مُخَيّر أم مُسَيّر
الرسالة السابقة
العنوان : مُخَيّر أم مُسَيّر
القسم: #الديني
الرقم: 19
السؤال:
أنا مجرد بنت عندي سؤال ديني مش عارفة أوصل لإجابته ، وسألته لأكتر من حد و محدش فاهم سؤالى ومش عارفين يوصلولي الإجابة عشان مش فاهمين مقصدي .. فـ هأعرض سؤالي وأرجو فهمه والإجابة عليه
سؤالي هو عن الشخص المنتحر ، طبعا أنا عارفة والناس كلها عارفين إن إللي بيموت منتحر بيبقى كافر وبيدخل جهنم ، عايزة أعرف ليه .. ؟!
ليه ربنا -سبحانه وتعالى- يموته كافر رغم إن ربنا -عز وجل- عليم خبير ، عارف إن الشخص دا هيموت منتحر وكاتبله إنه يموت منتحر ، ليه بقا رغم هو -جل ذكره- عارف إنه هينتحر يموته كافر ، أه عارفه إن ربنا بيحطنا فى إختبار بس هو العليم عارف إن الحد دا هيختار إيه مش ربنا سبحانه عليم باللي لسه هيحصل وعليم بكل شيء وكاتب ومقدر كل حاجة ، ليه بقا يموته كافر رغم إنه هو إللي مقدرله دا ؟!
عارفة إن سؤالي ملعبك حبتين بس أنا عايزة حد يجاوبني عشان الأمر دا محيرني جداً ...
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي . .
سؤالك لا ملعبك ولا محير , ولا حتي حرام .
كتير من الناس بتستحرم تسأل اسئلة في العقيدة , بينما سيدنا إبراهيم عليه السلام , وهو أبو الأنبياء , سأل المولي تبارك و تعالي أن يريه كيف يحيي الموتي , زي ما قرأنا في أواخر سورة البقرة . . .
طرح الأسئلة في العقيدة في ذاته مش غلط طالما من باب إرواء الفضول , بس الغلط ان الواحد يكون بيطرحها عشان يشكك او يجادل . .
كمان من المهم ان الشخص لو موجدش إجابة أقنعته , إنه يضع في اعتباره انه هيلاقي الإجابة في يوم ما , لكن حذار إنه يجعل في قلبه الشك او الريبة , واللي ممكن تزعزع عنده أساس العقيدة , والعياذ بالله . .
---------------------------------------------------------------------------------------
نوصل لسؤالك المحير , واللي أكيد مر علي عقول و قلوب الآلاف غيرك , بس مجعلوش السؤال ده يخرج للسان , مع إنه يملئ العقل بالحيرة . .
صحيح , ليه المولي تبارك و تعالي وهو يعلم أن فلان سينتحر , ليه بيجعله ينتحر ؟
بل إننا ممكن نوسع السؤال أكتر , لأنه مش متعلق بالانتحار و بس , ليه الشخص العاصي ربنا بيتركه عاصي وهو يعلم إنه سيعصي . .
حتي ممكن يخرج إلي مظلة الكفر بالله , ليه ربنا بيجعل فلان يموت كافر , وهو يعلم أنه سيكفر . .
والحقيقة مصدر الحيرة في السؤال إنك ربطتي في ذهنك بين حاجتين , هما قريبين من بعض , بس مش مسببين لبعض . .
والربط غير السليم بين الحاجتين دول , هما اللي أثارو كل هذا القدر من الحيرة اللي في عقلك . .
الشئ الأول هو : علم الله بالأمر .
الشئ التاني هو : إجبار الشخص علي عمل المعصية (سواء الإنتحار أو غيره) .
وانتي في اللاوعي عندك , ربطتي بين الاتنين مع إن الربط بينهم شئ غير سليم . .
الشئ الأول : أن المولي تبارك و تعالي يعلم بالأمر , هو شئ صحيح و مؤكد , ولا نقاش فيه .
