العنوان : البحث عن الاهتمام

القسم: #العاطفي

الرقم: 06

السؤال:

 

بصراحة أنا أول مرة ابعت رسالة واكون مستنية رد

 

انا بابا وماما منفصلين ومن صغري وانا بحس بعدم اهتمام رهيب أو تفرقة بيني وبين أخواتي

 

حبيت واحد ف سن صغير وارتبط بي واتجوزنا كان بيضرب مخدرات وعلمني بقينا احنا الاتنين مدمنين  , أطلقنا عشان الاهل تعبو بس بردو فضلنا مع بعض

 

وبعد كدة سبنا بعض وكل واحد فينا دخل أتعالج وبقينا مبطلين سنين الحمد للة

 

حاولنا نرجع لبعض بس اكتشفنا أن حياتنا واحنا مبطلين ومتغيرين مش هتنفع وأننا مش حسين بنفس المشاعر بعدنا سنة

 

وف الوقت دة انا كنت فقدت الاهتمام والحب وإحساس اني بنت لاني سني صغير 23 سنة ظهر شخص ف حياتي تاني فجأة مع اني كنت رافضة الارتباط

 

عمل كل حاجة بحبها اهتم بيا كتير طول الوقت كنا مع بعض فون أو خارجين

 

اة صح انا اتعرفت علية وانا إجازة ف مصر فضل معايا لحد مسفرت تاني لاني مقيمة ف دولة تانية وهوة لسة معايا بس هوة مسيحي وانا مسلمة

 

بيحاول يراضيني بكل الطرق كذا مرة قولتلو نسيب بعض بس هوة بينهار 

 

الحياة بنا إلي حد ما حلوة بالغرم انو بيقولي صلي وبيخليني آقرالقرآن ع طول

 

بس انا مش قادرة أكمل ولا قادرة أبعد

 

كمان طول الوقت عيزني اخس لاني تخينة شوية

 

مش عارفة انا معاة. لية عشان انا عندي نقص من الاهتمام والمشاعر وكلام الحب ولا عشان انا فقدة اصلا الاحتواء انا عارفة أن ناس كتيررررررر هتنتقدني  , بس الحب مش بادينا ومحدش بيختار دينو أرجو الرد بدون اسم شكرا

 

اة في حاجة تاني حبا أقولها

 

أن الولد ال انا مرتبطة بي طول الوقت بيكون عايز يعمل معايا (سكس فوووون) وبصراحة انا بعمل كدة معاة بس ف نفس الوقت زهقت لانو لازم كل يوم وكذا مرة لدرجة انو ممكن يزعل لو انا قولتلو اني مش هينفع اعمل كدة عشان أهلي صحينن أو عشان تعبانة

 

بيحب كدة اوووي وكتير سوري طبعا ع الجزء دة بس الموضوع دة مضيقني وأوقات كتير بكون عيزة أكمل معاة وممكن ف ساعة اقلب وابقا مش عيزاة بس بخاف أفقد الاهتمام

 

اسفة للاطالة

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

شوفي يا ستي . .

 

بالرغم من انك تعرضتي لظروف عصيبة جدا , و انك تفوقتي بعدها علي نفسك بالهروب من فخ الادمان , الا انك مش قادرة تتخلصي من مأزق تاني , وهو اسهل بكتير من اللي انتي تغلبتي عليه بالفعل  . .

 

وعلي الرغم من نضج فكرك , وانك تخطيتي مرحلة المراهقة , الا انك لسة مش قادرة تميزي الشخص اللي بيحب بشكل حقيقي , عن اللي بيتسلي . .

 

تعالي في البداية نلخص مشكلتك في خطوات بخط زمني :

 

• انفصال والديكي , واللي بدأ سلسلة المتاعب ديه كلها

• الجوع الرهيب للاهتمام و الاحتياج الشديد لحد يرعاكي , مع اختفاء الاب و اهمال الاخوة ليكي

• الزواج المبكر, وبعدها السقوط في مأساة الادمان ثم الطلاق

• العلاج من الادمان

• التعرف علي شخص آخر , الشعور انك "بتحبيه"

• الوصول لمفترق طرق , تكملي معاه ولا تسيبيه

 

 

 

قلنا قبل كدة ان الطلاق في حد ذاته مش بيسبب كل المشاكل للاطفال , لكن السلوكيات الغبية من الاب و الام اللي بيتعاملو باسلوب "واذا خاصم فجر" . .

