العنوان : الإحساس بالنقص

القسم: #النفسي

الرقم: 67

السؤال:

 

انا عندي 19 سنة و مش عارفة ليه كتير بحس ان عندي شخصيتين لما ببقا مع اصحابي بضحك واما ابقا لوحدي في بيتنا احس ان محدش فاهمني واهلي كلهم بيفهموني غلط ودايما قاعدة في اوضتي عشان بحس ان محدش فيهم بيعجبوا حاجة انا بعملها ابدا

 

ودايما نعمل مشاكل سوا وخصوصا مع امي ببقا نفسي افهمهم انا عاوزه اي بس محدش بيديني فرصة اعمل دا  وبالتالي بقعد اعيط وبكتئب  ودا غير كتير اوي بتكسف اخرج عشان وزني زايد و كمان وشي فيه حب الشباب اللي عندي فبتكسف من نفسي

 

وبرضو احط همي في الاكل وانام واكل واعيط لحد ما بقيت فظيعة ممكن حل

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

مشكلتك متعبة , ومؤلمة , بس من حسن الحظ ان حلها سهل إن شاء الله . .

 

من ناحية المشكلة فعلا مؤلمة , ولو تركتيها هتأثر سلبا علي جهازك العصبي و صحتك النفسية , لكن من ناحية تانية هي من المشاكل المتكررة عند كتير من المراهقات , و اللي حلها مقدور عليه , لا محتاجة طبيب و لا اخصائي نفسي , محتاج بس منك شوية ارادة , وعزيمة علي تنفيذ الخطوات اللي هنقولها . .

 

بداية انتي مش عندك شخصيتين , ولا فيه فصام ولا حاجة , كل الموضوع ان أفراد أسرتك تتعامل معاكي بجهل شديد للأسف , فده صنع عندك انطوائية شديدة , وعزلة مستمرة , ضيفي لده احساسك بالنقص نتيجة حاجتين (الوزن + حب الشباب) , فده ساهم مع الوحدة اللي كانت موجودة اصلا , في صناعة جو من الإكتئاب عليكي . .

 

و أكبر أزمة في المشكلة عندك , انها من النوع المستمر , والمتسلسل , واللي معناها ان وجودها بيجعلها تستمر , وتزيد و تتضاعف , وكل عنصر من عناصر المشكلة بيزود عنصر تاني فيها . .

 

فالعزلة اللي عندك بتزود الاكتئاب , والاكتئاب بيجعلك منعزلة أكتر , والاتنين بيخلوكي تاكلي اكتر و تنامي اكتر و تضيعي اليوم , والاكل و النوم الكتير هيزود الوزن , فده هيعمق عندك أكتر الإحساس بالنقص , وبالتالي هتزدادي إحساس بالعزلة و الضيق و . . . . وهتلاقيها سلسلة من العناصر اللي بتزود بعضها , وهتحسي كأنك غرستي في بحر من الرمال المتحركة , اللي كل خطوة بتعمليها عشان تطلعي منه , بتخليكي تغرسي أكتر . .

 

يعني باختصار , تم صنع دائرة مغلقة حواليكي , هتستمري بالدوران داخلها للأبد . .

 

مالم , انتي تكسري الدايرة ديه , وتحطمي احد العناصر اللي فيها , عشان تخرجي منها و تستريحي . .

 

خلي فكرة الدايرة ديه في بالك وانتي بتحلي مشكلتك , عشان تعرفي تتعاملي معاها , وعشان تكوني فاهمة المسار اللي هتمشي فيه عامل ازاي . .

 

الحل مش مستحيل , بس مش مُيسر قوي , محتاج منك شوية مجهود ووقت و إرادة . .

 

 ---------------------------------------------------------------------------------------------

 

ولو هنسرد المشاكل اللي قلتيها , فممكن نلخصها في 4 نقط بالتحديد :

 

• الشعور بالوحدة .

• المشاكل بينك و بين اسرتك .

• الإحساس بالنقص .

• الإكتئاب .

 

لازم نتكلم عن كل نقطة علي حدة , عشان نقدر نحل المشكلة . .

 

لو هنبدأ بالإحساس بالوحدة , فانتي من دلوقتي لازم تكسري دايرة العزلة اللي حواليكي . .

 

كنا اتكلمنا بالتفصيل قبل كدة عن العزلة و الانطوائية هنا , في رسالة : العزلة الإختيارية , و  عذاب الإنطواء

​

​

لازم لازم , تبدأي تكسري السور الوهمي المصنوع حواليكي , لازم تختلطي بالناس اكتر , والا هتلتهمك الوحدة و تجننك  .

 

و لما بقول تختلطي بالناس لا اقصد التخلي عن حياءك او عفتك , ممكن جدا يكون كل تواصلك مع فتيات محترمات و منتقبات , ويكون كل تعاملك معاهم بس , أكيد مش هنقولك علي خطوة ما الا لو كانت موافقة للشرع الحنيف .

