العنوان : قراءة القصص

القسم: #النفسي

الرقم: 54

السؤال:

 

 

انا عندي 37 سنة متجوز و عندي طفلة وشغلي كويس الحمد لله

مشكلتي اني بحب جدا اقرا الروايات و القصص بس مبحبش اقرا غيرها 

 

زمان كنت مدمن قصص ميكي و سمير وتان تان   لما كبرت شوية بقت رجل المستحيل و رفعت اسماعيل   لما كبرت اكتر بقت روايات عربية و عالمية

 

بحس ساعات اني هايف  والاقي زمايلي يقولولي اكبر بقي شوية ايه العبط ده  احيانا حتي بحب ارجع اقرا قصص ميكي و ملف المستقبل دلوقتي

 

اللي بعمله صح ولا لا هل فعلا قراية الروايات تضييع وقت و هيافة ولا مفيدة ؟ عايز اعرف رايك و يارب تفيدني

 

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

انت صح . . و أصحابك غلط . . 

 

عباس العقاد ليه جملة جميلة ( يقول لك المرشدون .. إقرأ ما ينفعك و لكني أقول .. بل انتفع بما تقرأ )

 

ليه العقاد مقالناش نقرأ اللي ينفعنا  ؟ ؟

 

لأنه عارف ان الإنسان بطبيعته كسول في القراءة , و بيزهق منها , فلما تكون نوعية الكتب اللي هيقرأها هي كتب "مفيدة" يعني تاريخ و سياسة و علم نفس و اقتصاد و حاجات خطيرة كدة , العقاد عارف إنك مش هتكمل فيها صفحتين , وهوب تقوم علي الفيس ولا اليوتيوب ولا اي حاجة هايفة تضيع فيها وقتك . .

 

هو عارف من خبرته إن نسبة قليلة من الناس – حتي الأوروبيين و الأمريكان اللي عاملين لينا عقدة الخواجة – معندهمش صبر للقراءة , لأنها بطبيعتها مملة و سخيفة , ديه حاجة ثابتة . .

 

قلة من الناس هما اللي بيستمتعو بالقراية فعلا , وده اللي بنسميه دودة كتب  , يعني حتي الشخص المحترم والمثقف في المجتمع  , بنوصفه بالدودة عشان عارفين انه غريب و نشاز عننا . .

 

طب ماذا عن الروايات و القصص ؟ ؟

 

طبيعتها كبشر بتجعلنا ننتبه و نتابع و نركز مع اي حدوتة بتتقال قدامنا , خاصة لو كان فيها شوية غموض و حيرة , يعني انت اركب المترو بكرة , واقعد جنب زميلك , وقوله بصوت مسموع : امبارح يا اخي الواد حامد حكالي علي موقف ولا في الخيال . .

 

هتلاقي اللي جنبك طرطق ودانه , والمدام اللي ماسكة الجرنان هتنزله عشان تركز معاك , وبياع اللبان اللي سارح في المترو هيقف عشان يعرف الموضوع ايه , وكله عايز يعرف ايه الحكاية . .

 

ديه طبيعتنا كبشر و نادر جدا مننا اللي مش بيقع أسير لأي قصة او حكاية . .

 

ده اللي بيجعل قراءتك للروايات , اسهل و اسرع و اقوي بكتير من قراءة اي كتاب تاني , لان فيها عامل جذب كبير يطغي علي الملل الطبيعي لتقليب صحفات الكتاب الممل . .

 

حب الروايات بيختلف من شخص للتاني , ففيه ناس ممكن تتنح قدام الرواية ساعات من غير ما ترمش  , وناس تانية بتزهق منها و  تفضل انها تشوف فيلم او مسرحية , واللي أساسها برضه القصة و الحدوتة . .

 

---------------------------------------------------------------------------

 

طب كل ده كلام جميل , بس برضه معرفناش هو الروايات اصلا مفيدة ؟ ليها اي لازمة ؟ ؟

 

طبعا فوايدها كتيرة , وسيبك من اللي مش شايفها الا انها هيافة , اعرف ان هو عنده نظرة سطحية للأمور , وغالبا بيتعامل بالنظرة ديه في كل اسلوب حياته . .

 

الروايات ان مكانش ليها تأثير و رسائل مبطنة , و انطباعات نفسية قوية , مكانتش وُجدت في القرآن عدد كبير من المرات , سواء قصص الأنبياء , او الصالحين (مؤمن آل ياسين , الرجل الصالح مع سيدنا موسي ) , او الفاسدين (فرعون , قارون) . .

 

متنساش إن خواتيم سورة يوسف , المولي تبارك و تعالي يحدد لنا فائدة القصص (لَقَدْ كَانَ فِي قَصَصِهِمْ عِبْرَةٌ لِّأُولِي الْأَلْبَابِ) , عبرة يعني دروس , أولي يعني اصحاب , الألباب يعني عقول , يعني القصص ديه , فيها دروس للي عندهم عقول و بيستخدموها . .

 

كمان الرسول صلي الله عليه و سلم قص علينا عدد كبير من قصص السابقين و التي لم تذكر في القرآن , وأغلبها من بني اسرائيل . .

 

بل إن الرسول صلي الله عليه و سلم أمرنا بتناول سيرة الأولين , الحديث في صحيح البخاري (حدثوا عن بني إسرائيل ولا حرج) , يعني من السنة انك تقرأ حصلهم ايه و كان ايه الاسباب و النتائج و هكذا . .

 

 

لا شك إن كل القصص المذكور في القرآن و الأحدايث قصص حقيقية مش خيالية , انا بس بأكد هنا فوائد القصص في حد ذاتها , وازاي هي قادرة علي تغيير وجدانك و تشكيل قناعاتك . .

