العنوان : الفضول والعقاب

القسم: #الاجتماعي

الرقم: 11

السؤال:

 

السلام عليكم ورحمه الله وبركاته

 

ساعدووني بجد انا بمصيبه

 

ابني سنه وثمانيه شهور وهوا بيلعب بحاجات تأذيه مثل الكهربا والمروحه والبتوجاز وحاجات كتيرة ممكن تأذيه

 

انا من خوفي عليه بتعصب وبضربه بس مو ضرب عنيف بس بضربه عشان يخاف ومايكررها

 

والمشكلة الاكبر انه جد ابني ساكن بالبيت اللي تحت بيتي يصدف انه ابني يقعد معاهم بعض الوقت وجد ابني محااافظ جداااااا ع اشياء البيت

 

لدرجه ممكن يضرب ابني عشان ما يلمس الشاشه او مبرد الميه او التلاجه وانا هالشي يدايقني واضرب ابني عليه

 

ساعدوووني اترجاكن كيف اتخلص من عصبيتي وكيف اتعامل مع ابني بهدوء

 

وكيف اخليه يبعد عن الشي اللي يأذيه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

وعليكم السلام و رحمة الله

 

ابنك بيتمتع بميزة موجودة عند بعض الأطفال , الا وهي الفضول الاستكشافي , واللي بيدفعه للاجابة عن أسئلة بتدور في ذهن الأطفال . .

 

هو ازاي المكوة بتسخن ؟ ؟ هو فيه نار جوة  ؟  ازاي التليفيزيون فيه ناس بتتكلم من جواه ؟   ازاي الموبايل بشوف فيه خالتو بتكلمني ؟ ليه بنحط فيشة في المكان ده فالجهاز يشتغل ؟ فيه ايه جوة ؟ ؟

 

ولو إنك تعلمي القيمة الحقيقية للكنز اللي في عقله , واللي بيدفعه انه يجاوب علي اسئلته الذاتية , ويشبع فضوله , لو بالفعل انتي تدركي قيمتها قد ايه  ,كنتي سيبتي كل حاجة في ايدك , وفرغتي نفسك ليل و نهار لتمنيتها و اثرائها عنده . .

 

لو تعرفي قد ايه الفضول ده شديد الأهمية لأي طفل , عشان يشكل عقله بحيث يفكر بشكل دائم ومستمر , ويسعي للتفوق في المجال اللي هيحبه , ما كنتي مديتي ايدك عليه ولا عاقبتيه . .

 

بعض الأطفال بالفعل بيكون عندهم الشغف ده , و الحيرة لاستكشاف كل ما يحيطه في العالم . .

 

ووقتها  بيكون رد فعل الوالدين , أحد تلات خيارات . .

​

---------------------------------------------------------------------------

 

الخيار الأول انهم يتصرفو بجهل شديد – سامحيني علي اللفظ – و إهمال جسيم , ويبدءو بمعاقبة الطفل علي اللي بيعمله , هو ليس عقابا علي الفضول في حد ذاته لكن علي حاجة من تلات حاجات . .

 

إما خوفا عليه من الأذي اللي ممكن يصيبه من العبث بحاجات تأذيه (متل ما انتي بتعملي معاه) , او خوفا علي الأجهزة من التلف بسبب عبثه (متل ما جده بيعمل ) ,  او يكونو شايفينه بيضيع وقته  في حاجات هايفة و سايب الحاجات اللي هما شيافينها اهم زي المذاكرة (وده مع طفل في سن المدرسة)  . .

 

و بالرغم من ان فيه حلول تتفادي المشاكل ديه جميعا , وتحافظ علي كنز الفضول العلمي في عقله , إلا إن إهمال الاسر , بيجعلها غير مهتمة اصلا بالبحث عنها  ,او معرفة ازاي يتصرفو معاها . .