الشئ التاني : إن فلان تم إجباره علي ارتكاب المعصية او الإنتحار أو الكفر , وده الشئ الغير سليم . .
إن كان المولي تبارك و تعالي يعلم أن "س" هيعصيه اليوم , او إن "ص" هيرتكب الزنا كمان شهر , او ان "ع"
هيكفر بالله في شهر مارس , او إن "ك" هينتحر بعد تلات اسابيع , بالفعل هو يعلم هذا وده مكتوب من قبل ان يُخلق آدم عليه السلام . .
إن كان الله يعلم هذا , فبالمقابل , كلا من "س" و "ص" و "ع" و "ك" , كلا منهم محدش أجبره علي القيام بهذا الأمر , ومحدش دفعه للمعصية او الزنا او الكفر او الانتحار , بل هو قرار فردي تماما , وتم من ثنايا عقله . .
علم الله تعالي بغيب , وعلمه بالمستقبل , و معرفته سبحانه باللي هيحصل في الايام و الشهور و السنين الجاية , مش معناه إنه هو من أجبرهم علي ارتكاب هذه الأمور , ولا إنهم ضحايا , أو مغلوب علي أمرهم . .
أنا عارف الأمر محير , لكن ديه الحقيقة . .
و عشان اقرب لك المثال أكتر , تعالي نضرب كذا مثال , ولله المثل الأعلي .
---------------------------------------------------------------------------------------------
لما يكون فيه مراقب في لجنة امتحان , والمراقب وجد إن "س", اللي هو طالب فاشل و عمره ما فتح كتاب , دخل اللجنة و بدأ يمسك ورقة الأسئلة و بيبص لها بنظرة اندهاش و رعب , و عينين الطالب يبدو عليهم انه مش فاهم اي شئ .
لما المراقب يكون عارف و متأكد و متيقن ان الطالب ده مش هيعرف يحل حاجة , وهيسقط . .
هل معرفة و تأكد المراقب باللي هيحصل , معناه ان هو السبب في فشل الطالب و رسوبه ؟ ؟
هل كون إن المراقب عنده القدرة علي استنتاج اللي هيحصل بعد اسابيع لما الطالب يشوف النتيجة , معناه ان المراقب السبب ؟ و هل ده بيخلي مسؤولية الطالب من الفشل الذريع اللي هو متسبب بيه ؟ ؟
مثال تاني . .
لما تلاقي ان "ص" هو شاب مستهتر , و متعود دايما يسوق العربية بمنتهي التهور و عدم التركيز , وياما عمل مشاكل قبل كدة بالعربية . .
لما في يوم تلاقيه بيركب عربيته و هو سكران و مش شايف قدامه , وهو مصر إنه يسوق بنفسه , ومش عايز يسمع تحذير اي حد انه متسوقش و انت مش شايف قدامك , بس هو راكب دماغه , وهيسوق يعني هيسوق . .
لما انتي تكوني شايفة ده , ومتأكدة انه هيعمل حادثة و يدمر نفسه , هل يقينك و علمك ده , معناه انك السبب في اللي هيحصل ؟
هل كون انك تعرفي باللي هيحصل بعد ساعات , بيخلي مسؤوليته من الجريمة اللي ارتكبها انه يسوق بتهور وهو سكران ؟
مثال تالت . .
لما تلاقي شخص حالته المادية مش عالية , بس متعود علي الإسراف و البذخ بشكل غير معقول , و دايما بيستدين فلوس من طوب الأرض , وعنده ديون علي البنوك و مش عارف يسدها ازاي , ولسة مكمل في طريق الإسراف بشكل غير منطقي . .
لما انتي تشوفي ده وتستنتجي إنه خلال شهور هيكون في ورطة كبيرة , وهيترفع عليه قضايا و مش بعيد يتسجن .
