العنوان : بين العفة و الفاحشة - 2

القسم: #الديني

الرقم: 23

السؤال:

 

 هو سؤالي مش استنكار والله لكن بس استفهام عشان بس متفهمنيش غلط يا ادمن :D

 

هو ليه ربنا حرم يكون فيه علاقات مع الستات (قصدي الممارسة الجنسية) عايز افهم بس هي ليه حرام ؟

 

انا عمري ما عملتها و لا هعملها ان شاء الله بس بتسائل من جوايا ايه المشكلة فيها و ايه الاذي اللي هيحصل خاصة لو تم ده برضا الطرفين من غصب عنها.

 

احيانا بفكر في ده و باستغفر ربنا اني بقول الكلام ده بس غصب عني السؤال بييجي  في بالي

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

ملحوظة : ده الجزء التاني من الإجابة , الجزء الأول في رسالة : بين العفة و الفاحشة - 1

​

ايه علاقة  ده بتحريم الزنا في الشرع ؟ ؟

 

علاقة وثيقة جدا  , وهي متعلقة بنتيجة بالغة الاهمية للكلام اللي فات.

ان لما ذكر و انثي يرتبطو ببعض بعلاقة جنسية , سواء في اطار زواج او "صحوبية" , زي ما  بيحصل في البلاد الغربية .

 

لما بتبدأ العلاقة , وبفرض ان كلا منهم بيعامل التاني معاملة كويسة و حب و احترام , هتجد ان فيه تأثير عكسي بيحصل عند كلا منهم .

الذكر , بتبدأ شهوته ليها تقل شوية بشوية , لأن الاعتياد عدو الشهوة , واول ما "ذكر" يعتاد جسد "انثي" , فرغبته فيها بتقل – مش هنقول بتختفي – لكن بتقل نوعا , لان التجديد و التغيير وثيق الارتباط بالشهوة عند الرجل . .

 

(وده السبب ان كتير من الزوجات الذكيات بتعمل تغيير في شكلها و هيئتها و لون شعرها و ستايل هدومها وحتي البرفان بتاعها بعد الزواج , عشان زوجها ميزهقش منها)

 

بينما الانثي , تمسكها بالذكر بيزيد , وبشكل متصاعد و قد يصل لمرحلة الجنون , طالما هو انسان محترم و مهتم و رومانسي و "حبوب" . .

و السبب في الفرق ده , ان الذكر  – رغما عنه – شهوته معتمدة علي الجسد , بينما الانثي – رغما عنها – شهوتها معتمدة علي العاطفة .

 

فلو هنعمل رسم بياني لمدي تمسك كلا من الذكر و الانثي بالطرف التاني , هنلاقي ان مشاعر الذكر بتكون خط ثابت ,و بيبدأ بداية قوية ولكن  بينزل ببطئ مع مرور الزمن , خاصة لما يتعود علي جمالها او جسمها .

بينما تمسك الانثي بيه هيكون خط بيبدأ بداية هادئة , لكن بيتصاعد بشكل كبير , طالما هو بيعمل لها التشبع الكامل للشق العاطفي اللي هي محتاجاه .

 

لاحظ اني لما بقول ان تمسك الذكر بالانثي بيقل , مش معني كدة انه هيطلقها , صحيح رغبته فيها بتقل شوية بشوية , لكن ممكن يستمر في الزواج للابد , لان عنده مشاعر و عاطفة , وممكن يبدأ يحبها بقوة , او حبا في ابناءه , او لعدم رغبته في انه يعيش لوحده و هكذا . .

 

-----------------------------------------------------------------------

 

طب برضه ايه علاقة الكلام ده كله بتحريم الزنا ؟ ؟

 

ان الاسلام لما اجبرك انت يا شاب , علي انك اياك تلمس انثي  , او حتي تبصلها الا في اطار الالتزام الكامل مع واحدة بس – او مع اكتر من زوجة في اطار محدد  – ومنعك الاسلام من انك تفرغ شهوتك الا مع امرأة واحدة , هتقيم معاها عمرك كله  , او علي الاقل انت بالفعل ناوي انك تستمر معاها للابد , مش ناوي تتجوز شوية و تخلع منها .

 

فالاسلام كدة جعلك مضطر انك تبحث عن واحدة انت هتحبها , و هتتعايش معاها , وهتقيم معاها عمرك كله , و مفيش في نيتك انك تسيبها بعد كام شهر لما انت كشاب "تعتاد" جسدها . .

