العنوان : موهبة مدفونة

القسم: #النفسي

الرقم: 15

السؤال:

 

انا اسمي -----  وعندي 16 سنه وفي 2ث ووالدي ووالدتي منفصلين

 

وقبل الفتره دي كانت مامتي مشغولة جدا وكنت عايشة في بيت خالي

 

والدي لما اتجوز ووالدتي اتجوزت والاتنين خلفو

 

كان نفسي جدا يكون ليا اخت أو اخ كبير اتكلم معاها واحكيلها كل حاجه وتفهمني وافهمها لان محدش كان فاضيلي

 

اتعرفت ع بنت , وهي موهوبه بتعرف ترسم كويس جدا وبتعزف ع الاورج كويس جدا

 

البنت دي عندها محدش مهتم بيها في اسرتها خالص ودائما اخوها بيزعقلها والدها ووالدتها مش مهتمين بيها ولا بنفسيتها 

 

المهم والدها دايما بيزعقلها ع كل حاجه هي بتعملها مع انها محترمه جدا جدا والاسره كلها يعتبر بيحبطوها في رسمها وعزفها وبيقولولها أنها كلام فاضي وهي عايزه تدخل كلية فنون وكده

 

المهم هي شخصيتها أنها بتخاف من الناس ومبتحبش تتكلم مع حد كتير  ولما بتتكلم مع حد شويه بتحس أنها  بتزهق منه وكده شايفه الناس زي بعضها بتحب تكون لوحدها معندهاش ثقه في نفسها اوي وكده

 

وكمان مبتحبش تهتم بحد نهائيا ولا بتحب حتى حد يهتم بيها ويحبها لانها عارفه أن شخصيتها مش اي حد ممكن يتقبلها

 

السؤال بقا انا اطلعها ازاي من الجو اللي هي في ده وهل هقدر اعوضها عن اللي اهلها بيعملوه فيها وتخليها تثق في نفسها وتحب الناس وتهتم باللي بيحبوها وتتقبل الاهتمام من الناس وكده ....انا نفسي اساعدها لاني بحبها جدا وبعتبرها زي اختي الكبيره بالظبط ونفسي تتغير

 

-*-*-*-*-*-*-*-*-*-*-*-*-*-*-*-*-*-*-*-*-

 

الإجابة                    :

 

 

سؤالك فيه نقطتين بالتحديد . .

 

النقطة الواضحة في السؤال , وهي ازاي تساعدي صديقتك , وتنتشليها من حالة الإحباط اللي هي بتعاني منها . .

 

والنقطة المختفية شوية , واللي انتي مذكرتيهاش هنا  وهي المتعلقة بحالتك انتي , وهو معاناتك من عدم اهتمام اسرتك بيكي . .

 

تعالي نبدأ بالأولي . .

 

كنا عملنا سؤال تفصيلي قبل كدة عن اكتشاف المواهب عند الاطفال , فهيتم ارفاقه في اخر الرسالة , هو مش متطابق مع حالتها لكن هيفيدك شوية . .

 

بس اللي يهمنا نقوله هنا بالنسبة لحالتها , ان عشان تساعديها , ممكن تعملي عدد من الخطوات . .

 

• أولا تبدي لها رأي حقيقي و ايجابي في المواهب اللي عندها , سواء رسم او موسيقي , و يكون الرأي بيجمع بين الموضوعية (مش مجاملة)  , و التشجيع . .

 

و طبعا  من الصعب جمع النقطتين مع بعض , بس مش مستحيل  . .

 

غالبا ده بيحتاج فن في صياغة الكلام نفسه , عشان تقدري تجمعي الصفتين مع بعض . .

 

عشان انتي ان تخليتي عن الشرط الاول (يكون الكلام مش موضوعي) فانتي بتعمليلها تضليل , وممكن يترفع سقف طموحاتها بشكل كبير , فتفاجئ من متخصصين ان موهبتها مش كما تتوقع  . .

 

ولو انتي تخليتي عن الشرط التاني (يكون مفيش تشجيع) فهيكون الكلام محبط جدا , وهتجعليها  تسيب المجال . .

 

فانتي عليكي فن انك تصيغي الكلام باسلوب يجمع بين الصفتين . .

 

 

• النقطة التانية انك تساعديها علي صقل موهبتها , مفيش موهبة في الدنيا بيتم تنميتها من الفراغ , ولا حتي من الممارسة بس , لازم تتعلم و تتدرب بشكل اكاديمي , او في مكان متخصص , عشان يتطور أدائها و تبقي ماشية في الاتجاه الصح  . .

 

ولو هي حاسة ان اهلها هيرفضو ذهابها لمكان متخصص لده , يبقي تستعين باليوتيوب وهتلاقي عليه مئات الدروس المتخصصة اللي بتشرح كل المواهب . .