لما كلامك يتحقق , وفعلا تلاقيه مرمي في السجن بسبب أسلوبه المتهور في الديون , وإسرافه المستمر , هل قدرتك علي استنتاج اللي هيحصله , معناها انك انتي السبب ؟ او معناها ان هو ملوش ذنب في اللي حصل ؟ ؟
فهمتي قصدي ؟
كون إن المولي تبارك و تعالي يعلم ما سيحدث لفلان , مش معناها علي الإطلاق انه سبحانه هو من أجبره علي هذا الطريق او ها العمل , وكمان مش معناها إن فلان ده مش غلطان , وان هو مش مذنب و مش مقصر في هذا الأمر .
---------------------------------------------------------------------------------
وعشان الصورة تقرب لذهنك أكتر , ثقي من حاجة , ان اي شخص بيقدم علي معصية كبري (زنا , قتل , انتحار , كفر) ثقي تماما إن المولي تبارك و تعالي وضع قدامه العشرات من العقبات والصعوبات في طريق المعصية ديه , وان الشخص ده – بكل تبجح – استمر في تحطيم كل العقبات ديه بشكل مستمر , لغاية لما يوصل للمعصية ديه و العياذ بالله .
ثقي ان ربنا سبحانه وتعالي , ارسل له العديد من التحذيرات الخفية , والرسائل المباشرة و الغير مباشرة , لكن الشخص ده استمر – بكل إصرار – في طريقه للمعصية , طب وقتها لازم نقول ان فلان ده غلطان ولا لا ؟ ؟
لما تلاقي ان "فلانة" اللي كان اخلاقها بيتضرب بيها المثل , و كانت عفتها و حياءها مشهورين في الكلية بالكامل , لما تلاقيها اتحولت الي شئ بشع , بلا خلق او حياء و صارت في أحضان الفاحشة بشكل دائم , ثقي ان ربنا ارسل لها العشرات من الرسائل في طريقها , وهي رمت ده كله ورا ضهرها , وكانت عارفة ان ده غلط و بتعمله . .
فكون ان ربنا يعلم انها ستعصيه في النهاية , مش معني كدة ان فلانة ضحية , لأ هي المتسببة بالكامل في اللي هي وصلتله , وعلم المولي تبارك و تعالي بمصيرها مش معناها إن هو من جعلها تقوم بهذا الأمر . .
و ده اللي شرحناه بالتفصيل في رسالة : درجات السُلم
وده ينعكس مع السؤال الخالد , اللي كل كام سنة يفتحوه و يثيرو النقاش عليه : هو الإنسان مخير ولا مسير ؟ ؟
قطعا هو مخير . .
قطعا من غير نقاش , وأي حد يقول الإنسان مسير هو مش بيفهم . .
----------------------------------------------------------------------------
وأسهل شئ يثبت الكلام ده , هو إن الإنسان بيبان عليه إنه مخير 100 % لما بيكون فيه قرارات تانية متعلقة بالصحة , بالأكل , بالإهتمام الشخصي , . . .
يعني وقت المذاكرة , تلاقي فيه طالب كسول مش بيذاكر , وفيه طالب جاد , بيصحي من بدري عشان عايز يبني مستقله . .
في مجال الصحة , تلاقي شخص "مكبر دماغه" ياكل أي حاجة من الشارع , ومش مهتم بعمل اي رياضة او لياقة , وشخص تاني مهتم بنفسه , وينقي الأكل بتاعه , و بيواظب علي الرياضة بشكل مستمر . .
في الإهتمام الشخصي , تلاقي شخص "معفن" , لا بيهتم بهدومه ولا ريحته ولا امتي استحمي ولا حاجة , وشخص تاني بيهتم بكل التفاصيل ديه . .
من الواضح ان المصائر المختلفة للاشخاص , بتكون بناء علي قراراتهم , مش علي اجبارهم علي شئ . .
ان كان فيه بعض العوامل اللي محدش له يد فيها بتتدخل احيانا , زي المستوي المادي , او الشكل , او نوع الجسم او مستوي الذكاء . .
