العنوان : السُفُن المُحترقة - 2

القسم: #الديني

الرقم: 25

السؤال:

​

انا ليا صاحبة من ايام الكلية انا متخرجة من سنتين بس هى لسة اخر سنة ليها بتدبلر كتير

 

 كانت من صغيرها وهى مع الاخوان واللبس الواسع وحفظ القران والتدين لحد لما اتصدمت من تصرفاتهم ايام مرسى فبعدت عنهم بس كانت يتشتغل فى صناع الحياة بتلم التبرعات

 

المهم صاحبتى ديه فيه ايام الكلية كانت مصدر تحفيزى علمتنى اقرا كتب وانتظم فى الصلاة واتفرج على فيديوهات تحفيزية

 

فجأة الشخصية ديه اتغيرت للأسوأ لقتها مرة كاتبة انها جربت تشرب سجاير لأول مرة اتعاركت معاها وحلفت مش هتكررها وفرحت بيا لأن انا الوحيدة اللى زعقتلها كل صحابها كانوا مش فارق معاهم

 

وبعد كدة عرفت بالصدفة انها لسة بتشرب بس ناكرة منى ودخلت فى علاقة عاطفية مع واحد ملحد وبعد كدة سابها واتجوز وبقت تعمل حاجات غلط كتير

 

سافرت كذا مرة القاهرة من غير متقول لأهلها احنا فى اسكندرية لقيت على موبيلها صورة ليها بشعرها فى الشارع وقالتلى كنت بجرب احساس لما اقلع الطرحة بس مش هقلعها

 

وكاتبة اخر بوست ليها انها هتروح الكنيسة مع واحدة صاحبتها مسيحية انا مش عارفة اعمل ايه انا خايفة عليها وشيفاها بتغرق ومش عارفة اعمل ايه ومش بتقبل نصيحتى اكلم حد من اهلها ولا اعمل ايه

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

ده هو الجزء التاني من الرد , الجزء الأول هنا بعنوان : السفن المحترقة - 1

​

------------------------------------------------------------------------------------

​

طيب لازم نتكلم عن الحل , واللي رغما عنا مش هيكون سهل ولا بسيط . .

​

ولازم انتي تستعدي و تعرفي ان الحل هياخد وقت و مجهود و طاقة نفسية , وتكوني مستعدة لده , عشان متتعبيش في النص  و تيأسي و ترميها في الشارع . .

​

اعرفي إن إنتي في إيدك مهمة مقدسة , مسؤولية كبيرة , ربنا سبحانه وتعالي جعل في إيدك الإمكانية إنك تحيي واحدة شارفت علي الموت "نفسيا و عصبيا و دينيا" , و ربنا قدّر إن أقرب شخص ليها هي ممكن تستمع ليه هو إنتي , ففعلا إنتي في إيدك إنك تاخديها من إيديها لغاية لما توصل لطريق المولي تبارك و تعالي , ولو كسلتي او يأستي , فاعرفي انها هتنهار بشكل مستمر لغاية لما توصل للحضيض . .

 

حتي لو الأمر ده أخد منك شهور طويلة او حتي سنين , حتي لو استهلك كمية من الوقت عندك , حتي لو كان علي حساب طاقتك النفسية , معلش احتسبي ده لله سبحانه و تعالي , وكل ما تتعبي , افتكري اليوم اللي هتقفي فيه بين يدي الله , وتقولي يا رب أنا استغرقت سنين طويلة و مجهود رهيب , عشان أساعد فلانة إنها ترجع لطريقك المستقيم , وتتجنب مصير بشع في الدنيا و الآخرة , وثقي إن ده عند ربنا شئ كبير , وله عظيم الجزاء . .

 

دايما حطي في بالك الحديث الشريف : (  فو اللَّهِ لأنْ يهْدِيَ اللَّه بِكَ رجُلًا واحِدًا خَيْرٌ لكَ من حُمْرِ النَّعم ) رواه البخاري و مسلم

 

هنبدأ نكتب عدد من الخطوات اللي ممكن تحل المشكلة , حاولي تطبقي منها المتاح  ,وممكن يتم تطبيق حاجات بالتوازي , وممكن بالتوالي (حاجة بعد حاجة) , انا حتي أتمني إنك تطبعي جزء الحل في ورق , بحيث يكون قدامك كمرجع دائم  , ترجعيله علي مدي الشهور الجاية . .

