و بالذوق , وانتي مش عايزة تسيبيه , سبحان الله عليكي , انا متخيل شعوره وهو بيشوف رسالتك علي الماسنجر, وينفخ وهو مخنوق و يقول "وبعدين في الشغلانة الزرقا ديه , اعملها ايه طيب عشان تفهم " . .

ده ان كان الخطيب او الزوج , مش بيستحمل الزن من خطيبته او مراته ,فما بالك بشخص قالك بالفعل "عليا الطلاق ما هتجوزك" , ليه بترخصي نفسك و تتكلمي معاه اساسا ؟ ؟

وطبعا هو مش برئ , هو مجرم انه بيشعل نيران الحب في قلبك بالكلام الحلو و المغازلة , تصرف شديد الوضاعة من مخلوق مش بيفهم , انه المفروض يبتعد بالكامل عن انسانه هو عارف انها بتحبه و هو مش هيحبها . .

هو مجرم باستمرار تغزله فيكي , وانتي غلطانه انك اصلا بتسمعيله و منتظرة منه المزيد . .

لما عقلك رجع لراسك , وادركتي اخيرا ان مفيش امل , سبتيه اسبوعين , و ديه خطوة هايلة و صح , وكان نفسنا انها تتعمل من الاول , وانها تستمر للآخر . .

فالشيطان المقيم في عقله و كيانه مرضيش ان انتي تهربي من الفخ الخاص بيه ,وكبرياءه و غروره مسمحلكيش انك تنسيه , لان هو بيستمتع اساسا بوجود شخص بيحبه وهو مش معبره , زي ما شرحنا بالتفصيل في رسالة "لهيب الحب" . .

قام هوب , يبعتلك شعر جميل ,و كلام يدوخ اي بنت مراهقة , ويوريكي صور "صديقاته" اللي بيترمو علي الارض وقوعا في غرامه , و بيقضو الليل بكاء علي اللي حب ولا طالش . .

وهنا لازم اقول تعليق مختص بحالته النفسية والعصبية . .

ده انسان عنده "عقدة نقص متكاملة" و غالبا سببها ان مكانش حد بيعبره ولا بيهتم بيه وهو صغير , فلازم عشان يعوض النقص الرهيب اللي عنده ,انه يقتنع و يؤمن يقينا , ان فيه عشرات الجميلات اللي واقعين في دباديبه , وهو مش عايزهم . .

انا مش باشتمه , انا بحلله نفسيا , و لا شك في ان نص اللي بيقولو كلام فاضي , وان البنات ديه تتقرف تبص في وشه من الاساس . .

و طبعا هو بيقولك كدة , مش بس عشان يعوض الفراغ الكبير في شخصيته , كمان عشان "يشطشطك" و يشعل نيران الغيرة من جديد ,لما لقي ان حبك و اهتمامك بيه قل كتير . . .

وطبعا لما قلتيله علي فلانة اللي بتحبه , ولا علي رسايل الـ other جابلك حجج خايبة , ولو هتشوفي الماسنجر عنده , هتلاقي انه بيبعت لنص البنات "هلا و غلا و اقبلي الادد من فضلك" , هي مش معبراه

خطأك الأخير انك بعد ما شفتي كل ده منه , لسة عندك امل واهم

---------------------------------------------------------------------------

يا تري متلازمة "شاب بيتسلي – بنت مخدوعة" بقت واضحة معاكي دلوقتي ؟ ؟

بقيتي شايفة بعنيكي بشكل حقيقي , قد ايه هو انسان مضطرب نفسيا , و اخلاقه في قمة الوضاعة , وان الفراغ الداخلي اللي جواه , ميملاهوش الا حرق قلوب العذاري . .

بالشكل اللي قلتيه , يبقي اصلا لازم ترفضيه لو هو اتقدملك , يعني بفرض ان بعد كام شهر , قالك انه بالفعل بيحبك و مش قادر يسيبك و بتاع , وعايز رقم بابا , فاصلا لازم ترفضي تماما . .

لان اللي زي ده لا يصلح كخاطب ولا كزوج ولا كأب ولا اي شئ في الدنيا . .

اللي يلعب بقلب انثي , و ميسيبهاش تنسي و تستريح من حب ميئوس منه , ويستخدم اسلوب ساذج في اشعال غيرتها , وكمان بيؤمن ان "فاتنات مصر" بيجرو وراه بس هو اللي تقيل , اللي زي ده مينفعش ابدا زوج . .

اللي زي ده هيعذبك في الخطوبة و بعد الزواج , وهيظل ماشي في الوهم اللي عقله الباطن اخترعه ومش هيعرف يتوقف عن "اصطياد" قلوب العذاري , حتي بعد الزواج . .

بعد اي جواز , الزوج بيكون كل حياة الزوجة , لكن الزوجة بتكون بعض حياة الزوج , والكلام ده في حالة انه مخلص ليها . .

يعني هي جزء من حياته لان عقله مشغول بشغله و امه و اصدقاءه و حياته و لعب الكورة , والقعدة علي القهاوي , والزوج المحترم اللي يعمل ده كله من غير ما ياخد من حق زوجته . .

فما بالك بقي لما يكون في قلبه بعد الزواج عدد من "العذاري" اللي بيصطادهم . . .

الحل الوحيد هو الابتعاد الكامل عنه و نسيانه تماما . . .

يعني بلوك علي الفيس من غير مناقشة , ولو جالك من حساب تاني بلوك من غير كلام , واصلا متقريش رسايلة , وان قريتيها متصدقيهاش , ده مجرم بالفعل . .

لو هو قدامك في الشغل فحاولي تشوفي شغل تاني , لما تخسري ال800 جنيه اللي بتاخديهم في الشهر , احسن ما تخسري اعصابك و قدرتك علي التحمل . .

شوفي شغل غيره , بلوك من اي حاجة يعرف يتواصل معاكي منها , ولو يعرف رقمك اشتري خط جديد . .

مش عايزة تعملي كدة ؟ ؟ براحتك , محدش فينا وصي عليكي . . . .

بس لما تلاقي نفسك كمان كام شهر مدمرة نفسيا من حماقاته و سلوكياته المضطربة , واعماله الاستفزازية , متلوميش حد فينا . .

الحل في ايدك , ومن كرم ربنا انه حفظك من مساحات مظلمة وصلت ليها بنات تانية بتحب شباب بنفس الكيفية , فاهربي فورا من المجرم ده وانتي لسة علي البر . .

سلسلة الأخطاء

الرسالة السابقة

الرسالة التالية