العنوان : الاتصال المحرم

القسم: #الاجتماعي

الرقم: 33

السؤال:

 

انا  كنت بحب واحد بقالى حوالى سنتين ونص وكنت بكلمه اهلى عرفوا وكده وحصلت مشاكل كتيييير وتعبت ومشاكل معاه واهله

 

قبل المشاكل كان ف واحد متقدملى بس هو مش متعلم خالص ماما كانت رافضه وقالت مديش بنتى لواحد مش متعلم وانا كنت رافضه بعد ماحصلت المشاكل تقريبا ف نفس اليوم كمان هو اتقدم تانى لقيتهم وافقوا ع طول وحددوا الخطوبه واتخطبت بقالى دلوقت سنه وشهر

 

 

بس تعبته وتعبت كتيير واثر عليا نفسيا وجسمانيا وقولتله انا مش عايزاك مليون مرة كان بيقول لماما كنت باتضرب كتير واتهزق وتفكرنى بالموضووع القديم اللي انا منستهوش

 

 

فضلت بعد الخطوبة خمس شهور معرفش عن اللي بحبه حاجه خالص لحد ماخدت فونى طبعا مكنش معايا الفون اول ماخدته كلمت الشاب الاولاني

 

فضلنا نتكلم ونطمن ع بعض وحكيت لخطيبى انى كنت  بحب حد وكده حكيتله كل حاجه

 

طبعا كان مع خطيبى  مشاكل بسبب انى مش بحبه مبسالش مبهتمش وهو كان بيعملى مشاكل وكرهنى فيه اكتر بزيادة

 

وقال كل حاجه لماما لحد ماكنت بدعى عليه وجيه قال لماما بنتك كانت عارفه وبتكلم رغم ان ماما عارفه بس بينتله انها متعرفش وكدبته بس انا اتبهدلت طبعا

 

يعنى من الاخر كانت سنه خطوبه كلها مشاكل

 

اديت لنفسى بدل الفرصه مليون وحاولت والله كتير معاه وصليت استخارة بس مفيش قبول من ناحيتى خالص لحد دلوقتى

 

مش عارفه اهتم بيه مش عارفه اقوله كلمة كويسه بحاول اعدل الوضع عشان امنع المشاكل عنى مفيش يومين وارجع اتقلب عليه تانى

 

والشخص ال بحبه انا رغم اننا بعدنا شويه بس معرفتش اكمل بعد عنه

 

وهو خطب بعدى بسنه بالظبط ولحد دلوقت احنا مع بعض بردو

 

حاسه بالذنب وف نفس الوقت هو بيحبنى وبيتمنى الوقت يرجع وميحصلش كل ال حصل ولا انا عارفه ابعد ولا حتى هو

 

بيفضل يقولى محدش عارف بكرة ف اي وانا مش قادرة ابعد عنه لحظه

 

وخطيبى محستش من ناحيته بأى حاجه مش عارفه اتعامل معاه معرفتش افتحله قلبى حاسه انه دمه تقيل ع قلبى مع انى اديت نفسى فرصه وحاولت انسى الشخص الاولانى بس بردو معرفتش

 

مش عارفه افتح قلبى لحد تانى مش عارفه اقبل حد تانى

 

مبستحملوش يقولى اعملى كذه وكذه بعمل معاه مشاكل ع طول وبهدلته كتير وهو بيستفذنى اوقات

 

يعنى افتكرت ان ربنا هيعوضنى بواحد ينسينى وابدء معاه من جديد بس للاسف ده زود الهم

 

هو كشخص خاطب حقه خطيبته تهتم بيه تفرحه تقدرة تحسسه بقيمته انا مبعرفش اعمل ده معاه وحاولت معرفتش وتعبت اووى

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

باختصار . .

 

من حقك تفسخي الخطوبة , بس مينفعش انك تتواصلي مع الشاب الاولاني خلاص  . .

 

لما نبدأ من الأول , هنلاقي ان البداية المعتادة لكل المشاكل الاجتماعية , هي التواصل بين شاب و بنت , و انشاء نوع من الاعجاب المتبادل و الهزار و الضحك بشكل غير مناسب , واللي بيصنع في قلبه و قلبها نوع من الاعجاب اللي قد يتحول لحب  .