 

------------------------------------------------------------------------------------------

 

ازرعي الأمل . .

 

زي ما قلنا من شوية , إن أحد الأسباب المحتملة لتحولها المخيف ده , هو الشعور باليأس الكامل , وإحساس إن "كدة كدة خربانة" , فده اللي خلاها تفتح الباب علي الآخر . .

 

انتي بقي فهميها ان مفيش حاجة خربت ولا حاجة , وإن هي علي مستوي جيد حاليا , ولسة فيه حبال عديدة تربطها بدينها , وبشخصيتها القديمة  ,وان كل اللي حصل هي قشور يسهل إصلاحها فورا . .

 

لازم هي تؤمن إن "لديها ما تخسره" , وان "سفنها لم تحترق" , لازم تعرف إن المولي تبارك و تعالي يحبها , و سيرضي عنها أول ما هي تعمل خطوات حقيقية للرجوع إليه . .

 

لابد من انها تسترد الأمل بالكامل , وتستعيد الثقة بالنفس , وتؤمن إن كل اللي اتدمر هي أشياء بسيطة يسهل علاجها في اسابيع لو هي عايزة . .

 

الثقة و الأمل هي اول خطوة لإصلاح المشكلة . .

 

------------------------------------------------------------------------------------------

 

كوني أقرب الناس لها . .

 

انا عارف إنها بتحبك , بس ده مش كافي , أنا عايز إنها تكون بالفعل قريبة جدا منكي , وإنك تكوني أقرب الناس لقلبها ,للدرجة إن أسرارها تكون عندك , وإنها متعملش اي خطوة مجنونة غير ما تتكلم معاكي الأول . .

 

إن كان أهلها عن إهمال او غفلة مش عارفين يعملو خطوة الإحتواء ديه , فإنتي قومي بيها , خليكي ابوها و امها و اختها  في نفس الوقت , اطمني عليها بشكل مستمر , لا مكالمات قليلة فتنساكي , ولا كتيرة فتزهق منك . .

 

استغلي انها بتحبك بالفعل و لينة معاكي , عشان توثقي علاقتك بيها أكتر , وتكوني إنتي اول واحدة تيجي في ذهنها لما هي تفكر في اي مصيبة . .

 

خدي بالك هي من جواها عايزة ترجع لربنا , هي من جواها بتعاني , وبتصرخ وبتقولك "اياكي تسيبيني" , بس مش عارفة تقولها بلسانها , بدليل إنها شكرتك لما انتي بهدلتيها علي السجاير . .

 

------------------------------------------------------------------------------------------

 

التوازن بين اللوم و الإحتواء . .

 

ديه خطوة بالغة الأهمية , من غيرها كل شئ هينهار . .

 

إن كانت دلوقتي تتقبل منك كمية من اللوم او الزعيق او "البهدلة" , فانتي مينفعش إنك تعتمدي علي ده , وتستمري في نفس السياق بشكل دائم . .

 

إنتي لو استعجلتي النتايج , وبدأتي تأمريها و تنهيها , وتلوميها علي الأخطاء , حبها ليكي هيقل شوية بشوية , و هتبدأ تدريجيا تبعد عنك و تشوف حياتها , في النهاية انتي ملكيش عليها كلمة , وهي مش طفلة . .

 

لابد يكون فيه حكمة منك في الموازنة بين امتي تلومي , وامتي تطبطبي , امتي تشدي و امتي ترخي , و نصيحة , زودي كمية اللين عن الشدة , وكمية الطبطبة عن اللوم , انك تطبطبي أكتر , فتكسبي قلبها , ويتأخر علاجها شوية , أحسن كتير ما تشدي عليها اكتر عشان تتعالج بسرعة , فتسيبك و تكرهك و تخسري كل حاجة . .

 

خلي الحاجة تستوي علي نار هادية , و تجنبي اللوم المباشر الا نادرا , والأهم إنها بالفعل تحبك و تثق فيكي .

 

------------------------------------------------------------------------------------------

​

رتبي الأولويات . .

 

لو الفرن فيه أكل بيتحرق , والتليفون بيرن , مش هروح اشوف التليفون و اسيب الأكل يتفحم , ترتيب الأشياء العاجلة ده ألف باء التعامل الذكي . .

