العنوان : درجات السُلّم

القسم: #الاجتماعي

الرقم: 40

السؤال:

 

 

انا منذ الطفوله انسانه حساسه لأبعد حد لدرجه اني بكون عوذه أعيش في الكون كله ملايكه مش بشر  لاني مش عرفه أتعامل مع البشر وده مش ميزه ده عيب

 

في طفولتي مكنتش مريحه كنت اكتر وحده في اخواتي خجوله وبتكسف اطلب حاجه ولا أطالب بحقوقي دي طفولتي

 

 ونا عندي 16 سنه اتقدملي واحد قريبي أكبر مني 17 سنه وقتها كنت طفله وكنت كمراهقه في مشاعر بحسها نحية ابن عمي ابويا رفض ابن عمي اللي كنت تقريبا نفسي ارتبط بيه واجبرني علي الشخص اللي متقدملي ده اللي مشفتوش قبل كده برغم انه قريبي بس كان ساكن في مكان آخر واختي وأمي ساعدو في إتمام الجوازه دي ورفضوا يسمعولي

 

تم الجواز وكان الشخص ده عصبي لأبعد الحدود كان لو أقل شيء عصبه يمد أيده كنت بروح اشتكي لامي تقولي معلش وهي الرجاله كده لدرجه كنت فاكره انه الحياه الزوجيه كلها بالفعل كده مكنتش بعرف أتفهم معاه صعب اتحاور معاه شخص غريب كده مش فهماه

 

جبت اول طفل والحياه ماشيه بس جويا بعاني وبقول لنفسي ما الناس كلها كده كان بيضرب ابنه وهو عنده شهور لمجرد أنه بيعيط كنت بروح اشتكى لامي تقولي ابنه ويعمل اللي يعجبه في وبقي عندي يقين انه فعلا الناس كلها كده وأنه الراجل كزوج يضرب أطفاله الزوجه ملهاش حق تدخل

 

وفضلت بعاني من حاجات كتير زي كبت الحريه وغيره وغيره وعصببه وخوف منه وكسر دراع ابني وهو لسه طفل بحجة أنه بيربيه وانا يتألم بس كل ما افتكر كلام امي اسكت وأقول ما هي الناس كلها كده ولأني مكنتش منفتحه ولا ليا حد وعايشه معاه في بلد غريبه مكنتش فهمه حاجه

 

وكبرت ونضجت وعرفت انه مش كل الناس كده وإني مظلومه وطبعا الطلاق عندنا جريمه بنسبه لابويا وامي

 

فضلت عايشه مع الشخص ده بموت كل يوم عن يوم بنسبالي واحد غريب بس امي وابويا بيقولوا جوزي لكن انا بنسبالي ولا أعرفه ولا هعرفه بس مكملة عشان هما عوذين كده

 

وفضلت يوم بعد يوم جويا حاجات تتكسر وتدمر والشكل الخارجي قدام الناس زي الفل وكانوا بيحسدوني كمان

 

بعد كده نفسيتي تعبت جدا من كتر ما انا مش قادره أكمل مع الشخص ده ولا عرفه انسحب وانا شايفه الأقل مني بتتعامل بطريقه محترمه وشيك رحت لدكتوره نفسيه اتعالجت فتره

 

بعدين هديت شويه وبقيت عرفه أتقبل الحياه الي حد ما بعدين رجعت تعبت تاني وحياتي وقفت

 

من فتره تعرفت علي شخص  .

 

عارفه انه غلط أتعرف علي حد تاني بس ده كان شيء مش مترتب كان قدر حبيت الشخص ده لدرجه الجنون وكان في بدايه العلاقه كويس جدا معايا وحنين وطيب وفجأة اتغير وعرفت انه علي علاقات نسائيه واجهته كان بيعتصب عليا ومكنش حتي بيعتذر

 

تحول من شخص بيهون عليا وجع الحياه لشخص لشخص أناني جداااا ومتسلط ويتعصب عليا ويسبني وانا ارجعله لاني مش عرفه أبعد عنه

 