 

بل إن في مقدمة أحد طبعات روايات الف ليلة و ليلة (الأصلية اللي كُتبت في العصر العباسي) ذكر المحقق إن أحد أسباب تأليف الروايات ديه هي نشر الإسلام , لعلمهم أن شعوب العالم المختلفة هي متيمة بالقصص والروايات و الالغاز  . .

 

 فلما تنتشر هذه القصص و ما فيها من ذكر للعفاريت , والجن  , الاشباح , والسحرة , والملوك , والموالي و الشيوخ , والعصاة , فهي تنقل صورة عن شعائر الإسلام بشكل أو بآخر في أنحاء العالم , مش هاقدر اقول ان ديه وجهة نظر دقيقة , بس ده اللي حصل بالفعل . .

 

---------------------------------------------------------------------------

 

طب ماذا عن الروايات الحالية , ليها لازمة ؟

 

ايوة ليها لازمة , عد معايا يا سيدي :

 

• أولا هتعودك علي القراية بشكل عام , وكتير من المثقفين و المفكرين و "دود" الكتب كان بداية قرايتهم بس قصص و روايات "هايفة" زي ما اصحابك بيحب يسموها , ولما اتعودو عليها بدأو يقرأو حاجات تانية .

 

 

 

• بتفتح لك مجالات كبيرة للبحث و التفكير , خاصة لو كان كاتب الروايات بيضع فيها جزء من المعلومات المفيدة , يعني انت لما تقرأ في احد اعداد ملف المستقبل ازاي نور الدين محمود رجع بالزمان لعصر هتلر , القصة هتحكيلك شوية عن الرايخ الالماني و العصر النازي وخلاص , انت لو فضولي هتدعبس هنا و هناك عن مين هتلر , وليه كان بلطجي , وايه اللي حصل في الحرب العالمية التانية  و هكذا .

 

 

 

• بفرض الروايات مفيهاش اي معلومات , في حد ذاتها بتوسع الخيال جدا ,  لما الكاتب يقولك ان ام حسين اول ما شافت حسين ماسك السيجارة , قامت ضربته كف علي وشه و ندهت ابو حسين يشوف الموضوع ايه , الكلمات ديه بتخلي "عضلات" عقلك تتحرك , وترسم صورة كاملة للي بتقرأه لأنك مش شايفه , وديه اكبر ميزة للرواية عن السينما و التليفزيون , اللي بيقتلو الخيال  تماما . .

 

 

• قراية الروايات بتعملك متنفس طبيعي و هادي , من كآبة الحياة اللي بعضنا بيمر بيها , كأنك بتاخد (break) كدة نص ساعة في اليوم , تغطس في اعماق شارلوت برونتي , وتكهرب أعصابك مع فيرجينيا وولف , و تضحك من قلبك مع محمود السعدني , البريك اللي انت بتاخده ده  ,بيجعلك قادر انك تكمل في مصاعب الحياة بنفس طويل , واعصاب هادية , عن الشخص التاني اللي حاطط كل وجع القلب علي اعصابه , ومش عارف يكمل في شغله ولا حياته ,  وجاي  بيتهمك انت بالهيافة  .

 

 

• الروايات بتعطيك خبرة حياتية في التعامل مع الناس , لو كنت في حياتك قابلت 20 شخص , ففي الروايات هتقابل مئات الشخصيات , وهتتعرف علي سلوكهم و طرق تعاملهم الحياتية , واللي هتخليك أكثر حكمة و إدراك في تعاملك الحقيقي مع الناس .

 

---------------------------------------------------------------------------

 

 

• بعض الروايات محرم شرعا إنك تقرأها , لو فيها وصف جنسي , او تصريح بالكفر , واللي للاسف بقت موضة حاليا عند كتير من الكتاب العرب قبل الأجانب . .

 

•  إنك تقرأ لكاتب واحد بس هتلاقي إن أغلب المميزات اللي قلنا عليها هتختفي , لأنك هتفضل سجين افكاره و معلوماته و وجهات نظره , اللي ممكن تكون تبعانة  . .

 

• إدمان الروايات زيها زي اي حاجة مصيبة , لما يكون جزء كبير من وقتك مفرغ لحاجة زي كدة , هتبقي مشكلة بالفعل  , حتي لو ده مش مأثر علي شغلك او مذاكرتك , لازم توازن بين القراءة , وبين الانشطة المجتمعية العادية , تلعب كورة , تروح البيسين , تمشي في الشارع , تتخانق مع خلق الله , اعمل ايه حاجة زي البشر متفضلش غرقان في بحر الكتب . .

 

• لازم تفصل في عقلك بين الواقع و الخيال , ومتحطش علي اعصابك حاجة مش منطقية , عشان مش كل رواية يموت فيها بطل تكتئب , ولا كل رواية فيها شوية رعب شعرك يقع , متحطش الرواية علي أعصابك عشان متأثرش علي جهازك العصبي , وهتلاقي نفسك بعد كام سنة بقيت مقيم دائم في العباسية  . .

 

• مينفعش الروايات تكون مهرب من مشاكل الحياة , وتكون البوابة اللي بتدخل فيها عشان تتجنب مواجهة المشاكل الطبيعية ,والمسؤوليات اللي عليك , مراتك عايزة تتناقش معاك في حاجة , ابوك متضايق منك , زميلك عيان , الشغل فيه حاجة متأخرة , عندك امتحان ايلتس قريب , بتأخر في الصلاة او القرآن , الحاجات ديه كلها لو اتأثرت بسبب شغفك في الروايات يبقي انت في طريق مش سليم