 

لازم انتي تكوني عارفة هتتناولي ايه قبل ايه , وهتهتمي بإيه و تأجلي ايه , تاني اقول متستعجليش , متستهدفيش إنك تحلي المشاكل كلها مع بعض , مش هيحصل أبدا , خليكي ذكية و نشني علي المهم الأول  . .

 

يعني السجاير علي بشاعتها , وخلع الحجاب علي الرغم من مصيبته , أقل بكتير من تغيير العقيدة أو ترك الصلاة , او ارتكاب الفاحشة مع شخص . .

 

انا عندي انها تشرب 10 علب سجاير يوميا , وماسكة الشيشة طول النهار , بس بتصلي و متمسكة بالعقيدة , احسن بكتير ما تكون سابت السجاير , بس مش بتصلي . .

 

لازم ترتبي الأولويات بشكل سليم , ولما ترتبيهم , خلي عينك علي هدفك بس , وتجاهلي الباقي ومتتكلميش عنه , متتعامليش باسلوب "طب بالمرة اتكلم عن كذا" , لأ غلط , نشني علي المهم و سيبك من الباقي , والتفاصيل الصغيرة هتتصلح اوتوماتيك اول ما الأساس يتنبي . .

 

والترتيب اللي انا شايفه بالنسبة للأهمية (العقيدة , الصلاة , الفاحشة , الحجاب , السجاير)

 

------------------------------------------------------------------------------------------

 

مشكلة العقيدة . .

 

أظن من كلامك , إن مشكلتها في العقيدة ( سواء من صداقتها للشاب الملحد أو ذهابها للكنيسة ) , مش عن عدم قناعة في الإسلام , او شك في أساسه , ولكن للمشاكل السابق ذكرها . .

 

وبالتالي حل المشكلة مش هييجي عن طريق انك تكلميها عن الإسلام , ودلائل اثباته , وان الكون متخلقش صدفة , او عقيدة التثليث . .

 

الكلام ده كله هيكون "بلا فائدة" لأن أساسا الدافع ليها إنها تفكر في الإلحاد او المسيحية , مش شك في أصل الإسلام , لكن مشاكل نفسية و اجتماعية مركبة , زي ما شرحنا في الـ 7  أسباب المحتملة السابقة . .

 

فالحل عندها , مش تجيبيلها فيديو لأحمد ديدات , ولا زغلول النجار , لكن ان مشاكلها السابقة تتحل + إنك تقربي منها جدا جدا . .

 

خدي بالك  ,علاقتك بيها هي حبل الإنقاذ اللي هينقذها من الغرق ,علي قد ما الحبل ده هيكون متين ,علي قد ما هيكون فيه قوة انه يشدها من الموج الهائج اللي بيرميها هنا و هناك , ولو كان  ضعيف فممكن نقول الله يرحمها . .

 

صدقيني مفيش شئ أهم عندك في الشهور الجاية من مهمة إنقاذ صديقتك , وثقي إن ربنا هيباركلك طول عمرك لو انتي نجحتي في ده , وأهم خطوة هي "توثيق علاقتك بيها بشكل غير مسبوق"

 

------------------------------------------------------------------------------------------

 

اسمعي منها . .

 

أغلب البنات – وإنتي أدري مني انا كشاب – بتكون محتاجة اللي يسمع منها , مش اللي يحل المشكلة , يعني اللي يسمع للآخر , حتي لو مقدرش يجيب حل  , اساسا هي مش عايزة حل , هي عايزة تتكلم و تلاقي أذن صاغية . .

 

انتي اسمعي منها و مترديش , اسمعي و متقوليش حلول , عرفيها بس إن إنتي "available" اي وقت لو هي عايزة تتكلم , معلش انا عارف انه شئ مرهق ليكي و لاسرتك , بس صدقيني انتي املها الوحيد لانقاذها من المثير المؤلم , ربنا يحفظها .

 

اسمعي منها حتي لما تتكلم عن معصية معينة , مترديش الا نادرا , بس طبعا متوافقيهاش  , عشان متاخدش ان ده إقرار منك بصحة اللي بتعمله , خلي يبان علي وشك إنك متضايقة , بس متقوليش نصايح او اوامر او نواهي الا اقل القليل .

