العنوان : تمالك الأعصاب

القسم: #النفسي

الرقم: 40

السؤال:

 

لو سمحت انا بقالي فتره مش بقدر اتمالك اعصابي يعني لو زعلت او حاجه مبحسش بنفسي ببقي حاسه ان جسمي كله فيه وجع وببقي ماشيه ف الشارع مش حاسه بنفسي

 

بقيت بخاف اعدي الشارع عشان بكون قلقانه لا جسمي يثبت مكانه ومقدرش اتحرك شعور الخوف والقلق دايما جوايا

 

مبكرهش قد الانسان اللي يزعقلي لاني ف الوقت ده مبحسش بالامان حتي لو الشخص ده من اهلي بقيت بخااف من اي موقف اقابله بواجه ضغوطات

 

ودايما لما امي او حد من اخواتي يتخانق معايا مش بعرف اتكلم او ادافع عن نفسي بسكت لحد م بقيت بخاف من كل حاجه بقيت بخاف ارتبط ب اي شخص او اني احب شخص مع العلم اني عمري ف حياتي م حبيت حد ولا ارتبط بسبب الخوف اللي دايما جوايا

 

بتظاهر قدام النااس اني قويه ودايما متماسكه حتي لو ف الوقت ده كنت ببكي بس المهم اظهر قدام صحابي او اي شخص اني قويه ومبسوطه مبقتش بحس بالضحكه اللي كل يوم ارسمها ع وشي من كتر الضغوطات النفسيه اللي بواجها

 

بقيت بقول لنفسي اني هعيش حياتي وهخرج مع صحابي وهعمل كل اللي نفسي فيه بس بأحترام بس للاسف مع اني ببقي مبسوطه جدا مع صحابي بس برجع اخر اليوم افتكر تاني وارجع ادايق حاليا اعصابي تعبانه جدا

 

انا كان نفسي اتكلم مع دكتور نفساني واعرف اتعامل ازاي

مش عارفه اعمل ايه

 

*-*-*-*-*-*-*-*-*-*-*-*-*-*-*-*-*-*-*-*-*-*

 

الإجابة                    :

 

 

فكرة ذهابك لطبيب نفسي فكرة كويسة , وانا اشجعك فيها .

 

عدم ذهابك مش معناه ضرر كبير , لان علي اللي انا شايفه اللي عندك ده موصلش لمرحلة "اضطراب سلوكي" اللي هو مستعدي الذهاب بشكل فوري .

 

يعني اللي انتي حاسة بيه هي مشكلة بس مش مرض , و بشكل ما ممكن تعالجي نفسك , لو مشيتي علي اللي هنقوله هنا .

 

بس لو انتي كسلتي , او مكانش عندك الهمة الكافية , او معرفتيش تنفذيه , او نفذتيه و لقيتي الوضع بيتفاقم  , يبقي ساعتها لازم تروحي لطبيب نفسي , لانه هيفرق معاكي كتير

 

 

اللي عندك كمية زيادة شوية من "الحساسية" تجاه اي شئ فيه اهانة ليكي  .

 

والحساسية يعني تأثرك بالنقد او التوبيخ او اللوم او الاهانة  , بيكون اعلي من المعدل الطبيعي اللي باقي الناس بتحس بيه  .

 

وبيختلف رد فعل الشخص اللي عنده حساسية زيادة , حسب مفاتيح شخصيته هو او هي  .

 

فبعض الناس (خاصة البنات) لما بيكون عندهم الحساسية ديه  بتخليهم يعيطو شوية و خلاص   .

 

و البعض ممكن ينعزلو شوية عن المجتمع و تكون دايرة معارفهم اقل .

 

والبعض ممكن تخليهم  اكثر حدة و عنف في التعامل , كحيلة نفسية للدفاع عن الذات .

 

و البعض بيكتم جواه , ومش بيتكلم , وبيضطر يُظهر انه سعيد و فرحان .

 

وانتي بقي من النوع الأخير , واللي ممكن نقول انه أخطر نوع .