و جعلك ماشي في اطار طريق واضح , لبناء بيت و اسرة , و الالتزام مع واحدة علي الحلوة و المرة , وانك من جواك ناوي تبقي معاها لغاية لما تصلو انتو الاتنين لمرحلة الشيخوخة , وايدك في ايدها .

 

فالاسلام – بتحريم الزنا – عمل تهذيب لبركان شهوتك , و عمل توجيه لدفة هرموناتك , انها تتجه في احتواء انثي و رعايتها , و انك تجعلها في ظل اهتمامك و حبك العمر كله . .

 

الاسلام جعلك يا بطل  تعمل ربط – رغما عنك – بين شهوتك الجنسية , وبين رعايتك و اهتمامك العاطفي , ومنعك بقوة الدين , وبسطوة المجتمع , انك تعمل تفريغ لشهوتك الجنسية , من غير ما يكون فيه رعاية عاطفية بالتوازي . .

متنساش ان الشق الجنسي اكثر امتاع للشاب , من "البذل العاطفي" , بينما الشق العاطفي عند البنت اكتر امتاع من "الممارسة الجنسية"

 

اهو الجواز بقي , عمل عند كلا من الطرفين ربط بين ده و ده , انت كشاب عشان تستمتع بالجنس , لازم تخلطه بالاهتمام العاطفي ,وانتي كبنت عشان تستمتعي بالعاطفة, لازم "تتزيني" لزوجك , عشان تشبعيه جنسيا . .

 

هل النقطة ديه بقت أوضح دلوقتي ؟ ؟

 

-----------------------------------------------------------------------

 

ولو انت عايز تعمل تقييم حقيقي لأهمية شئ ما , تخيل اختفاء الشئ ده . .

 

يعني مثلا , لو انت عايز تعرف اهمية الكهرباء في حياتنا , تخيل حياتنا لمدة شهر مثلا من غيرها ,  شوف هتبقي عاملة ازاي , هتكون شئ بشع , صح ؟ ؟

كمان نفس الفكرة  , عشان تشوف أهمية الزواج بصورة اكتر وضوح , تخيل اختفاء الزواج . .

 

 والحقيقة انك مش محتاج تتخيل الحياة من غير زواج  ,لأن فيه امثلة واقعية موجودة بالفعل , وهي البلاد اللي منتشر عندهم الزنا , وبالتالي بتتضائل بشكل مستمر نسب الزواج . .

هتلاقي ان المجتمع بيتفكك بشكل حرفي , الشروخ السرطانية بتتوسع فيه بصورة مخيفة , و فيه نوع من العزلة و التشرذم بطريقة لا تصدق . .

 

و انا مش باتكلم عن علاقة الواحد بابن عمه  . . انا باتكلم عن أزمة ان الابن ميعرفش ابوه , والاب مش مهتم ابنه عايش فين اصلا , و لو واحد سمع ان اخوه مات هيقول "wow , that’s horrible" وبعدها يكمل حياته عادي , وباقي السلسلة المفزعة من تفتت المجتمع . .

 

هل أحكيلك عن الشخص اللي بيفاجئ بعد سنين ان له أخ في مكان ما ؟ اقولك عن الواحدة اللي مش عارفة ولادها في انهي مكان في الكوكب ؟ احكيلك قصص عن الشاب اللي مش عارف ابوه هو "س" و لا "ص" ولا "ع" اللي كانو مصاحبين أمه قبل ما تحمل فيه ؟

كل ده لأنهم سعيا وراء إشباع ثورة جنسية عارمة , ومتعة جسدية مطلوبة , عملو تدمير لبنية المجتمع , وأهم نواة فيه وهو "الاسرة" , وعملو تجاهل تام لكل اللي ذكرناه من عطاء مشترك بين طرفين , واحد عايز الجنس والتاني عايز العاطفة .

 

تحولت العلاقة بينهم لبورصة كاملة , عرض و طلب , انا كشاب هفضل معاكي  لغاية لما ازهق منك , واول ما اتعود عليكي يللا مع السلامة و اشوف واحدة تانية اجمل . .

 

وانا كبنت هافضل معاك لغاية لما اشوف واحد اكتر وسامة منك او اغني منك , وقتها هوب مع السلامة اشوف غيرك .

و حتي لما بيكون فيه حب حقيقي من طرف للتاني – وده موجود مش مختفي – فبيصطدم مع أزمة ان مفيش التزام من الطرف التاني , اللي هو زهقان من الاول . .

