لهيب الحب
الرسالة السابقة
العنوان : لهيب الحب
القسم: #العاطفي
الرقم: 02
السؤال:
عندى مشكله انا بحب واحد هو كمان بيحبنى بس بحس انه بيكلم غيرى بحس انه بيحبنى بس معرفش ماله
ساعات بيتغير معايا من رغم بحبه حب والله العظيم بعيط بسببه كتير اوووى
ساعات بسبب المعامله انه يتخانق معايا ومع انه مش بيرن عليا وانا الا برن وبكلمه لما اقوله متغير يقولى شغل ومشاكل وكدا
وغير كدا يبقا فاتح نت واكلمه يرد متاخر اووى عليا
ويدعى انى اكون من نصيبه وغير كدا والله العظيم انا مش هقدر ابعد بحاول مش بعرف خالص من حبي ليه
بس انا الطرف المظلوم واللي بيحب اكتر بس هو اللي بيقول انه بيحبنى اكتر
نفسي يكون نصيبي يقولى ربنا يسهل الحال وتكون ليا بس عمرى مهقوله تعال اتقدم ليا
بس بشك فيه من رده المتاخر عليا ده دايما كدا وغير كدا ميرنش يطمن
لازم انا اللي ارن ممكن يرن لما اقوله يقولى ف شغل
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
الحقيقة ان ردي مش هيعجبك, ولا هيعجب اي شخص لازال يؤمن بالمنظور الساذج للعاطفة , واللي هو او هي استقاه و اتعلمه من روايات "زهور" , و اغاني "تامر" , وقصائد "نذار" , وفيلم "تويلايت" . .
لازال فيه فجوة كبيرة بين مفهوم الناس الطبيعية و مفهوم فئة كبيرة من المراهقات لمعني الحب , المعني الحقيقي له . .
فبينما انتو (المراهقين) بتتهمو الناس العادية (اللي مش مؤمنين بجدية احساسكم) انهم عديمي المشاعر , ومش قادرين يتفهمو المعاني السامية للحب . فهما (باقي الناس) بيتهموكو بالسطحية و الفراغ , و"الهيافة" , ومقدار لا بأس به من السذاجة العاطفية , وانعدام العقل , واللي تجعل بعضكم يصل لمساحات بعيدة تماما , وباسم الحب . .
فكام مرة شفنا بنات وافقت علي زواج عرفي , او عملت مجموعة من "التنازلات" و "التجاوزات" باسم الحب. .
و كام مرة تم تحطيم قلوب عذاري في عنفوان شبابهم , علي يد مجموعة من السفهاء , حديثي السن , ذوي شعر منكوش , وسلسلة في رقبته , ونضارة علي عينيه , و كلمتين ينجح بها في تخدير عقولكن و ضميركن . .
و عشان منضيعش الوقت , خلينا ندخل بشكل مباشر , ونقارن بين مفهومين من الحب . .
المفهوم اللي مؤمن بيه مجموعة "المراهقين و المراهقات" , و اللي غالبا صاحبة الرسالة تنتمي لهم . .
والمفهوم اللي باقي الناس العادية مؤمنة بيه و بتتعامل معاه . .
و علي قدر الفارق بين المفهومين , علي قد ما فيه مساحة كبيرة و بتتسع تدريجيا بين جيلين , وفئتين في المجتمع . .
---------------------------------------------------------------------------
المفهوم الأول للحب , زي ما شايفينه فئة كبيرة من المراهقين , بيكون ليه مجموعة من المواصفات , واللي تقدر تفهم صورة الحب في اذهتنهم عاملة ازاي
وهنقول الصفات بصيغة "المتكلم" كنوع من الدقة في الوصف , وهيكون بصيغة المذكر اللي بيحب الانثي , لكن طبعا نفس الصفات تنطبق علي الانثي اللي بتحب الذكر . .