 

و التواصل ده لو تم ترجمته لخطوبة و زواج , فهو بينزع فتيل اي مشكلة اجتماعية متوقعة , و بيجعله يصب في مسار ايجابي و سليم , بس المشكلة ان ده مش السيناريو الدائم  .

 

اغلب الاحيان التواصل و الاعجاب و الحب , لا ينتهي بالخطوبة و بالزواج , اما ان فيه عقبات معينة قدامهم  ,او ان هي اتخطبت  ,او هي لازم هيتجوز واحدة تانية  ,او خلافات عائلية , او انه من الاساس بيتسلي و مش بتاع جواز .

 

فالمشكلة وقتها  ان الحب ده مش بيختفي , مش بيتبخر , لكنه بيبقي في القلب باثر عميق وجرح مستمر , واللي بتكون ضحيته غالبا البنت , لان الشاب سريعا ما هينسي , ده لو كان بيحبها اساسا مش بيتسلي .

 

وبالتالي صناعة هذه الأزمة هي منك انتي  , محدش قالك في البداية روحي اتعرفي علي فلان , و اشبكي قلبك بقلبه , وهو مش هييجي يتجوزك .

 

و ديه الحكمة في ان الشرع الحنيف نهي عن الاختلاط غير المناسب بين الشباب  و البنات , ببساطة عشان يتجنبو الازمة ديه , واللي بتهد البيوت للاسف .

 

-----------------------------------------------------------------------------

 

نوصل للنقطة التانية  . .

 

وهو خطيبك اللي انتي مش طايقاه .

 

و هنا لازم ابدي كامل اندهاشي و تعجبي من والدك ووالدتك . .

 

فترة الخطوبة عشان الطرفين يتعرفو علي بعض , ويشوفو فيه بينهم مساحات مشتركة كافية , وهيكون فيه حب متبادل ولا لا .

 

فلما يبان - ولفترة  مستمرة – ان مفيش اي قبول من ناحيتك , وان مفيش امل في ان هيحصل تبادل للمشاعر , فلازم توافقو فورا علي فسخ الخطوبة .

 

هل انتو منتظرين اليوم اللي تجيلكو فيه بشنطة هدومها و معاها ابنها علي كتفها ؟ ؟

 

هتكونو فرحانين ان بنتكو تعيش احد خيارين زي الزفت  , اما حياة تعيسة مع زوج مش قابلاه  ,او تعاني من ألم الوحدة كمطلقة , والاسوء لو فيه طفل  .

 

ان كان الرسول صلي الله عليه و سلم , شدد علي أهمية موافقة البنت للزواج , في الحديث اللي رواه مسلم , حدثنا أبو هريرة أن رسول الله صلى الله عليه وسلم قال "لا تنكح الأيم حتى تستأمر ولا تنكح البكر حتى تستأذن قالوا يا رسول الله وكيف إذنها قال أن تسكت"

 

يعني اصلا لا يجوز للاب و الام اجبار البنت علي الزواج من شخص هي مش عايزاه , حتي لو هما شايفينه كويس وزي الفل .

 

و في نص الحديث , ان الأيم (مطلقة او ارملة) لازم تنطق ببقها انها موافقة , اما البكر (الآنسة) فممكن يُكتفي بصمتها , ولكن بشرط انها تكون موافقة , علي اعتبار ان البكر ممكن تكون اكتر خجل من الأيم , فممكن تكون موافقة بس مش عارفة تقولها .

 

لكن في كل الاحوال ممنوع تماما اجبار اي بنت علي الزواج من شخص هي مش طايقاه .

 

فابوكي و امك بيعملو جريمة لو اجبروكي علي الزواج , وانتي لو بالفعل مش طايقاه , اقفلي الباب فورا , ومتسمحيش ليهم بالضغط عليكي  . .

 

ده شئ مفيهوش كسوف او احراج , لو مش عايزاه يبقي مفيش جواز , لانك لو وافقتي يبقي لازم تكملي المشوار للاخر , ومتفتحيش سيرة الطلاق .

 

-----------------------------------------------------------------------------------

 

نيجي بقي للنقطة الخطيرة .

