العنوان : كلام الناس

القسم: #النفسي

الرقم: 84

السؤال:

 

السلام عليكم.....

 

انا مشكلتي حاجات كتير بس اللي مأزمني حاليا ومحتاجاله حل ويكون سهل يتنفذ قلة الثقة بالنفس انا ثقتي بنفسي صفر وفهمت الأسباب لما كبرت بس معرفتش احل المشكلة مترددة

 

ومشكلتي الحقيقة اني مبعرفش أصر علي الرأي اللي شيفاه صح خصوصا اني ام لطفلين اعتمادي الكلي علي رضاي عن نفسي جي من الناس كلامهم تعليقاتهم رضاهم عني مبعرفش ارد في اي موقف مضايقني وبشك في نفسي وتصرفاتي قبل اي حاجة

 

أتعرضت  مؤخرا للتعامل اكتر مع الناس وبحس ان كل تجاربي فاشلة كل علاقاتي مش برضي عنها ونفسي ابعد عن كل الناس كل اللي نفسي فيه شوية ثقة في النفس تشيل احساس الدونية البشع اللي عندي

 

عندي مشكلة بشعة في ان اخد قرار واستمر عليه او انفذه مش عارفة دة زهق بسرعة ولا مشكلة ممكن تتعالج

 

بتفرج علي شخص لما يقرر حاجة وينفذها بكل بساطة ميهموش اي حد او مترجعوش اي مشاعر سلبية انا حتي الصلاة بقالي عشرين سنة بعاني بجد ومش عارفة التزم فيها ملوش علاقة بالموضوع بس دة امر مضايقني وتاعبني

 

نفسي اتغير انا تعبانة وبعاني مع ان ربنا محاوطني بنعمه من كل حتة بس انا مدمرة من جوة

 

عاطفية ورومانسية بشكل بشع متعب ومؤذي وأذاني كتير جدا

 

التفكير الكتير اوي اللي ملوش لازمة بحس بدماغي حطق واني عايزة اخبطها في حيطة من كتر التفكير اللي غالبا مؤذي وسلبي

 

مش عارفه ده من ايه . بس من وانا صغيرة و امي كانت بنفس النظام انها مهتمة جدا الناس تقول عليها ايه و احنا اتربينا علي نفس الكلام

 

اتمني الاقي إجابة او حل

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله . .

 

انتي اتكلمتي علي نقط كتير , لكن ممكن نجمعها في تلات  نقط بالتحديد , وهي :

 

• الثقة بالنفس

• كلام الناس

• الإحساس بالنقص

 

ومن الواضح ان المسؤول الأول عن المآسي الموجودة عندك , هو الأسلوب الغير صحيح اللي والدتك تعاملت معاكي بيه , أسلوب التربية الغير سليم ده , هو اللي زرع عندك المشاكل ديه  , وهو اللي عمل تشكيل و صياغة كاملة لها في عقلك الباطن .

 

مش بقول كدة عشان تغضبي منها , لكن عشان تتجنبي تكرار نفس الأزمة مع أطفالك , لأنك ممكن لا شعوريا تزرعي جواهم نفس الأزمات اللي عندك , لو انتي عاملتيهم بأسلوب غير سليم . .

 

 

نبدأ بالثقة بالنفس .

 

احنا اتكلمنا عنها بالفعل في أكتر من رسالة قبل كدة ,  والكلام عنها بيطول . .

 

لكن ممكن نلخص ان الثقة بالنفس , محتاجة انك يكون عندك من جواكي اطمئنان كامل لامكانياتك و قدراتك , اطمئنانك ده معناه انك واثقة بنفسك , وعدم اطمئنانك معناها انهيار ثقتك بنفسك . .

 

فانتي مجرد انك تطمني لامكانياتك و قدراتك الحقيقية  , وتعرفي هي ايه بالتحديد , وكمان ميكونش عندك اهتمام ايجابي او سلبي برأي الناس فيها , فانتي كدة عندك ثقة بالنفس . .

 

و العكس صحيح , لو انتي دايما قلقانة و خايفة و مش واثقة من امكانياتك , وكلمة توديكي و كلمة تجيبك , ورأي فلان يخليكي تحسي انك كويسة , ورأي فلانة يخليكي تحسي انك فاشلة , فانتي دلوقتي تفتقدي لأساسيات الثقة بالنفس .