 

نادر جدا لما تلاقي في العالم العربي , طليقين بيتعاملو باسلوب راقي و محترم بعد الطلاق , هما بيتعاملو ان الطلاق هو نهاية العلاقة , وان لابد تشتعل الحرب للأبد طالما حصل الطلاق . .

 

و بالتالي كتير من الاباء و الامهات يظلو يشعلو نيران الكراهية و الحقد في الابناء , ضد الطرف الاخر , باعتبار ان انا مظلوم و الطرف التاني مجرم و خاين و من احط المخلوقات , وده اللي بيصنع عند الابناء ازمة كبيرة لا تمحي . .

 

او ان يحصل اهمال تام من الابوين في رعايتهم للابناء , و يا سلام بقي لما كل واحد فيهم يتجوز , والعيال تترمي عند الجدة هنا او هنا , مآسي والله  مستمرة لا تتوقف . .

 

او ان يحصل اهمال من طرف واحد , واللي غالبا بيكون الاب , فالام تكون مهتمة و مراعية للطفل , وهو نفسه يشوف ابوه , بس البيه معندوش حتي ذرة دم او اخلاق او انسانية انه يعبر الطفل اللي هو جزء منه , فلما يكبر و يطلع سفاح مش هنندهش , لاننا عرفنا ازاي مشاعره اتعملت . .

 

ارجوكم يا آباء و يا أمهات , متفكروش في الطلاق في الاساس عشان ولادكم , لو مش قد الجواز متتجوزش و خليك اعزب لغاية لما تموت احسن  . .

 

ولو خلاص مفيش حل الا الطلاق فيبقي باسلوب راقي و محترم , وتتقابل مع طليقتك بابتسامة و نفس صافية , و اياك او اياكي ان حد فيكم يقول كلمة وحشة في حق التاني قصاد الاولاد , عندك كلمة وحشة تجاه طليقتك , ادخل الحمام و اقفل علي نفسك و اقعد صوّت قدام المراية لغاية لما يلبسك عفريت , بس سيب العيال في حالهم . . 

 

وبالطبع كان من الطبيعي انك كطفلة يكون عندك احتياج متزايد للحب والحنان  , و كمراهقة للاهتمام و الاحتواء , وكبالغة للارشاد و التوجيه  . . .

 

و عدم وجود اب يرعي , او ام توجه , او اخ يسند , اوصلك لطريق الإدمان المسدود . .

 

و الحمد لله انك بالفعل خرجتي منه , قليل اللي بيقدر يهرب من كابوس المخدرات , وانتي من القلائل اللي عندهم ارادة

 

و واضح ان تجربة زواجك مكانتش عن حب حقيقي وبالتالي طلاقك مكانش عن مشاكل  , وانما هو مجرد انهاء للعلاقة اللي جمعها الادمان , وانهاها العلاج . .

 

---------------------------------------------------------------------------

 

نوصل للنقطة المهمة , صديقك "المسيحي" الجديد  . .

 

كل ما أعيد قراءة سطورك , مش بييجي في ذهني الا تفسير واحد , واللي بيتم التأكيد عليه مع اعادة القراءة كمان مرة . .

 

ان هو مجرد بيتسلي  , مجرد بيستمتع بالعلاقة مع انثي "جميلة و جذابة" . .

 

ده التفسير الوحيد اللي مش عارف اروح لغيره . .

 

مش عشان هو مسيحي , لا طبعا , واحنا شفنا هنا اهوال و مآسي من مسلمين و مسلمات . .

 

لكن عشان هو متطابق مع المتلازمة اللي ذكرناها اكتر من مرة "شاب بيتسلي – شابة مخدوعة"

 

و استنتاجي وصل من تتبع اللي حصل . .

 

لما شاب بيتعرف علي بنت ,  بيكون عنده واحد من هدفين . .

 

اما انه انسان محترم و جاد  , ومش بتاع تضييع وقت و هزار و بتاع , وانه عايز يخبط علي البيت من بابه . .

 

و اما انه بيتسلي , اما بس عاطفيا او عنده رغبات لابعد من كدة , ربنا يحفظنا  . .

 

و المعيار الاساسي اللي بنحكم علي الشاب هل هو من النوع الاول ولا التاني هو  : يا تري بالفعل بياخد رقم الاب و بيحدد معاه معاد و بييجي معاه ابوه و امه و في ايده التورتة و بوكيه الورد ولا لا . .

