الثورة و خراب البيوت

القسم   :#السياسي

الرقم    : 19

السؤال           :

 

هو مش سؤال لكن نوع من الفضفضة بدل ما يحصلي حاجة , خاصة اننا قربنا علي 25 يناير

 

يعني انا بابا كان شغال في السياحة من قبل الثورة  مكانش الشغل مقطع بعضه بس كان شغال كويس والأتوبيس اللي كان بيسوقه مكانش بيوقف شغل في الاقصر و اسوان و ابو سمبل و كانت الدنيا ماشية

 

من ساعة الثورة ما قامت 2011  ووقف حاله خالص  , مبارك مشي و جه طنطاوي و بعده مرسي و السيسي و الحال خراب  و بابا بيقولي ان مبقاش ييجي ربع اللي كانو بييجو قبل كدة

 

مش عارفة هل اكره الثورة ولا الثوار و السبب في مبارك ولا مرسي و لا السيسي ولا فينا احنا

 

كل ما افتكر الحال قبل الثورة اترحم علي ايام مبارك غصب عني

 

انا صح ولا غلط  

 

*-*-*-*-*-*-*-*-*-*-*-*-*-*-*-*-*-*-*-*-*-*

الإجابة                    :

 

انتي صح و غلط . .

 

صح في نقط , وغلط في نقط تانية . .

 

أفضل تعبير سمعته  , بيوصف حال البلد في الكام شهر اللي شفنها فيهم القرف من بعد تنحي مبارك , لما واحد قالي :  ( يعني بلاعة مقفولة بقالها 30 سنة و عايزين ننضفها , مستني تشوف فيها ايه غير الصراصير و الفيران , ربنا يكون في عونا علي ما ننضفها )

 

في الـ 18 يوم في التحرير كانت احلامنا الوردية مغرقانا , و بعد التنحي سذاجتنا خلتنا نحسب ان البلاعة نضفت خلاص , وتصلح للاستخدام الآدمي , وإننا داخلين علي أيام بمبي , وإن أكبر مشاكلنا هو يا تري نختار مرشح بروفيسير في الجامعة عشان نهتم بالجانب العلمي , ولا رجل أعمال شاطر عشان يطور الاقتصاد . .

 

مكناش نعرف ان متمش تنضيف أكتر من سطح البلاعة , بينما القاع مليان أطنان من الحاجات اللي يعجز اللسان عن وصفها . .

 

ومشكلة التنضيف السياسي انه عملية مؤلمة ,و مرهقة , وطويلة , وتصاحبها معاناة مستمرة , واسئلو في ده اي مدخن او سكير او مدمن عايز يرجع إنسان طبيعي , اسئلوه عن اعراض الإنسحاب . .

 

وطبيعي يكون والدك ضحية مؤلمة للتطهير , هو و عشرات الآلاف العاملين في مجالات كتيرة وقف حالها بعد الثورة , وياما مصانع اتقفلت , وياما  بيوت خربت  . .

 

بس السؤال , يا تري الثوار هما اللي منعو السياح ؟ هما اللي قلتو نفسهم في الميادين ؟ هما اللي فرضو الطوارئ ؟ هما اللي كتبو علي القنوات الرسمية "مصر تحارب الإرهاب" واللي كان ليها اثر رائع في جذب السياح لمصر ؟

 

والدك و كل العالمين في السياحة ضحية نظام مجرم بدأ يجيب عاليها واطيها عشان يخلي الثوار يندمو علي ثورتهم , و عشان يفقدهم الحاضنة الشعبية تدريجيا , وهو ما حدث . .

 

احنا كثوار قادرين نواجه النظام بكل جبورته , بس ازاي هنواجه عم متولي الراجل الغلبان اللي علي اول الشارع ,اللي الكشك بتاعه اتحرق من بلطجية النظام و مبقاش عارف يجيب دوا السكر ؟

 

هنواجه ازاي الحاجة سامية , اللي كانت بتروح القصر العيني تكشف ببلاش , ومبقتش عارفة تروح بسبب الحظر ؟

 

هنواجه ازاي الاستاذ ممدوح صاحب مكتب السياحة في شارع محمد محمود , واللي اتدغدغ من الخرطوش و طوب المتظاهرين وهما بيدافعو عن عيونهم اللي بتتصفي ؟

 

هناوجه ازاي والدك لما نلاقيه قاعد علي القهوة مكسوف يطلب شاي تاني عشان ممعهوش حقه  ,من ساعة ما السياحة وقفت ؟

 

هنواجه ازاي ام عبد الله اللي واقفة علي اول الشارع , واللي بتبص للآنسة عفاف اللي راجعة من ميدان التحرير , زي ما بتبص لواحدة جاية من شقة دعارة , من كتر ما سمعت من تامر امين و عفاف شعيب  عن اللي بيحصل في خيم التحرير ؟

 

و ديه كانت الضربة القاصمة اللي قطمت ضهر الثورة , وخلت الاعداد الخيالية اللي نزلت يوم 28 , ويوم 10 فبراير , تقل لأقل من العشر , بسبب الضغوط النفسية المستمرة . .

 

ازاي هتنقع دول كلهم ان الثورة لمصلحتهم , عشان ننضفها من العنكبوت اللي عشش عليها من الخمسينات , ولغاية لما حولها لشبه دولة علي رأي بلحة . .

 

ازاي تقنع الحاجة سامية اننا عايزين يكون ليها تأمين صحي يشبه التأمين الصحي الكندي او البريطاني اللي بيتضرب بيه المثل  , واننا عايزين لاستاذ ممدوح  عدالة اجتماعية تخلي شركتك تنافس باحترام مش وسط حيتان بتاكلك , وعايزين الحاج متولي يقعد في بيته مستريح و يجيله معاش يكفيه سؤال الناس  . .

 

كل واحد فيها يقدر يواجه الجيش و الشرطة و النظام , لكن ازاي هيواجه ابوه و امه واخوة و عمته و جاره و زميله في الشغل وصحابه علي الفيس .

 

نظام مبارك و من بعده طنطاوي ثم السيسي عرفو يعزف علي وتر "خراب البيوت" واللي عارف انه هيخلي الناس و الثوار كمان يلعنو اليوم اللي نزلو فيه التحرير , او عملو فيه لايك لصفحة خالد سعيد . .

 

الثوار والشعب اللي قدر يستحمل الفترة الانتقالية ديه , وقدر يفهم اللعبة اللي عليه , قدر يعدي المرحلة الانتقالية المتعبة ديه , و يكمل ثورته , و الشعوب اللي مقردتش تصبر زي شعبنا المبجل , هيعاني لسنين طويلة من عقاب مؤلم , لأنه رفع عينه في وش أسياده من الجيش و الشرطة و القضاء . .

 

المفكر سيد قطب لخص كل ده في كلمتين :  "لابد للأمة من ميلاد، ولابد للميلاد من مخاض، ولابد للمخاض من آلام"

 

والدك ضحية , بس الجاني مش الثورة ولا الثوار , الجاني هو المجرم اللي خلي البلد تولع عشان نظامه ميتغيرش .