 

وان كان مستحيل الحديث عن طرق علاج الثقة بالنفس في المكان المحدود ده , فيكفي اني نورتلك الطريق عشان تعرفي مفهوم الثقة بالنفس ,و انتي من جواكي حاولي تعيدي ضبط الدفة , عشان تكوني قادرة علي إعادة توجيه نفسك للاتجاه الصحيح

 

----------------------------------------------------------------------------------

 

نوصل للنقطة التانية وهي : كلام الناس  . .

 

و اللي هي زي ما وصفتيها من كلامك , انك مهتمة جدا برأي الناس فيكي , وانك بتشوفي قبل ما تعملي اي حاجة  , يا تري الناس هتقول عليها ايه . .

 

بل و بيصل الأمر ان قرارات كاملة بيتم اتخاذها او قرارات بيتم إلغاءها بس عشان الناس هتقول كذا كذا . .

 

والمشكلة ديه هي مش بسبب نقص الثقة بالنفس , لكن نقص الثقة بالنفس بتفاقم جدا من تأثيرها , و بتجعلها أقوي في التأثير و أعمق في المفعول .

 

و مش هنقدر نعمل فصل ما بين أسلوب والدتك في التعامل معاكي , و انها بتجعل كلام الناس دايما قدامها , وبين المشكلة الموجودة عندك , للأسف الأسلوب الغير سوي ده , هو اللي صنع عندك خط أحمر كبير اسمه : كلام الناس , واللي علي أساسه عملتي صياغة حياتك بالكامل , فمتعمليش خطوة من خطوات حياتك الا بقياسها علي كلام الناس و رأيهم فيها . .

 

و بقول كدة تاني , مش عشان تضايقي منها , لكن عشان متكرريش نفس التجربة المؤلمة مع أولادك , و ده اللي انتي ذكرتيه بالفعل في كلامك , واللي أخشي انك بتعمليه وانتي مش واخدة بالك , انك بتجعلي ولادك يتخذو نفس المسار الغير سليم في التفكير , وانهم هينشأو علي نفس الطريقة الغير صحيحة .

 

فلازم تبدأي إنك تبرمجي عقلك علي الاهتمام بالشئ اللي انتي شايفاه صح , مش اللي الناس شايفينه صح , اللي انتي عايزاه , مش اللي الناس عايزاه . .

 

متنسيش ان دايما رضا الناس غاية لا تُدرك , وانك مهما عملتي مش هتعرفي ترضي الناس ,ولو فاكرة قصة جحا و ابنه و الحمار , هتفهمي قصدي كويس . .

 

لابد من صناعة شخصية مستقلة داخلك بتنفذ الحاجات بناء علي معيار الصح و الغلط , مش علي معيار الناس هتقول ايه  . .

 

طب ماذا لو تعارض كلام الناس مع حاجة صح , هتنفذي انهي فيهم ؟

 

الأنبياء و الرسل لما كانو بيظهرو بدعوتهم , دايما كانو يواجهو بسخرية و استهزاء و حرب من اللي حواليهم , هل كان صح انهم يسمعو كلام الناس وقتها ؟

 

ابدئي عودي نفسك علي صناعة استقلالية في قراراتك , وإنك تصري عليها , وانك يكون ليكي شخصية قوية , بما لا يتعارض مع الدين و الشرع و العرف و المنطق , مش كلام الناس و رأيهم . .

 

---------------------------------------------------------------------------------------

 

النقطة التالتة :  الإحساس بالنقص . .

 

وديه احنا بالفعل عملنا ليها رسالة كاملة , في رسالة : الإحساس بالنقص

 

و ممكن نلخص الكلام فيها , ان الإحساس بالنقص , هو اللي بييجي لما الشخص يكون حاسس بالضيق الرهيب تجاه شئ معين فيه , غالبا بيكون شئ جسدي  .

 

سواء شكله , او لدغة , او حاجة في اسمه , او في اسرته , وهكذا , وده اللي بيخلي الشخص حاسس إنه أقل من اللي حواليه , ان هو معيوب , ان الناس بتبصله و تتريق  . .

 

ولما تفكري مرة تانية , هتلاقي ان الشئ اللي انتي حاسة بسببه بالنقص , هو متواجد و بكثرة عند ناس كتير , سواء عرب او اوروبيين , وكتير منهم متعايش تماما مع الحاجة ديه , بل واحيانا يكون فخور بيها . .

 

بعض الناس بتكون متضايقة و حاسة بالنقص من وزنها الزايد , في حين فيه اكتر من ممثل و ممثلة سواء عرب او امريكان , ووزنهم زايد جدا  . .

 

بعض الناس بيكونو متضايقين من لون بشرتهم الأسود , في حين المواطنين الأمريكان السود , فخورين جدا ببشرتهم , بل و بيعتبروها من أساسيات الجمال . .