 

انك اتكلمتي مع صاحبنا الاولاني  . .

 

و هنا بداية المشكلة  , واللي لازم تنتهي من هنا .

 

والحقيقة ان فيه 3 اسباب خطيرة , بتمنعك تماما انك تتكلمي معاه .

 

اولا ان اصلا الكلام والتواصل مع اي شاب , ومفيش نية للخطوبة و الزواج هي مشكلة كبيرة , وزي ما قلنا هي اللي بتسبب في هدم البيوت .

 

فما بالك بقي لما يكون الشاب ده في الاصل فيه اعجاب و حب متبادل بينكم , فبيكون الكلام اكثر خطورة , واشد تأثير .

 

السبب التاني ان انتي لسة مخطوبة , و فيه بالفعل ارتباط مع شاب تاني .

 

و الكلام مع اخينا نوع من خيانة الامانة , حتي لو كان خطيبك و امك عارفين .

 

السبب التالت و المفزع , ان الشاب ده اصلا خاطب .

 

يعني هو علي وش جواز , وبداية علاقة بشكل صحي و سوي مع بنت , وانتي جاية بكل اصرار و بتهدي العلاقة ديه  .

 

ولازم تثقي ان هو لو كان  بالفعل عايزك من البداية , كان حارب عشانك , فانتي لازم تضعي كل شئ في نصابه , عشان متتعذبيش , وتعذبي الناس معاكي

 

هو ببساطة قرر انه يتخذ واحدة تانية شريكة لحياته , وديه مش نهاية العالم بالنسبة لك .

 

اكيد الأمر مؤلم , بس اتخاذ اي خطوة في سبيل تحقيق اللي في مزاجك هتكون عاقبته وخيمة

 

فالكلام معاه مرة تانية لا يعني الا انك عايزة تخربي البيت اللي هو عايز يبنيه, وفي نفس الوقت بتذلي نفسك بشكل كبير .

 

سواء قدام شخص هو بالفعل مش عايزك , او قدام خطيبه اللي مش هتعرف تشوفك الا انك "خطافة الرجالة" , او قدام اهلك اللي هيشوفوكي عديمة التربية .

 

وكون انه بيقولك انه بيحبك , ده دلالة علي ان تهورك هيوصلك لمساحة مظلمة , لان هو بيقول اه بيحبك بس هو مكمل مع خطيبته  , و غالبا هيتجوزها  .

 

فاستمرار التواصل المخزي بينكم بالشكل ده , هيفسد عليه حياته الزوجية الهادية , او الأسوء انه قد يدعوكي للحرام بعد الزواج , هل هتكوني سعيدة بالمصير ده ؟

 

صحيح من حقك رفض خطيبك الحالي , بس لا يجوز باي منطق او شرع او اي معايير اخلاقية سوية   , انك تتواصلي مع شخص علي وش جواز .

 

المولي تبارك و تعالي لما حذرنا من الفاحشة  في الآية 32 من سورة الإسراء (وَلَا تَقْرَبُوا الزِّنَا ۖ إِنَّهُ كَانَ فَاحِشَةً وَسَاءَ سَبِيلًا) . .

 

التحذير مكانش من الوقوع في الفاحشة نفسها  , لكن ان الشخص يقترب منه اساسا .

 

و فيه ايه اقتراب اكتر من ان واحدة تكلم شخص متزوج (باعتبار ما سيكون) , وهي بتحبه و هو بيحبها (او بيقول انه بيحبها) .

 

هل فيه اقتراب اكتر من انهم يكونو علي اتصال بعد جوازه , و انه بالطبع  هيقابل مع زوجته المشاكل المعتادة بين اي ازواج .

 

وقتها الشيطان هيكون اقرب ما يكون ليكو , في دفعكم لمساحة متتخيليهاش في كوابيسك .

 

وحتي ان موصلتش المأساة لهذه الدرجة , فاصلا الاتصال بينك و بينه محرم تماما  , وغير مقبول علي الاطلاق .

 

 

 

سيبي خطيبك لو عايزة .

 

بس  توقفي عن التواصل مع الشاب الاول , لانه مش نصيبك .