وبقيت بعاني من من كل اتجاهات من شخص عايشه معاه ومش بحبه ولا قادره احس انه جوزي وبخاف منه جداااا ومعناه أخري من شخص بحبه جداااا وهو اتغير ومش قادره انسحب واسيبه كنت بكل طاقتي معاه بحبه اكتر بحب نفسي

 

وقفت جمبه في أي ازمه يمر بيها

 

مره احتاج مبلغ عشر الألف عشان في ازمه ماليه في شغله مترددتش واتدهمله قلي أسبوع وهرجعلك المبلغ مرت سنين ومفيش حاجه رجعها وبرغم كده المفروض أفقد الثقه في  مره اخرى كان في ازمه ادتله 8الالف وقلي هعمل قرض وبالفعل عمل قرض ومرجعش أي حاجه وبعدها ادتله مبالغ مالية تانيه بس كانت صغيره

 

وكنت لو الظروف زنقت عليا اتكسف اطلب حقي منه أو أنوه انه محتاجه مبلغ من فلوسي أو حتي أقوله ليه مش كد كلمتك وبرغم كده ياريت كان بيشكرني أو يعملني كويس لا هو من عيلة محترمه جدا وأهله ناس كويسين وهو كان من جواه انسان كويس بس بيرفض يظهر غير الوحش اللي فيه فضلت بعاني من عقدة الذنب وبعاني من الحياه الزوجيه المفروضه عليا ويعاني من حبي لشخص خلاص بطل يحبني أو ضمن حبي لي

 

تئنايب الضمير بقي ملزمني طول الوقت حسه اني اوحش انسانه علي وجه الأرض واتحولت من انسانه بتحاول في الحياه لانسانه مستسلمه كره الحياه يائسه مش عرفه حتي أقوم من مكاني ولا فيا طاقه حتي اسرح شعري وكل حاجه فى ادمرت فكرت في الانتحار كتير بس أولادي من غيري هيدمرو مبقتش حتي عرفه أتكلم ولا اعبر اتوجع لكن معرفش اعبر عن الوجع ده ادمرت بكل ما تحمله الكلمة من معنى

 

قررت أبعد عن الشخص ده من فتره عشان تعبت من معاملته ليا الوحشه رجعلي بعدها واتغير فتره وبقي كويس وبعدها رجع وحش تاني ومن عشرين يوم اتللكك علي سبب تافه وزعل مني وسابني

 

مع أنه هو اللي حاول يرجعلي لما بعدت عنه قبل كده ولما رجعتله بعد ما كنت بدأت اقوي وانساه ضعفت ورجعت انيل من الأول ورجعت استحمل إهماله ليا واهانته ليا وقسوته

 

ولما اتأكد اني ضعفت خلاص ورجعت أحبه زي الأول واكتر رجع تاني بأسلوبه الوحش واتلكك وسابني عشان سبب تافه انا حاليا كره كل حاجه وكره نفسي كل شخص دخل حياتي دمر جزء فيها ودمرني والشخص ده انا لحد بحبه ليه معرفش انا مش عرفه اللي عندي ده اكتئاب ولا وايه بظبط

 

 بس انا حاليا ميته بمعني الحرفي من فضلك عوذه أفهم اللي عندي ده ايه وبعتذر علي الإطالة بس ارجو الرد على مشكلتي بالله عليكي

 

وشكراً علي حسن الاستماع

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

لا حول ولا قوة الا بالله العلي العظيم .

 

فيه بعض المشاكل اللي بتجيلنا لما بنقرأها  , بنشعر قد ايه فيه ناس بوحشية الذئاب , و فيه ناس بحماقة الدواب , وفيه ناس باهمال الخنازير , وفيه ناس باجرام الثعالب . .

​

للأسف , الشاب اللي بتكلميه فيه الوحشية الكاملة , والديكي (سامحيني) فيهم جهل تام , زوجك فيه اهمال لا حصر له , وانتي ليكي نصيبك من الاجرام اللي مش قادرين نغفل عنه .

