العنوان : الرهاب الإجتماعي

القسم: #النفسي

الرقم: 96

السؤال:

  

السلام عليكم ورحمة الله وبركاته

 

انا عندي تدريب في مدرسة خلال ايام و المشكلة اني دايما عندي خوف من الكلام قدام اي مجموعة من الناس بحس بنوع من الرهبة و باتلغبط و مش باعرف اقول كلمتين علي بعض

 

احل حاجة زي كدة ازاي

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

وعليكم السلام و رحمة الله  , أهلا بيك يا سيدي  . .

 

عدد من الأعراض اللي ذكرتها تتشابه بشكل ما مع الإضطراب المشهور : الرهاب الإجتماعي Social anxiety disorder , واللي بيجعل الشخص من ناحية غير مستريح في التعامل او التواصل المكثف مع الآخرين , وكمان بيصاب بالقلق و التوتر و التلعثم لما يضطر إنه يواجه الناس , ويتكلم علي الملأ  . .

 

لكن محدش يقدر يأكد مدي تواجده عندك بالفعل من غير اختبارات يتم تطبيقها عليك , لأن وارد يكون اللي عندك هي مجموعة من الصفات الشخصية , اللي حصلت بعد سلسلة من المواقف السلبية اللي حصلت ايام الطفولة  , وبالتالي هي أقرب للسلوك الشخصي , منها الي الإضطراب النفسي . .

 

وفي كلا الحالتين , العلاج يكون محتاج شوية وقت , ممكن شهور طويلة لغاية لما الشخص يقدر يتجاوز المشكلة ديه , ويتعامل بتلقائية و بشكل طبيعي مع الناس .

 

و اللي هنحاول نعمله دلوقتي , اننا هنقولك علي عدد من النصايح والخطوات , واللي لو طبقتها هتعالج المشكلة  , او علي الأقل هتخفف من اثارها عليك , و هتعمل تغيير في كمية القلق و التوتر عندك , وتبدأ تتعامل بشكل تلقائي و طبيعي . .

 

 

• أولا ممكن تبص علي باقي المشاكل التانية اللي ممكن تكون بتعاني منها , صحيح ان القلق و التوتر ممكن ميكونش بسبب مشكلة تانية , لكن وجود مشكلة تانية عندك بالتوازي (زي مثلا مشكلة اجتماعية او مادية او اسرية ) , من الحاجات اللي بتأثر سلبا , وبتعمق المشكلة , و كمان علاج باقي المشاكل ديه بيساهم بمقدار كبير في علاج المشكلة الحالية

 

• لازم تزرع جواك الثقة بالنفس , الثقة بالنفس من النقاط شديدة الأهمية اللي لازم تتوافر عندك بكمية مناسبة , عشان تقدر تتغلب علي توتر التعامل مع الناس

 

• و علاج أزمة الثقة بالنفس بيبدأ إنك تتأكد و تطمن لقدراتك و إمكانياتك الشخصية , وتثق انك هتقدر تعمل الحاجة ديه , الثقة بالنفس ببساطة هي الإطمئنان لوجود قدراتك و إمكانياتك

 

• لازم تقاوم اي تواجد للعصبية في حياتك , العصبية مش سبب مباشر لمشكلة التوتر و القلق , بس هي بتزودها بمعدل كبير, وكلما كنت شخصية اقرب للهدوء و ابعد عن العصبية , كلما قدرت تتواصل مع الملأ بشكل ناجح و فعال

 

• لما تبدأ تحضر الكلام اللي هيتقال , متحضرش كلام كتير و نقط عديدة , فيه مثل بيقول : كثرة الكلام تنسي بعضه بعضا , فلما تحضر كلام كتير , كله هيتوه في بعضه , الافضل انك تحضر نقط محدودة و مرتبة و بسيطة , بحيث تكون في بالك

 

• ممكن تعمل تلخيص للنقط اللي هتتكلم عنها علي صورة نقط سريعة ورا بعض في ورقة صغيرة , مش تكتب سطور كاملة في الورقة عشان في وسط الحصة مش هتعرف تقرأ كل ده