 

والمصيبة ان العقاب اللي بيناله الطفل , سواء لفظي بالزعيق فيه , او جسدي بالضرب , بيجعل عقله الصغير محتار , هو انا غلطت فيه ايه ؟ ؟ انا نفسي بس اعرفهم ايه اللي جوة اللابتوب ؟ ؟

 

و مع استمرار العقاب , عقله الصغير بيهتدي لتفسير ما , إذن التفكير غلط , والتساؤل غلط , والمفروض مفكرش في الاساس , ولو عندي اي نوع من الفضول هكتمه و اكبته, وعمري ما هسمع كلامه  . .

 

متخيلة يا فندم مدي الجريمة اللي بترتكب في حقه , وانتو مش واخدين بالكم  ؟ ؟

 

وبالتالي تدريجيا , هو هيقتل عنده اي وازع للفضول , وهيحبس عقله في منظور ضيق , من غير ما يتم اشباع فضوله , او حتي اثارة اي تساؤل جديد  . .

 

بل الأنكي  , ان هيحصل عنده ارتباط شرطي مباشر (تجربة بافلوف)  , بين كلا من "حب الاستطلاع" , و"العقاب" , وهيظل علي نفس المبدأ ده فترة طويلة , وبالتالي مبروك , حضرتك دمرتي عنده اهم وازع للتعلم و سعة الاطلاع و حب المذاكرة و سعة الأفق . .

 

و أهلا بيه في نادي الأطفال ضيقي الافق , قليلي الخيال , واللي غالبا بيفشلو دراسيا , او يكون ليهم عقول قوالب جامدة , من غير اي ابداع او تفكير . .

 

و لما تلاقيه في المستقبل مش قادر يفهم مسألة اشتقاق بسيطة , او رسب في اختبار الفيزياء , او معندوش القدرة علي انه يختار قرار في حياته ,  متلوميش اي حد , لانك عارفة السبب بوضوح . .

 

 ---------------------------------------------------------------------------

 

الخيار التاني اللي بتمارسه بعض الأسر  , هو اللامبالاة . .

 

يعني عدم الاهتمام اساسا باللي بيعمله  , لا هما بيعاقبوه و يلوموه , ولا هما بيشجعوه و يساعدوه  , بيسيبوه لحاله . .

 

و بالطبع  هما وضعهم افضل من النوع الأول , اللي بيعاقب و بيمنع الطفل من الابداع , لكن يظل في جزء كبير من التقصير تجاه الطفل . .

 

ان الطفل اولا لو اتساب لوحده في رحلته الاستكشافية , وارد جدا يمل , او يتعب , او يتم اغراءه من حاجات تانية اكثر جمالا , واشد جاذبية , زي التاب مثلا او الاغاني و الكارتون , وبالتالي يسيب رحلة الابداع اللي كان ماشي فيها و يمل سريعا . .

 

الشئ التاني ان الطفل لوحده مش هيعرف يستكشف , لابد من يد العون , والمساعدة من الأهل , مش للإجابة عن اسئلة ولكن لتيسير سبل البحث و الاكتشاف , بل و التكسير . .

 

فالنوع ده و ان كان افضل حال من الاول , الا انهم لسة بعيدين تماما عن المطلوب  . . .

 

---------------------------------------------------------------------------

النوع التالت والأهم . .

 

وهو الآباء و الأمهات , اللي عندهم الوعي الكافي , انهم يفهمو قيمة الكنز اللي في عقل ابنهم , وانهم لازم يهتمو بيه اهتمام كبير , لا يقل عن اهتمامهم بصحته و نظافته . .

 

وبالتالي بيقومو باستشارة متخصصين في الشأن ده , او علي الاقل يبحثو اونلاين علي ما يسمي "فوائد فضول الأطفال" , عشان يعرفو ازاي ينموه بشكل سليم  . .

 

و يبدئو بالفعل . .

 

اولا يجيبوله كراسة كبيرة للرسم , واقلام ملونة كتير , يخليه يرسم اللي يجيي في باله . .