 

و عشان نحلل الموضوع كاملا , هنتكلم عن حاجة بعيدة شوية , هي السحور .

 

السحور اللي بيسبق الصيام الطويل , في رمضان او في صيام النفل .

 

السحور هو شئ مباح – بل وهو سنة كمان – ان الشخص ياكل و يشرب قبل الفجر .

 

لكن اول ما الفجر ييجي وقته , خلاص ممنوع اكل او شرب .

 

لو ان فيه شخص , عامل فيها سبع البرمبة , وقال انا مش عايز اتسحر و هاقدر اكمل صيام من غير ما اكل حاجة قبل الفجر .

 

احنا هنقوله براحتك , انت عندك شئ حلال وانت بتحرمه علي نفسك بمزاجك , بس استحمل بقي في الصيام .

 

لما ييجي يصوم , وهو يلاقي نفسه علي الساعة 10 الصبح بيتلوي في الارض من الجوع و العطش , ساعتها هو مش هيلوم الا نفسه , لانه ساب الشئ المباح , وهو بيعاني دلوقتي .

 

لما ييجي الساعة 1 الضهر , ويستسلم للحرام , ويفطر في نهار رمضان  , يبقي يا تري المشكلة كان في صعوبة الصيام ولا فيه استهتاره انه ساب الشئ اللي ربنا احله ليه , عشان هو فاهم نفسه جامد و شديد ؟ ؟

 

اكيد المشكلة فيه هو مش في الصيام  ,بدليل ان كل اللي معاه صامو بسهولة , لانهم اتسحرو 

 

وهنا ناخد مبدأ شديد الأهمية في الشرع , واوعي ننساه لاي سبب .

 

لو ان فيه مخرج شرعي لازمة معينة  ,والواحد مخدهوش و استحمل , خلاص كما تشاء , مفيش مشاكل , بس يا بطل لو انت وقعت في اي شئ حرام يبقي انت مجرم مش معذور .

 

هو عشان ماخدش المخرج الشرعي انه يسد جوعه قبل الفجر , كما يشاء مفيش مشاكل , بس انه يقول اني افطر في النهار يبقي انت بتستهبل , وانت مذنب مش ضحية .

 

ايه علاقة كل ده بكلامنا ؟ ؟

 

ان ربنا سبحانه و تعالي شرع الطلاق , وجعله مخرج شرعي و آمن و سليم , في حالة استحالت الحياة الزوجية  .

 

واكتر من عالم و مفتي قالو ان "الضرب المستمر بلا سبب" هو مبرر شرعي للطلاق , ومن حق الزوجة انها تتطلق فورا .

 

انتي كنتي بتعاني معاه , ومطلبتيش الطلاق , سواء بقي عشان خايفة من العيال او عشان امك - ربنا يسامحها – رفضت او غيره .

 

خلاص براحتك , عندك مخرج شرعي انتي مستخدمتيهوش , كما تشائي , مش عايزة تتسحري متتسحريش . .

 

انما تيجي وانتي متجوزة و علي ذمة رجل , وتتكلمي , بل و بتحبي , والانيل انك كمان بتغيري , علي انسان مفيهوش ذرة من الدين او الاخلاق او الكرامة , ده جنان فعلا .

 

انتي مش عايزة الطلاق اللي ربنا احله و شرعه ليكي , يبقي استحملي العيشة مع زوجك يوميا  .

 

انما عشان متروحيش للطلاق , تقومي تقيمي علاقة محرمة (حتي الكلام بس ده اسمه علاقة ) مع شخص غريب , و اصلا فيه كل الصفات الزبالة .

 

مفيش اي تبرير او عذر او تفهم للي بتعمليه  .

 

يا اما تتسحري عشان تقدري تعيشي , يا اما تكملي صيام وانتي سايبة المخرج الشرعي بمزاجك  .

 

يا اما تتطلقي و ده حقك و محدش يقدر يقولك حاجة , يا اما تصبري معاه وتحاولي تصلحي المشاكل اللي عند جوزك .

 

لكن الرقص علي السلم ديه جريمة مفيهاش اي مبرر او عذر .

