العنوان : الضربات المستمرة

القسم: #النفسي

الرقم: 38

السؤال:

 

انا عمرى٢٢سنه

 

كنت طول عمرى دلوعه والكل بيحبنى بس مكنتش اعرف ان ال بيحبنى دايما بيدور على حاجه واحده

 

وانا صغيره كان اولاد اعمامى بيحاولو معايا وانا كنت طفله مش فاهمه حاجه فى ابتداءى يعنى معشتش طفولتى صح  كبرت عل الحال دا لحد م زهقت

 

وانا اواخر ثانوى حبيت شب اكبر منى بسنه  كنت لسه ف سن المراهقه يعنى وسابنى وراح خطب واحده انا ال معرفاه عليها

 

تعبت وبعدين ابن عمى طلع عليا كلام انى مش "آنسة" واهلى صدقو طبعا دا ف مقام اخويا الكبير

 

بابا خدنى وكشف على عزريتى كسرنى وكسر البراءه

 

حبيت ابن عمى التانى جالى ف الوقت ال انا كنت محتاجه حد يطبطب عليا كنا اصحاب والموضوع تطور  , حبيته جداا جداا ٣سنين

 

الناس كلها كانت بتقول اننا مخطوبين و عرفته على صاحبة عمرى  اللي معايا من الطفوله

 

و فرحهم كان من شهر ونص وحضرت الفرح ورقصت كمان

 

اتخطبت ٣مرات مره كان بخيل وشكاك وسافل

 

والتانيه كان خنقنى  يعنى متلبسيش دا متكلميش دى  وغلط غيا وسبته

 

اما التالت بقا دا واحده صحبتى عرفتنى عليه وكنت عمرى م شوفته كنت بعتبره اخ وصديق

 

حبنى وجه اتقدملى وافقت طبعا  شان كان بيفهمنى جدا  خطوبتى كانت ف شهر ١٢

 

ف الاول احلى اهتمام وغيره ويحكيلى على كل حاجه

 

بعدين بقا مهمل فيا لما اسأله يقولى معلش انا بعمل كل دا شان يجمعنا بيت وكدا يعنى

 

صحبتى ال عرفتنى عليه  كلمتنى من اسبوعين قالتلى انه كان معاها ف اسكندريه وفضلو مع بعض يومين

 

سالته قالى انا ال قايلها تقولك كدا عشان اعرف غلاوتى عندك و عديتها بمزاجى

 

بعديها بيومين لقيته بيكلمنى ع الفيس وبيقولى شوفى حياتك وانا مش حعرف اسعدك

 

بس كدا

 

دا اختصار شديد جدا لحياتى

 

اسفه طولت ورخمت جامد

 

د انا ختصرت والله  عشان متعبش اكتر من كدا

 

انا بجد محتاجه ارتاح

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

اهلا بيكي

 

انتي بتعاني من اكتئاب مستمر , بسبب الضربات المستمرة اللي انتي تلقيتيها علي مدار سنين طويلة .

 

و الاكتئاب اللي لاشك بيلتهم تفكيرك و كيانك , وهيتطور الموضوع للأسوء لو كان عندك وقت فراغ كتير , لان الفراغ هو الوجبة الشهية للاكتئاب ,اللي بتغذيه و تكبره , وتجعله مسيطر علي عقلك .

 

و الضربات المتتالية اللي اصابتك , بعضها كان من حقارة اللي حواليكي , وللأسف قرايبك , وبعضها بسبب سلوكيات غير سليمة انتي حطيتي نفسك فيها .

 

لابد نكون موضوعيين في حكمنا , ومنعملش طبطبة او تغميض علي  اي سلبية او تجاوز , وده بهدف اننا نحاول نحل المشكلة .

 

لما نسرد المشاكل المتتالية اللي حصلتلك , هتكون كالتالي :

 

• التحرش بيكي كطفلة  .