 

لو مر علي التعارف فترة كافية , وهو بدأ يتملص او يتحجج باي سبب كان  ,عشان ميجيش البيت يبقي فورا من النوع التاني . .

 

و هنا بننصح البنت انها ترحم نفسها و تسيبه لانه بيلعب , و بيصطنع الحب و السهوكة , لانه عارف ان ده مدخل اي بنت , انه يغزو قلبها   . .

 

بالنسبة لحالتك , هو من اول ما اتعرف عليكي , وكان باين ان الدين مختلف , وان الزواج مستحيل , واكيد كان واضح ان انتي لا هتلبسي الصليب ويبقي اسمك ماريانا , ولا هو هيروح الازهر و يكون اسمه مصطفي , اذن باب الزواج مقفول من الاساس . .

 

فتعرفه عليكي , والحاحه عليكي عشان يقترب منك زي ما انتي وصفتي  , واهتمامه الشديد بيكي , وانه محاوطك من كل مكان , واضح جدا انه بس عشان يتسلي  . .

 

اما تسلية لمجرد الاستمتاع بالحب , وان فيه "مزة" (زي ما هو بينظر للبنات) بتحبني وواقعة في غرامي , وان فيه واحدة هعرف اتكلم معاها كل يوم و نضحك . .

 

و اما ان اغراضه اكتر من كدة , مش عارف هل هو تجرئ و طلب منك شئ لما اتقابلتو ولا لا , لكن واضح ان صبره نفذ , وان هرموناته تعبته جدا , فانتي سمعتي كلامه في ممارسة "الكلام في الفون" بالشكل المقزز اللي انتي وصفتيه  . .

 

فهي معادلة واضحة جدا , كل الشباب عارفينها , وكل البنات مش شايفينها  . .

 

ان اي شاب يفتقد لاي نوع من الاحترام او اخلاق او الآدمية , بيكون عايز يتصاحب مع واحدة عشان هدف من اتنين , اما يتسلي بالمشاعر  ,او يتسلي بهرموناته . . 

 

و عشان هو عارف ان مفتاح البنت قلبها , فسهل جدا انه يصبر عليها كام اسبوع في دباديب وورود واغاني كاظم و قصائد نذار  وكام بوست من صفحة "احتواء", ويتسهوك شوية  لغاية لما هي تقع . .

 

و اول ما هي تقع  , بيكون سهل انها تديله قلبها , او اكتر من كدة للاسف , و هو يبدأ يتناول وجبته اللي انتظرها اسابيع طويلة , وهي عايشة في الوهم . .

 

و بعد فترة بيزهق , لازم هيزهق لان دي طبيعة الفئة ديه من الشباب  ,  ساعتها يبدا يخلع بشكل تدريجي او بشكل مفاجئ . .

 

و من الواضح ان اخينا ده لسة في مرحلة "تناول الوجبة" , بعد ما اتم بنجاح مرحلة "شبكة الصيد" عشان يوقع قلبك , وتوقعي قريب مرحلة "الخلعان" لما يزهق منك . .

 

وهل انتي متخيلة اللي زي ده بيكتفي بانثي واحدة ؟  هل انتي متخيلة ان الماسنجر بتاعه مفيهوش الا انتي و اصحابه الشباب  , هل انتي متخيلة ان اللي بيعمله معاكي مش بيكرره – و قد يكون بصورة اعمق – مع بنات تانية . .

 

هو مجرد صياد  بيبحث عن فريسة , بعض البنات بتكون اذكي من انها تقع في الفخ لانها شافت المشهد كله , وبعضهن للاسف بيقع , ومش بيفوقو الا لما يخلع وهو تاركك مكسورة القلب . .

 

لو انتي تظني انه بيحبك تبقي ساذجة , هو مختار مسلمة لانه عارف ان هو مش هيتجوزك , وبالتالي مش محتاج يخترع حجج عشان يجاوب علي السؤال الخالد "هتيجي تقابل بابا امتي ؟ "

 

 

والدليل الواضح انك بيمارس معاكي "الكلام في الفون" يوميا , هل ده اسلوب شخص عاطفي و حبوب و كيوت  ؟  ولا اسلوب حيوان هرموناته بتدفعه لاسلوب مقزز مع البنات ؟ ؟ 

 

انتي بتشتركي في ذنب شرعي مستمر , وفي جريمة في حق نفسك , والادهي انك بتقتربي اكتر و اكتر من مساحة "الفاحشة" واللي هيعرضها عليكي بشكل مباشر لما تنزلي مصر اي وقت . .