- الحب ممكن يتم معايا من اول نظرة عادي
- الورد و الدباديب و القطط والحاجات ديه , هي لغة التواصل الاساسية بين القلوب
- السن بيبدا من 15 , ومعاك لغاية 30 تقريبا
- اول ما "سنارة" الحب تشبك , مش هاعرف آكل , ولا أنام , لا أذاكر ولا اي حاجة
- أكيد هكون سرحان طول اليوم , وشايف صورة حبيبتي في خيالي دايما
- المؤلم اكتر لما حبيبتي يكون مش بتبادلني نفس الحب , او الادهي لو مش عارفة اساسا
- اكتر اللحظات عذاب لما حبيبتي تتكلم معايا عادي جدا , وهي مش حاسة بلهيب الحب وهو بيقطع فيا
- و الأنيل لما اشوفها بتضحك و تهزر مع اي شاب تاني , بحس بالنار بتحرقني من جوة
- احيانا بييجي في بالي اني اخطفها , ونروح اي بلد او مدينة بعيدة , و نتجوز هناك رغما عن اي حد , حتي لو انا هشتغل جزمجي , وهي تمسح السلالم في العمارات
- مش متخيل الحياة من غيرها ابدا , وفعلا لو افترقنا هنتحر فورا
- لو مقتلتش نفسي , يبقي علي الاقل مش هتجوز ابدا ابدا لغاية لما اموت
- مستحيل ابدا هاحس بالسعادة مع اي انسانة غيرها , مهما كانت هي مين , ومش هنساها عمري ابدا
- لو بابا او ماما رفضو الجواز , هقولهم اخبطو راسكم في الحيط ,انتو متعرفوش بحبها قد ايه
- لو ابوها او امها رفضو الزواج , هتفق معاها فورا علي الجواز و احطهم قدام الامر الواقع
- مش باقدر اوقف نفسي عن اني اخرج معاها , او امسك ايديها , او اي حاجة تاني انتو تتخيلوها
- احيانا بافكر في الجواز العرفي , وقريت من كام شيخ انه حلال , محدش بس يبقي حنبلي و يصدعني بكلام تاني
- لو في مرة بعتتلها رسالة و مقريتهاش , ببقي متغاظ هي فين و بتعمل ايه , ولو قريتها و مردتش , باتجنن فعلا , هي مهملاني ليه
- لما هي شيرت من شوية بوست من صفحة "أنثي الميزان" واللي بيتكلم عن اللي بيتدلقو في الحب , وكتبت بعدها "مقصودة" , الحيوانة كان قصدها عليها , واني دايب فيها و هي مش معبراني
- امبارح شفتها مع الواد سامح في الكافيه و بيضحكو , لما كلمتها قالت مفيش , ده كان بيستفسر مني علي حاجة عن شغل باباها , لما زعقت فيها سابتني و مشيت , ومن ساعتها هتجنن
- مش عايز اي راي او نصيحة او كلام من اسلوب (لما هتكبر هتنساها) , (انت لسة مراهق) , (لسة بدري علي الجواز) , (ديه خيالات) , انا عندي 19 سنة و فاهم باعمل ايه
يا تري الصورة وضحت شوية , عشان نعرف ازاي بيترسم الحب في عقول و اذهان و خيالات الصنف الاول اللي ممكن نسميهم "مراهقين و مراهقات"
---------------------------------------------------------------------------
نوصل للمفهوم التاني من الحب . .
واللي هو موجود عن جيل مختلف , و عقول مختلفة , وفئة مختلفة من الناس . .
واللي الحب عندهم اكبر بكتير من "دباديب الفالانتين" , اغاني "اليسا" , و روايات "المستغانمي" . .
اللي شايفين الحب اكتر من انه يكون سهاد , وهمس , وافكار , وخيالات , وسرقات في ظلام حديقة الاورمان . .
اللي بالفعل شايفين الحب "الحقيقي" اللي بيدوم و يستمر و بيفتح بيوت , ويجعل القلوب تنتظر في صبر و أناة . .
و اللي ممكن نوضحه بالقصة الصغيرة ديه , هي بالطبع خيالية ,لكن بترسم كل تفاصيل الحب بالمفهوم الحقيقي . .
-
لما شفتها في النقابة السبت اللي فات , و عيني جت في عينيها , لقيتها فورا سحبت عينيها بعيد , ومقدرتش تبص فيهم
-
لما كلمت الواد محسن عليها , قالي ديه في حالها و مش بتاعت لف و دوران
-
لما سالت عليها "نهال" قالتلي علي صفاتها لقيتها هي بالفعل اللي بافكر فيها و عايزها شريكة لحياتي
-
لما عرفت اوصل لاخوها , فوجئت انه قالي ان عندنا الكانسر ,وان حياتك هتدمر لو اتجوزتها فلازم تشاور عقلك جدا
-
لما اتخذت القرار و اصريت عليه , وكلمت ابويا رفض تماما , وامي عيطت و قعدت تقنع فيها
-
لما شافو اصراري عليها وافقو مبدئيا , وابويا قالي انت حر , هي حياتك بس لما تطلقها بعد كام شهر متلومنيش
-
لما قعدت معاها في النادي , ومعانا اخوها وامي , لقيت ابتسامتها منورة المكان , مقدرتش اشيل عيني من عليها وهي مقدرتش تبص في عينيا اكتر من 5 ثواني من كسوفها
-
لما اتقدمت لابوها , كان سعيد و خايف مع بعض . لكن لما اخوها اكدله اني راجل قد كلمتي وافقو الحمد لله
-
كتبنا الكتاب و استشرت صديقي استاذ جامعي في معهد الاورام, واللي قالي ان حالتها مش متأخرة , بس مش كويسة برضه
-
اتفقنا علي الدخلة كمان شهر , وانا متأكد ان ربنا هيكرمنا و يرزقها الشفاء
-
لما بافتكر دلوقتي البت "مي" اللي كنت معجب بيها من 5 سنين لما كنت في الكلية , ببقي مندهش انا ازاي كنت معجب بيها , وميت عليها , وقلبي بيهفهف لما بشوفها , دلوقتي اساسا مش فاكرها , ولو شفتها في الشارع يمكن مخدش بالي منها . .