 

وديه جريمة لا يمكن السكوت عليها , وأحد اهم اسباب الاضطرابات السلوكية و الانحرافات الجنسية للبالغين , فاي نوع من التحرش الجنسي بالأطفال , اثره بيكون عميق جدا , وقليل من المحظوظين اللي بيفلتو من مشاكل نفسية مستمرة لما يكبرو .

 

ولازم اقول ان الأهل بيكون ليهم دور رئيسي في الجريمة ديه , في انهم اولا بيتفرجو - عادي مع اطفالهم - علي الافلام العربي او الاجنبي , واللي لا تخلو من كل مشاهد السفالة و العنف , واللي لازم الطفل هيقلدها

 

فالطفل لازم هيعمل تفريغ للطاقة اللي شحنها من الفيلم , في المتاح , ومفيش متاح اسهل من طفلة بريئة مش فاهمة حاجة .

 

وفي بعض الاحوال النادرة بيحصل تعدي كامل, من طفل مراهق  , ضد مراهقة او طفلة .

 

حماقة و اهمال الأهل في تعريض ابنائهم لكل المحتوي المنحط من الافلام و الكليبات ليه تمن , وبيكون تمن قاسي للاسف .

 

زائد ان لازم يكون فيه مراقبة ما , خاصة لما يكون اتنين بس مع بعض , الشيطان بيكون ثالثهم فورا, خاصة لما الطفل بيزيد عمره عن 12 سنة , مش بقول نمنعهم عن اللعب , بقول يلعبو قدام الكبار , مش صعبة يعني .

 

التساهل في امور زي كدة بيسبب احيانا كوارث للأسف ,وبنقرأ بشكل مستمر عن حوادث بشعة في بلادنا العربية و اوروبا و امريكا .

 

واي طفل يصاب بحادث اعتداء او تحرش , لازم اهله يودوه فورا عن طبيب نفسي متخصص  , عشان يلحق يتدارك الاثار السلبية تدريجيا قبل ما تتفاقم

 

---------------------------------------------------------------

 

• بالنسة لكشف العذرية .

 

بالطبع ده تصرف سافل من ابن عمك , ومن اي شخص قال حاجة زي كدة , وهو ارتكب كبيرة اسمها "قذف المحصنات" , واللي اساسا عقوبتها في الشرع انه يتمسك في اكبر ميدان عندكو , ويعرو ضهره , ويتجلد 80 جلدة , لما صويته يجيب اخر الشارع , عقابة ليه علي قذارة لسانه .

 

تصرف الوالد مش عارف اعمله تقييم موضوعي , من ناحية كان لازم يثق فيكي , ومن ناحية من كتر المآسي اللي بتحصل في المجتمع كان لازم يتأكد , ويارب ميكونش كسرك نفسيا .

 

لكن محتاج بس اعلق علي حاجة صغيرة , وسامحيني علي كلامي القاسي . .

 

مفيش دخان من غير نار . .

 

يعني مستحيل حد في الدنيا يكون شايف بنت عمه , ماشية في حالها , عينيها في الارض , مبيطلعش من بقها العيبة , مش بتتكلم مع اي شباب , مش بتتأخر برة البيت , وييجي يقول عليها كلام فاحش .

 

الكلمة اللي قالها تدل ان فيه نوع من "التجاوز" اللي هو شافه او سمعه او حس بيه , ومفيش حاجة زي كدة بتيجي من فراغ  .

 

بالطبع عارف ان مفيش حاجة "خطيرة" حصلت , الا كان كشف العذرية اظهره , لكن ماذا عن الخطوات اللي بتحصل في البداية , ماذا عن الهزار والضحك , ماذا عن "الصحوبية البريئة"  . .

 

كل المقدمات ديه هي عبارة عن سلالم الشاب او البنت بتنزلها  , وكل سلمة بتؤدي للتانية ببساطة , من غير ما تحسي لغاية لما تلاقي نفسك في كابوس مظلم .

 

وارد تكون بريئة براءة ام المؤمنين عائشة رضي الله عنها , ويكون ده افتراء تام منه , ووارد يكون فيه عدد من التجاوزات اللي انتي ممكن شايفاها "عادي يعني" , لكن في مقياس الشرع حاجة تاني .

