العنوان : الصراع الداخلي

القسم: #النفسي

الرقم: 108

السؤال:

 

السلام عليكم ورحمة الله لكم جزيل الشكر والتقدير ع مجهوداتكم الرائعة

 

انا من فترة طويلة كنت لينه القلب وبعرف اسامح واتجاوز وانسي واضحك واتكلم بمحبه وافرح مع الجميع وازعل بردو مع الجميع

 

 دلوقتي مبقتش كدا بقيت ساكته ف منتهي الدوشه من جوايا مبقتش احس باي حاجة لا فرح ولاحزن وبطلت اسال الناس ولما يجي ع بالي اسال اسوف وبنسي ف الاخر حتي لو حد يكلمني يطمن عليا مبردتش وبعد اصرار واتصالات كتير برد بس غصب عني وبتمني المكالمه تخلص

 

 كانت دمعتي تنزل من اقل حاجه دلوقتي بضغط ع نفسي وحشني البكي ساعات كدا وساعات ابكي وكاني عمرى مابكيت وبحرقه كدا مبقاش فارق معايا حد اصبت بالامبالاة تجاة الكل ترسخ جوايا يقين انهم ماشين حتي اخواتي واولادي هينشغلو ف حياتهم وينسوني ومتقبله كدا جدا مع اني روحي فيهم

 

 لما بتحصل حاجة كويسه متاكده ان هيحصل حاجة وحشه بعدها فمبقتش ازعل ولا افرح ع حاجة الوقت الوحيد البحس فيه بسكينه وانا بصلي او بقرا قران واقعد اعيد ف الايات عشان الوقت  يطول كل دعائي ف الصلاة اللهم اقبضني اليك عاجلا غير اجل

 

فيه صخب جوايا صراخ وعياط وضحك وكلام كويس وكلام كله جبروت حاسه أتنين جوايا عكس بعض ف نفس الوقت وكله عرض متواصل مع بعضه وتسالني أقولك تمام ومش باين عليا أنه ف حاجه بتكلم معاك عادي ولما تمشي برجع تاني للمعمعه

 

انا نفسي اصرخ واشتم وأقول سبوني ف حالي بس صوتي مش بيطلع عايزة أكسر واهدم عايزة أبكي ومش عايزة يسالني مالك مش أعرف ارد كتير بفكر أهرب بس مش أشوف حد أو يعرف مكاني بس برجع ف كلامي تاني

 

بفكر كتير اوي وممكن اقعد ساعتين ع مانام ونوم قلق ممكن يكون ثلاث ساعات بس  بقي عندي صداع ودوار ملازمني طول الوقت انا مش عارفه فيه ايه غير اني عمرى ماكنت  كدا ودلوقت مش عارفه اطلع من اللي انا فيه

 

 حاسه اني استهلكت وعندى فراغ ف قلبي ومعنديش حاجه اديها لحد بقيت مزيفه وبجامل مش عارفه انا بحب ولابكره لو سمحتم ساعدوني

 

ف حاجة نسيت اقولها وأنا بجاوب ع الاسئله بعد وفاة بابا وأنا ف الإعدادي حاولت الانتحار ٣ مرات ومرة منهم لحقوني من كام شهر كنت بفكر اعمل كدا لكن لما اتصاحبت مع القرآن وفهمت ان العيش والنعيم في الاخره إن الدنيا ماهي إلا مقدمه لمنزلتنا ف الاخره ومفيش الا نعيم مؤقت وكبد واني مش مطلوب مني غير الصبر عشان الجنه فأنا هصبر وشلت الفكرة من اساسها

 

من بعد وفاه بابا اتعالجت بجلسات كهرباء ومحاولات الانتحار مكنتش محاوله للفت الإنتباه مكنتش عارفه اتعايش مع الحواليا مش فاهمين بعض فانا كنت عايزة أروح لبابا

 

