تقويم الوالد
الرسالة السابقة
العنوان : تقويم الوالد
القسم: #الاجتماعي
الرقم: 61
السؤال:
حضرتك ابي مقاطع اخوته بسبب الميراث هم من وجهة نظري مش غلط هو الذي لم يقدرهم اويحترمهم وبيشتم ويسب الدين لهم وكل ماتيجي سيرتهم اوابنائهم يسب لينا انا وامي واخواتي والبلد ادخلوا وفي الاخر سبوه علشان تصرفاته وشتمته لكل من اراد الحل انا مش عرفه اتصرف معاه وهم بياتوا لزيارتي ولما بيعرف بيخرب الدنيا
حتي ان انا جالي كذا مرض بعدها وحاسة ان ده بسبب ده
قول لي اعمل معاه ايه بالله عليك
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
طيب شوفي يا فندم . .
الوالد ارتكب ذنب كبير , الله تعالي وحده هو الأعلم هل هيحاسب عليه , أم هيعفو عنه . .
بالنسبة لحل المشكلة , انتي مش في إيدك حل جميع أطرافها , لكن احنا هنعمل اسلوب "انقاذ ما يمكن إنقاذه" . .
و كلامنا هيكون في عدد من المحاور . .
-
محاولة تقويم الوالد و إقناعه
-
كيفية التعامل معه
-
التعامل مع المال الحرام
-
نقطة زيارتهم لكي
-
نقطة البلاء اللي عندك
----------------------------------------------------------------------------
بالنسبة لمحاولة تقويم الوالد , لابد تتعاملي بالحكمة الشديدة في الموقف ده , الوالد سنه كبير , ومع كبر السن العناد بيزيد , وليونة التفكير بتقل . .
فالنصح المباشر , او الوعظ المواجه له , مش هيكون ليه أي اثر او فايدة , بل هيعمل تعميق للمشكلة , ويجعلها مستحيل تتحل . .
اعرفي أنه لا تزر وازر وزر أخري , وفي النهاية انتي مش هينالك ذنب من الفلوس الحرام , مالم تضعي يدك عليها , وطالما كانت الفلوس او الورث معاه هو , فهو ذنبه وحده حتي الآن . .
ليه بقول كدة , عشان بس تضعي في بالك إن نصيحتك ليه , ومحاولة تقويمه تكون عن دافع حبك ليه , وخوفا عليه من الحساب العسير , ربنا يهون علينا الحساب . .
فلازم تشوفي مدخل ذكي للنقطة ديه , و تبتعدي عن الكلام المباشر تماما . .
هنا ممكن نقول عدد من الأفكار , اللي ممكن واحدة فيهم تنفع :
-
لو فيه حد كبير في العيلة الوالد بيقتنع بكلامه , ييجي هو يكلمه
-
لو فيه شيخ معين في المنطقة اللي ساكنين فيها , ويكون الوالد مقتنع برأيه , إنه ييجي و يفتح الكلام معاه
-
إن يكون فيه شيخ معين في التليفيزيون الوالد بيسمعله (الشعراوي مثلا) , فانتي تدوري علي اليوتيوب علي تفسير آيات الميراث مثلا في سورة النساء , وتخليه يشوفها بشكل غير مباشر
-
لو بيحب يقرأ لكاتب او مفسر او شيخ معين , فتشوفي طريقه انه يقرأها
-
انه لو كان بيثق في فتاوي دار الافتاء او الازهر الشريف , فتخليه يتصل بيهم و يسمع بنفسه
شوفي ايه من الحاجات ديه ممكن يكون ليه اثر ايجابي معاه , وانتي من ناحيتك باقي اخواتك , متفتحوش معاه الكلام تاني , لانه هيعند و يزعق و يشتم علي الفاضي . .
في النقطة التانية : كيفية التعامل معاه . .
ديه انتي محتاجة تسألي فيها شيخ يقدر يصدر فتوي , لان احنا كفريق محدش فينا مؤهل للفتوي . .
الفتوي عن : كيفية معاملة الأب في حين هو استحل مال حرام من اخواته . .
ولو كانت الفتوي بحسن معاملته يبقي استمري فيها , لو كانت بمقاطعته نفذيها . .
بس في كلا الأمرين , سواء هتعامليه كويس او هتقاطعيه , لابد يكون ليكي موقف كل ما يتجاب سيرة المال الحرام , وتقوليها علانية , انا مش همد ايدي فيها لانها حرام . .
سواء يشتم او يزعق او يقول اللي يقوله ,لابد تعرفيه كل مرة انه مال حرام .
--------------------------------------------------------------------------------
بالنسبة للنقطة التالتة , التعامل مع المال الحرام . .
المال ده هو حرام طالما معاه هو , وطالما في حوزته , وانتي مش هتستفادي بيه باي طريقة . .
في حالة انه – في حياته – عمل توزيع ليكم للفلوس ديه , ساعتها عندك حل من اتنين , ومحتاجة تسألي في فتوي تانية انهي فيهم الصح . .
