العنوان : الابتعاد عن الناس
القسم: #الاجتماعي
الرقم: 20
السؤال:
السلام عليكم ورحمة الله وبركاته كل اللي بيتعاملوا معي من معارف واقارب بيقربو فتره وبعد ذالك بيقطعوا المعامله او بعد ما يعرفعوا حياتي ماشيه ازاي
بس انا عندي مشكله اني لو حد ظلمني ظلم في كسر مش بقدر انسي او اسمحوا ونهائي
وعيبي اني بعيد في الماضي او اي شي كسرني ايه الحل وايه سبب نفورهم مني وكيفية التعامل
وهل الخطأ مني ام غيره منهم وهم ستات ولكن الاقارب او المعارف الرجال بيعجبوا بشخصيتي جدا
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
وعليكم السلام و رحمة الله . .
في البداية فيه لغز انتي طرحتيه ,من غير ما تجاوبي عنه ,وهو جملة "بعد ما بيعرفو حياتي ماشية ازاي" . .
الكلام مش مفهوم , ومش قادرين نحدد او نستنتج قصدك بيه ايه , وبالتالي هنتجاهل النقطة ديه مؤقتا . .
مشكلتك تتلخص في 3 نقاط اساسية :
-
انقطاع معاملة الجميع عنك
-
عدم قدرتك علي مسامحة او نسيان اللي ظلمك
-
اجترار احزان الماضي
وسؤالك العام , ده غلطي ولا غلطهم , وازاي اتعامل معاهم ؟ ؟
------------------------------------------------------------------------------
وغالبا هتلاقي النقط التلاتة مرتبطين ببعض , وان علاج الاولي هيساهم بمقدار كبير في حل الاتنين التانيين . .
لو هنبدأ باول نقطة , والمتعلقة بانقطاع معاملة الجميع معاكي بعد فترة من التعامل . .
و الحقيق لما بيحصل نوع من انقطاع العلاقة بين شخص و شخص , او شخص و اتنين او تلاتة , فممكن يكون المشكلة او الخطأ من الطرف ده او من الطرف ده . .
لكن لما يكون فيه اجماع من اغلب اللي تعاملو معاكي علي انهاء العلاقة , فدماغنا بتروح لواحد من تفسيرين , والتفسيرين كلاهما مش في صالحك للاسف . .
اما ان الغلط من عندك انتي بالفعل , وفيه شئ جعل الجميع يتوقف عن التعامل معاكي . .
او ان انتي فسرتي عدم تعاملهم معاكي علي انه انقطاع , في حين ان مفيش انقطاع عن عمد , قد ما هو انشغال من الناس . .
و كأن النقطة الاولي معناها ان فيه مشكلة بالفعل من طرفك , والنقطة التانية معناها ان مفيش مشكلة في الاساس لكن انتي فسرتي الأمر بشكل غير دقيق . .
النقطة الاولي مش اضطراب نفسي في حد ذاتها , الا لو كان المتسبب فيها مشكلة محددة , بينما النقطة التانية ممكن تكون بدايات "النمط الإضطهادي" , واللي بيكون احد فروع "الإضطراب التوهمي"
محدش يقدر يحدد هل فلان عنده اضطراب الإضطهاد ولا لا , من مجرد شرح في رسالة علي الفيسبوك , وانا لما بقول بدايات فلا اعني انك مصابة بيه بالفعل , لكن انتي في اول الطريق . .
سامحيني علي الكلام الصريح الصادم , بس لازم احيانا الشخص يحس ان فيه مشكلة حقيقية عشان يتحرك و يتعالج . .
ولأننا معندناش معلومات عن ايه اللي حصل , او ايه ملابسات اي موقف من المواقف , او ايه تفسير انقطاع الناس , فمعندناش اكتر من اننا نقولك نصايح عامة , ويارب يكون ليها تأثير ايجابي . .
وهنتناول الاحتمال الاول (ان فيه مشاكل بالفعل عندك ولازم تتعالج) , عشان نشوف نحلها ازاي . .
لازم يكون فيه تقييم كامل و موضوعي لشخصك , عشان تحطي ايدك بالفعل علي اي مشكلة موجودة , سواء في التعامل ,او سوء الفهم , او العصبية ,او الحدة و هكذا . .
-----------------------------------------------------------------------------
ولو اتعرفتي علي ناس جدد , مكانوش يعرفوكي قبل ما تتغيري , فمتفتحيش السيرة ديه اصلا , ومتقوليش طبعا انا كنت كذا و اتغيرت
-----------------------------------------------------------------------
طب ماذا عن الاحتمال التاني , ان مفيش انقطاع او كراهية حقيقية , لكن انتي "مكبرة" الموضوع شوية ؟ ؟
ده غالبا هتقدر تحدديه لما تعملي اول خطوة "التقييم" واللي هيبان منها ان الجميع بيقولك ان مفيش عندك مشكلة ولا حاجة , انتي بس اللي مزوداها شوية. .
فده هيأكد ان مفيش عندك عيب معين محتاج يتصلح ,لكن انتي بس اللي محتاجة تعملي تغيير في نظرتك للموقف كله . .
زي ما قلنا انتي معندكيش "نمط الاضطهاد" بس اخشي انك ممكن تكوني في الطريق اليه , وده كهف واسع مظلم , اللي بيدخل فيه صعب انه يخرج منه . .
فلو حسيتي بنوع من اعراضه , يبقي لازم تستشري طبيب نفسي متخصص فورا , لان "اضطراب الاضطهاد" مش هيتعالج بمقال علي الفيس بوك ,او نصيحة من صديقة , الا لو كنتي في بداياته البسيطة مش في اعماقه
و كمان ده هيحل جزء من مشكلة "التفكير المستمر في الماضي" , واللي غالبا الشخص بيروحله كنوع من الهروب من الواقع . .
ابدئي بعمل حل للمشكلة بشكل تدريجي , وان شاء الله تلاقي تغيير قريب