 

-----------------------------------------------------------------------

 

ولو كان ابوكي  و امك رافضين الطلاق , اكسري كلامهم فورا . .

  

بقائك مع زوجك بالوضع ده مش بر لوالديكي ولكنها استمرار في معاناة مؤلمة ليكي , واللي نتيجتها الحالية انه فيه اعجاب و حب بل و غيرة كمان , مع انسان ديوث , والي مش عارفين قدام ممكن تتطور لايه .

 

لو ابوكي و امك مانعينك عن الطلاق نفذي اللي ربنا شرعه ليكي , لو كان زوجك تستحيل معاه الحياه , يبقي اتخذي الطريق اللي ربنا شرعه ليكي, واطلبي الطلاق  .

 

والغريب لما قلتي مش عايزة اطلق عشان العيال , و مصدر الغرابة نقطتين  .

 

النقطة الاولي ان اساسا بقاء الاولاد مع اب مشوه نفسيا زي ده مصيبة كبيرة , الاب اللي بيرن مراته علقة , وبيضرب ابنه لما يكسر دراعه , ده اصلا مش اب , ده مجرم .

 

و بالتأكد الاحسن صحيا و نفسيا و معنويا علي اولادك , انهم يكونو بعاد عنه  , لانهم لو اتربو معاه هيشربو نفس مبادئه , وهيعاملو زواجتهم و اولادهم بنفس الطريقة الحيوانية .

 

او انهم يصابو بعدد من الاضطرابات السلوكية المرتبطة  بالقمع و الكبت و القسوة , يا اما يكون عنده اضطراب الاكتئاب او العصبية او الانطواء , او احد الفوبيات المختلفة   .

 

 النقطة التانية ان امهم ماشية في طريق الخيانة الزوجية والعياذ بالله , الخيانة مش بس تنجيس الفراش الزوجي , لكن مجرد السماح لقلبك انه يعجب و يحب انسان تاني , ده اسمه ايه  ؟

 

يا تري موقفك من امك كان هيبقي ايه لو عرفتي انها عملت ده مع شخص تاني غير ابوكي ؟ ؟

 

يا تري لو شفتي مرات ابنك بتعمل كدة و بتحب و تتسهوك مع حد تاني , بل و بتبعت فلوسه و شقاه ليه , هتقولي ايه ؟

 

بقاءك مع زوجك دفعك دفعا لمساحات مظلمة و خطيرة , و اكبر ضحية هيكونو الاولاد , لانهم ما بين اب معقد نفسيا بيأذيهم بشكل مستمر , وام بتحب شخص تاني غير ابوهم , هل ده مجال صحي للاولاد ؟ ؟

 

بينما لو حصل الطلاق , هيتسريحو من معاناة الاب , وانتي  تتوقفي فورا عن التجاوز الخطير مع الشاب ده , ويكون مكان صحي و آمن للأطفال

 

-------------------------------------------------------------------------------

 

خلينا نقول ان من كرم ربنا عليكي , ان الشاب ده كان بالصفات الحيوانية اللي انتي قلتي عليها . .

 

بالفعل ربنا بيحبك , ان هو عنده مجموعة الصفات الزبالة اللي انتي وصفتيها , و انه بيتعامل معاكي عشان يستغلك ماديا و بس  . .

 

عشان تفهمي قصدي , تخيلي لو كان انسان محترم و حبوب و كلامه  لطيف , و بيهتم بيكي و يراعيكي و يقولك كلام جميل و حلو . .

 

عارفة وقتها كان ايه هيحصل ؟ ؟  متخيلة كان ممكن مصيرك يبقي ايه معاه ؟ ؟

 

انتي احمدي ربنا سبحانه و تعالي ,ان  هو كان فيه مجموعة من الصفات السلبية الكبيرة (بتاع نسوان , قاسي معاكي , مستغل ماديا , مش بيهتم بيكي) .

 

لان الصفات ديه , عملت نوع من المعادلة و التوازن , مع الدافع الرهيب اللي بيزقك للاعجاب بيه و حبه و التمسك بيه , واللي جعلك محتارة تعملي ايه .