 

 

 

 

غالبا انتي متمسكة بيه لسبب من 3 اسباب , وجايز هما التلاتة مع بعض . .

 

السبب الأول  : اللي انتي ذكرتيه : محتاجة حد يهتم بيكي . .

 

السبب التاني : محتاجة انك تحبي و تتحبي . .

 

السبب التالت  : هرموناتك كأنثي . .

 

صحيح ان ظروفك الصعبة في طفولتك عملت لك ازمة في السبب الاول , وظروف طلاقك حرمك من السبب التاني و التالت. .

 

ولكن السؤال , هل ظروف اي انسان , هي مبرر انه يتجاوز القواعد , ويعمل حاجة زي كدة  ؟ ؟ ؟

 

اكيد الاجابة لا  . .

 

فانتي لازم تحاولي تشوفي بديل صحيح لاشباع احتياجات التلاتة اللي قلناهم هنا . .

 

الاحتياج الاول : مش هييجي الا بصديقة محترمة و كويسة , يعني طالما انتي رميتي طوبة ابوكي و اخواتك  , فالحل يكون فيه صديقة قريبة منك هي اللي تتواصل معاكي بشكل اكتر , وتتطمن عليكي , ويكون فيه نوع من الألفة بينكم , عشان لما يحصلك اي ازمة او مشكلة هي تقدر تساعدك . .

 

صحيح انك كأنثي تفضلي صديق شاب , وده شئ طبيعي و غريزي , بس ده شئ لازم نقاومه لغاية لما ييجي الفرج . .

 

 

و الفرج ده , اللي هيحل التلات احتياجات مع بعض اسمه : الزواج . .

 

صحيح ان الواحدة مش هتدوس علي زرار هتجيب عريس , بس هل انتي بالفعل متفتحة و متقبلة لفكرة الزواج اصلا لما تجيلك  ؟  هل طاقتك  النفسية جاهزة لحاجة زي كدة ؟ ؟

 

طب لما ييجي شاب محترم و ابن حلال , هل هتكون مهيئة نفسيا ترتبطي بيه وانتي بتمارسي "الكلام في الفون" مع اخينا التاني اللي بيتسلي ؟ ؟

 

طب لما قلبك يتعلق اكتر بالشاب اللي بيتسلي بيكي , وييجي ابن الحلال يخبط علي بيتك و عايز يخطبك , هتعملي ايه ساعتها  ؟ ؟

 

------------------------------------------------------------------

 

انتي عايشة حاليا في ازمة من صنعك انتي , ازمة الطفولة انتي كنتي ضحيتها و ملكيش يد فيها , وازمة الادمان انتي قدرتي تتخطيها  , لكن الازمة الحالية هي من صنعك و استسلامك بالكامل لشاب سفيه بيتسلي بيكي . .

 

انتي في ايدك انهاء الازمة كلها , فورا بلوك من غير نقاش , لا فيس ولا واتس ولا انستجرام , اقفلي الباب بلا رجعة ولا مواربة . .

 

ساعتها هو هيتجنن , ازاي مصدر متعته و شهوته اختفت فجأة , ازاي الفريسة هربت من القفص , وهيدور عليكي و يدخلك بمداخل عاطفية و سهوكة و دباديب و قلوب و بتاع , لو انتي استسلمتي وانتي عارفة هدفه , يبقي متلوميش الا نفسك . .

 

اكيد بعدها هتشعري بالخواء و الضيق  , واختفاء الشخص اللي كان بيهتم بيكي و يهرز و يضحك , لكن اياكي اياكي و انك تستسلمي او تضعفي . .

 

فاللي يستحمل اعراض انسحاب المخدرات من الدم , علي مدي اسابيع طويلة  , وهي شديدة الصعوبة و الألم , اكيد هيستحمل شئ اكثر سهولة , واقل ايلام . .

 

اياكي تضعفي قدامه , وافتكري انك مجرد اداة بيستخدمها لافراغ "شهوته" باسلوب حيواني قذر  , وانه هيرميكي اول ما يشبع منك عشان يشوف واحدة تانية