 

بس لابد بالفعل من صناعة فرص للتواصل مع ناس حقيقيين , ابعدي عن النت لأنه هيعمق عندك الشعور بالوحدة , شوفي مسجد قريب منك و اتعرفي هناك علي فتيات محترمات , شوفي لو فيه مكتبة عامة و روحيها , انزلي الجامعة حتي لو عندك محاضرات هايفة , شوفي لو فيه إمكانية انك تشاركي في نشاط تطوعي زي جمعية خيرية , لو تعرفي تزوري ملجأ للأيتام حتي لو مرة في الاسبوع , اضعف الإيمان انك تزوري قاريبك , وتتواصلي معاهم . .

 

انعزالك أمر خطير , وهيعمق المشكلة فورا , وزي ما قلنا من شوية , علاج مشكلتك بكسر حلقات الدايرة المفرغة اللي حواليكي , وده شئ بالغ الأهمية . .

 

أقل شئ وغير مقبول بأقل منه , إنك تتكلمي بالتليفون مع كام واحدة من زميلاتك , اصلا البنات غالبا بيحبو "يرغو" كتير , فمش هتلاقي صعوبة انك تضيعي شوية وقت مع كام واحدة , علي التليفون من غير ما تروحي ولا تيجي  .

 

و اياكي تتكسفي من وزنك او من حب الشباب  , انتي لو تعاملتي بثقة مع نفسك و تصالحتي مع جسدك , هتلاقي نفسك استريحتي جدا , وشوفي علي اليوتيوب فيه كام ممثلة سواء عربية او امريكية , سواء وزنها زايد او عندها حاجة معينة انتي ممكن تعتبريها انها عيب في وشها , بينما هي متصالحة تماما مع نفسها  .

 

-----------------------------------------------------------------------------------------

 

تاني نقطة   : المشاكل المستمرة مع اسرتك . .

 

لاشك أن هما الطرف اللي صنع المشاكل المستمرة , انتي في السن ده لابد انك تلاقي منهم الاحتواء الكامل , و التفاهم و التواصل السليم . .

 

لكن هنعمل ايه , ليس كل ما يتمناه المرؤ يدركه , وكون إن هما مش فاهمين ازاي يتواصلو معاكي , فديه مش نهاية العالم . .

 

انتي في ايدك عدد من الخطوات , واللي لو عملتيها ممكن تحلي بنسبة كبيرة المشكلة في التفاهم و التواصل , و تلاقي العلاقة بينكم اختلفت بشكل كبير . .

 

 

• أولا , وأهم نقطة , اقفلي باب الجدال معاهم . .

 

 

 

• حاولي تفتحي معاهم المواضيع المشتركة . .

 

 

 

• نقطة مهمة  : متقوليش علي كل اهتماماتك ليهم .

 

• حاولي تقدمي السبت و الأحد

 

 

 

• بالنسبة للتعامل مع الوالدة , ارمي الكورة في ملعبها .

 

 

 

• هاتي هدية لوالدتك .

 

 

كل الخطوات ديه كانت عن النقطة المهمة اللي اسمها  : المشاكل مع الأسرة

 

 

نوصل لنقطة بالغة الأهمية , وهي الإحساس بالنقص . .

 

انتي مذكرتيهاش صراحة في الرسالة , لكن للأسف هي واضحة من كلامك , ومن الشعور اللي عندك . .

 

و الشعور بالنقص , هو اللي بييجي لما الشخص يكون حاسس بالضيق الرهيب تجاه شئ معين فيه , غالبا بيكون شئ جسدي  .

 

و الشعور ده مدمر حرفيا , ممكن يدمر حياة الشخص , وصحته النفسية , وممكن يقلب بسهولة لعقدة نقص مستمرة معاه .

 

وانتي اتكلمتي عن حاجتين بالتحديد , الوزن الزايد , وحب الشباب اللي في وشك .

 

والأزمة ان الشعور بالنقص بيصنع اكتئاب عند الشخص , والاكتئاب بيدفع الشخص في بعض الأحيان لتلات حاجات مدمرة .

 

الأكل الكتير , النوم الكتير , اليأس . .

 

و التلات حاجات دول هما أساسا بيزودو الوزن بشكل مستمر .

 

فالوزن الزايد صنع عندك احساس بالنقص , والاحساس بالنقص بيزود الاكتئاب , والاكتئاب بيخلي الشخص ياكل , والاكل بيزود الوزن . .

 

زي ما قلتلك , هي دايرة مغلقة هتدوخ الشخص اللي عايش فيها , ومش هيخرج منها مالم يكسر الإطار اللي مكلبشه فيه , عشان تتغير حياته .

 

لو هنبدأ بحب الشباب , فهو بالفعل شئ سهل ومؤقت , و90% من اللي عندهم حب الشباب بيختفي بعد سنوات قليلة من الإصابة بيه , فمتقلقيش علي الإطلاق , وثقي ان ده شئ مؤقت .

