الإضطراب المزاجي
الرسالة السابقة
العنوان : الإضطراب المزاجي
القسم: #النفسي
الرقم: 73
السؤال:
اولا السلام عليكم ثانيا معلش عايزة اخد راي حضرتكو ف مشكلة وياريت ترد هنا عشان افهم
انا متجوزة من سنتين وعندي 21 سنة اتجوزت عن حب وجوزي يتيم اب وام وانا كنت شايفة انه شبهي جدا وكان دايما يسايسني وقعد يحاول كتير اووي عشان يلفت انتباهي قعد حوالي سنتين وشوية بيحاول يخليني احبة واتعلق بية وكان غلبان جدا
لكن المشاكل بدات من اول ماحملت كنت حامل ف توأم بدا يعاملني وحش اووي كانة زعلان اني حامل كان بيعاملني كاني خدامة وزعيق وتشنيج ومعاملة وحشة جداا نفسيتي بدات تسوء وسقط ف الشعر السادس اتعدل وبدا يعاملني كويس وحسيت انة فرح مش زعل ..
عدي كام شهر رجع اوحش من الاول كنت بسجلة صوت في تليفونه وهو قاعد مع صحابة سمعت كلامة عني وكلامة عن اهلي طلع كداب ف كل كلمة طلع مخبي عليا حجات كتير اووي من البداية بيكدب ف كل كلمة من غير سبب بيحب اووي يهزر مع ستات وحشة جداا من ورايا بتوع شاي الي بيقعدو ف الشوارع مع اني حلوة مش وحشة نهائي بدا يكدب ولما واجهتة قالي انتي ليكي اكلك وشربك ومدام مش ناقصك حاجة مالكيش دعوة بعمل اي
طبعا اتخانقنا وكل ماكنا نقرر نطلق يجي هو ع اخر لحظة ويصالحني مصالحة جبر خواطر وبعدها بيوم كان مفيش حاجة انا تعبت وهو مابيعملش اي حاجة عشاني انا اخر حاجة ف اهتمامتة حتي لو عيانة مش بيسال وبيطنش يوديني للدكتور مهما افضل ازن علية مع انا مش بكلفة حاجة ولا ليا طلبات ولا باخد منة جنية حتي
كان بيتخانق مع مامتي ويغلط وانا اعدي واقول معلش لحد مااختة تعبت ورحنا قعدنا معاها كل اخواتة كانو موجودين بداو يغلطو فيا ويكلموني كاني شغالة عندهم واحكيلة يقولي معلش وبعدها بدقايق يتحجج ويتعصب عليا من غير سبب
ومهما اتكلمت معاه بهدوء او عصبية واقنعة ان الطريقة دي وحشة هو بيفضل يقولي انا معملتلكيش حاجة ومش بيشوف نفسة غلطان اي غلطة ليها عندة مليون مبرر
بيروح مع صحابة افراح عشان يتفرج ع الرقصات بيفضل يتكلم معاهم عن البنات قدام الناس بيعاملني وحش بيحكي لصحابة وكل الشارع عمتنا عن اي حاجة بتحصل فوق بيفضل يقول انا بديها فلوس كتير ويفضل يقولهم لسة ضاربها واحنا مش متخانقين اساس
انا تعبت وبيني وبين نفسي شايفة اني استحملتة بما في الكفايا ومش شايفة سبب لكل دا غير ان العيب عندة مش عندي لاني مش مقصرة بالعكس انا مش مركزة غير معاه
وبغير عليه وهو مابيفرقش معاة انا زعلانة ولالا حتي وانا حامل وداني عند اهلي ولما رحنا عمل خناقة من غير سبب ونزل وسابني ولما وصل شقتو كلمني قالي متجيش عشان انا هطلقك وربنا يعوض عليا بعدها باربع تيام انا سقط
معلش طولت بس بحاول اوضح معلش عايزة رد اعمل اي اطلق ولا اي الحل لان هو مش بيسمع وتعبت
اسفة تاني ع الاطالة
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
اهلا بيكي .