 

بينما هو لو كانت صفاته ايجابية , ومعندوش دين او خلق  كان فورا دعاكي لفراشه , وربنا وحده اعلم انتي كان هيكون ردك ايه وقتها . .

 

هل انتي فاكرة ان الخيانات الزوجية بتيجي من نساء "عاهرات" متربيين في بيوت قوادين من وهم اطفال  ؟ ؟

 

لا طبعا  . . .

 

للاسف كتير من الخيانات الزوجية بتيجي لنساء اتربو علي قدر من الاحترام و التدين و الاخلاق , واغلبهم محجبات و بيصلو , و من بيت كويس  . .

 

لكن لان هي عملت , سلسلة من التنازلات المستمرة في انها الاول تتعرف علي فلان  ,بعدها تكلمه , بعدها تساله علي حاجة , بعدها تعجب بيه , بعدها تحاول تقاوم متقدرش , بعدها تحبه , ثم تتمسك بيه .

 

و كمان كتير من الرجال اللي بيشتركو في الجريمة ديه , مش رد سجون ولا اولاد شوارع .

 

كتير منهم اتربو في اماكن محترمة و متدينين بل و بيصلو , والتدين مش بيعمل تمثيل ليه , لا هو بالفعل من جواه اتربي كويس .

 

لكن لان هو كمان عمل مجموعة مستمرة من التنازلات  واتعرف و ضحك و هزر و اعجب و حب . .

 

وقتها بيكون مقاومة كلا منهم للفاحشة قليلة للاسف , ولما الشيطان يوز واحد فيهم و يدعو التاني للنجاسة  ,التاني مش بيعرف يقول لا .

 

محدش فيهم الاتنين معذور , لان في الاساس هما اللي نزلو السلم الطويل ده سلمة سلمة , محدش انتقل من الاخلاق للزنا مرة واحدة . .

 

هما الاتنين اللي قامو بتحطيم و تكسير كل العوائق اللي كانت موجودة عندهم من وهما صغيرين , من اخلاق و قيم و اصول و موانع خلقية , لغاية لما وجدو نفسهم في مواجهة مع قوة رهيبة و بمقاومة ضعيفة .

 

عشان كدة ربنا سبحانه و تعالي  قال "ولا تقربو الزنا" , مقالش ولا تزنو . .

 

لانه يعلم بحكمته ان الزنا خطوات طويلة , فيا عبد , متروحش اصلا لاول خطوة , متمشيش في السكة من البداية . .

 

اللي انتي عملتيه , نقدر نسميه ايه غير انك اتقربي من الفاحشة و العياذ بالله.

 

و من كرم ربنا عليكي , ومن حبه ليكي , انه طلع انسان زبالة مش بيهمه غير الفلوس , ومش بيتهم بيكي , وانه بيكسر بقلبك , وانه بيهين كرامتك .

 

لانه لو عاملك زي ما انتي متخيلة , كان زمانك دلوقتي في مكان انتي مكنتيش تتخيليه في ابشع كوابيسك , و كان زمانك انتحرتي بالفعل من هول الصدمة  ,او كان ابوكي او جوزك دبحك فورا من غير نقاش .

 

وعشان ربنا بيحبك , فهو وضع عدد من العقبات الكبيرة قدامكو , عشان تفوقي و تصحي من المأساة اللي انتي عايشة فيها  .

 

-------------------------------------------------------------------------------

​

باعتذر عن قسوة كلامي , بس احنا متعودين اننا نرضي ضميرنا , ومنقولش اللي صاحب الرسالة عايزة , لكن نقول اللي يرضي رب العالمين , واللي في مصلحته هو  , و اللي هيحل المشكلة  . .

 

انتي غلطتي من البداية انك مستخدمتيش المخرج الشرعي لانهاء الزواج , وغلطتي تاني لما تواصلتي مع انسان زي ده , واستمريتي في جريمتك انك حبتيه و متعلقة بيه , وبل و الادهي بتغيري عليه , يعني انتي بتعامليه معاملة زوجية كاملة  , سبحان الله  . .

