العنوان : حبيسة الجدران

القسم: #النفسي

الرقم: 99

السؤال:

 

انا داخلة 3ث و فى 2ث حسيت انى حرفيا مبفهمش  . قولت يمكن قلة مذاكرة فبالتالى دماغى وافقة او حاجة كده يعنى فشديت الحمدلله بس بردو لقيتنى مش بفهم حرفيا و مفيش تركيز خالص

 

 حتى لما بركز مش بلاقى نفسى فاهمة و انا داخلة علمى علوم إن شاء الله وأكيد فهم و كمان اسئلة 3ث معظمها فهم فبجد خايفة جدااا

 

 انا على فكرة مكنتش كده وبالعكس كنت بفهم بسرعة وذكية جدا  ... ده كمان كنت فى الاعدادى مكنتش بذاكر وافضل فاكرة شرح الاستاذ و الحمدلله كنت من الاوائل ...

 

من ساعة ما دخلت الثانوى حاسة إنى متلخبطة خالص ومتشتتة ومترددة ديما وعندى ضغوط نفسية وبقيت كارهة الحياة لدرجة التعليم مبقاش فارق معايا بعد ما كنت شخصية ايجابية و صحابى محبطين جدا كمان و كمان بتحصل معايا مواقف بتهز ثقتى فى نفسى و بقيت ديما احس ان مش قد ان احقق حاجة واعمل انجاز وبقيت كسولة ديما انا حاسة انى اتدمرت حرفيا فانا عاوزة الحق نفسى قبل فوات الاوان وكمان بقيت محبطة من كده اوووى بجد ...

 

المشكلة كمان اني بدأت اتصاحب مع ناس كتير + اشتريت موبايل وادمنت السوشيال بغض النظر زمان كان اخرى العاب ع الكمبيوتر بس

 

كمان من كلام المحبطين اللى حواليا من ساعة ما مستوايا نزل + انا ذات نفسى لما لقيت نفسى نزلت وصحابى اللى كان مستوايا مش كويس بقى عالى حسيت بعدم الثقة فى نفسى + بقيت الفترة الاخيرة مكتئبة من خذلان من اصدقاء عشان كانوا بيكذبوا عليا و بيحقدوا عليا ومش بيتمنوا ليا الخير وتراكمات وكده أثرت ع نفسيتى اصلا

 

حاجة تانية انا معجبة بحد كان بيمدح فيا ويهزر معايا ديما وبقيت اميل ليه بس مليش علاقة بيه من الناحية دى لانه بن عمتى وقررت الفترة الاخيرة ان ده حب مراهقة و انى لازم انسى وافكر فى مستقبلى وكده بس مش عارفة انسى وكمان انا عندى فراغ عاطفى عشان اهلى منفصلين فبتعلق بأى حد بزيادة بس حقيقى يا ريت بالذات النقطة دى تشوفولى حل عشان بقيت افكر فيه ديما بطريقة رهيبة

 

بقيت مدمنة سوشيال جداااا مهوووسة بيه اووى فبحس بيشغل تفكيرى جدا + موضوع الارتباط ده ديما بفكر فيييه وقرأت عن حلول زى اشغلى وقتك وكده بس للاسف مش عارفة والموضوع ده مضايقنى . يمكن كمان اللي مزود الموضوع ان بابا و ماما منفصلين

 

يا ريت تقولولى ايه حل المشكلة دى او ايه المشكلة اصلا  

 

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

 

أهلا بيكي . .

 

طيب انتي في بداية ازمة كبيرة , فيه اسباب منها رغما عنك , وفيه اسباب من صنع ايديكي , ولابد تعملي خطوات جادة للخروج منها عشان متتفاقمش بشكل خطير . .

 

و هحاول في النقاط التالية اني اعمل توصيف كامل ليها , و سرد خطوات لحلها . .