ان كانت العوامل ديه بتتدخل و هي بتكون رغما عنا , ففي التعامل مع المولي تبارك و تعالي , العوامل ديه غير مؤثرة . .
فمستحيل ان ربنا يحاسب شخص علي شئ , ليس له يد فيه , فمش هيحاسب فلان , ان ليه كنت طويل ,او اسمر , او تخين , او مناخيرك شكلها كذا ,او فقير , او الدغ . .
و كل العوامل ديه , غير مسببة علي الإطلاق في السباق إلي رضا الله و الجنة . .
فممكن تلاقي شخص فقير قريب جدا من ربنا , وشخص تاني فقير , وهو من افجر الناس . .
تلاقي شخص غني , ويخاف من ربنا خوف رهيب , وشخص تاني غني وهو ابعد ما يكون عن الله . .
تلاقي بنت جميلة وقلبها متعلق بالله تعلق لا حدود له , وبنت تانية جميلة , و بتستغل جمالها في التنقل بين الرذائل و الفواحش .
بنت تانية غير جميلة و تجدي ان خلقها مثل اخلاق الصحابيات , وبنت تانية غير جميلة , وتستحل المال الحرام و تظلم الناس . .
فمن الواضح إن الإنسان مخير 100 % , وان أي شئ هو هيحاسب عليه يوم القيامة , هيكون نتيجة اللي هو عمله بالفعل بإرادته الحرة في الدنيا , من غير ما يحد يجبره عليه . .
متنسيش ان ابن سيدنا نوح كان كافر , وزوجة سيدنا لوط كانت كافرة . .
كمان متنسيش ان ابن ابو جهل , كان صحابي (سيدنا عكرمة ان ابي جهل) , وابن رأس النفاق في المدينة كان صحابي هو كمان (عبد الله بن عبد الله بن أبي بن سلول) . .
الإنسان مخير و ليس مسير , وهو ما يتوافق مع العدل الرباني للكون , واللي يقول غير كدة يبقي مش بيفهم . .
---------------------------------------------------------------------------------------------
نقطتين أخيرتين لابد من ذكرهم سريعا . .
كل اللي اتقال من شوية , قد يكون فيه استثناء للمريض النفسي . .
يعني لو فيه مريض نفسي أقدم علي كبيرة من الكبائر او الإنتحار , وقتها قد يعفو الله عنه . .
و كلمة مريض نفسي كلمة مش صغيرة , فيه فرق بين شخص متضايق شوية , وبين شخص مريض نفسي حقيقي , وعنده غشاوة علي عقله . .
و ده شئ بيد المولي تبارك و تعالي , وثقي إنه مش هيظلم حد ابدا . .
لكن لو شخص عنده كام مشكلة في الحياة , فحذار إنه يحسب نفسه مريض نفسي , ويحسب انه ممكن ينتحر عادي و ربنا هيغفرله , ده كدة بيهزر . .
المريض بالإكتئاب MDD بيوصل لحالة إنه لو شاف أبوه قدامه النار ماسكه فيه و هو بيصرخ , فمش هيقوم يطفي النار من عليه , لأن اصلا عقله مش فيه . .
عشان بس مندخلش الأمور في بعضها , ونحلل لنفسنا حاجات علي أساس اننا مرضي نفسيين . .
الشئ التاني . .
إن فيه آراء شرعية متعلقة بالانتحار وهل هو كفر ولا لأ . .
و احنا كفريق محدش فيها عنده العلم الشرعي الكافي عشان يقول حكم الإنتحار ايه , فلو عايزة ممكن تقرأي باستفاضة في الأحكام الشرعية للانتحار , او تسألي شيخ ثقة , هل المنتحر كافر و هيخلد في النار ولا لا , لأن محدش فينا عنده العلم الشرعي الكافي , ولا الجرأة انه يدخل مجال الفتوي . .