خلعت الحجاب
العنوان : خلعت الحجاب
القسم : #الديني
الرقم : 01
السؤال :
بصراحة من وانا صغيرة و انا محجبة من تقريبا لما كان عمري 8 سنين ولما دخلت الكلية حسيت بشعور مختلف شوية اني مكبوتة او محرومة
وفي حين بنات تانية اقل من جمال بيلبسو اللي عايزينه و مكياج و برفيوم وانا مسجونة في الحجاب استغفر الله العظيم
فاتخذت قرار اني اخلعه وفعلا خلعته من 3 شهور كتير من قرايبي و اصحابي اندهشو فيه اللي فرح ليا و فيه اللي اتضايق بس انا مبيهمنيش حد طالما مقتنعة
بس مقدرش انسي اول يوم نزلت فيه الشارع من غير طرحة . حسيت بمزيج من شعور بالفرحة وفي نفس الوقت اني عريانة و الناس بتاكل في لحمي
احيانا بتضايق من نفسي واحيانا بحس اني عملت حاجة صح فعلا مش عارفة
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
أهلا بيكي أختي , وسعداء بالتواصل معاكي هنا . .
الحقيقة انتي محددتيش سؤالك ايه بالتحديد , يا تري انتي بعتي رسالتك عشان كنوع من الفخر بخلع الحجاب , ولا الندم , ولا هو نوع من الفضفضة ؟ ؟
طالما انتي مبعتيش سؤالك , خليني انا اطرح السؤال اللي متوقع كنتي عايزة تسأليه وهو , يا تري اللي انا عملته صح ولا لا ؟ يا تري انا غلطانة ولا عندي حق ؟ يا تري انا انسانة كويسة ولا مش كويسة ؟ يا تري طالما قلبي فيه الخير و بحب الناس هل ربنا هيسامحني طالما خلعت الحجاب ولا برضه هدخل النار ؟ انا مأذيتش أي حد بخلع الحجاب , طب ليه ربنا يعاقبني علي حاجة زي كدة ؟ , ده ربنا رب قلوب . .
انا حاسس ان ده سؤالك , مش عارف هو ولا لا , بس خليني ارد عليه علي اي حال . .
واضح إن سؤالك مش عن خطوات المحافظة علي الحجاب , لكن في قناعة هل الحجاب ضرورة ولا لأ
طبعا ربنا رب قلوب , و الرسول صلي الله عليه و سلم علمنا أن الله لا ينظر الي صوركم و أشكالكم , ولكن ينظر إلي قلوبكم و أعمالكم
ولا شك في أن حب الخير للناس و عدم الإيذاء لهو من أهم ما وصي به الشرع الحنيف , وهو الطريق الأول لرضي ربنا سبحانه وتعالي . .
بس فيه حاجة . .
يا تري لما شاب و بنت مش مرتبطين , بس معجبين ببعض , و اتفقو يخرجو في سهرة علي النيل لوحدهم . . ايه رأيك . فكرة كويسة ؟ ؟ قلوبهم لسة مليانة خير و محدش أذي أي حد
طب بعدها الولد عزمها علي عيد ملاده في شقته بحضور ابوه و أمه ؟ ؟ مفيش مشكلة طبعا انها تحضر بما انهم مأذوش حد . .
طب لما يروحو مع بعض الساحل علي انه مش هيقربلها ولا يلمسها ؟ ؟ ايه المشكلة يا اخي , مهو محدش اتأذي خالص . .
طب لو قررو برضاهم هما الاتنين انهم هيطورو علاقتهم بحيث يكون فيه معاشرة جسدية . .
هو صحيح ايه المشكلة لما يحصل زنا بين ولد و بنت , طالما هما الاتنين بيحبو بعض , ومش بيأذو اي حد ؟ ؟
ليه ربنا منعنا منها , وجعلها من الكبائر اللي مفيهاش نقاش ؟ ؟
ليه ربنا بيحرمنا من اللذة الجميلة ديه , طالما برضي الطرفين ؟ ؟
لأن ربنا سبحانه و تعالي يعلم ان ده يخالف الفطرة البشرية , يعلم ان المتعة الجسدية الغير مرتبطة بزواج بين شريكين هترسم خريطة دمار للجمتمع , يعلم ان الشاب بعد ما يعاشرها مرتين و تلاتة و عشرة هيزهق منها و يشوف غيرها , ويسيبها مدمرة نفسيا تنهشها الغيرة . .