 

والمصيبة كبرت لما بعتيله مبالغ كبيرة من الفلوس , اكيد ولادك اولي بيها , ولو كانت ديه فلوس زوجك فالجريمة مضاعفة  . .

 

و الكارثة بقي لما هو "نفضلك" اكتر من مرة  ,وانتي بتبحثي بحث المدمن عن "ربع جرام" .

 

ولما انتي حاولتي تعقلي , وهو ادرك ان "الهبلة" (نعتذر عن الكلمة) اللي بتجيبله فلوس هتطير منه , فكان لازم يتودد ليكي و يمد معاكي الكلام , عشان يكمل سحب في الفلوس . .

 

و انتي كل ده مش شايفناه ولا حاسة بيه .

 

و في الاخر بتقولي اعمل ايه , معقولة الطريق مش واضح عندك ؟ ؟

 

وكون ان كان فيه احداث معينة في طفولتك (الخجل , الكسوف , الحساسية , رفض ابويكي للزواج من ابن عمك) , او ان فيه مصاعب حالية في الزواج (زوج متوحش بيضرب و بيأذي) , فكل ده مش مبرر ولا عذر لاي ذنب تعمليه .

 

والا كنا نعذر بقي اللي بيسرق عشان عايز يبقي غني , او اللي بيقتل عشان فلان عصبه  ,او نعذر مبارك و السيسي عشان خايفين علي عروشهم , او نعذر فرعون لان سيدنا موسي عايز يخلعه من منصب الالوهية , او نعذر ابو جهل لان الاسلام جاي يهدد مكانته في قريش .

 

مفيش اي عذر لاي جريمة او ذنب بيحصل , خاصة ان فيه بالفعل مخرج شرعي للازمة , بس انتي مش عايزة تاخديه لسبب او لاخر .

 

-----------------------------------------------------------------------------------

 

وبالتالي اللي هنقوله , لازم تنفذيه بشكل كامل , وده لو انتي بالفعل عايزة تحلي المشكلة  ,لو شايفة اللي هنقوله تقيل عليكي او مش علي مزاجك , يبقي براحتك اعملي اللي انتي عايزاه , بس متلوميش الا نفسك  .

 

• اولا اقطعي علاقتك فورا بالحيوان ده  .

 

فورا من غير تفكير , بلوك ليه من كل وسائل التواصل , ولو معاه رقمك غيريه علي طول .

 

وخدي بالك هو عارف الفيس بتاعك  ,فسهل جدا انه يدخل عليه من حساب جديد و يبعت كلمتين حب و هيام عشان يرجع الفرخة اللي بتبيض له دهب   .

 

فالحل انك اصلا تمسحي حساب الفيس بتاعك ده بشكل نهائي , وتعملي حساب جديد باسم مختلف ومن غير اي شئ يعرف يدله عليكي , وضيفي عليه صديقاتك او قرايبك , وقوليلهم ان حسابك القديم ضاع ولا اي حاجة .

 

واياكي تضيفي اي انسان هو يعرفه , لانه من خلاله هيعرف يوصلك . .

 

 

 

ولو هو ضايفك علي الواتس او فايبر , فهاتي خط جديد ميعرفوش و امسحي الواتس و فايبر من تليفونك و نزليه من الاول بالرقم الجديد .

 

يعني لازم تسدي كل ابواب الشيطان من غير اي نقاش , اي تواصل معاه هو استمرار في الجريمة . .

 

و بمناسبة الفلوس , بالتاكيد هي خلاص راحت , وهو مش هيجيبها ابدا ,  واياكي تستمري معاه ولو يوم واحد علي امل انه هيجيب الفلوس , صدقيني مش هيجيب منه قرش واحد , وانتي اللي هتخسري اعصابك و كرامتك و دينك و بس .

 

ارمي الفلوس في الشارع لانها خلاص مش جاية اكيد , اعملي بلوك تام ليه من كل حاجة .