 

• لو فيه امكانية انك متعملش الشرح متواصل 100 % , يعني مثلا تشرح لمدة 10 دقايق , بعدها تدي للطلبة سؤال يفكرو فيه لمدة دقيقتين , تشرح كمان 10 دقايق , بعدها تخلي طالب يقرأ من الكتاب و الطلاب بتسمع , لما تعمل التقسيمات ديه  ,انت كدة بتعمل لنفسك استراحة بسيطة في وسط الدرس , وده هيقلل توترك و يخليك مركز اكتر

 

• متتعاملش مع اي موقف علي اكبر من حجمه الطبيعي , في الاخر انت مش رايح تكلم ولي عهد بريطانيا , انت بتتكلم مع طلاب او مدرسين او موظفين , و بعضهم قد يكون بقدرات عقلية او علمية اقل منك , فلما تبص للموقف علي حقيقته , هتحس ان الامر اكتر بساطة , وانك مكبر الموضوع عن حجمه .

 

• ابدأ اتدرب علي النظر المباشر في عيون البشر , النظر الطويل المباشر "التقيل" , اللي هو عينك مش بتطرف و مش بتحول عينيك منهم , ابدأ درب نفسك علي ده في معاملات بسيطة تانية (مع اقاربك , مع أصدقاء , مع اطفال) , وجرب انك تبص لعين شخص لمدة دقيقتين مثلا من غير ما تصرف نظرك منه , شوية شوية هتتعود علي الأمر و هتقل الرهبة تدريجيا

 

• درب نفسك علي انك تكلم مجموعة من الناس , و ابدأ الأمر بإلقاء كلام مع ناس انت عارفهم كويس و مستريح ليهم (اقارب او اصحاب ) , يعني شوف مناسبة اجتماعية او جلسة عائلية , وافتح الكلام عن حاجة معينة, واتكلم عنها لمدة 5 دقايق كاملة , لما تعود نفسك علي ده كذا مرة , هتلاقي ان الكلام مع الناس الغريبة بقي اسهل شوية

 

• اتدرب علي توزيع النظرات لمجموعة من الناس لما تتكلم , افتح اليوتيوب وشوفي محاضرات Ted وشوف المحاضرين ازاي بيتكلمو وسط مجموع كبير من الناس , راقب تصرفاتهم و عينيهم و حركة اجسادهم , وهتلاقي ان الموضوع يسهل الوصول ليه

 

• اتدرب علي الارتجال , اللي هو انك تتفاجئ بسؤال معين او موضوع مش محضره و تتكلم فيه فورا , الموضوع برضه سهل مش صعب بس محتاج تدريب , اقعدي مع 5 من اصحابك , و اطلب منهم يختارو موضوع فورا , وانت عندك نص دقيقة عشان تفكر فيه , وبعدها تبدأ فورا تتكلم فيه , واحدة واحدة هتلاقي الأمر مقدور عليه

 

• اتدرب علي النقاش و الجدال و صد اي كلام مفاجئ ممكن يجيلك , من طالب او مدرس او موظف , و ده عن طريق برضه انك بين اصحابك , تطلب منهم يتبنو وجهة نظر معينة ( ان الطفل مينفعش يقعد كتير علي التليفيزيون) , وانت تتبني وجهة نظر العكس تماما , وتبدأو تتناقشو و انت تبذلي كل جهدك عشان تصيغ قناعات و جمل سليمة , وترد علي وجهات نظرهم

 

• حاول تنام كويس قبل الشغل , وتبعد عن اي منبهات بتعمل ليك تشتيت او تزود القلق او التوتر

 

• عود نفسك انك تتكلم ببطئ بشكل عام في حياتك , تجنب الكلام بسرعة بشكل عام , لأن الاستعجال في الكلام بيستبب غالبا في المزيد من التوتر و القلق

 

 

 النصايح كتير , هي بس محتاجة منك تركيز و طولة بال و صبر في التعامل , و ثق ان خلال اسابيع هتلاقي تطور ايجابي ان شاء الله

​