-
ابويا وامي متجوزين من 32 سنة , البيت مش جنة بس هو عش هادي , عايشين فيه بسلام
-
مشفتش ابويا في حياته جاب لامي هدية او ورد , بس لما لنا اشتكيتله من امي مرة و انا صغير زعقلي و قالي يا حيوان امك ديه مفيش زيها , ولو عشت عمرك كله خدام تحت رجليها مش هتكفيها حقها
-
مشفتش امي حضنت ابويا ولا قالتله كلمة حب , بس لما بيسافر مبتعرفش تنام , وتفضل تكلمه لغاية لما تطمن عليه
-
لما ابويا اغمي عليه في الشارع و الناس كلمونا من تليفونه , امي انهارت و عيطت اكتر ما عيطت علي ابوها لما مات
-
اختي الكبيرة زوجها معتقل سياسي من سنتين , وعمرها ما زهقت من انها تجهز الزيارة ليه كل اسبوعين , وبتروحله وادي النطرون في اخر الدنيا و تقف اليوم كله , وفي الاخر يا تدخل يا لا
-
لما بتزوره عمرها ما ضايقته بكلمة ولا لامته علي فكره السياسي , مع ان هي ملهاش في السياسة خالص
-
لما ابنهم الصغير يسالها بابا غايب ده كله ليه , تقوله يا حبيبي هو في الشغل بيتعب و بيشقي عشان احنا نكون مستريحين و هييجي قريب
-
ابن خالتي اتجوز من قريب , ولما مراته بقت حامل , والدكتور قال لازم تستريح تماما , ساب قعدة القهاوي , وساب اصحابه , وساب البلاي ستاشن , وبقي بيعمل كل حاجة في البيت ولما يخلص شغل البيت ,يقعد جنبها يقرالها القصص اللي بتحبها عشان متبقاش لوحدها
-
جدتي حاطة صورة جدي الله يرحمه في كل اوض بيتها , ولما باسئلها عليه ,تبتسم و اشوف الدموع في عينيها و هي بتتكلم عليه
-
لما مراتي خلفت بنتنا "سارة" عرفت يعني ايه "لهيب الحب" وازاي انا ممكن بالفعل اضحكي بحياتي عشان المفعوصة الصغيرة ديه
-
لما بكون مسافر تبع الشغل كام يوم وارجع البيت , بحس فعلا انه جنة , مراتي و بنتي في انتظاري , وحاسس ان الدنيا كلها في ايديا
الصورة اتضحت ؟ ؟
يا تري مفهوم الحب باين فعلا ؟ ؟
النوع الأول (المراهقين) فاكرين ان النوع التاني (الناس العادية) جامدي المشاعر و مش بيحبو , لانهم بيسفهو من اسلوب النوع الاول في الحب . .
بينما النوع التاني بينظرو بشفقة للنوع الأول , انهم مداقوش المعني الحقيقي للحب , ولازالو في بوتقة المراهقة المتأخرة , واللي فيها بيعانو من كل انواع الأفورة . .
انا مش هجاوب علي سؤالك بالتحديد , لاني اجبت علي المبدأ العام من الاساس . .
كل اللي بتمري بيه لا حب ولا نيلة , وهو لا بيحب ولا يهبب , هو بيتسلي وانتي بتتعذبي , ببساطة شديدة و من غير اي مبالغة . .
عايزة تعيشي الحب الحقيقي , انتظري واحد محترم من النوع الأول لما يخبط علي باب بيتكم , وتتعرفي عليه بشكل حقيقي , وتقرري هل يصلح يكون شريك للعمر , ولا بيتسلي زي اخينا اللي بتتكلمي عنه . .