العنوان : إكتشاف الموهبة

 

السلام عليكم و رحمة الله

ابني عنده 4 سنين , ونفسي امارس معاه الاسلوب العلمي لاكتشاف لو عنده مواهب معينة يعني زي ما بيعملو في مدارس اوروبا و امريكا , نفسي اكون فخورة بيه لما يكبر , ويكون عبقري في مجاله , و ميطلعش زي باقي الاطفال بنفس التفكير الروتيني العادي

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة :

 

وعليكم السلام و رحمة الله

 

أحييكي يا فندم علي الرغبة الجميلة ديه , وإنك عايزة ابنك يختلف عن باقي الأطفال , واللي للأسف آبائهم و أمهاتهم أقل وعي و إدراك لأهمية اللي انتي بتتكلمي عنه . .

 

بس عايز أحذرك ان الرغبة لوحدها غير كافية , و انها لابد تترجم لهمة و طولة بال , وصبر , ومجهود عليكي و علي ابوه , مصاريف و متابعة , لأن اكتشاف و تنمية المواهب زيها زي اي حاجة , محتاجة رعاية و صبر و تكاليف , والا كان الناس كلها عملتها بسهولة . .

 

كتير من الآباء و الأمهات قالو بالظبط نفس اللي قلتيه ,بس قلة قليلة منهم اللي كان عندهم الصبر و العزيمة انهم يكملو المشوار , والباقي – اللي مكملوش الطريق – انتهي الحال بابنائهم انهم في "مصانع" المدرسة , اللي بتخرج قوالب ممتازة , تدخل في مفرمة الحياة بلا رحمة . .

 

أرجو تكوني مختلفة عنهم , وتكملي المشوار للآخر . .

 

---------------------------------------------------------------------------

 

في البداية اكتشاف موهبة الطفل و تنميتها , يحتاج متخصص او مؤسسة مختصة بيها , مش صفحة علي الفيسبوك , فانا اللي هعمله انا هنورلك الطريق وانتي لازم تكملي معاهم . .

 

المواهب اللي هتكون موجودة في طفلك , لابد يكون ليها اساس , والأساس ده هيعتمد علي واحد من أنواع الذكاء عند الإنسان . .

 

أنواع الذكاء ؟ ؟ هو فيه حاجة اسمها للذكاء أنواع ؟ ؟

 

طبعا . الذكاء مش ان حد يحل مسألة معادلات تفاضلية من الدرجة التانية , ولا انك يكون عارف عاصمة تشيلي , الذكاء ليه انواع مختلفة , و ليه تقسيمات متعددة . .

 

ومن أشهر التقسيمات , اللي عملها عالم النفس الأمريكي , هوارد جاردنر , لما قال ان فيه 9 انواع مختلفة من الذكاء , وهما :

 

• الذكاء الطبيعي : المتعلق بالتعامل الذكي مع معطيات الحياة , القراءة , المذاكرة 

• الذكاء السماعي : تتبعه الإيقاع و الاصوات والموسيقي و الالحان و المقامات و تجويد القرآن

• الذكاء الرياضي والمنطقي : متعلق بالعمليات الرياضية و الحسابية بالتحديد

• الذكاء الوجودي : متعلق أكثر بالتساؤل الفلسفي عن وجودنا في الحياة و الغرض و هكذا 

• الذكاء العاطفي : المتعلق بالاحساس بمشاعر الآخرين , و تعاطفه معهم 

• الذكاء الجسدي والحركي : بالسيطرة علي جسده التحكم فيه 

• الذكاء اللغوي : الخطابة و لباقة الحوار و الارتجال و كتابة الشعر و الروايات و المقالات

• الذكاء الداخلي : فهم ذاته و تحليلها و حسن التعامل معها و القيام من اي كبوات نفسية 

• الذكاء المكاني : احساسه بالمكان و الاتجاهات و الخرائط و الرؤية البصرية

 

​

​

هتلاحظي إن تقريبا اي موهبة عايزين نكتشفها و ننميها عند الطفل , بتعتمد علي عدد من أنواع الذكاء اللي تم سردها هنا

 

يعني موهبة كرة القدم , محتاجة النوع السادس بشكل اساسي ,مضاف إليه النوع التاسع . .