 

لأن الحساسية المفرطة ديه , معناها انك بالفعل تشعري بالاهانة و الضيق طوال الوقت , وبتعاني من تأثير ده بشكل مستمر .

 

لكن لما متعرفيش تعملي "تفريغ" للشحنة ديه من الضيق و الغضب و الاهانة , فده هيصنع جواكي مخزون تراكمي من الغضب والحزن المكبوت .

 

و الأنيل بقي لما تضطري انك تظهري بمظهر سعيد و مبتسم و بيضحك , ده بيصنع عندك ضغط نفسي غير طبيعي , من الفارق الكبير بين الشعور الحقيقي , والمظهر المفتعل .

 

و استمرار الوضع ده غير مقبول , لانه هيصنع عندك واحد من الاضطرابات السلوكية الخطيرة , منها "اضطراب  ثنائي القطب" , اللي الناس بتسميه شيزوفرينيا .

 

و انتي قلتي علامة خطيرة لا يمكن السكوت عليها , وهي "الوجع الجسدي" .

 

بعض الاضطرابات النفسية بالفعل بيتم ترجمتها لوجع فسيولوجي (جسدي) , وده مؤشر مش ايجابي علي الاطلاق , كأن عقلك الباطن بيعاني من الألم المستمر اللي جواه , وكمان اضطرار التمثيل , فبيفش غله في جسمك فورا .

 

عارفة مصطلح "سناني قايمة عليا" , لما الواحد يحصله مشكلة  , فسنانه توجعه  ,نفس الفكرة بالظبط .

 

فأحيانا العقل الباطن بيصنع نوع من الألم الجسدي , كنوع من الاعتراض علي المعاناة المستمرة اللي هو شايفها , واللي بيكون اشبه بانذار ان حالته مش كويسة , وان هو رايح لطريق مسدود .

 

 

 

• اولا تعالجي نقطة الحساسية .

 

وهي قابلة للعلاج و التغيير زي اي حاجة تاني .

 

انتي بس محتاجة تعرفي طريقة التعامل معاها ,  وازاي تقلليها و تجعليها بالمقدار المناسب  .

 

و في الرابط ده شرحنا بالتفصيل كل شئ عن الحساسية المفرطة

 

 

 

• تاني حاجة متحطيش علي اعصابك

 

 

 

لازم يكون عندك كمية من البرود , اللي تحطيه علي قلبك مع مواجهة المشاكل , عشان تعرفي تركزي فيها و تحليها  ,او حتي لو فيه مشكلة متتحلش , يبقي عشان تتجاوزيها من غير تعب

 

 

• لازم تفرغي اي شحنة غضب او ضيق جواكي , كتمها في نفسك خطير جدا و اثره مش قليل .

 

 

 

• ذهابك للطبيب النفسي شئ مهم , الوجع اللي في جسمك معناه انك في مرحلة متقدمة من المعاناة النفسية  ,وان الضغوط اللي جواكي اكبر من ان يتم استيعابها بسهولة

 

 

• نقطة الرهبة اللي جواكي من التعامل مع حد .

 

ده كمان شئ سلبي ولازم يتعالج , وهو من اعراض "الحساسية المفرطة" اللي عندك , غالبا هي هتتحل اوتوماتيك اول ما تنفذي الخطوات اللي قلناها فوق , لكن برضه خلي عينك عليها عشان تكون من الحاجات اللي تتابعيها

 

• لازم تكوني اجتماعية  .

 

أحد خطوات حل المشكلة هو الاختلاط بالناس (صديقات محترمات مش اي حد) , لان ده بينسيكي شوية اي تفكير سلبي ييجي في بالك , كمان بيجبرك علي الضحك و الشعور بالفرح بشكل حقيقي  .

 

فحاولي متعتذريش عن اي شئ اجتماعي مع صديقاتك , وده يكون بالتوازي مع الخطوات اللي فاتت ,هتلاقي بالفعل بقي ليها اثر ايجابي في تغيير اللي عندك