 

• يفضل في المستقبل تتواصل مع محترفين , عشان تقيم شغلها , وتشوف موهبتها موجودة بالفعل ولا خواطر و بس , لكن الافضل تأجل الخطوة ديه لبعد ما تطور نفسها , وتتدرب كويس , عشان يكون تقييم الخبير ليها ايجابي الي حد ما

 

• لازم تنظم وقتها بين موهبتها ودراستها العادية , لانها لو اعتمدت بس علي موهبتها هتبقي مشكلة كبيرة , والعزف والرسم من المجالات اللي مش بتلقي قبول من الاهل و الاسرة , خاصة مع ابوها الغير متفهم

 

فهي لازم تواظب علي تفوقها الدراسي , عشان يكون فيه قناعة من الأهل ان "الهبل" اللي هي بتعمله من وجهة نظرهم , مش بيضيع وقتها ولا بيشغلها عن الدراسة , بينما لو هي فشلت و جابت درجات اقل من المطلوب , فاول شئ هيبهدلوها عليه هو "الكلام الفاضي" اللي بتعمله .

 

• خليها تشارك في فعاليات او مهرجانات او معارض , سواء باعمال او انها بس تحضر , الحاجات ديه بتفيد كتير

 

• لازم هي تقتنع ان عداء ابوها  و امها لموهبتها , مش نابع عن كراهيتهم ليها , لكن عن رؤيتهم ان ده كلام فاضي , فلازم من ناحية متضايقش منهم , ومن ناحية تثبت لهم انها متفوقة زي ما قلنا في النقطة رقم 4

 

• انتي ذكرتي انها بتخاف من الناس و مش بتحب تتكلم مع حد , وده غلط , لازم تبقي اجتماعية اكتر , يكون ليها عدد من الصديقات , اللي ليهم مستوي معين من الدين و الخلق و المعاملة الكويسة

 

 

---------------------------------------------------------------------------

 

طيب  ماذا عنك انتي ؟ ؟

 

صحيح انك مذكرتيش صراحة انك محتاجة مساعدة , لكن خلينا نقولك عدد من النصايح ويارب تكون مفيدة ليكي . .

 

• اولا انتي سنك 16  , وهو في عنفوان مرحلة المراهقة , ولاحظي ان السن ده بيكون شديد الحساسية بشكل عام , وبتمري بتغييرات كتير في حالتك النفسية و المزاجية

 

• انتي مريتي بعدد من من الضربات الاسرية المتتالية , طلاق ابويكي , انشغال والدتك عنك , زواج كلا من ابيكي و امك و انشغالهم بابنائهم  , المعاملة السخيفة من جميع افراد اسرتك . .

 

بس انتي بذكاءك و فطنتك , ممكن تكوني حبيبة الاسرة كلها , لانك انتي اكبر اخواتك من ناحية الوالد و الوالدة , وبالتالي بتعامُلك الجميل مع اخواتك من هنا و من هنا  , وحنانك عليهم و رعايتك ليهم , هتجدي ان كلا من ابيكي , وامك , وزوجة ابيكي  , وزوج امك , و جميع اخواتك , هيحبوكي محبة كبيرة . .

 

و صدقيني ان المحبة شعور متبادل , حتي و ان كان (زوجة ابيكي  , وزوج امك) بيعاملوكي بنوع من الجفاء حاليا , لكن باهتمامك و حبك لاخواتك من الطرفين , هتأسري قلوبهم فورا , وهتلاقي ان كلا من الطرفين بينتظرو لقائاتك معاهم . .

 

ابدئي انتي و متنتظريش حد يقولك . .

 

• اياكي و الفراغ , انشغالك باشياء مهمة و مفيدة , هو اول طريق النجاح  , و فراغك هو اول طريق المشاكل المستمرة . .

 

يعني من ناحية ركزي جدا في مذاكرتك , عشان تجعلي كل افراد اسرتك فخور بيكي . .

 

و من ناحية في وقت فراغك , انشغلي بحاجات تفيدك , اشتركي في مكتبة قريبة منك , اشتركي في كورسات انجليزي , مشاهدة افلام وثائقية , حفظ القرآن في المسجد , التواصل مع جمعيات خيرية , او ملاجي ايتام للتطوع معاهم , اعملي زيارات مستمرة لاهلك و اقاربك في كل مكان . .

 

 

المهم متبقيش فاضية , عشان متسيبيش مدخل للشيطان , و متوجعيش قلبك بالكلام الفاضي   . .

 

• ان كان ملكيش اخت كبيرة تسمعلك , و الوالدة مشغولة عنك , فممكن تشوفي صديقة قريبة منك , بس المهم تكون صاحبة دين و خلق , وتكون من اسرة محترمة , واتكلمي معاها في اللي انتي عايزاه (من غير اخراج اسرار البيت) , واستشيريها , وهتفيدك اكيد . .

 

• واظبي علي التمسك بالدين و الخلق والصلاة و الدعاء , وثقي ان ربنا هينير لك الطريق . .