 

فلما شاب يصاحب بنت كام سنة , وبعدها يزهق منها  ,هي ممكن تكون بتحبه بجنون , بس هو خلاص زهق , انا ليه اكمل معاكي و انا قدامي واحدة اجمل منك , فيسيبها ويكسر قلبها , لانه ببساطة “don’t care”

 

انا كبنت  لو مصاحبة شاب كان غني , وبعد كام سنة فلوسه راحت و بقي افقر , ليه افضل معاه علي الحلوة و المرة في حين هو نفسه كان هيبيعني لو انا كبنت كنت اقل جمالا , فلما اشوف واحد اغني منه هاعتذرله و اروح للتاني   .. .

و هكذا , بورصة كاملة , سوق الناس بتبيع و تشتري فيه نفسها , للي يدفع اكتر . .

 

مأساة مخيفة , دمرت السواد الأعظم من المجتمع , و عملت افساد لكل القيم الانسانية الجميلة اللي جوانا  . .

أكيد مش ده كل حال المجتمع هناك , لكن تقدر تقول وانت مطمن إن أغلب المجتمع كدة . .

 

----------------------------------------------------------------------------------------

 

الزواج هو اللي بيجعلك انت كشاب ملتزم مع مراتك بس , مع انك ممكن تكون في بالك انك تروح مع واحدة اجمل منها , بس ملتزم معاها عشان بتحبها و عشان بتخاف ربنا . .

 

و بالمقابل لما انت تكبر شوية و تبقي صحتك في النازل , واقل وسامة , واكثر فقرا , تلاقيها اكتر واحدة سانداك , و اكتر انسان وقف جنبك و يطبطب عليك , حفاظا علي العهد الجميل اللي بينكم , ووفاء للعشرة الطويلة . .

 

بالمقابل شوف عدد المتقاعدين والعواجيز و كبار السن اللي عايشين لوحدهم في اوروبا و امريكا , ارقام مخيفة , وحالات لا تصدق , وملل يقتلهم , وكآبة تخنقهم , لانهم ببساطة تخلو عن قيمهم الانسانية لما كانو شباب , فلما كبرو لم يجدو الا الوحدة القاتلة .

 

ابتعادنا كمسلمين عن الزنا , جعلنا نتجه – رغما عنا – لمسار بناء البيت الزوجي , اللي هيستمر معانا لغاية اخر يوم في عمرنا , بينما تمسكهم هم بالزنا , عمل تدمير كامل للمعني الانساني له .

فكأن المتمسكين بخط الزواج , بيضحو في شبابهم بجزء من المتعة الجنسية المفقودة في شبابهم لما كانو اقوياء, وفي المقابل بيحصدو راحة نفسية و مجتمعية مستمرة لما بيكبرو و بيكونو في امس الحاجة اليها . .

 

 بينما السائرين في طريق الزنا , بيستمتعو بالكثير من اللذة الجسدية في شبابهم , وفي المقابل بيصطلو بنار الوحدة و العذاب النفسي في الكبر , وهو الوقت اللي في اشد الاحتياج اليه .

 

شايف ازاي ان الزنا شئ مدمر بشكل غير معقول , مش بس مشكلة اختلاط الانساب او انتشار الأمراض , في الآخر ديه حاجات ممكن يتم احتوائها , لكن ماذا عن الترابط الأسري و العلاقات المجتمعية المتفسخة . .

 

وثق إن الملايين من العجائز في العالم الغربي , يتمنو لو كانو رجعو شباب , وكل واحد فيهم قاوم شهوته الجنسية شوية , و عمل تهذيب لها , في سبيل الحفاظ علي شعلة الأسرة , و بنيان الزواج يكون متين و راسخ , عشان يتجنب عذاب الوحدة اللي بيصطلي بيه حاليا . .

 

 

واخد بالك من حكمة المولي تبارك و تعالي من تحريمه لهذه اللذة الرائعة اللي احنا كشباب من جوانا عندنا الدافع القوي ليها , لكن بنعمل مقاومة ليه حبا في الله , وخوفا منه . .

 

 

فيه حكم اكتر من كدة اكيد , احنا بس طرحنا رؤيتنا للأمر , و عملنا تحليل لاحد اهم الاسباب اللي عملت تدمير للمجتمع الغربي , واللي بندعي انها متوصلش لبلادنا العربية