كل ما اعيد قراءة الرسالة , واحاول ادور علي حل , أو علي مخرج , او علي طريقة لعلاج المشكلة , فعلا مش لاقي .
و باين من الكلام ان الطلاق احد الحلول المتاحة , واللي احنا مش بنحب نجيب سيرته , لكن مش لاقيين اي حل تاني . .
ولما حاولنا نعمل تحليل لشخصيته , بناء علي المعلومات اللي قلتيها , وصلنا ان هو حاجة من اتنين . .
إما ان هو شخص هوائي جدا , اللي في مزاجه بيعمله , واللي بيحبه ينفذه , بغض النظر هل ده شئ صح ولا لا , هل حلال ولا لا , هل هيكسر قلب مراتي ولا لا ,سيبك من ده كله , المهم اعمله و خلاص . .
او ان هو شخص عنده نوع من الاضطراب المزاجي , اللي بيجعله يتعامل بمشاعر متناقضة , و يتقلب بينها بشكل سريع و غير منطقي , و ده بناء علي وصفك لما قلتي انه يعاملك معاملة كويسة , بعدها بفترة قصيرة معاملة وحشة .
مستحيل تحديد هو من انهي نوع فيهم الا بتعريضه لعدد من الاختبارات النفسية , وطبعا ده شئ مش متاح .
و كان من المدهش اننا نتخيل شخص يزعق في مراته عشان بتكح , يعني اكتر راجل بارد في العالم , هيكتفي انه يتجاهل ان مراته بتكح و ينام , لكن انه يزعقلها و هي بتعاني من الكحة , شئ مدهش فعلا .
ولما انتي وصفتي انه بمليون وش , وانه محترف التمثيل , ده برضه أكد الانطباع عندنا انه ابعد ما يكون عن الدور المنوط بيه كزوج يرعي زوجته , او اب يحرص علي اولاده .
---------------------------------------------------------------------------------
و الغريب أكتر هو موقفه من حملك . .
يعني بفرض انه مش عايز اطفال , فده شئ كان ممكن يرتبه معاكي من اول يوم زواج , بحيث يكون فيه ترتيبات لتجنب اي حمل , وديه حاجة منطقية و معقولة . .
و حتي لو تم حمل ,فبعض الرجال بيسعو انهاء الحمل ده , وده مع انه جريمة شرعية و انسانية , لكن علي الاقل هو بيكون شخص صريح وواضح , وبيقول انا مش عايز الحمل .
لكن تصرفه المدهش , في انه يعاملك وحش وانتي حامل , من غير ما يقول صراحة انه مش عايز الحمل , مش شايفين ليه اي تفسير , الا انه مش قادر يواجهك بالحقيقة , انه مش عايز اطفال .
وارد يكون مش عايز اطفال عموما , ووارد يكون مش عايز منك انتي , عشان يكون "خفيف" و مفيش شئ يربطه بيكي .
و للأسف كل المؤشرات بتتجه الي التفسير اللي انتي قلتيه , انه مجرد مستمتع بتواجده مع زوجه بتحبه و بتهتم بيه , من غير ما هو يكلف نفسه بالحد الادني من الاهتمام او الرعاية , او حتي انه يقوم بدوره كزوج .
وان كراهيته للحمل , تفسيرها زي ما شيافينه , انه مش عايز رابط قوي بيكي , بحيث يكون "حر" , يعرف ينطلق اي وقت . .
ولأنه اتعود علي انه يصالحك كذا مرة لما تضايقي , فهو بيتعامل معاكي بالشكل الغير مقبول ده , علي اعتبار انه هيعرف يصالحك في النهاية , فعادي مفيش مشكلة . .