لو هيكون أديب فلازم السابع و الخامس و التامن

لو هيكون مهندس عبقري , لازم التالت والسادس و التاسع

لو هيكون مدير و قائد فمحتاج الرابع والخامس و السابع

لو هيكون رسام هيحتاج اكيد النوع التاسع و الخامس , و غالبا التامن

كمان النوع الأول مطلوب تقريبا لكل نواحي الحياة . .

 

وهكذا , اي موهبة بيتم بناءها علي عدد من أنواع الذكاء ديه , واللي لازم الاول نعرف هو نقطة قوته ايه , عشان نساعده في اختيار موهبة تتناسب معاه

 

---------------------------------------------------------------------------

 

نروح بقي علي الخطوة اللي بعدها . .

 

ازاي اقيس ذكاء ابني في كل مجال من المجالات ديه . .

 

ديه حاجة مش هاعرف اجاوب عنها اونلاين ابدا , لأني بأكد إنها محتاجة مكان متخصص , اسهل حاجة عليا إني افتي في الموضوع و اقعد احكيلك حكايات و اقولك قصص هايلة هتعجبك , بس كدة هكون باشتغلك . .

 

اكتشاف ذكاء الطفل و تنميته عملية معقدة محتاجة ناس دارسين و فاهمين ده , صحيح إن أغلب الناس مش بتعرف تقول لا لأي سؤال يتسئلو فيه , بس احنا بنقول لا للي مش متخصصين فيه . .

 

احنا عارفين الطريق , بس مش متخصصين في الخطوات , الفرق كبير . .

 

حاولي تشوفي في المدينة اللي عايشة فيها لو فيه مكان متخصص ,او حد فاهم و عنده خبرة في المجال ده . .

 

لو ملقيتيش يبقي شوفي في الكتب بالانجليزي - لو انتي كويسة في اللغة – الموضوع مش عقدة خواجة لكن بالفعل احنا كعرب لسة بنحبي في المجال ده , وهما متخصصين عننا

 

لو ضعيفة في الانجليزي , يبقي خليكي في المواقع العربي , بس خدي بالك من (الفتي) اللي في كل حاجة . .

 

و هنا مجموعة من المواقع , اللي ممكن تفيدك بكتير من التفاصيل

​

 

 

 

​

 

 

​

وأنصحك متستخسريش فلوس او وقت او مجهود في الخطوة ديه , لان ده اهم استثمار هتعمليه في حياته , تستثمري فيه , وصدقيني ده اولي بكتير من انكم تدفعو مبالغ خيالية في مدارس لغات او انترناشونال , وهو في الآخر بيتعلم بنفس الاسلوب العقيم

 

---------------------------------------------------------------------------

 

كل اللي فات ده كان مرحلة اكتشاف الموهبة نفسها , بفرض وصلتي بالفعل و عرفتي موهبة ابنك , ازاي بقي ننمي الموهبة ديه ؟ ؟

 

عرفتي انه بارع في الرسم , او متفوق في الرياضة , او بيحب المجال الطبي , نعمل ايه بعدها . .

 

محتاجة أولا تحطي في بالك ان فيه احتمال كبير يكون الاختبار غير دقيق , او إن علامات الاهتمام او التفوق اللي أظهرها ابنك في مجال معين , ممكن تتغير بعد فترة . .

 

وده اللي لازم يجعل جواكي نوع من المرونة , لو لقيتيه بعد سنين غير شوية من مجاله ,او اتنقل لحاجة تانية خالص . .

 

عالمة الرياضيات الإيرانية الفذة مريم مرزاخاني , كانت عايزة تكون أديبة و هي صغيرة ,أحمد خالد توفيق كان هيموت و يكون مخرج , نجيب محفوظ كان حلمه يكون لاعب كرة قدم , حسين فهمي اصلا درس السينما كمخرج مش ممثل , هتلر كان نفسه يكون رسام , وده اللي يأكدلك ان نتيجة اختبارات الذكاء و المواهب ايا كانت كفائتها , ممكن تكون غير دقيقة , او ممكن الطفل نفسه يغير من اهتماماته لما يكبر , ديه حاجة طبيعي . .

 

وبالتالي لازم تكوني متابعاه اول بأول , و بيعمل إعادة لاختبارات أنواع الذكاء لما يكبر شوية , باسلوب يتناسب مع سنة طبعا , عشان نعرف هل هو مكمل في نفس الاختيار الاول ولا عنده اهتمام تاني . .

