العنوان : تخطي الحدود

القسم: #النفسي

الرقم: 46

السؤال:

 

 السلام عليكم

انا بشتغل فى شركة كبيرة

 

عندى مشكلة مش قادرة أخد على الناس إلى شغالة معاهم وهما كمان اذونى كتير فى صراعات على الشغل وفيه تجاوزات كتير بتحصل ودلوقتى دائما حاسة بغضب وبتعصب من اقل حاجة

 

زى أن حد من زميلي يتجاوز معاى ويبقو متفقين مع بعض أنهم يضيقونى واشتكى اكتر من مره للمدير وميدخلوش غير لما تحصل خناقة كبيره

 

وهل التخلى عن الشغل حل؟  خصوصا لما اشتغل ومتقدرش من رؤسائي وينسبو الشغل لحد من زمايلى

 

كمان فى التعامل مع زمايلى انا محافظة شوية يعنى بيقولوا انى مقفلة بس انا بحب الحدود واحب يكون عندى خصوصية

 

ازاى اعمل حدود من غير ما هما يضايقو أو يبفكرو أنه تكبر

 

كمان عايزة اعرف اتصرف ازاى فى التحرش أو مضايقة من زميل فى الشغل بشكل عام لانى بتكسف وبتحرج من الموضوع ده

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله . .

  

انتي ذكرتي كذا نقطة , لازم نتناول كل واحدة بشكل مختلف .

 

وهي :

 

• الصراعات في الشغل و العصبية

• الاسلوب المنفتح في التعامل معاكي

• التحرش

 

 

نبدأ بالصراعات في الشغل , والظلم اللي بيقع عليكي . .

 

للأسف ده بقي الطبيعي في اغلب الشركات , ان الكبير بياكل في الصغير , والاسوء لما المديرين بيتفرجو , او يبعتو "عصافير" تشوف ايه اللي بيحصل   .

 

وانا هنصحك بحاجتين في النقطة ديه  .

 

نصيحة عملية , ونصيحة نفسية .

 

النصيحة العملية انك تكوني متابعة مديرك بخطوة خطوة باللي بيحصل , ويكون هو علي علم باللي بتعمليه اول باول , وبالتالي لما يحصل اي نوع من سرقة المجهود , هو هيكون عارف مين اللي تعب و مين اللي سرق .

 

واول ما تشوفي اتفاق بين زمايلك علي المضايقة , بلغي المدير ان بيحصل كذا كذا , عشان يكون متابع و عارف , وحتي لو متمش عقابهم , بس كفاية انهم عرفو انه عرف , هيبدئو يتلمو واحدة واحدة

 

المثل بيقول : امشي عدل يحتار عدوك فيك , فلما تتجنبي عمل اي غلطة , مش هيعرفو يوصلولك ازاي .

 

لكن طبعا متسيبيش الشغل لان ده مش حل , ولو انتي معرفتيش تتعاملي في الشركة ديه , مش هتعرفي تتعاملي في اي شركة تانية , انتي من بكرة مش رايحة تشتغلي في جنيف , نفس الناس و الطباع هي هي . .  

 

خلي عندك شخصية فيها حزم و صرامة اكتر من كدة , ويبان في صوتك انك اقوي منهم , حتي لو مبطلوش 100 % علي الاقل هيخافو منك .

 

وبالنسبة للعصبية , ده غلط منك , ومينفعش ابدا تتعصبي في الشغل , لتلات اسباب مهمة  .

 

اولا لما تتعصبي , بتفقدي مصداقيتك للاسف  ,يعني المدير لما يشوف طرفين قدامه  , واحد متعصب و متضايق والتاني هادي و مبتسم , للاسف كلام الهادي هيكون اكتر مصداقية  .

 

ثانيا ان مع عصبيتك غالبا هتقولي كلام مش مناسب , خاصة لما الطرف اللي قدامك بيكون بارد و مستفز, وده بيضيع منك اي حق ليكي , يعني مجرد ما تقولي كلمة مش مناسب , هيضيع حقك فورا

 

ثالثا و ده الاهم . وهي صحتك النفسية اللي اهم من ده كله , مش هتستفادي اي شئ لما يجيلك اي مرض من الامراض المرتبطة بالعصبية , او لما يكون سلوكك كدة مع الناس , هتتجوزي ازاي ؟ ؟ وهتربي ابنائك ازاي ؟ ؟ طبعا مفيش اهم من السلام النفسي .

 

و هنا عملنا حل تفصيلي لمشكلة العصبية , ياريت تقريه 

 

 -------------------------------------------------------------------------------------

 

كل ده كان النصيحة العملية , ماذا عن النصيحة النفسية ؟ ؟

 

لازم لازم لازم , تبدئي تعودي نفسك علي انك متحطيش اي شئ علي اعصابك  و علي ان يكون فيه شوية هدوء و "برود" في التعامل مع مشاكل الشغل .

 

ده شئ مفيهوش نقاش , عشان تحافظي علي جهازك العصبي سليم و معافي .

 

اي حد بيحط المشاكل علي اعصابه لابد هييجي اليوم اللي هيطق فيه , وهينفجر في الناس من حواليه , يصاب باضطرابات سلوكية مختلفة .

 

حطي في بالك ان كل مشاكل الشغل اقل بكتير من انك تعصبي نفسك عشانها , وانك لازم تكون اهدي بكتير من اللي بتشوفيه .

 

ظلموكي ؟ ايه المشكلة , ضاع حق ليكي  ؟  عادي يا ستي ,  قالو عليكي كلمة ؟ ميهمكيش . .