 

• متنسيش بداية انك في مرحلة عمرية غير مستقرة , الفترة من 15 لـ 20 سنة بتكون عنق الزجاجة لاي شاب او بنت , لما بيحصل تغييرات جسدية و نفسية و عاطفية كبيرة , فده من العوامل المؤثرة في صنع الازمة الحالية , واللي لابد من التعامل معاها بذكاء و حكمة

• اللي عندك مزيج من الإحباط المستمر , و الخوف من المجهول المتعلق بالمرحلة الجاية في حياتك , بالإضافة للخواء الأسري , والاضطراب العاطفي , غير المشاعر السلبية الناتجة عن ادمانك لوسائل التواصل الإجتماعي

• من العلامات السلبية انك وصلتي لمرحلة : مش فارقة معايا حاجة , ديه علامة سلبية خطيرة , واستمرارها معناها صناعة كمية من اللا مبالاة و اللي هتنعكس في كل جوانب حياتك

• أول خطوات علاجك هي التوقف فورا عن إدمان النت و السوشيال ميديا , فعلا شئ مدمر , مش بس عشان الوقت الرهيب اللي بيضيع , ده كمان بيصنع اثار سلبية خطيرة , نتيجة المقارنة المستمرة مع الغير , و اللهفة المستمرة في متابعة الاخبار الغير مهمة , غير فرص التواصل مع شباب و بنات عديمي المسؤولية و فاقدي الدين و الخلق , واللي ممكن يسحبوكي للعالم بتاعهم

• كنا كتبنا بالفعل رسالتين فيهم تفاصيل الواحد ازاي يتخلص من ادمان السوشيال ميديا , ياريت تقريهم حالا و تطبقي الكلام اللي فيهم :

https://www.facebook.com/shof.ya.sidi/posts/269213447264402

https://www.facebook.com/shof.ya.sidi/posts/273462763506137

 

 

• تاني خطوة في العلاج هي الابتعاد فورا عن صديقاتك المحبطين و اليائسين , واللي هيجعلوكي دايما في دائرة الفشل و المشاعر السلبية , فورا تخلصي منهم و اعملي انتقاء لمجموعة مختلفة من الصديقات , اللي عندهم كمية كافية من الدين و الخلق و الحرص علي النجاح

• الخطوة المهمة اللي بعدها , هي ابعاد ذهنك تماما عن التفكير العاطفي  , انتي بتمري بمرحلة عمرية غير مستقرة , وطبيعي انك تحسي بميل للجنس الآخر دلوقتي , لكن لازم يكون فيه ضبط للمشاعر ديه , لأن لا عمرك ولا ظروفك تسمح باي ارتباط او زواج دلوقتي , وبالتالي التفكير العاطفي في الوقت الحالي هو نوع من تدمير استقرار النفسي , ودخولك في دوامة المشاعر السلبية , اللي مش هتسيبك في حالك

•  لازم تبعدي عن ذهنك اي تفكير في الشاب ده او غيره  , فعلا ده مش وقته خالص , التفكير في الامور ديه يكون  لما تتخرجي و يتقدملك شاب محترم عايز يكون شريك حياتك , مش شاب مراهق في سنك و بالتاكيد مش في ذهنه ابدا اي افكار للجواز دلوقتي

•  انفصال والديكي ممكن يكون سبب مساعد للازمة اللي انتي فيها ,لكن انتي ببعض الفطنة ممكن تعملي تجاوز للاثار السلبية , انتي مش اول اسرة يحصل فيها طلاق , وكتير من الابناء قدرو يتجاوزو المشاكل الخاصة بيه

•  لازم يكون عندك كمية كبيرة من الثقة بالنفس , اقري كتير عنها , وشوفي محاضرات في اليوتيوب عنها

• لازم تخرجي من الشرنقة اللي انتي وضعتي فيها نفسك , كون انك تظلي حبيسة غرفتك , و قاعدة طول اليوم علي الموبايل ده هيجعل الازمة مستمرة عندك , لازم بالفعل تخلي استخدام الموبايل ميزيدش عن ساعة يوميا , وغير كدة تمارسي حياتك الطبيعية

•  لازم تشغلي نفسك علي قد ما تقدري . املي يومك بشئ مفيد , عشان تصنعي حالة نجاح جواكي

•  فكري تعملي زيارات لاصدقائك , او لاقاربك , فكري تروحي جمعية خيرية تتطوعي فيها ولو بساعة في الاسبوع , فكري تتعملي لغة جديدة , او برنامج كومبيوتر يفيدك , عندك عشرات الحاجات اللي تقدري تعمليها