العنوان : طمس الموهبة

القسم   :#النفسي

الرقم    : 60

السؤال :

 

عندي 17  سنة و داخل ثانوية عامة السنادي وحلمي اطلع رسام مش عايز ابقي اي حاجة غير كدة

 

رسوماتي حلوة بجد بس بابا مش فاهم كدة و بيقولي لازم اجيب مجموع عشان ادخل كلية كويسة وانا فعلا مش عايز اشتغل اي حاجة غير رسام

 

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

 

شوف يا سيدي

 

انت عندك حق , وبابا عنده حق , ولازم يتم عمل خطة واضحة لتنفيذ الرؤيتين مع بعض . .

 

من ناحية من أكبر مشاكل بلادنا هي طمس المواهب ووأدها , باعتبارها دلع و تضييع وقت وكلام فاضي , بينما في البلاد اللي بتفهم بيتلقفو الاطفال بدري جدا , لتنمية مواهبهم و تنشئتها . .

 

اللي شايف الرسم هيافة يبقي ميقراش الجرايد اللي فيها الكاركاتير , ولا  يجيب لولاده قصص مصورة مرسومة , وأول ما يدخل بيت حد من زمايله ويشوف لوحة علي الحيطة يرميها من الشباك فورا . .

 

الرسم و الشعر و الادب و غيره من الفنون , هي اللي بتجعل الحياة ليها طعم , وقابلة للعيش بهدوء و راحة , بعيدة عن ضوضاء الحياة . .

 

------------------------------------------------------------------------------------

 

و من ناحية تانية . .

 

حضرتك مش مولود في ستوكهولم , ولا بتدرس في السوربون , ولا الشارع بتاعكو  فيه ناس عندهم الذوق الفني اللي في أحد أحياء مونتريال . .

 

زي ما نبص للجانب الجميل من الفن , لابد أننا نكون واقعيين و نعرف ان الرسم مبيأكلش عيش , وإنه مش هيفتح بيت , و حتي الفرص المتعلقة بمهن فيها رسم زي الجرايد و دور النشر قليلة و مش مستقرة  .

 

فالوالد عنده حق , لأنه لازم يتأكد و انت في السن الحساس ده , واللي كل قرار هتتخذه فيه هينعكس علي حياتك بالكامل  , لازم يتاكد إنك ماشي في طريق سليم , نهايته انك يكون عندك مهنة مستقرة و تعرف تفتح بيت و تتجوز و يكون عندك ذرية تشيل اسمك . .

 

و للأسف الرسم مش من ضمن قائمة المرشحين للمهن ديه , خاصة انك في بلدنا الحبيبة مصر , اللي أصلا اللي معاهم شهادات عليا مش لاقيين شغل .

 

فلازم يكون عندك خط موازي - ومش هقول خطة بديلة - عشان  تدخل كلية تصنع فيها مستقبل المهني , وتقدر تفتح بيت لما تتخرج  .

 

كون ان فيه بطالة و الاقتصاد ميت حاليا , ميمنعش ان فيه مجالات معينة هتقدر تشتغل بيها , حتي لو سافرت برة مصر .

 

وبالتالي احنا هنمشي علي قاعدة  : ما لا يدرك كله , لا يترك جله . .

 

متخليش الرسم هو مصدر دخلك , وفي نفس الوقت متسيبهوش . .

 

اطحن نفسك مذاكرة في ثانوي و سيب الرسم مؤقتا , و لما تدخل كلية مناسبة , سهل جدا تتعلم الرسم لوحدك بالتوازي .

 

اليوتيوب عليه محتوي كبير في كل المجالات , وبالتالي لو عندك ارادة , وصبر , هتطور نفسك بشكل مناسب .

 

و متخليش ده ياخد اكتر من 3 ساعات اسبوعيا مثلا , لان عندك اولوية اسمها تتفوق في الكلية و تاخد شهادة وتشتغل بيها  .

 

وارد لما تتعلم الرسم , تلاقي نفسك احترفت فيه بالفعل , وبقت رسوماتك جميلة و معبرة  , ساعتها ممكن ببساطة تشتغل اونلاين , تتعاقد مع جريدة او دار نشر , وتبعتلهم شغل بالقطعة , و يبعتولك الفلوس لحسابك البنكي .

 

و ده من غير ما تسيب الكلية , او تغير مجالك . .

 

اوعي في لحظة تتهور وتتخذ قرار غير مناسب , انك تسيب الكلية و تجري ورا حلمك من غير تكون مخطط كويس انت هتعمل ايه , عشان متلاقيش نفسك بعد سنين عرفت انك أخذت قرار غلط .

 

خلي دراستك 80 % من وقتك , وموهبتك 20 % , وثق انها كافية لتطويرها , من غير ما تضيع مستقبلك  .