 

يشترو "مكواة" مستعملة او تالفة , بسعر بخس , ويدوها للطفل (لو كان عمره كبير شوية) بحيث يمسكها و يفكها حتة حتة   , وممكن والده يتحداه هل هيعرف يجمعها تاني زي ما كانت ولا لا , حتي لو مشتغلتش

 

يجيبوله لعبة قديمة شوية , يفك المسامير و يخلوه يتأمل كل جزء فيها , حتي لو اترمت بعدها . .

 

لما يبدا يتكلم يشبعو فضوله العلمي , باجابات تثير المزيد من الفضول عنده , و يجعلوه جائع بشكل مستمر للعلم . .

 

يجعلوه يشاهد بعض الوثائقيات المخصصة للاطفال , واللي بتفتح لهم مواضيع علمية هائلة  . .

 

ياخدوه عشان يزور حدائق و متاحف و معامل و حتي مصانع , بل انه حتي لو زار ورشة صديقه الميكانيكي , ويجلعو الطفل يشوفو ايه اللي بيحصل في السيارة . .

 

ديه نوعية من آباء و أمهات فاهمين , وعارفين يعني ايه ابتكار و ابداع و خيال , ومدركين أهمية الفضول اللي عندهم  . .

 

ده طفل بينشأ عنده نهم مستمر للعلم و المعرفة , لما يكون في اعدادي هيقضي وقته في المكتبة بدل البلاي ستيشن , في الثانوي هيكون غرقان في الموسوعة البريطانية بدل ما بيعاكس بنات , في الجامعة هيكون بيتجادل مع البروفيسر بتاعه بدل ما هو قاعد بيحب في كافية الكلية , ولما يتخرج هيشوف البعثات للخارج , بدل ما يقعد علي القهاوي . .

 

للأسف و بدون قصد انتي ساهمتي في ايقاف و فرملة عقله الابداعي , انتي خايفة عليه بس مفهمتيش ازاي توجهيه بشكل مناسب . .

 

بس الحمد لله ان سنه لازال صغير , وبالتالي لسة فيه امكانية كبيرة لعلاج الموقف بالكامل . . .

 

---------------------------------------------------------------------------

 

ايه بقي اللي يتعمل عشان نرجع نحافظ علي زهرة الابداع اللي في عقله ؟ ؟

 

مجموعة من الخطوات اللي لا بد منها  :

 

• بالطبع الحفاظ علي أمنه و سلامته مقدم علي كل شئ , وبالتالي انتي محتاجة تعملي اعادة ترتيب و تنظيم في البيت , بحيث ميكونش فيه اي شئ في متناول ايده , يكون خطر عليه , يعني لا يعرف يطول جهاز كهربي ولا حاجة تقع عليه

 

• لازم كل فيش الكهرباء تترفع لفوق اجباري , ممكن في اي لحظة يجيب مسمار و يحاول يدخله في الفيشة و تبقي كارثة , او بيكون فيه احيانا مدخل كهربا مش بتتفتح الا لما تدخل الفيشة نفسها , هتلاقوها اكيد

 

• لا يتم الصراخ عليه او لومه ابدا علي اي شئ فيه فضول او تفكير , طالما تم اعادة ترتيب البيت  ,وطالما مفيش اي خطر عليه

 

• لما يبدا يسال اسئلة علمية , تحاولو تجاوبو باللي تعرفوه , عشان يكون عنده حصيلة جيدة من العلم

 

• لو سال سؤال انتي مش عارفة اجابته , فاوعي تفتي او تقوليله اي حاجة , لكن مفيش اي مشكلة انك تقولي انا مش عارفة , ما تيجي ندور عليها مع بعض , ومن علي جوجل هتلاقي كل شئ , فالاعتراف بعدم العلم اولي بكتير من اي "فتي"  , ده غير انك هتعلميه فضيلة انه يقول للحاجة اللي مش عارفها , مش عارف

 

