جهاد الكيبورد
الرسالة السابقة
العنوان : جهاد الكيبورد
القسم: #السياسي
الرقم: 21
السؤال:
كل ما اقرا تعليق يشتم في السيسي ولا يتكلم عن فلسطين ولا يدافع عن اطفال سوريا , الاقي حد سخيف يهبد بكلمة "جهاد الكيبورد" تريقة عليه و عشان يحبطه
واحيانا فعلا بحسب ان كل اللي بيتكتب علي الفيس ملوش لازمة واهو تفريغ طاقة وخلاص
*-*-*-*-*-*-*-*-*-*-*-*-*-*-*-*-*-*-*-*-*-*
الإجابة :
مين قال ملهاش لازمة , الفيسبوك , وكل ما يكتب فيه من بوستات و تعليقات ولايكات ليه تاثير تراكمي علي المدي البعيد , هو غير محسوس حاليا لكنه بيعمل حاجة بالغة الخطورة , اسمها : تشكيل الوعي . .
و "جهاد الكيبورد" ممكن فعلا نطلق عليه كلمة جهاد , لان اللي بيأديه بيبذل المستطاع حاليا عشان يوضح الحقايق , ويفهم المخدوع , ويفضح الكذاب .
"جهاد الكيبورد" هو حاجة مؤثرة , لكن لابد يتواجد في إطارعدد من الأعمال الأخري بالتوازي عشان يجيب تأثيره , وأهمها الاحتكاك بالناس في أرض الواقع , وتصحيح المفاهيم الغلط اللي عندهم , أو ما يسمي بمعركة الوعي .
أكبر سبب لنكسة ثورتنا , هي الشعب المخدوع , اللي حارب الثوار , وكان بيبلغ عنهم عشان ييجي الأمن يقبض علي المعارضة والمتظاهرين , الشعب الغلبان الفقير اللي اصلا نزلنا عشانه . .
ثورتنا مفشلتش بسبب تنافس و تناطح قوي الثورة مع بعضها , قد ما فشلت بسبب غياب وعي كافي عند الناس . .
طب هو الفيس بوك بيصنع وعي وبياثر في الناس ؟ ؟
أكيد طبعا , حتي لو انت مش شايف بعنيك حاليا لكن ليه تأثير تراكمي طويل المدي , وبيبان في الحاجات المهمة قوي , زي مظاهرات الأرض , واللي اغلب فئات الشعب كانت متفقة علي الجريمة ديه , لكن سطوة السلاح و سفك الدماء اللي منع الشعب انه يكمل حراك .
كل بوست انت بتنشره يمثل نقطة بتجري في نهر , متقدرش تقيم النقطة لوحدها , لكن تعالي بص علي النهر اللي فيه بلايين النقط , هتلاقيه قوة كاسحة تهدم اي حاجة قدامه . .
اللي رافض "جهاد الكيبورد" يا إما شخص نظرته قاصرة , وبيقيم بس الحاجات اللي بيشوفها قدامه , مع تجاهل اي تاثيرات متراكمة طويلة المدي , ساعتها الافضل ليه انه يسيب الكلية اللي بيدرس فيها باعتبار انها مش هتجيبله نتيجة ايجابية الا بعد سنين طويلة , ويروح حالا يشتغل ميكانيكي و يجيب قرشه بايده .
او بقي شخص سيساوي مغيب العقل و المنطق و القلب و الجوارح وكل شئ . .
--------------------------------------------------------------------------------
واحنا ممكن نطرح سؤالك بصيغة مختلفة عشان نتعرف عليه بطريقة أدق . .
السؤال هو "هل الفيس بوك ليه تأثير في تغيير الوضع الحالي ؟ ؟ "
الإجابة : أيوة
طب تعالي نسأل سؤال تاني قريب منه شوية
السؤال الجديد " هل الفيس بوك قادر علي تغيير الوضع الحالي ؟ ؟"
الإجابة لأ . .
إيه بقي اللغبطة ديه , هو شوية أيوة وشوية لأ . .
مفيش لغبطة ولا حاجة , صفحات و جروبات الفيسبوك و تويتر و غيره , ليها تأثير , لكنها ليست قادرة وحدها علي تغيير الوضع الحالي . . .
صفحات الفيس بوك يا ريس , زيها زي حاجات كتيرة , ليها تأثير "تراكمي" لا يستهان به , في حاجة كبييييرة جدا اسمها "صناعة وعي الشعب"
والوعي ده , اللي لو انتشر , وزاد , وكبر , هيكون قادر بالفعل علي عمل تأثير . .
او علي الأقل هيساعد مع عوامل تانية في تغيير الوضع بشكل متتخيلوش . .
مهو لما "عبد الرحمن سوار الذهب" رئيس اركان الجيش السوداني , تسلم السلطة في الخرطوم بعد هروب "جعفر النميري" , كان عنده الوعي الكافي إنه يسلم الحكم لحكومة منتخبة من الشعب . .
نفس الوعي ده , اللي غاب عن مواطن مصري فقير , بيدوخ من الصبح للمسا علي لقمة العيش , ولما جالته الثورة بالحرية بقي يتصل بقوة مكافحة الشغب عشان تيجي الشرطة تقبض علي المتظاهرين , وهو بيهتف الجيش و الشعب ايد واحدة . .
ثورتنا مفشلتش بسبب تنافس و تناطح قوي الثورة مع بعضها , قد ما فشلت بسبب غياب وعي كافي عند الناس . .
طب نكمل السؤال , هو يا تري الفيس بوك بيصنع وعي ؟ ؟
الحقيقة ان ليه دور في صناعة الوعي , هو لوحده غير كافي لكن ليه دور اكيد , واسئل في كدة اي خبير في الحملات الإعلانية , اللي هيكلمك عن ما يسمي التأثير التراكمي للتعرض للمادة الإعلانية في تغيير القناعات . .
الفيس بوك لوحده مش كفاية , لكن لو هو المتاح معاك حاليا متوقفهوش , ابدأ طور في أدائك و اسلوبك و محتوي البوستات , وتكون كدة عملت اللي عليك