العنوان : ألم الكتمان

 القسم: #النفسي

الرقم: 111

السؤال:

 

السلام عليكم ورحمة الله وبركاته انا اسفه ع الازعاج لان دى المره الثانيه اللي ابعت فيها بس انا بجد ف مشكله انا اتعرضت لاصعب موقف ممكن يحصلى انا رسبت وشيلت السنه دى مع العلم ان انا تقريبا موقفه حياتى ع دراستى ومعرفش اعمل اى حاجه غيرها والكل يعرف كدا

 

 بس مش دى المشكله... المشكله رده فعلى.... انا منهرتش بالعكس اتعملت بكل هدووء وحتى صحبتى مرضيتش اكلمها فون عشان معيطش وانهار وأفضل ماسكه نفسى وبدل ما اخد حقى ف الحزن او استوعب الصدمه بدأت افكر ازاى اتعامل مع الموقف أنى هذاكر الترم دا كويس وممكن اعمل تظلم ف ماده يمكن تترفع ليا

 

وكمان مقولتش لحد ف البيت... يمكن عشان خايفه ان حزنهم يهد القوه اللى بتعامل بيها وانا مش عارفه إذا كانت قوه ولا مبالاه.... انا بدأت الاحظ ردات فعلى البارده ف مواقف كتير بس الموقف دا انا مستغربه نفسى وحاسه ان بجد عندى مشكله..

 

لانى لما بكون ف ازمه ف حاجه جوايه بتمنعنى ان أشارك حد فيها وبزعل من نفسى قوى لو حد شافني ف لحظه ضعفى او شاف دموعي..

 

 انا بجد تعبانه قوى من الكتمان بحس ان بيستنزفنى بس ف حاجه من جوايه بترفض بشده انى أشارك تعبى مع حد.... لدرجه ان بحكى مشاكلى بعد ما بتحصل بفتره عشان اكون خلصت من تأثيرها عليا انا وبحكيها وكأنى بحكى حاجه عاديه...... ياريت تساعدون لان الموضوع بجد بقى متع ب قوى

 

انا كمان بدأت الاحظ ان حتى دموعى بدأت تقل يعنى حتى بينى وبين نفسى لما يكون ف حاجه مزعلانى بحاول استدعى الدموع يمكن تريح اعصابى ساعات كتير بقتش الاقيها... اسفه ع الاطاله

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

و عليكم السلام و رحمة الله .

 

اهلا بيكي , وبالطبع مفيش داعي للاعتذار , اهلا باسئلتك اي وقت . .

 

نصايحنا ليكي هتكون في محورين بالتحديد :  مشكلة اعادة السنة , و مشاعر الحزن المختفية

  

 

 

• بداية كمبدأ عام , فالازمة مش في المشكلة اللي تحصل , لكن في فن التعامل معاها , يعني ايه  ؟ , يعني لما تحصل مشكلة معينة لفرد , فالضرر اللي بيقع عليه نتيجة تعامله الخاطئ معاها , بيكون اكبر غالبا من ضرر المشكلة نفسها

 

 

 

• بالنسبة للهدوء و حسن التفكير لما تحصل مشكلة معينة , فده شئ ايجابي و مطلوب , لكن لازم تفرقي بينه و بين كبت المشاعر اللي هي مشكلة مش قليلة

 

 

 

• لازم تؤمني من جواكي ان الحزن مش ضعف , و مش شئ الواحد يتكسف منه , والا مكناش شفناه من سيد الناس اجمعين صلي الله عليه و سلم , و مكانش بس حزنه علي قضايا الأمة او خسارة في معارك , ده كمان علي وفاة زوجته و ابناءه , يعني مشاعر شخصية خالصة

https://www.facebook.com/shof.ya.sidi/posts/375899719929107

 

 

 

• أخيرا , حاولي توسعي دايرة معارفك , وانتقي صديقات مقربات منك , واتعودي انك تعملي نوع من الفضفضة ليهم في الأمور العادية – مش الأسرار – لأن ده شئ صحي  ومريح جدا , خاصة للبنات . .

 

 

 ربنا يوفقك يا رب , وييسرلك كل عسير

 

​