إما إنك ترفضي مس اي قرش حرام , سواء فلوس او ارض او ايا كان , وتقوليله صراحة مش هاخدها لانها حرام و مش من حقي . .
و إما انك تاخديها , وفي يومها فورا تروحي توزعيها لاصحابها الحقيقيين . .
فلو إنك الوالد كان اخذ مثلا ما يساوي ربع مليون جنيه , وانتي نصيبك منه 100 الف , وقتها خدي الفلوس , ومتخليهاش تبيت عندك في البيت , يومها فورا روحي لاقاربك , ووزعي الفلوس عليهم بعد عمل نسبة و تناسب , حسب مين من اقاربك ليه كام , كنسب مئوية . .
فلو كانت الربع مليون , مأخوذة مثلا من أخين و أخت , فكل أخ ليه سهمين , والأخت ليها سهم , إذن كل أخ هيكون ليه 40 % من الفلوس , والأخت ليها 20 % . .
وقتها امسكي الـ 100 الف اللي انتي اخدتيها , ووزعيها بالترتيب , كل اخ ليه 40 الف , والاخت ليها عشرين , وكأنك رديتي جزء من فلوسهم , وانتي متاخديش قرش منه في بيتك . .
وفي حالة ان الوالد توفي في اي وقت , انتي اطلبي علانية وسط كل الورثة , ان يتم استقطاع كل الفلوس الحرام اولا , سواء كفلوس او دهب او اراضي او عقار او سيارة مثلا , و ارجاعها بالكامل لاصحابها قبل ما يتم التقسيم . .
ولو باقي الورثة رفضو , واصرو علي اخذ نصيبهم من المال الحرام , انتي خدي ورثك كامل , وشوفي نسبة قد ايه منه هي فلوس الوالد الحقيقية , ونسبة قد ايه هي من الفلوس الحرام , فلو مثلا فلوس الوالد هي التلتين و الفلوس الحرام التلت , يبقي اعملي استقطاع لتلت نصيبك من الميراث . .
و بعدها وزعيه بالكامل زي ما قلنا من شوية , حسب كل واحد ليه كام سهم في الفلوس الحرام ديه . .
و في كل الحالات , اياكي تستفادي من اي قرش حرام لاي سبب , ولو حسيتي ان الوالد اشتري لكم حاجة , او لاولادك , او هدية او اي شئ , امتنعي عن قبولها بعذر ما . .
و برضه محتاجة تسألي شيخ يقدر يصدر فتوي , هل يجوز ليكي تاكلي في بيته ولا لا , باعتبار ان الاكل عنده قد يكون بخليط من المال الحرام . .
-------------------------------------------------------------------------------------
النقطة التالية : زيارتهم لكي . .
رأيي , امتنعي عن زيارتهم , ومتخليهومش يزوروكي مؤقتا , لأن بر الوالدين مقدم علي صلة الرحم , زائد إن إثارة غضبه هتعرقل اي محاولات لتقويمه , وإقناعه بالطريق السليم , وهتخليه يعند أكتر . .
فمؤقتا متزوريش حد فيهم ولا هما يزوروكي , وانتي عرفيهم بالتليفون ,انك عارفة ان ده حقهم ,لكن انتي لا تملكي اي شئ
-------------------------------------------------------------------------------------
النقطة التالية : الابتلاء و المرض اللي عندك . .
مين قال ان ده من غضب ربنا عليكي او من الفلوس الحرام ؟ ؟
غضب ربنا هيأتي لما انتي تستحلي المال الحرام , وطالما انتي انكرتيه , ورفعتي ايدك عنه , فإن شاء الله تعالي انتي في رضي المولي تبارك و تعالي . .
و أي مرض يأتي للإنسان , قد يكون عقابا له , لو كان مسئ , او يكون تكفيرا عن ذنوبه لو كان صالح . .
ماذا عن مرض سيدنا ايوب ؟ ماذا عن سجن سيدنا يوسف ؟ ماذا عن معاناة سيدنا موسي ؟ ماذا عن حصار شِعب ابي طالب للرسول صلي الله عليه و سلم لمدة 3 سنين ؟ ؟
فسيبك من اي كلام يتقال , وانتي بس اتأكدي ان مفيش قرش حرام هيدخل بيتك بأي طريقة , غير كدة ثقي ان المرض اللي عندك هو تكفير عن الذنوب ان شاء الله تعالي . .
--------------------------------------------------------------------------------
أخيرا نصيحتين ..
كثفي الدعاء للوالد , وثقي إن الدعاء قد يغير العقول و القناعات . .
وتوقفي عن الجدال مع اي حد , قولي رأيك و سيبي اللي يجادل و امشي , انتي حافظي علي صحتك و علي طاقتك النفسية , ومجادليش اي حد
الف سلامة عليكي , وربنا يهدي الوالد للصراط المستقيم