 

بكرر تاني , اي "مواربة" صغيرة يعرف هو يوصلك منها , هتفتح عليكي باب جهنم , وانتي واضح انك ضعيفة الارادة و هيعرف يجيبك تحت جناحه , النوعية ديه من الذئاب بيعرفو يلينو قلب اي انثي , ربنا يحفظنا .

 

اي "مواربة"  للباب  يبقي مفيش اي حل هينفع , واعرفني انك بتنزلي برجليكي السلالم بشكل مستمر ,واللي اخر سلمة فيهم بتوصل لغرفة نومه , ربنا يحفظك يا رب

 

                   --------------------------------------------------------------------------------

 

• لازم تتوبي لربنا فورا عن اللي حصل .

 

ومتقلقيش ربنا هيغفر , يعني هو غفر لسيدنا "خالد بن الوليد" , اللي كان شوكة في ظهر المسلمين في "أحد" و جعله من خيرة الصحابة , وغفر لـ "وحشي" اللي قتل سيد الشهداء ,فمعقول مش هيغفر ليكي ؟ ؟

 

و اصلا من الحاجات اللي تجعلك متحمسة للتوبة , ان ربنا بيحبك حب كبير ,انه حفظك من ذنب اسود مخيف , واللي بيجعل الواحدة بعده غير ما كانت قبله  .

 

فكون ان ربنا جعلك "طاهرة" لغاية دلوقتي , ده معناه انه يري في قلبك "حب الله" , و"الخوف منه" , وان الامل فيكي كبير جدا .

 

وبالتالي انتي فورا امشي علي الخطوات المتتالية للتوبة واللي ممكن نلخصها في اربع نقط  :

 

• الاستغفار التام عن اللي حصل

• الندم الرهيب علي كل ذنب عملتيه

• الاصرار و النية الصادقة عدم العودة الي اي ذنب

• ارجاع الحق لاصحابه

 

والنقطة الرابعة ديه في حالة الفلوس اللي رمتيهيا للشاب كانت مش فلوسك الشخصية  , ساعتها اعملي خطة في بالك ازاي هتيجي فلوس حتي علي مدي شهور جاية , عشان ترجعيها واحدة واحدة من غير ما حد يعرف باللي حصل

 

التوبة ضرورية جدا , عشان ربنا سبحانه و تعالي يكفر عن كل ذنب تم منك , وثقي ان كرمه كبير , وان مغفرته واسعة , وانه يفرح بتوبتك فرح كبير , زي ما وصف لنا الرسول صلي الله عليه و سلم

 

وهنا اتكلمنا بالتفصيل في خطوات التوبة في رسالة علاقة محرمة , ورسالة لذة المعصية

​
 

-----------------------------------------------------------------------------

 

• تحصين نفسك  .

 

ومعناها انك تبني عدد من الحصون و الحواجز و العقبات الكاملة , بينك و بين اي معصية تاني  , سواء مع نفس الشاب او مع اي حد تاني في المستقبل .

 

لانك حتي لو تبتي حاليا  , وقطعتي علاقتك تماما مع اخينا الاولاني , فوارد الشيطان يحاول يفتح معاكي باب تتعرفي علي شاب تاني او تالت , وزي ما قلنا هتكون مصيبة لو كان "انسان لطيف و كيوت" .

 

فلابد تعملي كمية كبيرة من الحصون الصلبة ضد اي محاولة للشيطان انه يزقك تاني وتنزلي السلم من الاول تاني , ربنا يحفظك

 

وكأن الواحد لما بيذنب , هو بينزل السلالم واحدة واحدة , ف التوبة وكأنها بترجعك فوق خالص علي اول السلم , و بتلغي اللي حصل .

 

فانتي محتاجة بقي تعملي حواجز بينك و بين اول السلم , عشان اساسا ميكونش فيه اول خطوة ولا سلمة للكبائر .

 

 ده بيتم بطريقين مهمين  .

 

اولا انك تتخذي الوسائل الحياتية لده , يعني في الاساس يكون فيه وسائل ان مفيش تواصل بينك و بين حد .