 

------------------------------------------------------------------------------------------

 

الصلاة . .

 

أنا عارف إنها مسابتهاش , بس خلينا نتناولها بشكل مختلف . .

 

الصلاة لوحدها قادرة علي جذب أي شخص بعيد عن ربنا , عشان يرجع لرحابه مرة أخري , بس بشرط إن يتم تأديتها بشكل سليم . .

 

مش مجرد ركوع و سجود , لكن استحضار قلب متواجد طوال لحظات الصلاة . .

 

خليها تيجي تتغدي عندك في البيت مرة في الاسبوع مثلا , و لما تيجي صلو مع بعض جماعة , بس انتي عرفيها ازاي تصلو بشكل سليم , مش كحركات جسدية , لكن تواجد قلبي , وحضور روحي كامل , و اتفقي معاها انك تحاول تركز بقدر الإمكان , ومتفكرش في اي حاجة تاني . .

 

كمان قوليلها في السجود انها تدعي ربنا بكل اللي هي عايزاه . .

 

بس خدي بالك , متقوليلهاش ادعي ربنا يغفرلك كذا كذا , او انه يبعد عن قلبك السجاير , متستعجليش , ومتعمليش توجيه , ارمي بس المعني و هي هتمشي في الطريق السليم  , متجيبيش سيرة الحاجات الصغيرة دلوقتي . .

 

كرري ده معاها مرة في الاسبوع ,واتفقي معاها  انها تعمل كدة طول الاسبوع , ولما تتصلي بيها تتطمني عليها , لا تساليها علي السجاير ولا علي شعرها , ولا علي هدومها , اسأليها بس علي الصلاة , يا تري قلبها موجود ولا لا , ولو هي فتحتلك مواضيع صغيرة (السجاير مثلا) عرفيها انها مش هتفرق معاكي , انا المهم عندي الصلاة عاملة ازاي ؟ ؟

 

ثقي ان الصلاة لو هي بالفعل اتقنتها , فهي هتكون بوابة رجوعها لربنا , وهيكون الضوء اللي هيرشدها للطريق السليم

 

------------------------------------------------------------------------------------------

 

القرآن

 

متتخيليش تمسكها بالقرآن هيكون فيه تأثير قد ايه . . .

 

 و بالطبع انا يهمني الكيف مش الكم , يهمني إن كل آية تدخل في ثنايا عقلها , وتتشرب بها روحها , ومنها هتجدي إنها اتغيرت 180 درجة . .

 

لما تجيلك مرة في الاسبوع , وبعد ما تصلو مع بعض , كل واحدة تمسك المصحف , وافتحو سورة معينة , واقرأو مع بعض صفحة واحدة , وممكن نص صفحة , بس متزوديش عن كدة حتي لو فيه وقت . .

 

امسكي الصفحة ديه  , وشوفي تفسيرها ايه , وحاليا فيه عشرات التطبيقات اللي فيها كل التفاسير المتاحة . .

 

امسكو آيه آيه واتعلموها مع بعض , حتي لو انتي مش متخصصة في العلوم الشرعية , دردشو فيها , قوليلها انتي حسيتي بايه من الآية ديه علي ضوء التفسير , وهي حست بإيه , بس كدة . .

 

متعملوش ده في اكتر من صفحة واحدة او اقل كمان , انا يهمني الكيف مش الكم . .

 

اتفقو انك تتقابلو في بيتك او بيتها مرة في الاسبوع او في الاسبوعين  , بس ممكن تتقابلو علي التليفون كل يومين مثلا , وتمسكو 5 ايات و تتكلمو عنها . .

 

اطلبي منها انها تقرا كل يوم 5 ايات , 5 ايات مفيش غيرهم و متزوديش عليهم , بس تقرا تفسيرها و تحسها من قلبها . .

 

خليها من جواها تمسك كل اية و تفكر فيها شوية , خلي الآية تدخل في عروق دمها و تحسها كلمة كلمة , حرف حرف . .

 

ثقي إن للقرآن تأثير عجيب و مدهش , مش هتصدقي نتيجته عاملة ازاي مالم تشوفي بنفسك .

 

أكرر تاني , متفتحيش اي مواضيع تانية اقل , لا تجيبي سيرة الحجاب ولا السجاير ولا اي حاجة , متستعجليش .

