مش عارفة هي مشكلة ابني بس ولا الجيل كله كدة

ابني عنده 9 سنين و بيتعامل معايا باسلوب عنيف و سخيف فعلا يندهلي بأسمي عادي حتي قدام الناس يكلمني بقرف كدة شوية يزعق فيا لو سألته علي المذاكرة او يسيب التاب عشان ينام

ولما اكلم جوزي يقولي كل العيال كدة ولما يكبر هيعقل

اعمل ايه فيه عشان تعبت

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

 

كالعادة الإجابة مش هتكون مبسطة او سهلة , لأن المشكلة أساسا مش سهلة . .

 

فيه بعض المعلومات كان يهمنا نعرفها عشان نقدر نقيم الموقف بشكل مناسب , وأهمها نقطتين رئيسيتين .

 

أولا مصادر معرفته , ثانيا تعامل زوجك معاكي قدامه عامل ازاي

 

نتكلم عن النقطة الأولي , مصادر المعرفة , واللي محتاجة شوية تفسير , يعني ايه اصلا مصادر المعرفة للطفل ؟

 

مصادر المعرفة هي أشبه بالبوابات , اللي منها الشخص (أو الطفل) بيتعامل مع الحياة و الأشخاص

 

احنا كبالغين , عندنا عدد متنوع من مصادر المعرفة , اصدقاء , اقارب , كتب بنقراها , تليفزيون بنشوفه , بوستات من صفحات و جروبات و افراد بينشرو كلام معين , جرايد , راديو , افلام سينما , دور العبادة ورجال الدين , رجال السياسة اللي بنسمعلهم , و هكذا . .

 

الحاجات ديه كلها بتشكل لكل شخص قناعاته و قراراته و افكاره و معتقداته , وعلي أساسها بيتخذ قراراته و تسير حياته

 

بالنسبة للطفل مصادره بتكون محدودة شوية , و كلما كان سنه اصغر كلما كانت مصادره أقل

 

فيهمنا انك تتعرفي عن قرب لعدد من مصادر المعرفة لابنك , واللي بتأثر عليه بقوة وهي (اصدقائه , المدرسين , محتوي اللي بيشوفه علي التاب او الموبايل , ما يقرأه )

 

مجموع التأثير من النقط اللي قلناها حاليا , هي اللي بتتحكم في تصرفات ابنك , وبتجعل منه طفل برئ هادي و كيوت ,او دنجل زعيم العصابة بتاع قصص ميكي و بطوط . .

 

هي اللي بتزرع جواه رد الفعل المناسب اللي المفروض يقوله لوالدته لما تعاتبه علي حاجة او تزعق فيه , يا تري هيحط عينيه في الارض وهو بيلوم نفسه انه زعل مامته اللي بيحبها و بيخاف من زعلها , ولا هيتعامل معاها كعدو عايز ينكد عليه , وبالتالي لابد من مقاومتها بطريقة شرسة , ولا بأس من انه يشتمها بنفس الشتايم اللي بيمسعها من دائرة اصدقائه في المدرسة , عشان تحرم تعمل كدة تاني . .

 

فتشي يا فندم في دائرة معرفته , هتلاقي فورا المصدر , وممكن ميكونش شئ واحد باين , يعني مش هتلاقيه مصاحب طفل اسمه "زقرد" مضروب بشلة في وشه , وامه ممسوكة في قضية تزوير فلوس و محكوم عليها تأبيده . .

 

انتي غالبا هتلاقي علامات سلبية بسيطة من كذا حاجة جنب بعض , واللي مع بعض بتعمل تأثير تراكمي متدرج , واللي وصلته للشكل المخيف ده . .

 

----------------------------------------------------

 

نروح للنقطة التانية المهمة تعامل زوجك معاكي قدامه عامل ازاي

 

و كلامي بالتحديد علي اللي بيشوفه من تعاملاتكم مع بعض , واللي ممكن يكون مختلف شوية عن حقيقة تعاملاتكم

 

يعني لو الزوجين عندهم مقدار من الذكاء الاجتماعي , والوعي الكافي لفن تربية الأطفال , هيعرفو ان لازم لازم لازم اي مشاكل او اختلافات او نقاشات سواء حادة او غير حادة , لازم تكون بعيدة كل البعد عن الأطفال , من عمر سنتين لغاية عمر 20 سنة علي الأقل . .

 

الزوجين اللي فاهمين ده كويس , بيأجلو اي نقاشات حتي لو ودية و لطيفة و هادية , لغاية لما كل الاطفال ينامو , او يكونو مش في البيت , عشان يظل الأب و الأم دايما كلمة واحدة , رأي واحد , فكر واحد , قلب واحد قدام الأطفال

 

كمان الأب الذكي اللي يعامل الأم باحترام مبالغ فيه قدام الأطفال , عشان يزرع جواه ان ماما ديه أهم إنسان في الكون , وإن زعلها معناها ان السما هتتطربق علي الأرض , وطبعا العكس من الأم للأب . .

 

التكنيك ده , هو اللي يصنع طفل صحي نفسيا , و ناشئ بشكل قويم خلقيا , و عنده توازن بين حب أبويه , والخوف منهما , لا الحب وحده اللي يصنع دلع داخله ,ولا الخوف وحده اللي يصنع داخله عقد نفسية لن تعالج . .

 

فأنا أخشي أن يكون هناك نوع من عدم الاحترام في التعامل من زوجك ليكي قدام الطفل , ونوع من تسفيه رأيك او السخرية منه , او تجاهلك, او كسر كلامك , وعشرات السلوكيات السلبية , اللي بتصنع لدي الطفل تأثيرات مخيفة لن يمكن حلها علي المدي القريب . .

 

الطفل بيتعلم من أبوه ازاي يواجه الحياة , فلما طفل يجد أمه تعاتب ابيه علي شرب السجاير مثلا , فيبص الاب للأم نظره سخرية او احتقار و يقولها : وانتي مالك انتي , خليكي في حالك , فنفس الطفل ده لما أمه تقوله سيب التاب وقوم نام , هيقولها بس اسكتي وخليكي في حالك , ملكيش فيه . .

 

طفلك زي باقي الاطفال شديدي الذكاء , وعندهم قوة ملاحظة مذهلة , و ذاكرة حديدية , ونظرة متفحصة قادرة علي تمييز مشاعر الأب و هو بيكلم الأم , وبالتالي لما الأب و الأم يقدمو مشاكلهم علي طبق من فضة لأولادهم , يبقي يعرفو انهم بيصنعو منهم وحوش هتفترسهم فورا . .

 

ابحثي عن النقطتين دول : مصادر المعرفة , تعامل زوجك معاكي قدامه , هتلاقي الحل أكيد

​