 

ولما تعرفي الاختيار الخاص بيه , تبدأي مراحل تدريجية هادئة لتنميتها , حذار من التسرع , او الضغط النفسي عليه , او إنه يحس إن ده واجب عليه و شئ ملزم , والا هتتقتل جواه شفغه بيها , و حبه لها ,و تتحول لنوع من الواجب المنزلي اللي بيعاني منه . .

 

يتم التعامل معها علي إنها تسلية يعملها وهو مستمتع بيها بلا ضغط أو محاسبة عليها . .

 

فلو هو موهبته يبقي أديب , هاتيله بداية القصص اللي بيحبها عشان يقراها , حتي لو كانت هايفة , خدي بالك انك هتمنعي عنه القصص ذات المحتوي السلبي او الرسائل اللي تتعارض مع ديننا و قيمنا , بس لو كانت مفيهاش ضرر حتي لو هايفة هاتيها . .

 

بعدها خليه يبدأ يألف من دماغه , من غير ما يكتب حاجة , الكتابة مملة , لكن يحكيلك , او حتي يصيغ حاجة هو قراها بالفعل , او يعمل معالجة لشئ قراه في الجرنان مثلا . .

 

من الوسائل الجميلة لتنمية موهبته (سواء في الادب او غيره) انك تحطيله مجموعة من القيود البسيطة , اللي غالبا بتسهله العملية , يعني قوليله عايزاك تألف قصة , يكون فيها طفل عنيد , وام مهملة , وظابط بوليس , وعربية اسعاف , و شنطة فلوس . .

 

مجموعة القيود ديه , علي الرغم من ان ظاهرها انها بتصعب العملية , إلا إن هي بتخلي الموضوع اسهل كتير عليه , لان بقي عنده اساس يبني عليه القصة , و هتكون اسهل عليه ما تقوليله : (عايزة قصة عن طفل ) العموم ده بيجعل الموضوع مرهق أكثر . .

 

لو هو بيحب الفك و التركيب و الاختراعات , فسهل تخليه يمارس هوايته بشكل آمن و من غير ضرر , هاتي تليفزيون مستعمل او تالف , وخليه يفكه , ويركز جدا في كل حتة مكانها فين , و بعدها يرجعه تاني مكانه , هاتي عربية لعبة صغيرة , يفكها حتة حتة , ويرجعها تاني و يخليها تشتغل , وهكذا , فمن ناحية منقتلش موهبته في الفك و التركيب و ننمي فضوله العلمي , ومن ناحية منخليهوش يدمر اجهزة البيت . .

 

و يفضل تجنب انه يعمل مواجهة حقيقية وهو صغير مع متخصصين في المجال , يقابل ايوة متخصصين في الكشف عن الذكاء , لكن مش متخصصين في الموهبة نفسه . .

 

لانه لما يقعد مع بروفيسير في الرياضة , هيكتشف ان اللي بيحبه من بدايات الارقام بعيد شوية عن ارض الواقع , و ده قد يصيبه بنوع من الصدمة او الاحباط . .

 

كمان متخليهوش يمارس هوايته قدام الناس او في العلن دلوقتي , لو هو بيحب الرسم , وراح شارك برسوماته في معرض او مسابقة , وخسر , هتكون ضربة نفسية عميقة , قد تمنعه انه يكمل في المجال تاني , بينما هو كان محتاج سنين من التعلم و الخبرة , انتي كأمه او ابوه ممكن يجاملوه و يرفعو من روحه المعنوية ,لكن باقي الاقارب و الاصدقاء مش هيعملو ده , فالمواجهة تكون قدام خالص لما يحترف موهبته

 

لازم تفهموه ان وجود الموهبة مش مبرر عشان يسيب المذاكرة و المدرسة , و انه لازم يذاكر المواد "السخيفة" اللي مش بيحبها , عشان لما يكبر يعرف يتخصص في اللي بيحبه , وان وقت تطوير و تعلم الموهبة لازم يكون بحدود و ميطغاش علي اولويات تاني

الموضوع مش هيخلص , ومحتاج منك اهتمام و رعاية و بحث لا ينتهي

​

أخيرا لازم تقرأي رسالتين مهمين في نفس الإطار , الفضول و العقاب ,  و طمس الموهبة