 

احنا مش بنعاتب ولا بنحاسب , احنا بنعرض تحليل كامل للصح و الغلط , عشان نحل المشكلة .

 

لو كان حصل اي شئ زي كدة , استغفري ربنا فورا , لازم من جواكي تحسي بالندم الحقيقي , ويكون في قلبك نية حقيقية علي عدم تكرار ده تحت اي سبب

 

 ----------------------------------------------------------------------

 

• التجارب العاطفية الفاشلة المتكررة

 

يعني في البداية الشاب اللي كان في ثانوي , وبعدها ابن عمك التاني , وبعدها الخطوبات التلاتة .

 

وان كان فيه منها اللي انتي ضحية فيها (الخطوبات التلاتة), ففيه منها الغلطة اللي حذرنا منها كتير (الشاب في ثانوي و ابن عمك ) , وهي عدم التواصل او التعلق بشخص مش جاد , ومفيش ارتباط حقيقي بينكم .

 

مشكلة اي بنت انها تعلق قلبها بانسان مش جاد , انه بيدمرها عاطفيا لما بيخلع منها بالذوق , او الانكي لما يخونها مع واحدة تانية , خيانة عاطفية قصدي

 

و كانت النتيجة ان الشاب الاولاني باعك فورا , وابن عمك رماكي اول ما شاف زميلتك  اللي انتي معرفاهم علي بعض .

 

و النوع ده من التسيب و التساهل و الانفتاح غير السليم في العلاقات بين الذكور و الاناث  ,هو السوس اللي بينخر في عمق اي ارتباط حقيقي , و لما ييجي اصحاب الدين يقولو يا جماعة خلو عندكو نخوة و غيره وخلق , الناس تتهمهم انهم متخلفين  .

 

وانا استوقفني كلمة "انك رحتي فرحهم و رقصتلهم كمان" , اكيد مش هنتكلم عن الحكم الشرعي لحاجة زي كدة  لانه معروف , انا هتكلم عن البُعد النفسي  للحدث .

 

المشكلة ان بعد ما ابن عمك باعك و اتجوز زميلتك , انتي اصريتي انك تظهري كـ "strong independent woman"  وان روحك رياضية تماما , وان مش هامك , فانتي رحتي الزفاف , واظهرتي كل مظاهر السعادة و الفرح  علي وجهك , بينما انتي بتتقطعي من جوة .

 

ده تصرف مراهقين , تصرف واحدة حاطة همها انها تثبت للناس انها قوية و مش بتتكسر , و المصيبة انه جه علي حساب استقرارك النفسي و جهازك العصبي , واللي مش هيقدر يتحمل ضغط اكتر من كدة  .

 

لو كنتي صرختي , لو كنتي صوتي , لو كنتي بكيتي , وبعدها آمنتي ان ده واقع , وان هو اساسا لا يصلح كزوج ليكي , يعني ان كان باعك وانتو علي البر , امال كان هيعمل فيكي ايه لما يكون معاكي 3 عيال ؟

 

لو كنتي عملتي كدة كنتي فرغتي عن نفسك المعاناة اللي انتي حاسة بيها دلوقتي , لكن كبتها و التظاهر بالفرح و البهجة , محدش استفاد بيها , وانتي ماخدتيش منها الا حرق اعصابك و بس

 

------------------------------------------------------------------------------------

 

• الخطوبات التلاتة

 

الأول كان بخيل , والتاني مفيش تفاهم بينكم , والتالت باعك زي ابن عمك  .

 

والحقيقة ان لما خطوبة بتتفشكل , فديه اصلا علامة ايجابية مش سلبية .

 

لان اساسا الخطوبة معمولة عشان كدة , هي فترة اختبار للزوجين هيعرفو يعيشو باقي حياتهم مع بعض ولا لا , فلازم اقول للتلاتة كتر خيرهم .