 

و علي كدة قيسي اي شئ تاني , انك هتلاقي ان المشكلة مش في الحاجة نفسها , لكن انك مش متصالحة مع نفسك فيها , وانك مركزة عليها جدا , وانك شايفها عيب , في حين في الأصل هي شئ عادي مش سبب الأزمة زي ما انتي شايفة .

 

و بشكل ما , النقطة ديه مرتبطة بنقطة الثقة بالنفس , وكمان مرتبطة بكلام الناس , انتي عندك نقص في الثقة بالنفس , وكمان بتعملي الف حساب لكلام الناس , وبالتالي كل تقييمك لنفسك معتمد علي آراء الناس , اللي هي مستحيل تكون منضبطة أو عقلانية , فهتظلي في الأزمة ديه للأبد . .

 

الحل انك تكسري القيود الوهمية ديه , وانك تعيدي صياغة طريقة تفكيرك و نظام تعاملك مع الناس . .

 

----------------------------------------------------------------------------------

 

طيب و الحل ؟ ؟

 

هنقولك هنا عدد من النصايح , اللي لو مشيتي عليها هيكون لها اثر ايجابي ان شاء الله . .

 

• لابد تبدأي بحل مشكلة الثقة بالنفس , وهو شئ ليه حلول و طرق و خطوات , ولو بحثتي علي الفيسبوك او يوتيوب , هتلاقي عشرات الطرق الناجحة , اللي محتاجة منك صبر و اهتمام

 

• لازم تعيدي صياغة عقلك عشان يكون اهتمامك بكلام الناس في الحد الأدني , ويكون أقصي حاجة لمجرد النصيحة , مش التوجيه او الأمر , لازم يكون عندك نوع من كسر كلام الناس لما تعرفي ان اللي انتي بتعمليه شئ صح , ساعتها اعملي الشئ الصح ده , وسيبك تماما من كلام الناس

​

• اياكي تربي ابنائك بنفس الأسلوب الغير سليم اللي انتي للأسف اتربيتي عليه , لازم تزرعي داخل أولادك إن البوصلة اللي يمشو عليها هي الحق و العدل و الدين , مش رأي الناس فيهم , الكلام ده يا فندم يكون عملي مش نظري , يعني يشوفو مواقف عملية تطبيقية للكلام ده , مش مجرد كلام في الهوا

​

• ابدئي حلي مشكلة الإحساس بالنقص اللي عندك , اعملي تصالح مع وزنك + مع جمالك اللي انتي مش راضية عنه + مع أي شئ تاني انتي بتظني انه عيب فيكي , اعرفي ان معيار التقييم السليم هو بحسن المعاملة و صفاء القلب , (إِنَّ أَكْرَمَكُمْ عِندَ اللَّهِ أَتْقَاكُمْ) , طالما انتي ماشية علي طريق الله سيبك من اي حاجة تاني

​

• توقفي عن الشك الداخلي اللي انتي بتعذبي بيه نفسك و أولادك  , ارحمي نفسك من العذاب المستمر ده , و تعاملي مع الأمور بشكل سليم

​

• لازم تتوقفي عن كتر التفكير في الجوانب السلبية , انتي بتقولي انك من كتر التفكير بتكوني هتتجنني و بتضربي راسك في الحيط , ديه مصيبة , انتي حاليا في بداية طريق المرض النفسي , ولازم تعملي تنفيس للتوتر اللي عندك , وتتوقفي عن كتر التفكير بالشكل السلبي ده

​

• ابدأي التزمي بالصلاة , وخليها أولوية عندك , حافظي علي الصلوات حتي لو كانت متأخرة , حتي لو من غير خشوع , اعرفي ان الصلاة هي بداية اصلاح مشاكل حياتك المختلفة

​​

• توقفي عن الجدال مع الناس , كتر الجدال – خاصة مع الناس اللي مش بتفهم – هيفاقم من مشاكلك , وانتي مش ناقصة قلق , ارحمي نفسك و سيبي كل واحد مقتنع برأيه , بس طبعا بالتوازي متخليش حد يفرض عليكي رأيه , يعني ايوة متجادليش بس متخليش حد يفرض عليكي رأيه , مالم يكون كلامه صح وانتي غلط

​

• اتعودي تقولي لأ , اتعودي يكون عندك رأي مستقل , تكون قرارات حياتك بناء علي معيار الصح و الغلط , مش معيار رأي الناس , الاستثناء الوحيد هو مع زوجك و والدك و والدتك , اللي عصيانهم فيه ذنب كبير