 

ده غير ان اصلا ده مش ذنبك و ملكيش يد فيه , واي جاهل هيتضايق منك عشان موجود عندك ثقي انه مش بيفهم حاجة .

 

نصيحة بس , متحاوليش "تفرقعي" اي حبة فيهم , لانها ممكن تفضل موجودة و متروحش , سيبيهم تماما , وتدريجيا هيروحو , ولازم تتصالحي مع نفسك في النقطة ديه .

 

-------------------------------------------------------------------------------

 

بالنسبة للوزن الزايد فهو شئ لابد من تغييره , مش بس عشان حالتك النفسية , كمان هيفرق معاكي كتير كصحة  جسدية , وكفرص عمل , حتي في فرص زواج , فالسعي وراء "جسد صحي" هو شئ مطلوب .

 

و فقد الوزن شئ مش مستحيل , ومش محتاج لا عملية ولا دكتور ولا حبوب ولا حاجة , محتاج بس منك : سياسة النفس الطويل .

 

معناه ايه ؟ ؟

 

لو انتي فكرتي او خططتي عشان "تخسي" خلال شهر او شهرين , يبقي بتضحكي علي نفسك , ده مش موجود اصلا , واي خطوات عشان تعمليها في السبيل ده نتايجها سلبية .

 

بل ان حتي اللي بيضغطو علي نفسهم عشان يخسو كتير في وقت قليل , بيكون جسمهم مستعد جدا انه يزيد في الوزن مع اول خلل في البرنامج الغذائي بتاعهم , وده غالبا اللي بيحصل , وغالبا بيزيد وزن اكتر من اللي هو كان فيه . .

 

فالحل السليم و الصحي , هو سياسية النفس الطويل . .

 

يعني ايه ؟

 

يعني تقولي انا هخس كيلو واحد في الشهر ,  مش محتاجة اكتر من كدة , مورناش حاجة , ومش مستعجلين . .

 

كل اللي محتاجة تعمليه , انك تنظمي اكلك , بس كدة , كلي شوية سلطة مع الاكل , متحرميش نفسك من اي اكله بتحبيها , متقوليش مش هاكل عيش ولا مكرونة , كلي كل حاجة بس كمية اقل شوية . .

 

و بالتوازي , اعملي رياضة في البيت , لمدة 10 دقايق في اليوم , متزوديش عن كدة , لا تروحي جيم ولا نادي . .

 

ثقي انك لو مشيتي علي الخط ده لمدة سنة , هتلاقي نفسك اتغيرتي تماما , شوية ضبط في الاكل , قللي شوية الكمية , متاكليش بعد الساعة 9 , 10 دقايق رياضة في البيت .

 

و زي ما قلتلك , حطي لنفسك خطة تخسي كيلو واحد بس في الشهر , مش لازم اكتر , فعلي اخر 2019 , تلاقي نفسك خسيتي 12 كيلو , وده رقم كويس جدا .

 

لما تبدئي تعملي ده , هتحسي بتحسن واضح في حالتك النفسية  , وفي جسمك اللي هيتفاعل مع التغيرات ديه .

 

و الأهم , انك تعملي تصالح تام مع كل حاجة فيكي , سواء حب الشباب او الوزن , اياكي تضايقي من حاجة فيهم .

 

 

وقتها هتلاقي احساسك بالنقص اختفي , بقي عندك ثقة بالنفس بشكل رائع , وبقيتي فعلا انسانة تانية .

 

-------------------------------------------------------------------------------

 

بالنسلة للعنصر الأخير , الاكتئاب .

 

انا خليته في الآخر , لأن حل التلات نقط اللي فاتت (الوحدة , المشاكل مع الاسرة , الاحساس بالنقص) هيصنع حل مباشر لكل الاكئتاب و الحزن الي عندك .

 

الشعور بالاكتئاب اللي عندك هو نتيجة  , مش مشكلة في ذاته , وهو نتيجة تراكمات كذا حاجة , وهيتحل فورا اول ما تحلي المشاكل ديه .

 

كمان حاجة ,لازم  تتوقفي عن العياط, العياط مش هيحل مشكلة , وهيزود الأزمة و خلاص , لما تحصل مشكلة معينة واجهيها مش تهربي منها بالبكاء .

 

بالتوازي حوالي متضيعيش وقتك  , عندك عشرات الحاجات المفيدة اللي ممكن تستغلي بيها وقتك , مش هتغلبي انك تنظمي وقتك بقدر الإمكان , لان الفراغ هو اكبر داعم للاكتئاب و الحزن

 

-------------------------------------------------------------------------------------------

 

زي ما قلتلك في بداية الكلام , مشكلتك مؤلمة , بس حلها في ايدك , انتي اللي ممكن تغيري كل حاجة وتحلي المشكلة .

 

ارجوكي , ابدئي اكسري الحلقة المفرغة اللي حواليكي , امشي خطوة خطوة بالراحة و من غير استعجال , ولو وقعتي قومي تاني و استمري , هتلاقي حياتك اتغيريت تماما ان شاء الله 

​