 

لازم تتعاملي ببرود شوية مع الحاجات ديه , لان صحتك النفسية اهم بكتير من الكام جنيه اللي بتاخديهم من الشغل .

 

لازم تكون اعصابك في تلاجة , وتهدي نفسك خالص , لان حالتك النفسية مهمة .

 

لكن انتي هتستفادي ايه لما تتحرق اعصابك كل يوم و التاني , و تتنرفذي و ترجعي تعيطي قبل ما تنامي , يبقي ساعتها الشغل ملوش لازمة

 

حطي لكل شئ مقداره الحقيقي , و"كبري" دماغك عن كل العبط اللي بيتم , ولما تحسي انك خسرتي حاجة في الشغل , تعاملي معاها زي ما بتتعاملي مع هزيمة فريق كورة انتي بتشجعيه من بعيد لبعيد  , اللي هو "عادي مش مهم "

 

خلي ده منهج حياة عندك في كل الامور الحياتية , عشان بس اهتمامك يكون منصب للحاجات الاهم , دينك و خلقك و اسرتك و زوجك و اولادك , ده المهم مش الباقي

 

------------------------------------------------------------------------------------

 

ماذا عن الاسلوب المنفتح معاكي , واللي انتي مش متقبلاه لانك بتتعاملي باسلوب محافظ .

 

ده بقي ميتسكتش عليه , ولازم من اول يوم تحطي النقط فوق الحروف .

 

لان كتير من الشباب , فاكر نفسه دنجوان , و خياله المريض بيقنعه ان اي بنت هتقع في هواه , وان اللي بتقاوم لازم هتستسلم اخيرا ليه .

 

و النوع اللي زي ده مترحميهوش , واياكي تسكتي علي اي تجاوز او اقتراب او حتي تعامل عادي .

 

اياكي تتحرجي انكي تكسفيه او تحرجيه , او حتي تمسحي بيه البلاط لو تجاوز حده .

 

كتير من الشباب بيتعامل باسلوب "سكتنا له دخل بحماره" , فالبنت اللي بتسكت عن حياء او خجل , بتخليه يكمل في تعامله اللي ينفع مع الاشكال اللي زيه , مش مع بنات الناس .

 

يعني مثلا لو تخيلنا موقف , ان واحدة دخلت مكتبها في الشغل ,و عينيها حمرا و باين عليها انها كانت بتعيط , فلو زميلها اللي عامل فيها "عبده الحبيب" سألها مالك فيه ايه

 

فهي قالت مفيش , فهو مش هيسكت  , يقول : بجد طمنيني عليكي , اكيد فيه حاجة .

 

فهي تسكت حياء , فهو يكمل : انتي برضه هتخبي عليا , انا زميلك و يهمني مصلحتك . .

 

هي تبدأ تحكي اللي حصلها .

 

الموقف ده , وعلي الرغم من انها متبادلتش معاه الكلام , وكانت بتوقفه عند حده , الا انها سابته بشكل ما يكمل كلام و اسئلة .

 

وهي الغلطانة بالطبع , يعني ان كان هو اخلاقه تسمحله بالتدخل في شئون زميلته , فهي كان لازم من اول كلمة تبصله و تقوله في وشه : خليك في حالك  ,لما احتاجك هبقي انده له  .

 

كلمة زي كدة , وعلي الرغم من انها محرجة ليه , الا انها ضرورية جدا للنوع ده من الشباب , واللي منصب نفسه "حامي الحمي" , و "ديك البرابر"  .

 

لازم انتي يكون لسانك حاد , وكلماتك قاطعة , مع اي حد يتخطي حدوده  ,او يحاول يسال في شئ مش من حقه , او يهزر معاكي باي طريقة , اياكي تستسلمي او تسكتي حتي علي تدخل اي حد معاكي , او انفتاحه بشكل غير لائق

 

 

 

ان كان التعامل بانفتاح هو مشكلة , فماذا عن التحرش , سواء لفظي او جسدي . .

 

ان كان التحرش جريمة , فسكوت البنت عنه جريمة زيه , لان بسكوتها بتجعله يستمر في اسلوبه القذر , معاها او مع غيرها  .

 

اي لمحة من لمحات التحرش اللفظي او الفعلي , لازم تقومي الدنيا و متقعديهاش, لازم يعرفو ان انتي مينفعش يتداسلك علي طرف , وان الكل لازم يحط الف اعتبار قبل ما حد يقربلك .

 

اي تحرش صعدي الموضوع فورا للمدير  ,او حتي للبوليس , انك بس تعملي بلاغ فيه , حتي لو متسجنش فده فايدة في حد ذاته , عشان يعرف ان اللي عمله مش سهل .

 

ولو فيه بالفعل طريق قانوني للتحقيق معاه ياريت , يعني لو حد مد ايده عليكي , و فيه كاميرا في المكتب بتصور , فلابد تصعدي الموضوع فورا و من غير نقاش , اياكي تخافي من الفضيحة , اياكي تخافي من "حرام اؤذيه" .

 

اعرفي ان اي مجرم انتي تتساهلي في اخد حقك منه , ديه مش طيبة و "المسامح كريم" , ده  اسمه تخاذل في عقاب المجرم , واللي ربنا هيحاسبك عليه .

 

لان اي مجرم اغتصب واحدة , هو عمل كدة لانه بدا السلم من اوله , يعني مر بسلسلة من التحرشات و المضايقات و الايذاء الجسدي لبنات , وكلهم خافو من الفضيحة , وخافو يؤذوه , وقالو حرام نضيع مستقبله , فهو كمل في الطريق لما وصل للشكل الحالي

 

وياريت تشوفي رسالة رقة القلب و القصاص و تقري الحل بتاعها