 

 

يعني مثلا ممكن تمسحي الماسنجر من تليفونك , او انك تعملي فيس باسم وصورة راجل , وده عشان تمنعي اي حيوان عايز يتسلي انك يضيفك او يكلمك . .

 

فلما يشوف حساب باسم "الحاج ابو فتحي" , وعليه صورة واحد بشنبات قاعد علي القهوة , مش هيعبره , بينما لو فيه حساب حتي لو باسم "نقابي حيائي" , وحتي لو عاملة الصورة كلها سواد , برضه هيضيفك و يكلمك  , لان الدياثة بتجري في دمهم .

 

وعلي الواتس مترديش علي اي حد متعرفيهوش , اقفلي كل ابواب الشياطين

 

الطريق التاني  , اللي ممكن نسميه الرصيد الديني .

 

واللي معناه انك تقربي جدا جدا لربنا , التزمي بقراءة جزء او جزءين من القرآن يوميا ,واظبي علي قيام الليل , صومي اتنين و خميس , التزمي بذكر الله  ,اقطعي علاقاتك باي صديقات انتي عارفة انهم بتوع "نميمة و غيبة" , وهتلاقي ان بقي عندك رصيد عالي من التقرب لله . .

 

الرصيد العالي ده , هو اللي هيمنعك اصلا انك تفكري في انك تروحي لاول سلمة , وهتعيشي في معية الله بشكل دائم

 

-------------------------------------------------------------------------------

 

• بالنسبة لزوجك لازم تشوفي حل .

 

لابد يكون فيه حل من ناحيته ويغير من نفسه  ,او يكون فيه كبير ليه يتدخل ويشوف الموضوع ايه  ,او يكون فيه مساحات وسطي تتفقو عليها في التعامل .

 

لو الدنيا انسدت تماما , وهو مصر علي ظلمك و ظلم اولادك , اطلبي الطلاق , ده حقك .

 

لو شايفة انها هتكون حرب طويلة انتي مش قدها , يبقي استمري في الزواج بس عامليه بشكل بارد و حاد لغاية لما يفهم ان اللي بيعمله غلط ولازم يتغير

 

و هنا اتكلمنا في اربع رسائل موضوع الضرب و الطلاق , اقريهم لو سمحتي

​

رسالة  :  بيتي هيتخرب

رسالة  : الإعتداء الزوجي

رسالة  : محاولات الاصلاح

رسالة  : الصبر أم الطلاق   

​

---------------------------------------------------------------------------

 

في النهاية لازم اؤكد علي حاجة . .

 

ربنا بيحبك , انه وضع قدامك العقبات انك تستمري في المأساة اللي انتي فيها  , وان محصلش شئ كارثة حتي الان , وانك من جواكي حاسة بتأنيب الضمير , وبتدوري علي حل لمشكلتك .

 

اياكي انك تستهتري او تكسلي في تنفيذ الخطوات , ابدئي فيها فورا  من غير نقاش , متفكريش في الفلوس اللي هي بالفعل راحت و مش هترجع , فكري بس في دينك و كرامتك  و اخلاقك و نظرة ابنك ليكي .

 

ربنا كرمك ان مفيش حد عرف حاجة  ,وانك لسة في نظر ابنك و اهلك و حتي زوجك "الزوجة المخلصة البريئة" , ربنا ستر عليكي لانه عارف ان جواكي خير , فاياكي و اياكي انك تكملي في الطريق المظلم ده .

 

لان احيانا لما ربنا يري ان الشخص خلاص  ,بقي مش هامه , وبقي فيه استمرار و اكمال في المعصية  ,ربنا بيرفع الستر عنه , وبيتفضح وسط الناس , واللي مش هتكون سهلة خالص ليكي

 

ابدئي حالت من غير اي شفقة او تعاطف لقلبك اللي هيقولك استني شوية , فورا اعملي بلوك  ,فورا امسحي حساب الفيس بتاعك  , فورا غيري رقمك , من غير اي تردد , واقطعي بايدك كل الحبال اللي بتشدك للفاحشة ربنا يحفظنا