انا بقيت اخاف من نفسي جوزى اتخانق معايا ورديت عليه كلمه كلمه بكل جبروت وعيني مدمعتش ولما نزل جبت المقص وقصيت شعري وأنا بصرخ وببكي بانين فضلت كدا لحد ربنا مالهمني وقلت لا حول ولا قوة إلا بالله وهديت وبقالي ٣ أيام من غير نوم أو كلام ولا اكل انا خايفه علي ولادى مني انا مش مطمنه

 

بتمني يجلي حاجه ميكنش ليها علاج ولما بتعب مش ببقي عايزة أكشف وأغير رأي ع امل أنه يطلع عندي حاجه وحشه ومش بيطلع فبحبط وازعل انا عارفة ان في ناس بتتمني الصحة بس انا عايزة اخلص

 

مع العلم ان عندي 27 سنة و متجوزة من 6 سنين و المشاعر ديه بقالها سنة معايا

         

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

و عليكم السلام و رحمة الله

 

انتي بتعاني من درجة متقدمة  من اضطراب الإكتئاب الحاد MDD   , واللي باين في  كل كلمة من كلامك  .

 

في نقطة معينة في حياتك , الإضطراب بدأ و استمر و تغلغل في حياتك , وانتي عشان مخدتيش بالك منه فللأسف تركتيه يستحوذ علي حياتك بالكامل , لغاية لما وصلتي للمرحلة اللي انتي فيها . .

 

و الأزمة ان العلاج مش هيكون بالنصايح ولا باي كلام هنقوله هنا , علاجك يا فندم مش موجود الا عند طبيب نفسي متخصص , تدخليله و تقوليله  انك تشتبهي ان عندك MDD  و هو هيعرف يحدد بالظبط اللي عندك , ويقولك تعملي ايه . .

 

و حتي تمسكك بالأسس الدينية – زي الصلاة او القرآن – هو جزء من العلاج لكنه مش العلاج نفسه , والتزامك بيه لوحده من غير ما تروحي عند طبيب متخصص هو شئ غير صحيح , ليس من الدين ولا من العلم  . .

 

البعض بيظن ان من الممكن علاج الأمراض النفسية بالتمسك بالدين لوحده , وده تصور غير سليم , أصلا نوع من الاستخدام الغير سليم للشعائر الدينية . .

 

هل ينفع نعالج الحصبة بالصلاة ؟  ينفع  نعالج السكر بالأذكار ؟  هل ده من الدين اصلا ؟ هل ده اللي كان بيعمله الرسول صلي الله عليه و سلم الصحابة الكرام ؟

 

الدين هو خط موازي جنب العلاج الدنيوي , اللي هو ممكن يكون علاج دوائي , او بترسيخ القناعات و المفاهيم الصحيحة علي يد طبيب متخصص

 

و جزء من علاجك هو بالأدوية , وبالطبع مستحيل نكتبلك علي اسم اي دوا من هنا  ,  لأن أي دوا بيكون ليه جرعة معينة و ليه كمية محددة , و بيكون حسب مدي تطور حالة الاكتئاب نفسه عند الشخص . .

 

احنا مش هنقدر نقولك كلام اكتر من كدة , لأن بالفعل اي كلام اضافي هو نوع من الخداع , علاجك عن الطبيب النفسي مش بالنصايح ولا بالطبطبة . .

 

و اعرفي ان تأخرك في الذهاب للطبيب النفسي هو جريمة , انتي زوجة و أم , يعني لو حياتك انتهت بسبب تكاسل منك يبقي انتي بتدمري حياة ابناءك , وهيكروهي طول عمرهم . .

 

عدم ذهابك لطبيب نفسي , معناها استسلامك لكابوس الاكتئاب المظلم , اللي ممكن يوصلك لحافة الانتحار و العياذ بالله , هل عايزة تخسري دنيتك و اخرتك بسبب حاجة زي كدة ؟

 

فورا احجزي معاد عند طبيب نفسي , وميهمكيش الناس هتقول ايه , ولا تفكري في اي حاجة  , روحي فورا ولو جوزك هيعترض متقوليلوش اصلا , ديه حالة طارئة مفيهاش هزار .

 

ارجوكي متكسليش , حياتك و حياة اولادك علي المحك