 

كتر خيرهم انهم اظهرو تعاملهم الحقيقي معاكي وانتو لسة علي البر, كل واحد فيهم تعامل معاكي بالشكل اللي كان هيتعامل معاكي فيه بعد الزواج , فلما يكون صادق و امين في طباعه من دلوقتي , ديه حاجة يشكر عليها .

 

لان فيه غيرهم للاسف محترف التمثيل , وبيقدر يخبي كل طباعه لبعد ما يحصل "التدبيس" و تتجوزي , و ابقي اطلبي الطلاق بقي لو تعرفي .

 

و يا سلام لما يظهر الوجه الحقيقي بعد عيل و اتنين  ,اللي هو الطلاق هيكون مؤلم و دموي .

 

ففعلا من غير هزار , هما مشكورين جدا ان الاولاني عرفك انه بخيل , والتاني  عنده معايير معينة انتي شايفاها مش صح , والتالت صريح معاكي من اولها , يا بنت الناس انا عايز اعيش حياتي خروجات و فسح و اسكندرية , انا مش بتاع جواز .

 

انتي هتعرفي قد ايه اللي عملوه كويس , لو تخيلتي ان حد فيهم كان عمل كدة بعد الجواز  , وقتها هتتجنني .

 

يا تستحملي حياة فيها عذاب , يا ترجعي بيت ابوكي و معاكي اللقب اللي المجتمع بينظرله نظرة عنصرية بغيضة : مطلقة .

 

ولو تابعتي معانا في الصفحة , اكتر من حالة بيكون حلها الوحيد هو الطلاق , واللي كانت تتمني الزوجة انها شافت الوجه الحقيقي لزوجها اثناء الخطوبة , فكانت فورا هتنهي العلاقة بكلمة و خلصت .

 

احمدي ربنا انهم ظهرو بالشكل ده من دلوقتي , واعرفي انه حاجة كويسة .

 

والحقيقة ان ده ينبهك لشئ مهم , ان في المستقبل لما ييجي حد تاني يتقدملك , لازم "تكشفي" عليه .

 

مش طبيا طبعا , لكن في نقطة الطباع و الخلق و الصفات و وجهات النظر و طريقة التعامل , عشان تعرفي هي فيه توافق ولا لا .

 

ولو لقيتي توافق مبدئي , وافقي علي الخطوبة , وطول فترة الخطوبة لازم تتأكدي انه بالفعل انسان يصلح ليكي كزوج , مش مجرد شكله محترم .

 

عشان متكرريش المأساة اللي حصلتلك , وتتجنبي اي فخ اكبر من كدة  , ربنا يحفظنا

 

-------------------------------------------------------------------------

 

فالشئ اللي ممكن ننهي بيه كلامنا , هو انك محتاجة تعملي كذا حاجة

 

•  ترجعي لربنا اكتر , وتعترفي بينك و بين نفسك عن اي تجاوز حصل في السنين اللي فاتت , وتستغفري ربنا عليه  , و تنوي من قلبك انك عمرك ما هتكرريها

 

• تمسحي من قلبك وياريت ذاكرتك كل الوجع اللي فات , صحيح انها مؤلمة و متعبة , بس لما تحطي في بالك ان ربنا حفظك من مصير تاني اكتر سواد , هتعرفي انك في نعمة

 

• متكرريش غلطة التواصل مع حد تاني , انتي مبتقيتيش صغيرة او مراهقة , اي تواصل مع اي شاب لاي سبب محرم شرعا و هيدمرك نفسيا  , انتي مش ناقصة , اقفلي قلبك تماما لغاية لما ييجي ابن الحلال اللي يخبط علي الباب

 

• متبصيش للدنيا بسواد , الامور بخير , انتي بقيتي كويسة , محصلكيش حاجة من الحاجات اللي مش بتتصلح , مفييش طلاق او حمل ربنا يحفظك , اللي قالوه عليكي لسانهم هيتقطع بس انتي انسيه , و متقفليش باب الجواز لان ممكن ييجي فعلا ابن الحلال

 

بالتوفيق يا رب