ربنا سبحانه و تعالي هو صانعنا , وهو يعلم "الخريطة" اللي لازم المجتمع يمشي عليها عشان يصل لحالة من الطمأنينة و الاستقرار و الراحة , واللي من غيرها هيتآكل المجتمع ببطئ حتي يصل لمرحلة لا تصدق من الانحطاط . .
يعني الزنا هو إيذاء جماعي للفرد و المجتمع , وان لم يكن هذا واضحا في بدايته
عشان كدة المعيار اللي نحطة لنفسنا في الحلال و الحرام مش "هل بأذي حد ولا لأ" , لكن "هل حلال ولا لأ"
أكيد انا لا اقارن بين الزنا و خلع الحجاب , ولا أتهم من تخلع الحجاب بالفاحشة , لكن انا أقيس بالمثال المتشابه
نفس الموضوع في الربا , لما يكون حد هيديني فلوس و ياخد فايدة , و هو موافق و كسبان و انا موافق و كسبان , ايه المشكلة طيب ؟ ليه يا رب حرمته علينا و احنا الاتنين متفقين ؟ ؟
لنفس الفكرة , ان الربا يقوم بعمل تأثيرات سلبية متراكمة غير ملحوظة , تؤدي بالحالة الاقتصادية لمرحلة الفوضي , ويزداد الفقراء فقرا , والأغنياء غني
إن كان الزنا والربا قد حرما و احنا مش شايفين منهم أي أذي ظاهري لأي إنسان , فمن واجب أولي اتباع الأمر الرباني بالتزام الحجاب , حتي لو مش شايفه منه اي أذي لأي إنسان . .
ديه كدة نقطة الأذي . .
طب ماذا عن نقطة , ان فيه زميلاتي مكياج و هدوم عاملة ازاي , وبناطيل و فساتين , وانا مسجونة في الحجاب , زي ما انتي وصفتي
ولعلمك لفظ مسجونة هو لفظ صحيح 100 % , و مكانش فيه داعي انك تستغفري ربنا علي الكلمة ديه , لان الرسول صلي الله عليه و سلم استخدمه في وصف المؤمن . .
حديث ابو هريرة واضح "الدنيا سجن المؤمن و جنة الكافر" , ايوة فعلا , الرسول صلي الله عليه و سلم وصف المؤمن انه مسجون , ليه مسجون , لأن ممنوع عليه حاجات كتيرة من اللي بتمتعه , زي الخمر و الزنا و السرقة , والمكياج و البرفان الفساتين و هكذا
يعني انتي لما تلفي الطرحة كل يوم حولين راسك , وتلبسي واسع , ومتستخدميش اي برفان برة البيت , انتي كدة بتدخلي سجن الايمان , اللي آخره الجنة أن شاء الله , زي ما سبقك بيها ملايين الملتزمات قبلك
ولما بتروحي الكوافير و تصبغي شعرك , وتحطي برفان و تلبسي بنطلون , فحضرتك خرجتي من السجن الخاص بالمؤمنين , وللأسف الطريق ده نهايته بشعة جدا , فوق ما تتخيلي
لأن بمجرد ما الواحد يدخل القبر , هينسي كل متعة استمتع بيها في الدنيا , وهيضرب نفسه بالجزمة انه لم يطيع ربنا في كل لحظة من حياته
انتي مش صغيرة , و اختاري كما تشائي , عندك طريقين واحد متعب لكن هو نفس طريق الرسول صلي الله عليه و سلم , وواحد جميل لذيذ , لكن اخرته كابوس متوحش
عايزة تخلعي الحجاب , محدش ماسكك , انجوي الحرية اللي عايزاها , بس اعرفي ان عداد السيئات شغال , وربك وحده يعلم امتي هيقف