 

------------------------------------------------------------------------------------------

 

زميلها الملحد . .

 

لما تحسي انها قربت منك أكتر , ولما تحسي كمان إن الصلاة و القرآن بدأو يخترقو قلبها بالطريقة الصحيحة , ابدئي خطوة اقوي معاها , وهي زميلها الملحد . .

 

اتكلمي معاها ان بقاءها معاه معناه تدمير كامل لحياتها وكل شئ عندها , قوليها حتي لو بتتسلي غلط , حتي لو مش بتتكلمو في الدين برضه غلط . .

 

متتكلميش معاها بشكل حاد ولا زعيق ولا بتأمريها , متنسيش هي ممكن في اي وقت تسيبك و متعبركيش , خلي الحاجة تستوي علي نار هادية من غير ما تستعجلي . .

 

اطلبي منها بشكل هادي و بسيط , وبلهجة "رجاء" , مش "أمر" , خليها تحس انك بالفعل بتحبيها , مش بتنهيها . .

 

اياكي تقوليلها "لو مسيبتيهوش انا معرفكيش" , لانها ممكن بالفعل تقطع معاكي عشانه , بالراحة مع الناس و ان شاء الله هتستجيب .

 

لو الخطوة ديه تمت بنجاح , كرري نفس الموضوع مع زميلتها الغير مسلمة , مش انها تقاطعها , بس متكملش معاها في الفكر الديني , ولا تروح معاها الكنيسة . .

 

لو لقيتي عندها تساؤلات في الدين و العقيدة , وانتي مش عارفة اجابتها ,وقتها شوفي لو تعرفي فتاة او سيدة متبحرة في العقيدة , ومتخصصة في مقارنة الأديان , انتو الاتنين روحولها , وافتحو معاها الكلام , وهي هتجاوب لها بشكل رائع .

 

بس ارجوكي , متعمليش الخطوة ديه او ديه , مالم تكون الصلاة والقرآن بالفعل دخلو قلبها , وكمان تكوني وثقتي علاقتك بيها بشكل متين . .

 

------------------------------------------------------------------------------------------

 

متقوليش اي شئ لاهلها . .

 

من الواضح ان اهلها مش متفهمين الأزمة ديه كلها  , وحتي لو عرفو فغالبا مش هيحسنو التصرف معاها , بل ممكن يكرهوها في كل شئ و يهدو اي انجاز تعمليه . .

 

اللي ممكن تعمليه , انك توثقي علاقتها بأهلها من غير ما اي حد من اهلها يعرف حاجة , يعني مثلا لو تعزميها هي و اختها علي الغدا عندك , او لو انتي هتزوريهم في البيت هناك , انك تقربي بينهم بشكل ما  . .

 

بس حذاري انك تقولي اي شئ  او حتي تلمحي باي شئ لاهلها , حتي متقوليش لاختها او امها "خدي بالك من فلانة " , لان اي اهتمام مفاجئ او رعاية غير معتادة من اهلها ليها , هيخليها تشك انك قلتي كل حاجة ليهم , وده معناه انهيار جدار الثقة اللي بينك و بينها . .

 

ارجوكي متستعجليش , خلي كل حاجة تستوي علي نار هادية , ومتقوليش اي حاجة لاي حد , اي سر من اسرارها يخرج من عندك معناها انك هتقطع اي صلة بيكي للابد , وبالتالي هتفقدي كل امل في انقاذها . .

 

----------------------------------------------------------------------------------

 

انا كتبتلك 10 خطوات للحل , عليكي مسؤولية تقيلة , وشغل كتير , بس معلش انتي قدها , وربنا سبحانه و تعالي اختارك للمهمة ديه , واللي ممكن تكون سبب في دخولك للجنة إن شاء الله , وانا متفائل إنك هتأتي يوم القيامة تلاقي جبال من الحسنات  ,بس عشان انتي حطيتي قدامك هدف و سعيتي اليه , هو إنك ترديها إلي الله ردا جميلا . .

 

امشي معاها واحدة واحدة , ومتنسيش إن أهم خطوة لنجاح العملية كلها : مدي علاقتك بيها  + عدم الاستعجال

 

بالتوفيق يا رب

​