• لو سال اسئلة دينية كفرية (متعلقة بالذات الالهية او الاديان) فلا تلوميه ولا تنهريه , لكن اعطيه اجابات تتوازي مع سنه , وفيه مواقع وكتب كتير فيها نماذج للاجابات ديه

 

• لو سأل اسئلة "جنسية" فلابد برضه من عمل اجابات بسيطة تناسب سنه , وبرضه في مواقع فيها نماذج عن كل ده

 

• المهم في اي نوع من الاسئلة انك حذار تقول (حرام تقول كدة) , والا هتخوفيه من السؤال نفسه

 

• انزلي يا فندم و اشتريله لعبة بلاستيك رخيصة , ولما يلعب بيها و يزهق منها , فكيها قدامه , و خليه يبص علي كل جزء فيها و جاوبي علي اي سؤال يقولك عليه

 

• كراسة الرسم و الالوان ديه اساسية  ,او لو فيه سبورة "تخت او لوح" وطباشير , عشان يرسم و يبدع فيها

 

• لما يكبر شوية , اشتريله اجهزة كهربية مستعملة او بايظة من سوق الجمعة , و خليه يمسكها و يفكها حتة حتة , وقوليله ان لو انت شاطر هتعرف تجمعها تاني زي ما كانت , وخليه يصور بالموبايل الجهاز قبل ما يفكه , عشان يعرف ترتيب التروس و الاسلاك .

 

• لما يكبر برضه , اشتري جهاز شغال رخيص (قطر لعبة بالبطاريات) , وخليه  يفكه تماما , ويعيد تركيبه , والتحدي انه يخليه يشتغل تاني مش مجرد تجميع

 

• لما ييجي اي شخص يصلح اي جهاز في البيت , سواء جهاز كهربي او سباكة او اسلاك كهربا , خليه يراقبه ويشوفه بدقة , من غير ما يقرب طبعا , فلازم يكون فيه حد ماسكه عشان ميمدش ايده

 

• احرصو علي  زيارة المتاحف و المعارض المتخصصة , وخليه يشوف كل حاجة , ولو فيه شئ هو عايزه اشتروه فورا و باي تمن

 

• ابدئي دوري علي افلام وثائقية مخصصة للاطفال , او حتي او افلام وثائقية علمية عادية , بس يكون مستواها  معقول عشان يفهمها , ويشوفها بشكل مستمر

 

• يبعد تماما عن التلفيزيون و الكارتون وطيور الجنة و كل الحاجات اللي بتدمر كل طاقات التفكير الابداعي

 

• شوفي لو فيه مراكز متخصصة في مواهب الاطفال قريبة منكم , بحيث يقدرو ينمو موهبته بشكل ما

 

• لما يكبر حاولو يدخل يزور مصانع و يتعرف علي مكوناتها و آلياتها

 

• بالنسبة لجده  , وهي نقطة حاسمة , الأول زوجك يكلمه ان يا والدي احنا عرفنا ان مهم الطفل يعمل كذا كذا عشان الابداع و هكذا , وان هنحرص انه مش هيعمل اي مشكلة في اي جهاز, فبلاش الضرب او الشتيمة خالص

 

• لو وافق  , فلما يزوره تكون عينك عليه لحظة بلحظة , اول ما يقرب يخبط علي حاجة , امسكي ايد ابنك بالراحة واشغليه باي حاجة تاني , من غير اي لوم او زعيق فيه

 

• لو رفض و كان مش متفهم ده , يبقي لما يزوره يكون قاعد قدامك , وتكوني انتي جايبة لعبة معينة من لعبه , بحيث يلعب بيها في الارض بعيد عن الاجهزة الكهربية

 

• لو اصر الجد علي ضربه من غير ما يعمل اي مشكلة , فمن حقك بالاتفاق مع زوجك انه ميطلعش عند جده لغاية لما يفهم ازاي يعامل اطفال

​​

وياريت تقرأي بالتفصيل رسالة : اكتشاف الموهبة و كمان رسالة  : طمس الموهبة