العنوان : اليأس التام

القسم: #النفسي

الرقم: 90

السؤال:

 

 

من و انا صغيرة و انا بعاني ان ان فيه بخل من والدي . لغاية لما اتجوزن من قريب .

 

جوزي بيحبني و بحبه بس المشكلة محرومين من كل حاجة عشان الديون اللي علينا . هو شغال من الصبح و ييجي بالليل و انا مقروفة مع البنت الصغيرة في البيت . لا متهنية علي جواز ولا فسح ولا خروج ولا اي حاجة . حتي كتير بنزل عند ماما اكل عندها و بكون مكسوفة منها

 

جوزي مبقاش يقولي اي كلمة حلوة زي زمان اول ما ييجي ياخد البنت معاه بالحضن و انا مش في باله خالص .

 

حاسه عمري ضاع مني و حاسه اننا هنعيش طول حيانتا فقرا بنسدد في الديون لما كرهت نفسي و عيشتي و بقيت عصبية جدا

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

انتي بتعاني من كذا حاجة بالتوازي . تراكمهم مع بعض اللي صنع عندك حالة اليأس التام اللي عندك حاليا

 

لو بدأنا بالكلام عن بخل الاب وانه هو السبب ف ده مش سبب منطقى هو ممكن يكون فعلا كده لكن مش شرط انه يحصل نفس النتيجة مع كل بنت عاشت فى الظروف دى  , فبلاش تزعلي منه لانك شايفة الظروف كويس وانتي قلتي انهم عاديين بسطاء مش مليونير مثلا وبخل عليكي.

 

وبالنسبة لعدم اهتمام زوجك بيكي فانتي لما سألته وضحلك السبب اللى قد يكون جدا صادق فيه وطبعا انه يشيل هم كبير كده وديون لو لا قدر الله ما قدرش يسدها هيحصل مشاكل كتير مش مشكلة واحدة فطبعا حقه انه ينسى اى حاجة او اى اهتمام

 

ومتنسيش ان ده وضع مؤقت بس لحد ما ربنا يفرجها وكونه بيهتم ببنته ده شئ جميل مش بس رحمة منه لانها صغيرة واضعف لكن يمكن بيهرب لها من الحالة النفسية السيئة اللى بيمر بيها لانها طفلة يعنى ملاك وديه حاجة المفروض تفرحك .

 

ايه رأيك في فكرة انك تشوفي شغل  , اهو منها تشاركي وتحسني دخلكم مش تبقى قاعدة محملة جوزك كل حاجة خصوصا وانتي عارفة انه غصب عنه طبعا دا مش اجبار عليكى لكن تفضل وكرم منك ودى مميزات الست الجدعة الاصيلة اللى تقف جمب جوزها في اصعب الظروف وتصبر معاه هو يمسك مجداف وهى تمسك المجداف التانى فى مركب الحياة لحد ما يعبروا سوا بحر الديون والهموم اللى هما فيه

 

وبلاش تقارني نفسك بغيرك حتى لو الحال صعب فيه الاصعب منك واسألى الله من فضله وطلعى صدقات كتير حتى لو مبلغ بسيط فأجمل حاجة ان الانسان يتصدق فى العسر مش بس فى اليسر وهو مش اكرم من ربنا.

 

--------------------------------------------------------------------------

 

فممكن الخص ليكي النصايح هنا علي شكل نقط  :

 

• خلي جوزك يفكر في البحث عن شغل جديد افضل من ده

 

• فكري انتي في البحث عن شغل لو ده متاح

 

• بعض المهن ممكن تعمليها من البيت , بس في حالة انتي عندك مهارة فيها , زي الترجمة او التصميم او غيره

 

• هل فيه فرصة للسفر  , دولة عربية او اجنبية ؟ ممكن تحل المشكلة

 

• لازم تعودي نفسك تشوفي المصايب الحقيقية للناس , تتخيلي الناس اصحاب الامراض المزمنة و المعاناة المستمرة , والي بيكون منهم ناس في سنك و يمكن اصغر , الناس اللي هيموتو علي ضفر طفل صغير و مش لاقيينه , اللي مفتقدين نعمة الأب و الأم , وقتها هتعرفي ان انتي بالفعل في نعم لا تنتهي

 

• من الطرق الجميلة للاحساس بنعمة معينة , انك تتخيلي اختفائها . تخيلي لو كنتي مكان زوجة تانية مش مكتوب لها انها تكون ام للابد , لو كنتي مكان زوجة تانية زوجها بيضربها و يهينها يوميا , ثقي ان ربنا كرمك من وسع بس انتي مش واخدة بالك

 

• من الحاجات اللي ممكن تهون عليكي انك تعرفي اننا كلنا عايشين في الكوكب ده , كنوع من الاختبار عند رب العالمين , و بالتالي حتي لو مكانش فيه سعادة او راحة مفيش مشاكل , كلها سنين و الاختبار يخلص بحلوه ومره , و نقف بين يدي الله , ونسأل الله وقتها ان يجعلنا من اهل الجنة , افتكري دايما دعاء الرسول صلي الله عليه و سلم : اللهم لا عيش الا عيش الاخرة

 

• فكرة الفسح و الخروج ممكن تتطور شوية , يعني ممكن تعملي في البيت حاجة حلوة و تخرجو و تاكلوها , من غير ما تشترو حاجة , ممكن تشوفو مكان قريب للخروج من غير ركوب , الموضوع مش مستحيل

 

• لازم تسامحي جوزك علي معاناته اللي بيعاني منها , فيه رجالة غيره قاعدين مكسلين في البيت و ميهموش فيه ديون ولا بلاوي , فيه غيرهم يسعي ورا الفلوس عشان الحشيش و البانجو , فسامحيه و متحاسبيهوش علي حاجات بسيطة زي كدة

 

• اعرفي ان الحب بيكون بالمعاملة و المواقف , مش بالكلمات و الهدايا , لو مكانش بيحبك كان قعد في البيت و ريح نفسه , مكانش هيتجوزك من البداية و يعاني المعاناة المستمرة اللي هو فيها حاليا

 

• توقفي عن التفكير في الماضي , متقوليش انا راح عليا شبابي و مستمتعش بكوني زوجة , فكري في اللحظة الحالية

 

• توقفي عن مقارنة نفسك بغيرك , انتي متعرفيش الناس بتعاني ازاي , والناس اللي رايحين و جايين بفلوس و فسح و صور , ممكن يكونو بيعانو معاناة رهيبة انتي مش شايفاها , ولو اتيح ليكي انك تعرفي تفاصيل حياتهم بحلوها و مرها , مش هتحبي انك تكوني مكانهم

 

• لا تخجلي من امك , متتكسفيش انك متقله عليها ,في النهاية انتي بتاكلي من خير والدك اللي المفروض هو يعطيكي منه , و هي بتحبك و عمرها ما هتضايق منك , تخيلي لما بنتك تكبر انها تتكسف منك و متكونش عايزة تتقل عليكي , هل ده ينفع  ؟

 

• متزعليش ان جوزك بيحب بنتك بجنون , ده يدل علي معاناته من جوه و انه ما صدق لقي منفذ سليم للعاطفة ,انتي المفروض تتضايقي لو كان بارد الإحساس معاها

 

• لازم تركزي في التخلص من العصبية اللي عندك , اللي ممكن تأذيكي بشكل مستمر

 

• صلي كل يوم قبل ما تنامي ركعتين بنية ان ربنا يفرج الكرب و يزيل الهم