ومن اسوء الاشياء اللي فيه , افشاء اسرار البيت الزوجي , وهو الشئ اللي اصلا بيطعن في كرامة اي رجل محترم , معقول حد يقول لاصحابه انا كنت باضرب مراتي ؟ ؟ ؟ هل ده مخلوق عاقل ؟
ومش بس مبيصليش او مبيصومش , ده كمان بيحاول يخليكي تكوني زيه , وده شئ غريب بالفعل في طباعه و صفاته . .
فانتي ممكن في النهاية تديله فرصة واحدة و اخيرة . .
و تكون كالتالي . .
اقعدي مع نفسك , وامسكي ورقة و قلم و اكتبي الصفات السلبية الزبالة اللي فيه , واختاري الحاجات شديدة الاهمية , واللي بالفعل عاملة استحالة في المعيشة (الاهانة , الضرب ,افشاء الاسرار , التعامل الغير مناسب, السخرية من الدين , اهانة اهلك) , وممكن حاليا تتجاهلي الحاجات التانية اللي ممكن تستحمليها (البخل , مش عايز اطفال )
ولما تكون القايمة جاهزة , قوليله من تاني يوم انا عايزة اطلق , وده قرار نهائي و مفيهوش نقاش . .
هيقولك ليه و مش هينفع , وبتاع , وهيضحك عليكي بكلمتين . .
ساعتها طلعي القايمة ديه , وقوليله فيه هنا سبع حاجات انا مش طايقاهم فيك , ومستحيل اعيش معاك طالما موجودين , ومعاك مهلة شهر واحد , يا اما تتغير فيهم تماما , ويا اما مفيش فايدة . .
لما يبص علي القايمة , هيعمل حاجة من اتنين . .
يا اما يشوف الحاجات ديه اكبر من طاقته , فيرفض و يقعد يجادلك او يفاصل معاكي . .
انتي اياكي توافقي علي اي فصال , واياكي تتنازلي عن اي حاجة فيهم , طالما انتي بالفعل اختارتي الحاجات ديه علي اساس انها شديدة الاهمية . .
لو اصر علي الفصال او الجدال , ساعتها يبقي انتي عملتي اللي عليكي , وامشي في اجرائات الطلاق من غير نقاش .
الحاجة التانية اللي ممكن يعملها , انه يقولك يا سلام , من عينيا , اوعدك هتغير تماما . .
ساعتها ممكن بالفعل يكون جاد , ويبدأ يغير من نفسه شوية بشوية , وانتي تشوفي فيه جدية حقيقية , في انه يتغير , يبقي خلاص , سامحيه بالفعل , بس مش من كلمتين يقولهم , لكن لما تشوفي بعنيكي انه اتغير حقيقي مش بيمثل . .
و ممكن انه يمسك نفسه كام يوم , ويرجع تاني زي ما كان و اسوء , ساعتها مفيش حل الا الطلاق . .
و في الحالة الاولي (انه يرفض يغير نفسه) , او في فشل تطبيق الحالة التانية (انه يوعدك بالتغيير بس ميغيرش نفسه) , وقتها لازم تكملي اجاراءت الطلاق للاخر , واعرفي انك بتعملي خير في نفسك , وبتنقذي ذاتك من عذاب مستمر معاه . .
ايوة الطلاق حاجة مش كويسة , بس احيانا بيكون رحمة من عذاب اشد منه , و بيكون هو الحل الوحيد .
و لما تتطلقي دلوقتي , احسن ما تصبري كام سنة كمان , وتجيبي منه طفل او اتنين , و تاقي ان الحياة مستحيلة معاه و تطلقي و انتي معاكي اطفال منه , وده كابوس حقيقي . .
اعملي الخطوة ديه , واعتبريها الفرصة الاخيرة ليه , بس ارجوكي , لو بالفعل هو فشل في تغيير نفسه , اياكي تصدقيه ,او تسمعيله مرة تانية , لانه وقتها هياكل عقلك زي ما عمل اكتر من مرة
ربنا يعينك علي المأساة ديه , ويخفف عنك يا رب العالمين